НӨАТ-ын урамшууллын “ebarimt” сугалааны долоо дахь тохирлоор азтан болсон иргэдийг хүлээн авч, тохирлыг батламжлан, азтануудад эрхийн бичиг гардуулах арга хэмжээ Гааль татварын ерөнхий газрын мэдээллийн технологийн төв улсын төсөвт үйлдвэрийн газарт боллоо.
Долоо дахь удаагийн тохирлоор 21 хүн дөрвөн сая, нэг хүн 20 сая, нэг хүн супер азтан болж 400 сая төгрөгийн азтан болжээ. Сугалаанаас дөрвөн сая төгрөг хожсон дөрвөн азтан өнөөдөр ирж, тохирлоо батламжлуулан, эрхийн бичиг гардаж авсан юм.
Харин дөрвөн сая төгрөг хожсон долоон азтан болон 20 сая, 400 саяыг хожсон хүмүүс сугалааны баримтаа “ebarimt.mn”-д бүртгүүлээгүй байгаа аж. Амгалан дахь Оргил худалдааны төвөөс нэгдүгээр сарын 27-ны өдөр худалдан авалт хийж, 400 сая төгрөгийн азтан болсон иргэнийг НӨАТ-ын журмын дагуу баримтаа баталгаажуулахыг гурван сар хүлээх гэнэ. Энэ хугацаанд баримтаа баталгаажуулахгүй бол 400 сая төгрөгийг улсын орлого болгох аж.
2016 оны зуны олимп болоход хэдхэн сар үлдээд байна. Манай улсаас Бразилийн Рио-де-Жанейро хотод болох XXXI наадамд оролцох эрхээ 14 тамирчин аваад байгаа тухай мэдээллийг холбогдох албаныхан өгч байгаа юм. Тэгвэл олимпод оролцох эрхтэй тамирчдын тав нь Зэвсэгт хүчний “Алдар” спорт хорооны тамирчид юм. Тухайлбал, Монгол Улсын Хөдөлмөрийн баатар, гавьяат тамирчин, дэд хурандаа О.Гүндэгмаа буудлагаар, гавьяат тамирчин Г.Мандахнаран, ОУХМ О.Үйтүмэн, ОУХМ П.Орхон нар чөлөөт бөхөөр, марафон гүйлтээр ОУХМ Б.Мөнхзаяа нар олимпод оролцох эрхээ аваад байна. Цаашдаа энэ тоогоо нэмэгдүүлэхээр хичээн ажиллаж байгаагаа “Алдар” спорт хорооны удирдлагууд онцолж байгаа юм. Энэ жил Зэвсэгт хүчний “Алдар” спорт хорооны түүхт 70 жилийн ой тохиож байгаа билээ.
АТГ-ын Мөрдөн Шалгах хэлстийн дарга Э.Амарбат Улсын прокурорын ерөнхий газрын Дотоод аюулгүй байдлын хэлтсийн даргаар томилогджээ. Тэрбээр өчигдрөөс шинэ ажилдаа орсон байна.
Төвийн бүсийн хурдан морины “Цэцээ гүний хурд-2016” уралдаан маргааш Төв аймгийн Баянцогт суманд болно. Харин нөгөөдөр буюу энэ сарын 27-нд Сүхбаатар аймгийн Сүхбаатар болон Наран суманд тус аймгийн хаврын бүсийн уралдаан зохион байгуулагдана.
Өнөөдөр өглөө Сүхбаатар дүүргийн 19-р хороо, Шарга морьтод хүн рүү чоно дайрсан гэх мэдээлэл цагдаагийн байгууллагад ирсэн байна. Мэдээллийн дагуу шалгахад 30-40 насны хоёр хүн чононд хазуулсан байсан бөгөөд уруулсан хүмүүсийг ГССҮТ-д яаралтай хүргэжээ.
Гүржийн нийслэл Тбилис хотноо олон улсын жүдо бөхийн холбоо буюу IJF-ийн олимпийн эрхийн оноо олгох Гран При тэмцээн энэ сарын 25-27-ны өдрүүдэд болох гэж байна. Тус тэмцээнд манай улсаас эрэгтэй 6, эмэгтэй 4, нийт 10 бөх хүч үзэхээр боллоо.
ЕБС-ийн III улирлын амралт ирэх мягмар гараг буюу энэ сарын 29-наас эхлэнэ. Бага, дунд, ахлах ангийн сурагчид долоо хоног амарч, ирэх сарын 4-нд хичээлдээ орох юм. Харин хөдөө, орон нутгийн сургуулиудын улирлын амралтыг мал төллөх үеэр эцэг эхдээ туслах, уламжлалт ахуй, соёлоо өвлөх боломжийг нь бүрдүүлж өгөх үүднээс өөрчилсөн.
Энэ сарын 14-20-ны хооронд улсын хэмжээнд томуу, томуу төст өвчний амбулаторийн үзлэгт 191.314 хүн хамрагдсаны 14.012 хүн буюу 7.3 хувь нь томуу, томуу төст өвчтэй гэж оношлогджээ.