Month: March 2016

Нийслэлийн Мэргэжлийн Хяналтын Газар, Ерөнхий төлөвлөгөөний газартай хамтран Нийслэлийн нутаг дэвсгэрт барилга барихаар нүх ухаж, суурийн ажил хийсэн газруудыг тодруулан хийсэн судалгаа болон зөрчилтэй барилга байгууламжийн талаар өнөөдөр мэдээлэл хийлээ.

Дүүргүүд ухсан нүхний мэдээллийг энэ сарын 18-ны өдөр НМХГ-т ирүүлэхээр тохирсон боловч БГД, БЗД, БНД, ХУД-ээс бусад дүүрэг мэдээлэл ирүүлээгүй байгаа аж. Мөн нийслэлийн нутаг дэвсгэрт өнгөрсөн сарын байдлаар 12 барилга байгууламж эрх бүхий байгууллагаас ажлыг эхлүүлэх, үргэлжлүүлэх зөвшөөрлөө авч, таван барилга байгууламжийг байнгын ажилтанд хүлээлгэн өгч, илэрсэн зөрчлөө арилган нийт зөвшөөрөлгүй барилгын тоо 42 болж 50.6% -аар буурсан байна.

Сар бүр хүүхдэд олгодог 20 мянган төгрөгийг олгохгүй хэмээн нэг хэсэг шуугисан ч эцэстээ хүүхдийн мөнгийг ялгаварлахгүйгээр олгох хууль батлагдсан. Тэгвэл өчигдрөөс эхлэн гуравдугаар сарын хүүхдийн мөнгө эх, хүүхдийн данс руу оржээ. Одоогийн байдлаар Хаан, Голомт, Төрийн банкны данстай хүүхдийн мөнгө ороод байгаа юм.

Энэ оны нэгдүгээр сарын байдлаар Хүүхдийн мөнгийг “Өрхийн мэдээллийн нэгдсэн сан”-д бүртгэлтэй 0-18 насны 999.0 мянга орчим хүүхдэд өгөх юм байна.

Нийслэлээс иргэдэд үзүүлж буй төрийн үйлчилгээнүүдийг нэг дор төвлөрүүлж, зарим үйлчилгээний шийдвэрлэх хугацааг богиносгон, иргэдэд учруулж буй хүндрэл, чирэгдлийг багасгах зорилгоор “Төрийн үйлчилгээний нэгдсэн төв”-ийг “Дүнжингарав” худалдааны төвд байгуулсан.

Өнөөдрийн байдлаар тус төвд сардаа 2000 гаруй иргэн үйлчлүүлдэг гэсэн мэдээ бий. Харин ирэх сард үйлчилгээний төвийн салбаруудыг Мишээл экспо болон Драгон төвд нээхээр бэлтгэл ажил хийгдэж байгаа юм байна. Ирэх сард нээлтээ хийх Мишээл экспо худалдааны төвд нээгдэх үйлчилгээний төвд биржийн үйл ажиллагааг түлхүү явуулахаар төлөвлөжээ. Тухайлбал, Нийслэлээс дэвшүүлж буй зорилтот бүлгийн иргэдэд зориулсан орон сууцны хөтөлбөрүүдээс гадна төлбөрийн чадварт нийцсэн орон сууцны хөтөлбөрүүдийг төвлөрүүлэх аж. Харин Драгон төвийн салбарт биржийн үйл ажиллагааг түлхүү явуулахаар төлөвлөсөн байна. Салбарын байршлаас хамаарч ийнхүү голлон ажиллах салбарыг тодорхойлсон бөгөөд Сонгинохайрхан дүүргийн хувьд орон сууцны гэхээсээ илүүтэй хашааны газар өмчлөлийн асуудал ихтэй гэжээ.

Нарны энергийг боломжтой үед нь түлхүү ашигласнаар цахилгаан эрчим хүчийг хэмнэх зорилгоор манай улс 1983, 1985, 2001 онд Засгийн газрын тогтоолоор гуравдугаар сарын сүүлчийн долоо хоногийн баасан гарагаас есдүгээр сарын сүүлчийн долоо хоногийн баасан гараг хүртэлх хугацаанд Монгол Улсын нутаг дэвсгэрт цагийн тооллыг нэг цагаар урагшлуулж байсан. Энэхүү тогтоол нь 1999 оныг хүртэл 14 жил хэрэгжсэн бөгөөд 1999 онд хүчингүй болж, Засгийн газрын 2001 тогтоолоор дахин зуны цаг тооллыг мөрдөж эхэлсэн байдаг. Гэвч 2005 онд Засгийн газраас уг тогтоолыг дахин хүчингүй болгож байсан юм. Цагийг ингэж урагшлуулснаар байгалийн эрчим хүчийг ашиглах нь эрчим хүч хэмнэх, тариа ногоо тарих болон хувийн аж ахуй эрхлэх, үйлчилгээний байгууллагад үйлчлүүлэгчдийн тоо өсөх зэрэг эерэг боломжийг олгодог байна.

Иймээс 2015 оны гуравдугаар сарын 9-ний өдрийн Засгийн газрын хуралдаанаас орон даяар зуны тоололд шилжих шийдвэрийг гаргасан. Энэ жил гуравдугаар сарын 25-26-нд шилжих шөнө буюу өнөө шөнө зуны цагийн хуваарьт шилжих юм.Та цагаа 02.00-ээс 03.00 дээр тааруулна. Зуны цагийн хуваарь есдүгээр сарын 30-ны өдрийг хүртэл үргэлжилнэ. Цаг урагшлуулснаар ажил, үйлчилгээ эхлэх цагийн хуваарийг хэвээр мөрдөж байхыг тогтоолд тусгажээ.

Дэлхийн улс орнуудад эдийн засгийн хэмнэлтийн талаарх олон судалгаа байдаг бол, манай улсад 1998 онд хийсэн судалгаагаар зуны цагийн тоололд шилжих 4-9 дүгээр сарын хооронд байгалийн гэрэлтэй цагийг илүү ашигласнаар жилд дунджаар 23 орчим сая квт.цаг цахилгаан эрчим хүч хэмнэгддэг болохыг тогтоосон юм байна.