Month: November 2015

“Өдрийн сонин”-ы мягмар гаригийн дугаар хэвлэгдэн гарлаа. Өмнөговь аймгийн Ханбогд сумын Номгон багийн гурван малчны хотонд тэмээний үл мэдэгдэх өвчин гараад байгаа. Арав гаруй тэмээ энэ өвчнөөр үхээд зогсохгүй үхэрт хүртэл халдварлаж байгаа юм. Энэ талаар манай сонины сурвалжлагч Э.Хүрэлбаатар газар дээрээс нь сурвалжлага бэлтгээд зогсохгүй малын эмч, эрдэмтдийн хэлсэн үгсийг нэг болон 15 дугаар нүүрт нийтэллээ. Харин баримт, үзэл бодлын гуравдугаар нүүрт “Амьдрал яах вэ, Анжела Девис юу болж байна” хэмээх нийтлэл хэвлэгдсэн юм. Уг нийтлэлээр УИХ-ын гишүүн Д.Оюунхоролын сэтгүүл зүйн талаар хэлсэн үгийг дэмжсэн байна. Мөн сэтгүүл зүйг боомилж буй шийдвэрүүдийг сэтгүүлчид өөрсдөө уухайлан дэмжиж буй явдлыг шүүмжилжээ.

Улс төрийн мэдээллийн нүүрүүдээс “Үндсэн хуулийн нэмэлт өөрчлөлтөөр УИХ 99 суудалтай болж, бүрэн эрхийн хугацаа нь таван жил байна” тухай болон УИХ-ын гишүүн А.Бакей, Д.Ганбат нартай хийсэн сонирхолтой ярилцлагыг унших боломжтой. Мөн уламжлал ёсоор эрүүл мэндийн нүүр хэвлэгдэн гарсан болно.

Монгол төрийн наадамд нэг түрүүлж, нэг үзүүрлэсэн улсын арслан П.Бүрэнтөгстэй хийсэн сонирхолтой ярилцлага нийтлэгдсэн юм. Тэрээр Монгол Улсын дархан аварга Х.Баянмөнхийн нэрэмжит барилдаанд түрүүлж байны мөнгөө Хавдар судлалын үндэсний төвд өгсөн билээ. Энэ бол бөх хүний зангараг, жудаг ямар байх ёстойн том илрэл. Түүнтэй хийсэн ярилцлагыг таалан соёрхоорой. Харин утга зохиолын нүүрт МУСГЗ, Д.Нацагдоржийн нэрэмжит шагналт яруу найрагч Б.Хүрэлбаатарын дурсамжаас хэвлэлээ. Тэрбээр зохиолч, сэтгүүлч Пүрэвийн Баярсайхан агсны талаар дурсамж тэрлэсэн байна.

Түүнчлэн Эрүүл мэнд, спортын сайд асан Г.Шийлэгдамбын аав Ганхуяг хүүгийнхээ талаар ярилцлага өгчээ. Энэ мэтчилэн гадаад мэдээ, цаг үе баримтын олон сонирхолтой материал хэвлэгдсэн юм.

Өмнөговь аймгийн Ханбогд суманд тэмээний үл мэдэгдэх өвчин гарсан. Тус сумын Номгон багийн малчин Л.Отгондүү, А.Буд, Б.Өлзийбүрэн нарын хот айлд гарсан өвчин тэмээнээс хальж үхэрт халдварлаад байгаа. Өчигдрийн байдлаар тус хот айлд 13 тэмээ үл мэдэгдэх өвчнөөр үхээд байгаа юм. Гэвч тус орон нутгаас сонгогдсон УИХ-ын гишүүн, Хүнс хөдөө аж ахуйн яамны мэргэжилтнүүд, аймаг, сумын удирдлагууд тэмээний баяр хийж геннесийн номонд бүртгүүлнэ гээд давхиж яваа аж. Хэрэв энэ халдварт өвчин мөн бол өдгөө Монгол, Хятад хоёрхон улсад үлдээд буй хоёр бөхт хүрэн тэмээний тоо толгойд ноцтой аюул учруулна. Өмнөговь аймаг бол Монголдоо хамгийн олон тэмээтэй аймаг юм. Тэгтэл ийм өвчин гарч үй олноороо хиарч байхад улсаас авч явуулж буй ажил нь дэндүү хойрго байгаа. Арга барсан малчид өөрсдөө эмчлэх төрөл бүрийн оролдлого хийж лам, бөөд ч үзүүлж байгаа гэнэ. Энэ удаагийн дугаарт тухайн өвчний талаар мал эмнэлгийн эмч, эрдэмтэд юу хэлсэн болоод газар дээрээ ямар нөхцөл байдалтай байгаа талаар уншаарай.

Гол нэрийн барааны үнийг өмнөх сарынхтай харьцуулахад 0.5 хувиар буурч, өмнөх долоо хоногийнхтой харьцуулахад 0.3 хувиар өссөн аж. Тодруулбал, хонины ястай махны үнэ өмнөх сарынхаас 0.9 хувь, үхрийн ястай махны үнэ 4.7 хувь, үхрийн цул махны үнэ 7.1 хувь, адууны ястай махны үнэ 6.3 хувь, ямааны ястай махны үнэ 4.8 хувиар буурсан байна. Өмнөх долоо хоногийнхтой харьцуулбал, хонины ястай махны үнэ 1.7 хувиар өсч, үхрийн ястай махны үнэ 0.7 хувь, үхрийн цул махны үнэ 2.3 хувиар буурч, адууны болон ямааны ястай махны үнэ өөрчлөлтгүй байна.

