Month: September 2015

Categories
мэдээ спорт

Саори Ёшида дэлхийн аваргын 13 дахь алтан медалиа хүртжээ

Чөлөөт бөхийн насанд хүрэгчдийн ДАШТ АНУ-ын Лас Вегас хотноо энэ өдрүүдэд болж байгаа билээ. Тэмцээний эмэгтэйчүүдийн 53кг-ын жингийн алтан медалийн төлөөх барилдаанд
алдарт Саори Ёшида, Софи Маттсон нар
барилдсан байна. Олимпийн гурван
удаагийн аварга Саори Ёшидаг
дэлхийн аваргын алт, хошой мөнгөн медальт Шведийн бөх София эхний үед тун сайн хамгаалж 0:1 онооны
илүүтэй дуусгасан ч хоёрдугаар
үед Саори Ёшида хоёр оноо авснаар дэлхийн аваргын 13 дахь алтан медалиа хүртжээ.

Ийнхүү Японы алдарт бөх Саори
Ёшидаа олимпийн 3, дэлхийн аваргын 13 алтан медальтай болж байна.

Categories
мэдээ нийгэм

Л.Гансүхийн өмгөөлөгч шүүх бүрэлдэхүүнээс татгалзах санал гаргалаа

Улсаас 13 тэрбум төгрөг завшсан гэж сэжиглэн шалгаж эхэлсэн Л.Гансүхийн гэгдэх хэргийг шүүх хурал Баянзүрх, Сүхбаатар, Чингэлтэй дүүргийн эрүүгийн шүүхэд эхлээд байгаа билээ. Түүний өмгөөлөгчийн зүгээс шүүх хуралдааныг хойшлуулах санал гаргасан ч шүүх бүрэлдэхүүн өмгөөлөгчийн хүсэлтийг хүлээн авах боломжгүй гэж үзэж шүүх хурлыг үргэлжлүүлсэн юм. Гэтэл Л.Гансүхийн өмгөөлөгч энэ шийдвэрийн дараа шүүх бүрэлдэхүүнээс татгалзах саналаа албан бичгээр мэдэгдэв. Энэ саналыг нь хэлэлцэхээр шүүх хуралдаан түр завсарлаад байна.

Гэрэл зургуудыг Ц.МЯГМАРСҮРЭН

Categories
мэдээ нийгэм

Сүхбаатар аймаг 3836 тонн өвс бэлтгээд байна

Сүхбаатар аймгийн хэмжээнд өнөөдрийн байдлаар 60 хэсэг салаа, 383 хүний бүрэлдэхүүнтэй 150 трактор, 152 хадуур тармуур, 48 хаман боогчтойгоор хадлан тэжээл бэлтгэх ажлыг хийж байгаа бөгөөд одоогоор 3836 тонн өвс бэлтгээд байгаа аж. Үүнээс Дарьганга, Наран, Мөнххаан, Эрдэнэцагаан, Түмэнцогт сумд өөрийн сумдын аюулгүйн нөөцийг бүрдүүлээд байгаа юм байна.

Монгол Улсын Засгийн газрын А/92 дугаар тогтоол, аймгийн Засаг даргын А/283 дугаар тогтоолыг хэрэгжүүлэх ажлын хүрээнд өвөлжилтийн бэлтгэл ажлыг хангахад зориулан олгосон бага оврын 25 морины хүчин чадалтай 60 ширхэг тракторыг аймгийн ХХААГ-т татан авчирч, 37 тракторыг сумдын аж ахуйн нэгж, иргэдэд хадлан тэжээл бэлтгэхэд зориулан хоёр жилийн хугацаатай олгож, эргэн төлөлтийг өвсөөр тооцон, аймгийн аюулгүйн нөөц бүрдүүлэхэд 37800 боодол буюу 756 тонн өвс нийлүүлэхээр гэрээ байгуулан ажиллаж байна.

Categories
мэдээ эдийн-засаг

Гадаад валютын ээлжит дуудлага худалдаа боллоо

Өнөөдрийн буюу 2015 оны есдүгээр сарын 10-ны өдрийн гадаад валютын дуудлага худалдаагаар банкуудаас ирүүлсэн 1991.01-1999.0 төгрөгийн ханшаар 33.0 сая ам.доллар худалдан авах, 310.01-312.0 төгрөгийн ханшаар 121.0 сая юань худалдан авах саналыг үндэслэн, Монголбанк 10.6 сая ам.долларыг 1996.01 төгрөгийн хаалтын ханшаар, 61.0 сая юанийг 310.8 төгрөгийн хаалтын ханшаар тус тус худалдав.

