Month: September 2015

Далянь хотноо ажлын айлчлал хийж буй Монгол Улсын Ерөнхий сайд Ч.Сайханбилэгт Бүгд Найрамдах Энэтхэг улсын “Хиндүжа групп”-ийн Европын бүсийн захирал Пракаш Хиндүжа бараалхлаа.

Уулзалтаар хоёр орны батлан хамгаалах, уул уурхайн салбарын хамтын ажиллагааг өргөжүүлэх боломжийн талаар ярилцлаа. Ерөнхий сайд Ч.Сайханбилэг “Оюун санааны хөрш” Энэтхэг улсын хөрөнгө оруулалт манай улсад чухал. Энэ оны тавдугаар сард Энэтхэгийн Ерөнхий сайд Нарендра Модигийн Монгол Улсад хийсэн айлчлалын үеэр бүхий л салбарт харилцаа хамтын ажиллагаагаа өргөжүүлэх, тэр дундаа төр-хувийн хэвшлийн хамтын ажиллагааг хөгжүүлэх талаар ярилцаж байсан гэдгийг онцлоод Хиндүжа групп Монгол Улсад банк санхүү, газрын тос, батлан хамгаалах салбарт хамтран ажиллах өргөн боломжтой гэлээ. Мөн тус группийн захирлыг Монгол Улсад зочлохыг урилаа.

Хиндүжа групп нь банк, санхүү, тээвэр, газрын тос, эрчим хүч, техник технологи, хэвлэл мэдээлэл, харилцаа холбоо зэрэг олон салбарт байр сууриа олсон дэлхийд нөлөө бүхий байгууллага төдийгүй автомашин үйлдвэрлэлээр улсдаа хоёрдугаарт, автобус үйлдвэрлэлээрээ дэлхийд дөрөвдүгээрт бичигдэх томоохон үйлдвэрлэгч юм гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

БНХАУ-ын Далянь хотод зуны Давосын чуулга уулзалтад оролцож буй Ерөнхий сайд Ч.Сайханбилэг Дэлхийн эдийн засгийн чуулга уулзалтыг үндэслэгч, гүйцэтгэх захирал Клаус Швабтай ажил хэргийн уулзалт хийлээ. Уулзалтад Эрчим хүчний сайд Д.Зоригт, УИХ-ын гишүүн Д.Сумъяабазар, Ерөнхий сайдын ахлах зөвлөх Б.Дэлгэрмаа болон албаны бусад төлөөлөгчид, бизнесийн төлөөлөл оролцлоо.

Дэлхийн эдийн засгийн чуулга уулзалт нь Монгол Улстай нягт харилцаа, хамтын ажиллагаатай байсаар ирсэн төдийгүй Монгол Улсын Ерөнхийлөгч өвлийн Давосын чуулга уулзалтад олон жил хүндэт зочноор оролцсон. Монгол Улс эдийн засгийн хөгжлийн гарцыг судлах, эдийн засгийн хөгжлийн тодорхой загваруудыг боловсруулахад Давосын чуулган чухал үүрэгтэй байдаг гэдгийг Ерөнхий сайд уулзалтын эхэнд онцолсон юм.

Дэлхийн эдийн засгийн чуулга уулзалтыг үндэслэгч, гүйцэтгэх захирал Клаус Шваб 2007 оноос зохион байгуулагдаж ирсэн зуны Давосын чуулга уулзалтад Монгол Улсаас оролцож буй анхны Ерөнхий сайд нь ноён Сайханбилэг та болж байна гэдгийг онцлоод Монголын эдийн засгийн цаашдын төлөв байдалд анхаарч, ач холбогдол өгч байгаагаа хэллээ. Зуны Давосын чуулга уулзалтад Монгол Улс өндөр ач холбогдол өгч, Ерөнхий сайдын хэмжээнд оролцож байгаад Дэлхийн эдийн засгийн чуулга уулзалтыг үндэслэгч, гүйцэтгэх захирал Клаус Шваб талархлаа илэрхийллээ.

