Month: March 2016

Хүнс хөдөө аж ахуйн яамнаас өнөөдөр хаврын тариалалтын бэлтгэл ажилтай холбогдуулан хийж буй ажлынхаа талаар мэдээлэл хийлээ.

Мэдээллийн үеэр Газар тариалангийн бодлогын хэрэгжилтийг зохицуулах газрын дарга Ц.Болорчулуун “Хүнс хөдөө аж ахуйн яамнаас 2016 оны хаврын тариалалтад нийт 322.9 мянган га газарт үр тариа тариалахаар төлөвлөсөн. Үүнээс 301.5 мянган га-д улаан буудай, 20.8 мянган га-д төмс, хүнсний ногоо, 16.3 мянган га-д тэжээлийн таримал, 25.3 мянган га-д тосны болон сэлгээний бусад таримал тариална. Өнгөрсөн жил гантай байсны улмаас хаврын тариалалтад үрийн буудай дутагдах тооцоо гарсан. Тиймээс импортоор орж ирэх үрийн улаан буудайг гаалийн болон нэмэгдсэн өртгийн албан татвараас чөлөөлсөн. Мөн шинэ техник тоног төхөөрөмж, бордоо, ургамал хамгааллын бодис, усалгааны тоног төхөөрөмжийг нэмэгдсэн өртгийн албан татвараас чөлөөлсөн” гэлээ.

Мөн дутагдах буудайн үрийн нөөц бүрдүүлэх зорилгоор тариалан эрхлэгч 16 аж ахуйн нэгжид 15, ТЭДС-тай дамжуулан зээлдүүлэх гэрээ байгуулсан аж ахуйн нэгжид дөрөв, нийтдээ 20 орчим мянган тонн үрийн буудай импортлох зөвшөөрөл олгосон.

Нийслэлийн удирдлагын зөвлөлийн ээлжит хуралдаан болж, “Нийтийн тээврийг хөгжүүлэх хөрөнгө оруулалтын хөтөлбөр” BRT төслийн өнөөгийн явц, цаашид авах арга хэмжээний талаар танилцууллаа.

Нийтийн тээврийг хөгжүүлэх хөрөнгө оруулалтын хөтөлбөр төслийг 2015 оны тавдугаар сард Монгол Улсын Их Хурлаар соёрхон батлагдсанаас хойш өнөөдрийн хүртэл хэд хэдэн үе шаттай ажил хэрэгжүүлээд байгаа аж. Үүнээс гол мэдээллийг хүргэе.

• Дамжуулан зээлдэх гэрээг 2015 оны арваннэгдүгээр сард байгуулж зээлийн эргэн төлөлтийн хуваарийг Сангийн яамтай тохирсон.
• Нийслэлийн төсөвт таван тэрбум төгрөгийг суулгасан
• Төслийн нэгжийн ажилтнуудыг сонгон шалгаруулах ажлыг хоёр албан тушаал дээр зохион байгуулж зохих журмын дагуу Сангийн яаманд хүргүүлсэн. АХБ-ны зөвшөөрсний үндсэн дээр томилох ажлыг зохион байгуулна.
• Нийтийн тээврийн Төр-Хувийн хэвшлийн түншлэлийг сайжруулах төсөл мөн 11 дүгээр сараас эхлэн ажиллаж байна.
• Нийслэлийн Засаг даргын захирамжаар Техникийн ажлын хэсэг байгуулан ажиллаж байна.

Цаашид нэгдүгээр үе шатанд төсөл хэрэгжүүлэх коридорыг дөрөвдүгээр сардаа багтаж сонгох, төслийн зохицуулагчийг АХБ-тай зөвшилцөн тохилох, нарийвчилсан зураг төслийг боловсруулах олон улсын тендерийг зарлах, нийтийн тээврийн ухаалаг системийг BRT-тай уялдуулах төсөл, замын аюулгүй байдлыг хангах техникийн таслалцааны хоёр төслийг хэрэгжүүлж эхлэх ажлыг зохион байгуулна.

