Өнөөдөр Шадар сайд бөгөөд ЭМС-ын сайдын үүрэг гүйцэтгэгч Ц.Оюунбаатар Халдварт өвчин судлалын үндэсний төвд ажиллалаа. Тэрээр улаан бурхны тархалтыг хэрхэн зогсоох, эмчилгээг хэр үр дүнтэй байлгах талаар эмч, мэргэжилтнүүдтэй ярилцсан юм. Намжаад байсан Улаан бурхны дэгдэлт өнгөрсөн арваннэгдүгээр сараас эхлэн дахин сэргэж, бага сартай буюу 0-8 сартай, 15-28 насны залуучууд энэ халдвараар өвдөх нь нэмэгдсэн. Иймээс улаан бурхан өвчлөлөөс урьдчилан сэргийлэх вакциныг халдварын голомтод буй иргэд заавал хийлгэх шаардлагатайг Халдварт өвчлөл судлалын үндэсний төвөөс санууллаа.
Улсын хэмжээнд 70 мянган тун вакцин байна. Үүнээс 40 гаруй мянгыг нь орон нутагт буюу аймгуудад тараажээ. Халдварын голомт Улаанбаатар хотод их байгаа аж. Мөн хүн ихээр зорчдог Сэлэнгэ, Дорноговь зэрэг аймгуудад өвчлөл их гарч байгаа гэнэ. Улаан бурхнаар өвдсөн хүний эргэн тойрны хүмүүст халдварын эсрэг вакцин хийж чадвал уг өвчлөлийн халдварыг устгах боломжтойг онцолж байв. Улаан бурхны халдвар дахин дэгдсэн нь хүн амын дархлаа суларсантай холбоотой гэж тайлбарлалаа. Иймээс дархлаа нь суларсан болон өмнө нь огт халдварын эсрэг вакцинд хамрагдаж байгаагүй иргэн бүр улаан бурхны эсрэг тариаг хийлгэх шаардлагатай байгаа аж. Он гарсаар бага насны зургаан хүүхэд улаан бурхны халдвараар өвдөж, өвчнөө дийлэлгүй таалал төгсчээ.
Халдварт өвчин судлалын үндэсний төвд өнөөдрийн байдлаар нийт 323 өвчтөн Улаан бурхнаар өвдлөө гэж тусламж авахаар хандсан байна. Үүнээс 64 өвчтөн нь заавал эмнэлэгт хэвтэн эмчлүүлэх шаардлагатай гэж эмч нар үзжээ. Үлдсэн 259 өвчтөн нь гэрээр эмчлүүлж байгаа гэнэ. Энэ он гарсаар улсын хэмжээнд нийт 11400 гаруй сэжигтэй тохиолдол бүртгэгдэж, үүнээс 22 хувь нь лабораторийн шинжилгээгээр батлагджээ.
-МОНГОЛ ТУУРГАТНЫ ШИЛДЭГ МИСС ЭНЭ САРЫН 27НД ТОДОРНО-
Монголын Үндэсний циркт энэ сарын 26-наас буюу бямба гаригаас эхлэн “Дэлхийн цирк Монголд” циркийн үзүүлбэр тоглогдох билээ. Энэ тоглолтыг манай улсад жил бүр зохион байгуулж байгаа бөгөөд олон улсын авьяаслаг циркчид өөрсдийн үзүүлбэрээ толилуулдаг. Энэ жилийн хувьд гурван одой морь, хоёр арслан, сармагчин, лам гөрөөс зэрэг амьтад оролцохоор ирсэн байна. Эдгээр амьтныг Казахстан улсын нийслэл Астанагийн циркээс авчирсан аж. Түүнчлэн тус тоглолтод АНУ, Англи, Франц, Испани, Бразиль, Бельги, Өмнөд Африк, БНХАУ, ОХУ зэрэг 15 орны 60 гаруй циркчин оролцохоор иржээ. Дашрамд, энэ удаагийн тоглолтын хамгийн сонирхолтой үзүүлбэрүүдийн нэг нь сургуулилалттай арслангууд морь унах аж. Эдгээр арсланг Казахстаны циркчид 10 гаруй жил сургажээ. 
