Month: December 2015

Монгол Улсаас Оросын Холбооны Улсад суух Онц бөгөөд Бүрэн эрхэт Элчин сайдаар Б.Дэлгэрмааг томилохыг гишүүд дэмжжээ.

Өчигдрийн Засгийн газрын ээлжит хуралдаанаар уг асуудлыг шийдэж, Монгол Улсын Ерөнхийлөгчид өргөн мэдүүлэхээр болжээ.

Ингэхдээ Монгол Улсын Засгийн газрын тухай хуулийн 15 дугаар зүйлийн 15.4-т заасныг үндэслэн Монгол Улсаас Оросын Холбооны Улсад суугаа Онц бөгөөд Бүрэн эрхэт Элчин сайд Ш.Алтангэрэлийг эгүүлэн татаж, ийнхүү Б.Дэлгэрмааг томилуулах саналыг хүргүүлсэн байна.

Улсын Дээд Шүүхэд бүртгэлтэй улс төрийн намуудаас 12 нь УИХ-ын даргад хоёр хоногийн хугацаатай шаардлага хүргүүлж байгаагаа мэдэгдлээ. Тус намууд УИХ-аар сонгуулийн хуулиудыг яаралтай хэлэлцэн батлахыг шаардаж буй аж.

Энэ талаар МАН-ын ерөнхий нарийн бичгийн дарга Ж.Мөнхбат “Улс төрийн намууд УИХ-ын сонгуулийн тухай хуулийг өөрчлөхөөр найман зүйл заалттай хуулийн төслийг УИХ-ын гишүүн Су.Батболд нарын гишүүдээр дамжуулан өргөн бариулсан.

УИХ дахь Ардчилсан нам бүлэг өчигдрийн хуралдааныхаа дараа сэтгүүлчдэд мэдээлэл хийх үеэрээ Сонгуулийн хуулийг хэлэлцэх шаардлагагүй, түүнээс урьтаад Улс төрийн намын тухай хуулийн төслийг хэлэлцэх ёстой гэсэн байр суурийг илэрхийлсэн байна. Иргэний танхимд Улс төрийн намын тухай хуулийн төслийг хэлэлцэхэд улс төрийн намууд дэмжих боломжгүй байгаагаа илэрхийлсэн.

Гэтэл яагаад өнөөдөр дэмжихгүй байгаа хуулийг хэлэлцье гээд, дэмжээд байгаа хуулийн төслийг хэлэлцэхгүй гээд хойш суугаад байна вэ. С.Батболд нарын өргөн мэдүүлсэн хуулийн төслийг парламентад суудалтай 5 намын төлөөллөөс дөрөв нь, парламентад суудалгүй намуудын 20 нь дэмжиж байгаа. Иймд УИХ-ын даргад хоёр хоногийн хугацаатай шаардлага хүргүүлж байна” гэв.

Мөн тэрээр “Сонгуулийн саналын хуудсыг хар машинаар тоолоход 30 тэрбум төгрөг. Гараар тоолоход ямар ч мөнгө гарахгүй. Ерөнхийлөгчийн санаачлаад байгаа шиг 2016 сонгуулийн үйл ажиллагаа явц шилэн байх ёстой” гэж хэллээ.

УИХ дахь МАН-ын бүлгийн өчигдрийн хуралдаанаар хэлэлцсэн асуудлаар тус бүлгийн дарга С.Бямбацогт, УИХ-ын гишүүн Ч.Хүрэлбаатар, бүлгийн дэд дарга Д.Хаянхярваа нар мэдээлэл хийлээ.

МАН-ын бүлгийн хуралдаанаар Сонгуулийн тухай хуулинд өөрчлөлт оруулах асуудлыг хэлэлцсэн байна. Бүлгийн дарга С.Бямбацогт”Хуулинд өөрчлөлт оруулахад бидэнд 20 орчим хоногийн хугацаа л үлдэж байна. Энэ хугацаанд Сонгуулийн хуулинд зайлшгүй гэх өөрчлөлтийг хийж чадвал ард түмний итгэлийг хүлээсэн хямралаас гаргах ард түмний амьдрал доройтож байгааг засах парламентийг бүрдүүлж чадах болно. Иймээс МАН-ын зүгээс сонгуулийн хуулинд онцгой ач холбогдол өгч байна. Сонгуулийн хуулийг хэлэлцэх эсэхийг шийдээд арав гаруй хоног өнгөрч байна. Харамсалтай нь цааш ахиц гарах эсэх нь тодорхойгүй байна” гэв.