Зуны Давосын чуулга уулзалт 2007 оноос БНХАУ-ын Далянь, Таньжин хотуудад ээлжлэн зохион байгуулагдаж ирсэн бөгөөд энэ удаагийн чуулга уулзалтад 90 гаруй орны Засгийн газар, бизнес, судалгаа шинжилгээ болон хэвлэл мэдээллийн 1500 гаруй төлөөлөгч оролцохоор иржээ.

“Өсөлтийн шинэ чимэглэлийг зураглах нь” ерөнхий сэдвийн хүрээнд шинжлэх ухаан, мэдээллийн технологийн хөгжил, түүнээс эдийн засаг, нийгмийн амьдралд үзүүлж буй нөлөөлөл, дэлхийн эдийн засгийн байдал, байгалийн нөөцийн хомсдол болон Хятадын эдийн засгийн тэлэлт зэрэг чиглэлээр 160 орчим хуралдаан болно гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Улсын Их Хурлын гишүүн, Нийгмийн бодлого, боловсрол, соёл, шинжлэх ухааны байнгын хорооны гишүүн Л.Эрдэнэчимэг, Г.Уянга, С.Одонтуяа нар өнөөдөр халдварт бус өвчний чиглэлээр Монгол Улсад ажлын айлчлал хийж байгаа НҮБ-уудын хамтарсан багийн гишүүдтэй уулзалт зохион байгууллаа.

НҮБ-уудын хамтарсан багийнхан Монгол Улсад энэ сарын 7-11-ны өдрүүдэд айлчлал хийж байгаа бөгөөд тэдний айлчлалын гол зорилго нь Монгол дахь НҮБ-ын удирдлагын баг болон НҮБХТХ-ний үр дүнгийн хэсгийг боловсруулах ажлын хэсгийн гишүүдэд дэмжлэг үзүүлэхэд оршиж байгаа юм. Монгол дахь хувь хүний хөгжлийн чиглэлээр хийж буй хүчин чармайлтууд халдварт бус өвчлөлтэй хэр хамааралтай байгааг ойлгох, түүний хэрэгжилтэд дэмжлэг үзүүлэх , халдварт бус өвчнүүд, тэдгээрийн тодорхойлогч хүчин зүйлсийг Монгол Улсын Засгийн газартай хийх хоёр талт хамтын ажиллагааны төлөвлөгөөтэй уялдуулах ба тэдгээр төлөвлөгөөнүүдийн хэрэгжилтийн явцыг хамтдаа үнэлэх юм байна.

Өнөөдрийн уулзалтаар УИХ-дахь эмэгтэй гишүүдийн төлөөлөл УИХ-аар хэлэлцэн баталсан Тамхины хяналтын тухай хуулийн хэрэгжилтийн явцын талаар мэдээлэл өглөө. Мөн УИХ-д өргөн баригдсан Архидан согтуурахтай тэмцэх тухай хуульд нэмэлт, өөрчлөлт оруулах тухай хуулийн төслийн талаар мэдээлэл өгч, санал солилцсон юм.

Түүнчлэн Монгол Улсад хүүхэд гэмтэж бэртэх, түлэгдэх зэрэг эрсдэлд орох явдал маш их байгааг УИХ-ын гишүүн Г.Уянга хэлээд, энэ чиглэлээр НҮБ-тай илүү бодитой ажил хийх байдлаар хамтарч ажиллах хүсэлтэй буйгаа илэрхийлсэн юм. УИХ-ын гишүүн Л.Эрдэнэчимэг энэ үеэр УИХ-дахь эмэгтэй гишүүд нийгэм рүү чиглэсэн, хүний эрүүл мэндийн талаарх хууль, тогтоомжуудыг батлах чиглэлд илүү анхаарч ажиллаж байгаа талаар хэлж байсан.

Уулзалтад Нийгмийн бодлого, боловсрол, соёл, шинжлэх ухааны байнгын хорооны ажлын албаны ажилтнууд, Эрүүл мэндийн яамны төлөөлөл, НҮБ-ын Хөгжлийн хөтөлбөр, НҮБ-ын Хүүхдийн сан, НҮБ-ын Хүн амын сан, Азийн хөгжлийн банк, Дэлхийн эрүүл мэндийн байгууллагын төлөөлөл оролцлоохэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.