Ойрын өдрүүдэд ихэнх
нутгаар дулаарч байгаа тул цас, голын мөс эрчимтэй хайлж байгаа учраас усны
түвшин нэмэгдэж, ус эргээсээ хальж голын эрэг усанд автаж болзошгүй. Иймд ард
иргэд шар усны үер болон мөс цөмрөх аюулаас сэрэмжтэй байхыг Ус, цаг уур, орчны
шинжилгээний хүрээлэнгээс онцгойлон анхаарууллаа.

Энэ сарын 26-нд баруун зүгийн
нутгийн хойд хэсгээр, 27-нд төв, зүүн зүгийн нутаг, говийн нутгийн хойд
хэсгээр, 28-нд нутгийн зүүн өмнөд хэсгээр хур тунадас, нойтон цас орно. Салхи
26-нд секундэд 12-14 метр, 27-нд говь, талын нутгаар секундэд түр зуур 16-18 метр
хүрч, шороон болон цасан шуурга шуурна. Увс, Хөвсгөл, Завхан Архангай,
Өвөрхангай зэрэг аймгийн нутгуудаар шөнөдөө 8-13 градус хүйтэн, өдөртөө 2
градус дулаанаас 3 градус хүйтэн, Хэнтийн уулархаг нутаг, Тэрэлж, Хэрлэн, Халх
голын сав газраар шөнөдөө 5-10 градус хүйтэн, өдөртөө 3-8 градус дулаан, говийн
бүс нутгийн өмнөд хэсгээр шөнөдөө 0-5 градус, өдөртөө 13-18 градус дулаан,
бусад нутгаар шөнөдөө 1-6 градус хүйтэн, өдөртөө 8-13 градус дулаан байна.
27-нд нутгийн хойд хэсгээр бага зэрэг сэрүүсэх төлөвтэй байна.

Энэ сарын эхээр дунд сургуулийн сурагч охин амиа хорлохыг завдаж, онцгой байдлын албан хаагчид охины үйлдлийг таслан зогсоосон билээ.

Тэгвэл өнөөдөр өглөө 06.45 цагт Баянгол дүүргийн нэгдүгээр хороонд байрлах 12 давхар байрны тагтан дээрээс нэгэн иргэн үсрэхээр завдсан хэрэг гарчээ. Энэ талаар албаныхан “Согтуу иргэн цонхоороо үсрэх гээд байна гэх дуудлага өглөөний 07.00 цагийн орчимд Нийслэлийн Онцгой байдлын албанд ирсэн. Ингээд мэдээллийн дагуу аврах ангийн алба хаагчид шуурхай очиж, тухайн иргэнийг аюулгүй болгосон” гэж мэдээлсэн байна.

Байран дээрээс үсрэхийг завдсан иргэн гэрийнхэнтэйгээ муудалцсан үедээ амиа хорлоно хэмээн сүрдүүлжээ.

“Жолоочийн бүртгэлийн оноо тооцох журам”, Жолоочийн эрхийн үнэмлэхний дахин олголт, камерын хяналтаар торгууль оногдуулах болон замын нөхцөл байдлын талаар Цагдаагийн ерөнхий газар, Замын цагдаагийн газраас өнөөдөр сэтгүүлчдэд мэдээлэл хийлээ.

Өнөөдрийн байдлаар 15220 жолооч бүртгэлийн 10 оноогоо хасуулаад байгаа юм. Үүнээс 10 мянга гаруй нь нийслэлийн жолооч нар ажээ. Оноогоо хасуулсан жолооч нарын 12 мянга гаруй нь хамгаалалтын бүсээ хэрэглээгүй гэсэн үндэслэлээр оноогоо хасуулсан байна. Хэрвээ жолооч зам тээврийн осол гаргасан тохиолдолд таван оноо хасах юм. Харин хасуулсан оноогоо сэргээхийн тулд Лицензийн төвд хандах ёстой. Улмаар хоёр цагийн сургалтад сууж, шалгалт өгөн оноогоо сэргээх боломжтой юм байна. Өнөөдрийн байдлаар уг сургалтад хамрагдсан жолооч байхгүй, согтуугаар тээврийн хэрэгсэл жолоодож яваад жолооны эрхээ хасуулсан жолооч нар сургалтад сууж эрхээ сэргээлгэж байна гэдгийг Лицензийн төвийн дэд дарга П.Эрдэнэбат хэллээ.