Month: December 2015

Шумуулаар дамжин халдварладаг денге хэмээх халуун хумхаа өвчний эсрэг анхны вакцины зөвшөөрлийг Мексикт авчээ. Денгваксиа /Dengvaxia/ нэртэй вакциныг гаргаж авахаар эрдэмтэд сүүлийн 20 жилийн турш ажилласан байна. Өдгөө тус вакциныг Латин Америк, Азийн 19 оронд зөвшөөрүүлэхээр ажиллаж байгаа аж. Вакциныг Парист төвтэй Санофи /Sanofi/ группын эрдэмтэд бүтээжээ. Денгваксиа нь денге өвчнийг үүсгэгч дөрвөн төрлийн вирусийн эсрэг үр дүнтэй тарилга болсон аж. Вакцин гарган авах ажилд нийтдээ 1.5 тэрбум еврог зарлагджээ.

Уг халдварт өвчин нь дэлхийн хүн амын тал хувьд аюул заналхийлдэг гэж үздэг байна. Денге өвчний халдвар шумуулын хазалтаар дамждаг тул Ази, Латин Америк, Африкийн олон оронд тархах өндөр эрсдэлтэй аж. Тухайлбал, Хавайд өдгөө денге өвчний 139 тохиолдол бүртгэгдээд байгаа гэнэ.

Денге өвчний халдвар хүнд ханиадтай төстэй шинж тэмдгээр илэрдэг боловч үхэлд хүргэх эрсдэлтэй байдаг аж. Жил бүр дэлхий дахинаа 390 сая хүн денге өвчнөөр өвдөж, нэг гаруй хувь нь нас бардаг гэсэн судалгаа гарчээ.

2015 оны 11 дүгээр сарын 24-ний өдрийн 17:30 цагт Булган аймгийн Баян-Агт сумын харьяат иргэн Б.Цогтмагнай 38-99 БУА улсын дугаартай ЗИЛ-130 загварын автомашинаар хөлдөж гүйцээгүй нуурын мөсөн дээгүүр зорчиж яваад живсэн тухай дуудлагаар тус аймгийн Онцгой байдлын газрын Эрэн хайх, аврах салбарын дарга ахлах дэслэгч Ж.Лхагважаргалын ахалсан 9 албан хаагч 11 дүгээр сарын 25-ны өдрөөс 12 дугаар сарын 04-ний өдөр хүртэл 10 хоног ажиллаж автомашиныг нуурын гүнээс гаргаж эзэнд нь хүлээлгэж өгөв.

“Да хүрээ трейд” компанийн менежер, түрээслэгчид болон хуулийн зөвлөх Ц. Монгол нар өнөөдөр мэдээлэл хийлээ. “Да хүрээ трейд” компанийн менежер Ж.Чимэдцэрэн “Да Хүрээ Трейд компани 1996 оны хоёрдугаар сарын 13-ны өдөр авто машины худалдааны “Да хүрээ” захыг Засгийн газрын тогтоол, Өмч хувьчлах комиссын шийдвэрийн дагуу нээлттэй дуудлага худалдаагаар хувьчилж авсан. Ингэхдээ төрийн эрх бүхий байгууллагатай байгуулсан гэрээгээр зөвхөн зориулалтаар ашиглах хатуу үүргийг хүлээсэн. Тиймээс өмчлөх эрхийн гэрчилгээ, үйл ажиллагаа явуулах зөвшөөрлийн хүрээнд үйл ажиллагаагаа хуулийн дагуу одоо хүртэл явуулж байгаа. Гэвч 2013 оноос эхлэн албан тушаалтнуудын хууль бус үйл ажиллагааны улмаас ихээхэн дарамт шахалтад өртөж, Үндсэн хууль, бусад хуулиар олгогдсон эрх, хууль ёсны эрх ашиг сонирхол нь ноцтой зөрчигдсөөр байна” гэсэн юм.