Энэ өнөөдрийн ээлжит гадаад валютын своп, форвард хэлцлээр банкууд 52.0 сая ам.доллар худалдан авах төгрөгийн своп хэлцэл, 15.0 сая ам.доллар худалдах ам.долларын своп хэлцэл байгуулах санал ирүүлж, Монголбанк саналыг 100 хувь биелүүлэв.

Тодруулга, Гадаад валютын дуудлага худалдаа гэдэг нь валютын дотоодын захын үйл ажиллагааг ил тод, нээлттэй явуулах, үр ашгийг нэмэгдүүлэх, төгрөгийн ханшийн тогтвортой байдлыг хангах, зах зээлийн зарчмаар тодорхойлох зорилгоор Монголбанкнаас захад оролцох нэг арга хэрэгсэл юм.

Монголбанкнаас гадаад валютын дуудлага худалдааг долоо хоног бүрийн мягмар, пүрэв гарагт тогтмол зохион байгуулдаг ба дуудлага худалдаанд зөвхөн банкны үйл ажиллагаа эрхлэх зөвшөөрөлтэй, Монгол Улсын нутаг дэвсгэр дээр үйл ажиллагаа явуулж буй банкууд оролцдог.

Монголбанк нь валютын дотоодын захад оролцогчдод аливаа мэдээллийг нээлттэй хүргэхийг дэмжиж ажилладаг бөгөөд энэхүү мэдээллийн эцсийн зорилго нь валютын захын тогтвортой байдал, төгрөгийн ханшийн огцом хэлбэлзлийг үүсгэхгүй байхад чиглэгддэг.

Categories
мэдээ нийгэм

Парламент байгуулагдсаны 25 жилийн ойд зориулсан номын үзэсгэлэн нээгдлээ

Монгол Улсад байнгын ажиллагаатай парламент байгуулагдсаны 25 жилийн ойн хүрээнд Улсын Их Хурлын Тамгын газар, Монгол Улсын Үндэсний номын сан, Улаанбаатар хотын төв номын сантай хамтран номын үзэсгэлэн гаргасан байна.

Энэхүү үзэсгэлэнд Монгол Улсад байнгын ажиллагаатай парламент үүссэнээс хойш 25 жилийн хугацаанд хэвлэгдэн гарсан Монголын төрийн тогтолцоо, төр эрх зүйн түүх, парламентын ёс, Улсын бага хурал, Улсын Их Хурлын түүхэн товчоо, эмхтгэлүүд, төрийн түшээд, улс төрчдийн тухай ном, хэвлэл болон ойд зориулсан номуудыг уншигч үйлчлүүлэгчдэд дэлгэн үзүүлж байна. Тухайлбал, “Монгол Улсын парламент” дөрвөн боть, “Судалгааны эмхэтгэл” хоёр боть, “Улсын Бага Хурлын товчоон, 1990-1992 он”, “Монгол Улсын анхны байнгын ажиллагаатай парламент-Улсын Бага Хурал /1990-1992 он/”, “Найргийн хуртай монгол парламент”, “Монгол Улсын байнгын ажиллагаатай парламентын Тамгын газар: 1990-2015 он” зэрэг номуудыг олон нийтэд толилуулж байна.
Монгол Улсын Үндэсний номын санд гарсан үзэсгэлэн 7 хоног үргэлжлэх бол Улаанбаатар хотын төв номын санд дэлгэгдсэн үзэсгэлэн энэ сарын 13-ныг дуустал үргэлжлэх юм.
Categories
мэдээ нийгэм

Мандалговиос-Чойрын чиглэлд нийтийн тээврээр үйлчилдэг боллоо

Дундговь аймгийн Мандалговь хотоос -Говь-Угтаал-Цагаандэлгэр-Чойрын чиглэлд өнөөдрөөс эхлэн зорчигч, шуудан тээврийн үйлчилгээ үзүүлж эхэлсэн байна. Тодруулбал, долоо хоног бүрийн пүрэв гарагт Мандалговиос-Чойрын чиглэлд зорчигчдыг тээвэрлэх бол баасан гараг бүр Чойроос- Мандалговийн чиглэлд нийтийн тээврээр үйлчлэх ажээ.

