Month: December 2015

Хүүхдийн урлан бүтээх төвийг хувьчлалыг эсэргүүцэн өнөөдөр зарим эцэг эхийн төлөөлөл, сурагчид тайван жагсаал зохион байгууллаа. Тэд Нийслэлийн ИТХ-ын арваннэгдүгээр сарын 30 –ний өдрийн хуралдаанаар Хүүхдийн урлан бүтээх төв, Хүүхдийн ордон тэргүүтэй 19 барилгыг 2016 оны өмч хувьчлалд хамруулж, нээлттэй дуудлага худалдагаар зарах шийдвэрийг гаргасныг ийн эсэргүүцсэн юм. Тэд “Монголд цор ганц, тэр дундаа үнэ төлбөргүйгээр үйл ажиллагаа явуулж, хүүхдийн авьяас билгийг нээн хөгжүүлж, соён гэгээрүүлдэг уг байгууллагыг татан буулгаж, хувьчилж болохгүй, хүүхдүүдийг хаана сур гэсэн юм бэ” хэмээн эцэг, эхчүүд ийн нэгдэж санал бодлоо илэрхийлж байгаа аж. Тэд “Хүүхдийн байгууллагыг хувьчлахыг эсэргүүцэж байна”, “Хүүхдийн өмчид халдахаа зогсоо” зэрэг уриа лоозон барьсан харагдав.

Шийдвэрээ эргэн харж, цуцлах хүртэл энэ мэт жагсаал, хөдөлгөөнийг үе шаттайгаар цааш өрнүүлэх болно гэдгийг тус төвийн багш ажилчид, эцэг эхчүүдийн төлөөллүүд мэдэгдэж байлаа.

Өнгөрсөн долоо хоногт нийтийн тээврийн автобуснуудтай холбоотой томоохон ослууд гарсан.

Үүнтэй холбогдуулан нийслэлийн Засаг даргын Зам, тээвэр, дэд бүтцийн асуудал хариуцсан орлогч Н.Гантөмөр нийтийн тээврийн үйлчилгээ эрхлэгч аж ахуйн нэгж байгууллагуудыг өндөржүүлсэн бэлэн байдалд шилжиж, гудамж замын хөдөлгөөнд тавих хяналт зохицуулалтыг эрчимжүүлэхийг даалгасан байна.

Мөн Улаанбаатар хотын алслагдсан захын гэр хорооллын автобусны эцсийн зогсоолын тэмдэг, тэмдэглэгээг байршуулах, байгаль, цаг уурын нөхцөл шалтгаанаар үүссэн хальтиргаа, гулгаа, хүндрэл, бэрхшээлийг цаг алдалгүй арилгах ажлыг Нийтийн үйлчилгээний Улаанбаатар нэгтгэл ОНӨҮГазар, дүүргүүдийн тохижилт үйлчилгээний хэлтэст,

-Гэрээ хэлцэлгүй нийтийн зорчигч тээврийн үйлчилгээг эрхэлсэн эсэхэд хяналт тавихыг Улаанбаатар хотын Цагдаагийн газар, Нийслэлийн Тээврийн газарт тус тус үүрэг болгожээ.

Монголын анхны ванны бөмбөг, уруул өнгөлөгч, зөгийн лавтай лаа гэх мэт бүтээгдэхүүн үйлдвэрлэсэн “Lhamour” брэндийн хонины сүүлээр хийсэн саван Азийн онцлох органик таван бүтээгдэхүүний нэгээр тодорсон байна. Энэ бүтээгдэхүүн нь харшилтай, арьсны өвчтэй хүмүүс хэрэглэхэд тохиромжтой, цэвэр байгалийн гаралтай учир арьсыг тайвшруулж, тэжээл өгч, гэмтэхээс хамгаалдаг аж. Мөн ядаргаа тайлах, хор гадагшлуулах, целлюлит багасгах гэх мэт олон эерэг нөлөөтэй бүтээгдэхүүн юм байна.

Байгалийн гаралтай цэвэр түүхий эдээр хийсэн, хаягдалгүй, 100 хувийн органик цэвэр бүтээгдэхүүнүүд нь эрүүл мэндийн хувьд чанарын өндөр баталгаатай байдаг аж. Тиймээс ч Монголын үндэсний худалдаа, аж үйлдвэрийн танхимаас эдгээр бүтээгдэхүүнүүддээ “Органик бүтээгдэхүүн” эко шошго хэрэглэх эрхийг авжээ. Хэдийгээр органик гоо сайхны бүтээгдэхүүн дөнгөж дэлхийд танигдаж байгаа ч олон улсад өндөр үнэлэгдэж буй. Учир нь хүмүүс эрүүл мэнддээ анхаардаг болсон тул “Natural Essentials” компанийнхан шошгоо анхнаас нь ямар ч улсын хүн ойлгохоор бичсэний үр дүнд бүтээгдэхүүнүүдийг нь Монголдоо төдийгүй олон улсад сонирхдог болсон байна.