Өмгөөлөгч Ц.Монгол “Автомашин, авто техникийн сэлбэг хэрэгсэл худалдаалж байгаа иргэд, хуулийн этгээдийн эрх, хууль ёсны эрх ашиг сонирхлыг албан тушаалтнууд бүдүүлгээр зөрчиж байна. Үндсэн хуулийн 16 дугаар зүйлийн 16.3 -д “Хөдлөх, үл хөдлөх хөрөнгө шударгаар олж авах, эзэмших, өмчлөх, өв залгамжлуулах эрхтэй. Хувийн өмчийг хууль бусаар хураах, дайчлан авахыг хориглоно. Төр, түүний эрх бүхий байгууллага нь нийгмийн зайлшгүй хэрэгцээг үндэслэн хувийн өмчийн эд хөрөнгийг дайчлан авбал нөхөх олговор, үнийг төлнө” гэж заасан. Үүнийг хэнч зөрчих эрхгүй. Гэтэл Нийслэлийн эрх бүхий зарим албан тушаалтан Нийслэлийн ИТХурлын Тэргүүлэгчдийн Тогтоол, Засаг даргын Захирамжийг хуулийн дагуу хэрэгжүүлэхийн оронд уг эрх зүйн баримт бичгүүдийн утга санааг мушгин гуйвуулж муйхарлан захиргаадалтын аргаар, арга заль, хүч хэрэглэх замаар өөрсдийн ашиг сонирхолд нийцүүлэн Автомашин, автотехникийн сэлбэг хэрэгсэл худалдаалж байгаа олон мянган иргэд, хуулийн этгээд, компанийн хуулиар олгогдсон эрхийг зөрчиж байна. 20 жил нэг газраа байрлаад ажилчихсан худалдаачдыг нүүлгэх гэж байгаа бол нөхөн олговор олгож, авто худалдааны цогцолбортоо үнэгүй зогсоол гаргаж өгөх ёстой” гэсэн юм.

Олон улсын хүний эрхийн өдөр, Ардчилсан хувьсгалын 25 жилийн ойг тохиолдуулан Төр, нийгмийн нэрт зүтгэлтэн Ж.Батмөнхийн хөшөөнд өнөөдөр цэцэг өргөж хүндэтгэл үзүүллээ.

МАН-ын Ерөнхий нарийн бичгийн дарга Ж.Мөнхбат “Одоогоос 25 жилийн өмнө Монгол Улс ардчилсан орон болох, иргэн нь эрх чөлөөтэй, ардчилсан улсын иргэн болох түүхэн үйл явц тохиосон. Энэ түүхэн үйл явцад гавьяа байгуулсан хүний нэг бол тухайн үедээ Монголын төрийг удирдаж байсан МАН-ын дарга Жамбын Батмөнх гуай байдаг. Жил бүхэн Ардчиллын өдрөөр энэ хүний түүхэн гавьяаг бид бүхэн төрөл төрөгсөд, Монголын ард түмэн хамтдаа хүндэтгэж хөшөөнд нь цэцэг өргөдөг уламжлалтай. Дэлхийд цорын ганцханд тооцогдох улстөрийн хоригдолгүй, буун дуугүй, улстөрийн хэлмэгдүүлэлтгүй, хүний амь насны гарзгүй тайван замын хувьсгал хийхэд түүхэн үүрэг гүйцэтгэсэн гавъяаг нь бид үеийн үед санаж дурсаж явах учиртай” гэв.

ЕБС-ийн бага ангийн сурагчдын хоёрдугаар улирлын амралт энэ сарын 22-ноос эхэлнэ. Хотын 1-5 дугаар ангийн сурагчид энэ сарын 22-ноос ирэх сарын 25-ныг хүртэл таван 7 хоног, 6-9 дүгээр ангийн сурагчид нэгдүгээр сарын 5-25 хүртэл гурван 7 хоног, 10-12 дугаар ангийн сурагчид нэгдүгээр сарын 12-25 хүртэл хоёр 7 хоног амарч ирэх 26-наас гуравдугаар улирлын хичээл эхлэх юм. Орон нутгийн 1-5 дугаар ангийн сурагчид ирэх сарын 12-ноос хоёрдугаар сарын 01 хүртэл гурван 7 хоног, 6-9 дүгээр ангийн сурагчид ирэх сарын 12-ноос 25 хүртэл хоёр 7 хоног, 10-12 дугаар ангийн сурагчид ирэх сарын12-18 хүртэл нэг 7 хоног амрах юм.БСШУЯ-ны сайдын 2015 оны 445 дугаар тушаалаар сурагчдын амралтын хуваарийг гаргахдаа хот, хөдөөд ялгаатай байхаар зохицуулжээ. Орон нутгийн хүүхдүүд гуравдугаар улирлын амралтаар буюу мал төллөх цагаар урт хугацаагаар амрахаар зохицуулсан учраас өвөл богино хугацаагаар, хотод ханиадны ид дэгдэлтийн үеэр бага насны хүүхдүүдийг аль болох гэрт нь байлгах зорилгоор хоёрдугаар улирлын амралтыг урт хугацаатай байхаар зохицуулсан байна.