2016 оны 03 дугаар сарын 24-ний өдрийн гадаад валютын дуудлага худалдаагаар банкууд ам.доллар, юань худалдан авах, 4.5 сая юань зарах санал ирүүлжээ. Харин Монголбанк 2050.05 төгрөгийн нэг ханшаар 7.2 сая ам.доллар, 314.55 төгрөгийн хаалтын ханштайгаар 12.0 сая юанийг тус тус нийлүүлсэн байна. 
Хар тамхи, мансууруулах бодис улсын хилээр хууль бусаар нэвтрүүлсэн бүлэг этгээдүүдийг өчигдөр саатуулжээ. 
Сангийн сайд Б.Болор өнөөдөр эдийн засгийн нөхцөл байдлын талаар сэтгүүлчдэд мэдээлэл хийлээ. Энэ үеэрээ “Хан ресурс” компанийн нөхөн төлбөрт өгөх 70 сая ам.долларыг улсын төсвөөс гаргах болсныг мэдэгдэв. Төсвийн орлого төвлөрүүлэлт оны эхний хоёр сарын байдлаар 90 гаруй хувьтай байгаа аж. Мөн Засгийн газар гадаад зах зээлээс жилийн 7.2 хувийн хүүтэй 250 сая ам.доллар зээлсэн билээ. Түүнийгээ өмнөх 16-20 хувийн хүүтэй авсан зээлийг төлөхөд зарцуулах юм байна. 
Мөн Хууль эрх зүйн орчныг сайжруулах чиглэлээр Эрчим хүчний тухай хууль, Сэргээгдэх эрчим хүчний тухай хуульд нэмэлт, өөрчлөлт оруулж, Эрчим хүчний хэмнэлтийн тухай хуулийг батлуулсан. Төрөөс эрчим хүчний талаар баримтлах бодлогыг УИХ-ын тогтоолоор батлуулсан гэж салбарын сайд хэллээ.
“Нүүрс ” хөтөлбөрөөс мөнгө завшсан хэргээр Ерөнхий сайдын ахлах зөвлөхөөр ажиллаж байсан Л.Гансүхэд давж заалдах шатны шүүхээс 3.6 жилийн ял оноогоод байгаа. Үүнтэй холбоотойгоор Ерөнхий сайд асан Н.Алтануягийн зөвлөхөөр ажиллаж байсан М.Хүдэрбаатар сэтгүүлчдэд мэдээлэл хийлээ.
АНУ-ын Ерөнхийлөгч Барак Обама Кубад хийсэн айлчлалынхаа дараа Аргентин улсыг зорьсон билээ. Өчигдөр Аргентиний Ерөнхийлөгч Маурисио Макри АНУ-ын Ерөнхийлөгч Барак Обамаг гэргий Мишелийн хамт хүндэтгэлийн оройн зоогонд урьсан байна. Энэ үеэр нэгэн бүжигчин бүсгүй Америкийн төрийн тэргүүнийг танго бүжгэнд урьсан аж. Обама бага зэрэг эргэлзсэн боловч мэргэжлийн бүжигчний урилгад татгалзаж чадаагүй гэнэ. АНУ-ын тэргүүн хатагтай ч мөн энэ үеэр бүжгийн талбайд гарчээ. Гэвч зоогонд уригдсан зочид Обамаг илүү чадварлаг бүжигчин хэмээн үнэлсэн байна. 
Баянзүрх, Чингэлтэй, Сүхбаатар дүүргийн шүүхээс УИХ-ын гишүүн Х.Баттулгын туслах Г.Түвшинжаргалыг цагдан хорих хугацааг 14 хоногоор сунгах шийдвэр гаргаад байсан. Тэгвэл түүний давж заалдах шатны шүүх хурал өнөөдөр болж үргэлжлүүлэн хорих шийдвэр гаргасан байна. 