“Монголын статистикийн
нийгэмлэг”, “Хөгжлийн төлөөх судлаач”, “Нээлттэй мэдээллийн төв” зэрэг ТТБ
болон ахмад статистикчдийн төлөөлөл өнгөрсөн сард ҮСХ-г Улсын бүртгэлийн
ерөнхий газартай нэгтгэх болсныг эсэргүүцэн өнөөдөр мэдээлэл хийлээ. Монголын
статистикийн нийгэмлэг ТТБ-ын тэргүүн Б.Батмөнх “Монголын статистикийн салбар
бол 90 гаруй жилийн түүхтэй, төрийн чухал алба. Гэтэл 2015 оны арваннэгдүгээр
сарын 14-нд УИХ-ын чуулганаар ҮСХ-г Хууль зүйн сайдын мэдэл дэх Улсын
бүртгэлийн ерөнхий газартай нэгтгэх шийдвэр гаргасан. Уг нь Статистикийн хууль
ёсоороо бол ҮСХ хороо нь ажлаа УИХ-д тайлагнадаг, хараат бус бие даасан
байгууллага. Нэг байгууллагын статус нь жижгэрч, ажилчид нь цомхотгогдон, цалин
хөлс нь буурч байгааг энд онцолж ярих гэсэнгүй. Хамгийн гол нь статистикийн
албаны ажил хуульд зааснаар хараат бус байх ёстой. Гэтэл УБЕГ-тай нэгтгэчихээр
Хууль зүйн сайдын дор ажиллах болчихоод байна. Энэ нь цаад утгаараа Засгийн
газрын хараат болж байгаа хэрэг. Ингэчихээр ҮСХ-ны үнэлэлт дүгнэлт, тоон
мэдээнд Засгийн газрын нөлөө орж, улмаар иргэд итгэхээ болино. Өөрөөр хэлбэл
статистикчид Засгийн газарт “таалагдахгүй” бодит үнэн тоон мэдээллийг судалгаа
тооцооллын үндсэн дээр гаргах эрхгүй болчихлоо гэхэд нэг их хилсдэхгүй
болчихлоо” гэсэн юм.

Нийслэлийн өмч хувьчлалын
дуудлага худалдаагаар “Хэвлэх үйлдвэр”-ийг 24 тэрбум төгрөгөөр худалдаж авсан
Абдул карим өнөө өглөө өөрийн биет төлөөлөгчөөр дамжуулан НӨХГ-т “Хэвлэх
үйлдвэрийн газрыг буцаан өгөх” өргөдлөө албан ёсоор өгчээ. Тэрбээр тодорхой
шалтгааны улмаас хувьчлалаас татгалзаад буйгаа мэдэгдсэн. Тиймээс “Хэвлэх
үйлдвэр”-ийн хуучин байгууламж, газрыг дараагийн үнэ дуудсан “Таван
Богд” групп 23.8 тэрбум төгрөгөөр хувьчлан авах боломж бүрдэж байна. Хууль
ёсны дагуу дуудлага худалдаанд оролцсон эхний ялагчийн дэнчинд тавьсан 710 сая
төгрөг буцаан олгогдохгүй юм байна.

Захиргааны хэрэг шүүхэд хянан шийдвэрлэх тухай хуулийн шинэчилсэн найруулгын төслийг өнгөрсөн 7 хоногт УИХ-д өргөн барьсан билээ.

Уг хуулийн төсөл нь 16 бүлэг, 138 зүйлтэй бөгөөд иргэдтэй холбоотой нийтийн эрх ашгийг төлөөлөн нэхэмжлэл гаргах тухай заалт багтжээ. Өөрөөр хэлбэл, иргэд нийтийг хамарсан хор уршгийн эсрэг шүүхэд гомдол гаргаж болох талаар тусгагдсан байна.

Үүнд, агаарын бохирдолд хордсон, замын эвдрэлээс болж автомашинаа эвдсэн зэрэг хохиролд өртвөл тухайн иргэн уг асуудлын эсрэг шүүхэд гомдол гаргаж болох зэрэг багтжээ.

Нийслэл хотын албан татварын тухай хууль хэрэгжиж эхлээд 2 сар гаруй болж байна. Энэ хугацаанд нийслэл хотын албан татварын төрлөөр 193,177.0 мянган төгрөгийг нийслэлийн төсөвт төвлөрүүлжээ.

Нийслэл хотын албан татварын тухай хуульд нийслэлийн нутаг дэвсгэрт үйлчилгээ үзүүлж буй баар, ресторан, зочид буудал, амралтын газар гэсэн дөрвөн төрлийн тусгай үйлчилгээ, бүх төрлийн архи тамхины жижиглэн худалдаанд нийслэл хотын албан татварыг нэг хувиар ногдуулахаар заасан бөгөөд энэхүү татвараас жилдээ 13 тэрбум гаруй төгрөгийг нийслэлийн төсөвт төвлөрүүлэх тооцоо байгаа юм.

Нийслэлийн хэмжээнд 5374 суутгагч 4578 тусгай зөвшөөрлийн дагуу үйл ажиллагаа явуулж байгаа бөгөөд одоогийн байдлаар татвар төлөгчийн бүртгэлийн програмд 543 иргэн, 3834 хуулийн этгээд, нийт 4377 албан татвар суутгагчийг бүртгэжээ гэж Нийслэлтийн НЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.