Categories
мэдээ нийгэм

УДБЭТ хориход ажиллана

Жил бүрийн есдүгээр сарын хоёр дахь долоо хоногт “Монгол Улсын соёл урлагийн ажилтны өдөр” тохиодог билээ. Тус арга хэмжээг Боловсрол соёл, шинжлэх ухааны яам(БСШУЯ) удирдан, соёл урлагийн байгууллагууд ээлжлэн зохион байгуулдаг уламжлалтай. Энэ жилийн соёл урлагийн ажилтны өдрийг БСШУЯ, СУИС хамтран энэ сарын 9-12-ны хооронд зохион байгуулах гэж байна. Энэ хүрээнд Улсын дуурь бүжгийн эрдмийн театрын(УДБЭТ) хамт олон өнөөдөр 15.00 цагт Зайсан дахь насанд хүрээгүйчүүдийн 411-р хорих ангийн хамт болон хүмүүжигч хүүхдүүдэд зориулан “Хүмүүнлэг Монголын соёлтой иргэний төлөө” уулзалт, тоглолтыг зохион байгуулах гэж байна. Уг үйл ажиллагаанд УДБЭТ-ын уран бүтээлчид дэлхийн сонгодог болон монголын шилдэг бүтээлүүдээс тоглох юм. Мөн уран бүтээлчид хорих ангид хүмүүжиж байгаа хүүхдүүдэд зориулан ном цуглуулсан бөгөөд үүнийг хорих ангийн номын санд хандивлах аж.

Энэ жил соёл урлагийн ажилтны өдрийг өвөрмөц, шинэлэг хөтөлбөртэйгээр зохион байгуулах удирдамжийг БСШУЯ-наас гаргасны нэг нь байгууллага бүр нийгмийн эмзэг бүлгийг сонгон авч “Хүмүүнлэгийн тоглолт, арга хэмжээ”-г зохион байгуулах үйл ажиллагаа юм. Энэ нь соёл урлагийнхан нийгмийн хариуцлагын манлайллыг өргөх сайн дурын үйл ажиллагаанд нэгдэж, хүнлэг, энэрэнгүй нийгмийн төлөө гар бие нийлүүлэн ажиллах зорилтын дор хийгдэж байгаааж.

Categories
мэдээ нийгэм

“Буянт-Ухаа 2”-ын захиалга даваа гаригаас эхэлнэ

“Буянт-Ухаа 2” хороололд шинээр байр авах хүсэлтэй иргэдийн захиалгыг ирэх даваа гарагт буюу 9-р сарын 14-нд авч эхэлнэ. Иргэд захиалга өгөхдөө банкны 8 хувийн зээлд хамрагдаж чадах эсэхээ судалсан байхыг зөвлөж байна.

Захиалгын эхний ээлжинд “Буянт-Ухаа 1” хорооллын журмын нөхцөл хангасан ч сугалаанд шалгарч чадаагүй 4395 иргэнд давуу эрх олгож бүртгэсэн. Захиалга эхэлснээс хойш гурван хоногийн хугацаанд “Буянт-Ухаа 2” хороололд байр авах хүсэлтэй 700 орчим иргэн хандаж, үүнээс 420 гаруй иргэд байрны захиалгаа өгөөд байна.

Төрийн орон сууцны корпорацийн захиалгаар баригдаж буй 6500 айлын “Буянт-Ухаа 2” орон сууцны хорооллын захиалга өнгөрсөн 9-р сарын 7-нд эхэлсэн. Эхний ээлжинд 1620 айлын захиалгыг авч, барилгыг 10-р сарын 31-нд улсын комисст хүлээлгэн өгөх юм. Харин үлдсэн орон сууцны барилгыг 2016 оны 5-р сард ашиглалтад оруулах төлөвлөгөөтэй ажиллаж байна.

ТОСК-ийн Хэвлэл мэдээлэл олон нийттэй харилцах албанаас мэдээллээ.