Мөн тус бүлгийн гишүүдийн саналаар дараах гол асуудлуудыг Сонгуулийн тухай хуулинд тусгаж өгөх асуудалд санал нэгдсэн байна.

Тухайлбал, Сонгуулийн саналыг хар машинаас гадна гар тооллогыг давхар хийж баталгаажуулах ёстой. Хар машины баталгаат байдлыг хөндлөнгийн байгууллагаар урьдчилсан байдлаар баталгаажуулах асуудлыг Сонгуулийн хуулинд тусгах ёстой.

-Намыг бус хүнийг сонгодог тогтолцоог дэмжинэ гэж шийдсэн. УИХ-ын гишүүнийг иргэд нь тэмтэрч мэдэрч байж сонгодог болох хэрэгтэй. Намын нэрээр хэн ч мэдэгдэхгүй нөхөр сонгогдож ард нийтийн эрх ашгийг уландаа гишгэдэг асуудал байгаа.

-УИХ гишүүнээр сонгогдсон хүн нам эвслээс гарвал УИХ-ын гишүүний суудлаас эргүүлэн татдаг болох ёстой. Намын нэрээр гишүүн болсон атлаа аль нэг нам эвсэлд урвадаг, шаравдаг байж болохгүй гэж үзсэн.

-Сонгуулийн зөрчил маргааныг хурдан хугацаанд шийдвэрлэх хэрэгтэй. Мөн асуудал үүсгэсэн хүмүүст оноох хариуцлагыг чангатгах хэрэгтэй гэж үзсэн. 2012 оны сонгуулийн маргаан одоог хүртэл шийдэгдээгүй байна. Тухайлбал, Говьсүмбэр, Говь-Алтай, Дархан-Уул, Хөвсгөл зэрэг аймгуудын сонгуулийн маргаан одоог хүртэл үргэлжилж байна.

-СЕХ-г татан буулгаж оронд нь комисс байгуулна гэж байгааг эсэргүүцэж байна.

-Саналын хуудсанд нам эвслээс дэвшиж байгаа гишүүдийг бичихдээ Улсын дээд шүүхэд бүртгүүлсэн дарааллаар бичиж байх шаардлагатай гэж үзсэн гэв.

Засгийн газрын ээлжит хуралдаанаар хэлэлцсэн асуудлын талаар Ерөнхий сайдын зөвлөх Ц.Мөнхтөр мэдээлэл хийлээ. Тэрбээр “Засгийн газрын хуралдаанд Сангийн сайд Б.Болор Эдийн засгийн ил тод байдлыг дэмжих тухай хуулийн хэрэгжилтийн явцын талаар танилцуулга хийлээ. 2015 оны наймдугаар сарын 7-нд Эдийн засгийн ил тод байдлыг дэмжих тухай хууль батлагдсан. Энэ хуулийг хэрэгжүүлэх журмыг Засгийн газар наймдугаар сарын 31-ны өдрийн хуралдааны 348 дугаар тогтоолоор баталсан юм.

Иргэдийн болон хуулийн этгээдийн нуун дарагдуулсан хөрөнгө орлого, үйл ажиллагааг ил тод болгох байдлыг дэмжих зорилготой. Тодорхой хэмжээгээр орлого, хөрөнгөө нуун дарагдуулснаа тайлагнасан нөхцөлд захиргааны болон хуулийн оногдох арга хэмжээ, татвараас чөлөөлөх юм. Дээрээс нь далд эдийн засгийг ил болгох үүднээс энэ хуулийг санаачилсан. Энэ хуулийг хэрэгжүүлэх зорилгоор Сангийн яамнааас шат дараатай арга хэмжээ авсан байна. Хуулийг хэрэгжүүлэх бэлтгэл ажлыг хангаж, арга зүйн зөвлөгөө өгч, олон нийтэд сурталчилжээ. Энэ хугацаанд нийтдээ 5600 гаруй хүмүүс тайланг ирүүлснийг Сангийн яам хүлээн авчээ. Бэлтгэл ажлын хүрээнд иргэдийн мэдүүлэх мэдүүлгийн маягтыг бэлэн болгож, Монголын татварын алба.мн сайт ажиллуулсан. Иргэдэд хуулийн зөвлөгөө өгөх, сурталчлан танилуулах сургалт зохион байгуулах ажлыг удаа дараа явуулсан байна” гэлээ.