Нэг кг хонины мах дунджаар 4465 төгрөг, үхрийнмах 5690 төгрөг, үхрийн цул мах 7385 төгрөг, адууны мах 4405 төгрөг, ямааны мах 3745 төгрөгийн үнэтэй байв. Гурилын үнийн хувьдзадгай I гурилын үнэ 0.6 хувиар өсч, савласан II зэргийн гурилын үнэ 0.7 хувиар буурч, бусад гурилын үнэ өөрчлөлтгүй байна. Өмнөх долоо хоно­гийнхтой харьцуулахадгури­лын үнэ өөрчлөлтгүй байна.

Цагаан будааны үнэ өмнөх сарынхаас 0.2 хувиар буурч, өмнөх долоо хоногийнхтой харьцуулахад өөрчлөлтгүй байна. Элсэн чихрийн үнэ өмнөх долоо хоногийнхоос өөрчлөлтгүй. Төмс, хүнсний ногооны үнийг өмнөх сарын дундаж үнэтэй харьцуулахад төмсний үнэ 6.6 хувь, луувангийн үнэ 4.4 хувь, байцааны үнэ 3.2 хувиар өсч, манжингийн үнэ 0.4 хувь, сонгины үнэ 0.8 хувиар буурсан байна. Өмнөх долоо хоногийнхтой харьцуулахад төмсний үнэ 0.9 хувиар буурч, бусад ногооны үнэ өөрчлөлтгүй байна.

Өмнөх долоо хоногийнхтой харьцуулахад”Элекстер” сүүний үнэ 1.6 хувь, савласан (нэг литрийн) сүүний үнэ 0.7 хувиар буурч, задгай сүүний үнэ өөрчлөлтгүй байна. Өндөгний үнэ өмнөх долоо хоногийнхоос 1.8 хувиар өссөн байна. Ургамлын тосны үнэ өмнөх сарынхтай болон өмнөх долоо хоногийнхтой харьцуулахад өөрчлөлтгүй байна. Цөцгийн тосны үнэ өмнөх долоо хоногийнхоос өөрчлөлтгүй байна гэж Үндэсний статистикийн хорооноос мэдээлжээ.

Чингэлтэй дүүргийн 19 дүгээр хорооны иргэн Ж.Чулуунцэрэн

Ажлын байр гадуур олдохгүй байна гээд байгаа ч үнэндээ зөндөө байна. Цалин, орчин нь маш муу, илүү цагаар ажиллуулж туршиж байна хэмээн хүний хөдөлмөрийг мөлжиж мөлжчихөөд цалин өгөхгүй халах гэх мэт асуудлаас болж ажил олдохгүй байна гэсэн яриа гараад байна.

500 мянган төгрөгийн цалин авдаг бол эрүүл мэндийн даатгал, нийгмийн даатгал гэж татвар аваад 300 гаруй мянган төгрөг авч байх жишээтэй. Тухайн компаниуд нь татвар төлөхдөө ажилчинтай таллаж төлөх ёстой байдаг. Гэтэл зөвхөн ажилчны цалингаас л төлж байгаа нь бага цалин авахад нөлөөлдөг. Харин компанид энэ нь ашигтай байдаг.

Илүү цагийн мөнгө өгөхгүй хэрнээ илүү цагаар ажиллуулах сонирхолтой. Хүнийг хөдөлмөрийг шулж байгаад их бухимдалтай байдаг. Хүний гадна дүр төрхөөр нь ялгаварлаж ажилд авах асуудал их байгаа. Жаахан хүүхэд ажилд авчихаад сүүлд нь голоод, тэнцэхгүй байна гээд арав хоног ажиллуулаад цалин өгөхгүй халдаг жишээний. Байгууллагын хөдөлмөр хамгаалалтын ажилтан гэж байдаг, Энэ хүмүүс ажлаа хийж чадахгүй байна. Хөдөлмөр хамгаалалтын байдал бүрэн байна уу, дутуу юу байна гэж шалгадаггүй. Энгийн юманд ажилчдыг шүүмжилдэг атлаа ажиллах аюулгүй орчин нөхцөлийг бүрдүүлдэггүй. Хүн бэртэж гэмтэхээр байна уу, хамгаалалтын малгай, бээлий бүрэн эсэх гэх мэт чухал зүйлүүдээ шалгадаггүй. Үүнээс нь болоод хүн бэртэж гэмтэх тохиолдол их гарч байна. Энэ асуудал даамжирч ажилчин хөдөлмөр эрхлэх чадамжаа алдах тохиолдолд байгууллага хариуцлага хүлээхгүй гэсэн ойлголтыг төрүүлж байгаа юм. Хөдөлмөр хамгаалал байхгүй болчихоор хүмүүсийг илүү цаг ажиллуулж, аюулгүй байдлыг нь бүрэн хангахгүйгээр ажиллуулах, цалин мөнгө нь муу, заримдаа өгөхгүй байхаар хүмүүс ажил хийх ямар ч сонирхолгүй болчихож байгаа юм. Ингээд ажлын байр байхгүй ажил олдохгүй байна гэж яригдаад байна. Би жолооч хүн. Машинд эвдрэл гарсан үед компанид хэлж засуулах гэхээр маргааш нөгөөдөр гэсээр байгаад хэдэн сар болдог. Энэ хооронд хүн гэмтэж болох эрсдэлтэй. Байгууллага урьдчилан сэргийлэх болон аюулгүй ажиллагаанд заагаад өгсөн байдаг үүргийг биелүүлдэггүй.

Хэлэх эрхийн индэрт оролцон үзэл бодлоо илэрхийлэхийг хүсвэл

95260351 дугаарын утсаар холбоо барина уу.