УИХ-ын Сонгуулийн тухай хуульд өөрчлөлт оруулахыг шаардаж улс төрийн 21 нам Тусгаар тогтнолын талбайд нэгдсэн жагслаа. Жагсагчид “Хар машины луйваргүй шударга сонгуулийн төлөө” уриан дор жагссан бөгөөд сонгуулийн саналыг гараар давхар тоолохыг уриалсан лоозон барьсан байна.

Шинэ он гарахаас урьтаж, УИХ Сонгуулийн тухай хуульд өөрчлөлт оруулж чадахгүй бол ирэх оны УИХ-ын сонгуулийг 2011 онд батлагдсан хуулиар зохион байгуулах юм. Үүнийг дээрх намууд эсэргүүцэж байгаа бөгөөд автомат машинаар саналын хуудсыг тоолсон нөхцөлд гараар давхар тоолж, камераар бичин баталгаажуулах ёстой. Ингэж байж өнгөрсөн хугацаанд гарсан эргэлзээг тайлна гэсэн байр суурьтай байна.

Жагсагчид сонгуулийн санал тоолох хар хайрцагийг Тусгаар тогтнолын талбайд шатаасан юм. Тэд өөрсдийн тавьж буй шаардлагатай УИХ болон Ерөнхийлөгч, Ерөнхий сайдад хүргүүлэхээр Төрийн ордон руу явцгаав.

Нийслэлийн хэмжээнд ирэх онд арван түргэн тусламжийн цэг шинээр байгуулахаар шийдвэрлэжээ. Эл тусламжийн цэгийн түрээсний үнэ сард 700−900 мянган төгрөг байхаар төсөвлөсөн аж. Үүнийг ус, цахилгаан, дулаан, эмчийн хангамж зэрэг урсгал зардалд зарцуулагдана.Түргэн тусламжийн цэгүүд Баянзүрх дүүрэгт дөрөв, Сонгинохайрхан дүүрэгт гурав, үлдсэн гурав нь бусад дүүрэгт байгуулагдах юм байна.

“Тэмүүжин Өрлөг” цэргийн сургуулийн сурагчид мансууруулах үйлчилгээтэй бодис хадгалж, хэрэглэсэн гэх мэдээлэл буй. Эл асуудлыг “Тэмүүжин Өрлөг” сургуулийн захирал, хошууч В.Дашпунцаг цагдаагийн байгууллагад шалгуулахаар өгсөн талаар мэдээллээд байгаа юм. Тэрээр “Манай сургуулийн төгсөх ангийн гурван хүүхдээс тамхи үнэртсэн учир Цэргийн албаны дарга шалгалт хийсэн. Тэгэхэд тухайн гурван хүүхдээс юу нь үл мэдэгдэх, жижигхэн гялгар ууттай ургамал олдсон. Бид тухайн үед Эрүүгийн цагдаагийн газарт бичиг явуулж шалгаж өгөх хүсэлтийг тавьсан” гэж буй.

Бид энэ талаар ЦЕГ-ын хэвлэл мэдээллийн төвийн ахлах мэргэжилтэн, Цагдаагийн ахмад Ё.Лхагвасүрэнтэй холбогдож тодруулахад “Бидэнд мэдээлэл ирсний дагуу бид “Тэмүүжин өрлөг” сургуулийн төгсөх ангийн гурван сурагчид Эрүүгийн хуулийн 192 дугаар зүйл ангиар хэрэг үүсгэн шалгаж байна. Хэрэг мөрдөн байцаалтын шатандаа явж байна” гэсэн юм.

Дээрх сурагчид гэм буруутай нь тогтоогдвол хөдөлмөрийн хөлсний доод хэмжээг нэг зуугаас нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, гурваас дээш зургаан сар хүртэл хугацаагаар баривчлах, эсхүл хоёр жил хүртэл хугацаагаар хорих ял шийтгэнэ гэж заажээ