Categories
онцлох-нийтлэл туслах-ангилал

Бензиний өндөр үнэ бол популизмын төлбөр юм

Дэлхийн зах зээлд
шатахууны үнэ манайхаас хоёр дахин хямд байгаа. Харин Монголд гурван жилийн
өмнө ямар байсан яг тэр үнэ огт хөдлөхгүй юм гэж нийгэм даяар шүүмжилж байна.
Шатахуун, түлшний үнийг хямдруулж, гадаад улс орнуудын одоогийн жишигт аваачих
саналыг УИХ-ын гишүүн Ж.Энхбаяр, С.Бямбацогт нар гаргасан. Сошиал ертөнц ч эдгээр нэр бүхий
гишүүдийг дэмжиж хөөрсөн хүмүүсээр дүүрэв. Тэд “НИК”, “Шунхлай” зэрэг шатахуун
импортлогч томоохон компаниуд Монголыг шулж дууслаа, хагартлаа баяжицгаалаа”
гэж дайрч байна. Тэр байтугай “НИК”-ийн хувьчлалыг буцаая гээд шуугиж байх юм.
Хэдүүлээ саяхан болсон нэг үйл явдлыг саная. Ч.Сайханбилэг Ерөнхий сайд болоод
оюутны 70 мянга, хүүхдийн 20 мянга, алдарт эхчүүдийн одонгийн мөнгө,
цэцэрлэгийн багачуудын хоолны мөнгө гээд улсаас өгдөг халамжийг таная гэж
уриалсан. Тэрбээр төрийн халамжийг ялгавартайгаар олгож байх санал
дэвшүүлснээсээ болж түмэн эсэргүүцэлтэй тулгарч, бараг толгойгоо хага
цохиулахаа дөхсөн шүү дээ. Тэгвэл төр энэ бүх халамжийн мөнгийг юунаас гаргаж
өгч байгаа юм бэ. Гаалийн онцгой албан татвараас бүрдүүлж байна. Хил гаалиар
орж ирж байгаа зарим нэр төрлийн бараанд онцгой албан татвар тавьдаг. Архи,
тамхи, автомашин, шатахуун гээд хуруу дарам эдгээр нэр төрлийн бараа
бүтээгдэхүүнд л хамаатай. Тухайн барааг хилээр нэвтрэх эрх олгохын тулд гаалийн
онцгой албан татварыг төр бодлогоор зохицуулдаг. Жишээлбэл, гадаадаас авч
байгаа бараа бүтээгдэхүүний үнэ дэлхийн зах зээлд өссөн байвал энэ онцгой албан
татварыг багасгадаг. Бүр тэглэх тохиолдол ч байна. Харин тэр бүтээгдэхүүний үнэ
дэлхий дахинд буурвал эсрэгээрээ онцгой албан татварыг нэмдэг. Өнөөдрийн нөхцөл
байдлаас харахад шатахуун дээр тавьж байгаа онцгой албан татварыг 50 хувиар
нэмсэн байх. Тиймээс манай улсад шатахуун үнэтэй байхаас аргагүй. Энэ нь ард
түмэнд хүнд тусч байгаа нь ч үнэн. Гэхдээ асуудлын гол зангилаа нь
популистуудын нэхээд байдаг тэр их халамжийн мөнгийг өгөхийн тулд ийм арга
хэмжээ авч байгаа юм. Үүнийг Засгийн газар “Та нарын мөнгийг эндээс авч байна
шүү дээ” гэж олигтойхон хэлчихгүй юм даа. Харин шатахууны үнэ хөдлөхгүй байгаа
шалтгааныг Үнэ тогтворжуулах хөтөлбөртэй холбож, ард иргэдийн дургүйг хүргэмээр
тайлбар хийгээд нэр хүндээ алдсан. Энэ хөтөлбөрийн хүрээнд гэрээ байгуулж,
бондын хөрөнгөөс мөнгө авсан олигархиудын компаниуд шатахууны үнийг таван
жилийн хугацаатай гацаасан гэсэн ойлголт нийгэмд бий. Уг нь гаалийн онцгой
албан татвараас шалтгаалж бензин түлшний үнэ
өсдөг гэж шатахуун импортлогчид өөрсдөө ч дуугарахгүй юм. Популистуудын
шаардсан мөнгийг өгөхийн тулд шатахуун өнөөдөр үнэтэй байгааг яагаад хэлж
болохгүй гэж. Үнэндээ “НИК”, “Шунхлай” зэрэг компаниуд хагартлаа баяжсан юм
байхгүй л байгаа.

Нийгмийн түрүүнд
явах ёстой сэтгүүлчид үүнийг юунд үл анзаарна вэ. Дэлхийн зах зээлд шатахууны
үнэ буучихаад байхад яагаад Монголд үнэтэй хэвээр байна вэ гэх улстөрчид ч тэр,
сошиал ертөнцийнхөн ч тэр бодит үйл явцыг нь ухаж ойлгохгүй улстөржүүлээд
байна.

Популистууд
“Мөнгөө өг” гэж орилоод байгаа хэрнээ онцгой албан татварыг багасга гэж
шаардаад байгаа. Тэгэхээр тэр их халамжийг та нарын амны хөөсөөр өгөх болж
байна уу. Бензиний өндөр үнэ бол популизмын төлбөрийг л өгч буй хэрэг юм шүү
дээ.

М.МӨНХ

Categories
мэдээ нийгэм

Л.Гансүх нарын шүүх хурлыг хойшлуулах хүсэлтийг хүлээн авсангүй

Улсаас 13
тэрбум төгрөг завшсан гэж сэжиглэн шалгаж эхэлсэн Л.Гансүхийн гэгдэх хэргийг
шүүх хурал Баянзүрх, Сүхбаатар, Чингэлтэй дүүргийн эрүүгийн шүүхэд эхлээд
байгаа билээ. Тэгвэл Л.Гансүхийн өмгөөлөгчийн зүгээс шүүх хуралдааныг
хойшлуулах санал гаргасан ч шүүх бүрэлдэхүүн өмгөөлөгчийн хүсэлтийг хүлээн авах
боломжгүй гэж үзжээ. Тиймээс шүүх танхимд Л.Гансүх нарын хэргийг үргэлжлүүлэн
шүүхээр боллоо.