Сангийн яаманд аж ахуйн нэгжүүд төвлөрч байгаа бөгөөд нийтдээ 860 гаруй тэрбум төгрөгийн хөрөнгө орлого, үйл ажиллагаа ил болжээ. Харин ТЕГ-т нийт 3.5 их наяд төгрөгийн хөрөнгө орлогын үйл ажиллагаа ил болсон аж.

Эдийн засгийн ил тод байдлыг дэмжих тухай хуулийн үйлчлэх хугацаа энэ оны 12 дугаар сарын 31-нд дуусна. Хууль үйлчлэх хугацааны сүүлийн хоногуудад иргэд хөрөнгөө мэдүүлэх гэж яарч байгаа. Сангийн яам, ТЕГ-ын мэдээлж байгаагаар сүүлийн 21 хоногт хөрөнгөө мэдүүлэх иргэдийн тоо нэмээд өсч, хөрөнгө орлого ил болох үйл ажиллагаа нийт таван их наяд төгрөгт хүрэх болов уу гэсэн тооцоотой байгаа юм байна.

Өчигдрийн Засгийн газрын хуралдаанаар дээрх мэдээлэл танилцуулгатай холбогдуулан шийдвэр гаргасан байна.

“2015 оны дөрөвдүгээр сарын нэгнээс өмнө орлогоо болон үйл ажиллагаа нуун дарагдуулсан нөхцөлд ил болгож, мэдүүлэгчийн энэ оны II, III, IV улирлын тайлан Эдийн засгийн ил тод байдлыг дэмжих хуульд хамаарагдах учраас ямар нэг хариуцлага хүлээлгэхгүй хууль мөрдөж ажиллахыг холбогдох байгууллагад даалгалаа.

2015 оны дөрөвдүгээр сарын нэгнээс өмнө нуун дарагдуулсан хөрөнгөө хэрхэн бүртгүүлэх тал дээр УБЕГ-т үүрэг өгсөн. Энэ нь нотиаратийн баталгаажуулсан бичиг баримтаар бүрдүүлнэ. Эдийн засгийн ил тод байдлын хууль хэрэгжих цөөн хугацаа үлдэж байна. Үүнд иргэд, олон нийтийг өргөнөөр хамрагдан оролцохыг, Сангийн яам, ТЕГ, УБЕГ-ын зүгээс ард иргэдэд хандаж суртал ухуулгаа сайн хийхийг Засгийн газрын зүгээс даалгасан шийдвэрийг гаргасан байна.

УИХ-ын Аюулгүй байдал, гадаад бодлогын байнгын хорооны тогтоолоор эдийн засгийн чадавхийг бэхжүүлэх зорилгоор Монгол Улсын Эдийн засгийн гадаад харилцааны хөтөлбөрийг боловсруулах шаардлагатай гэж үзэн Засгийн газарт чиглэл өгсөн байна.

Гадаад хэргийн сайдын тушаалаар хөтөлбөрийн төсөл боловсруулах ажлын хэсгийг төр, хувийн хэвшил, судалгааны байгууллагын төлөөллийг оролцуулан байгуулж, төслийг боловсруулжээ. Хөтөлбөрийн төсөлд гадаад зах зээлд нэвтрэх боломжийг нэмэгдүүлэх, шинээр зах зээл нээх, үндэсний аж ахуйн нэгжүүдийн экспортод чиглэсэн бизнесийн үйл ажиллагааг дэмжих, байгальд ээлтэй дэвшилтэт технологи нэвтрүүлж, аж ахуйн нэгжийн өрсөлдөх чадварыг сайжруулах, гадаадын хөрөнгө оруулалтыг татахад чиглэсэн үйл ажиллагааг зорилт болгон тусгасан байна.

Хөтөлбөр болон арга хэмжээний төлөвлөгөөг хэрэгжүүлэх ажлыг нэгдсэн удирдлага, зохицуулалтаар хангаж ажиллахыг Гадаад хэргийн сайд Л.Пүрэвсүрэн, уг хөтөлбөр, төлөвлөгөөнд тусгасан холбогдох арга хэмжээг хэрэгжүүлэх чиглэлээр ажиллахыг Засгийн газрын гишүүдэд үүрэг болгожээ.