“Марко Поло” кинонд оролцон тоглосон жүжигчид өнөө өглөө эх орондоо ирлээ. Монгол Улсаас 40 орчим хүний бүрэлдэхүүнтэй баг Унгар улсад болсон зураг авалтад очиж оролцсон юм. Монголчуудын нүүдэлчин ахуй амьдрал, зан заншлыг дэлхийн 50 сая үзэгчийн хүртээл болгох зорилготой “Марко Поло” киноны дараагийн зураг авалт Малайз улсад үргэлжилнэ.
АНУ-ын Нэфтликс компанийн хөрөнгө оруулалтаар бүтээж байгаа “Марко Поло” киноны зураг авалтад мэргэжлийн жүжигчдээс гадна Унгар улсад амьдарч байгаа 300 гаруй монгол хүн оролцон тоглосон байна. Соёлын тэргүүний ажилтан А.Цэгмидийн хувьд гол дүрд тоглоогүй ч өөрийн хувирсан 7 дүрээрээ Монгол хүний онцлог, өвөрмөц байдлыг товойлгон үзүүлэхийг зорьсон ажээ.
Ерөнхий сайд Ч.Сайханбилэг БНХАУ-ын Далянь хотод болж буй зуны Давосын чуулга уулзалтад оролцох үеэрээ Монгол Улсад эрчим хүчний төсөл хэрэгжүүлж буй “Пауэр Чайна”, “Сэнко-III” компанийн удирдлагуудтай уулзлаа. Уулзалтад Эрчим хүчний сайд Д.Зоригт, УИХ-ын гишүүн Д.Сумъяабазар, Ерөнхий сайдын ахлах зөвлөх Б.Дэлгэрмаа болон Могул пауэр, Бодь группийн төлөөлөл оролцлоо.
УИХ-ын гишүүн, УИХ-ын Өргөдлийн байнгын хорооны дарга О.Баасанхүү өнөөдөр Үндсэн хуулийн Цэц/ҮХЦ/-ийн дунд суудлын хуралдаанаас гаргасан шийдвэртэй санал нийлэхгүй байгаагаа сэтгүүлчдэд мэдээллээ. ҮХЦ-ийн дунд суудлын хуралдаанаар өчигдөр “УИХ-ын гишүүн нь Засгийн газрын гишүүнийг огцруулах асуудлыг УИХ-д тавьж, хэлэлцүүлж байгаа нь Засгийн газрын танхимын зарчмаар ажиллах, Үндсэн хуулийн үзэл баримтлалыг алдагдуулж байна” гэсэн дүгнэлтийг гаргасан юм.
Нийслэлийн Мэргэжлийн Хяналтын газрын даргын баталсан урьдчилан сэргийлэх удирдамжтай шалгалтаар Баянгол дүүргийн 20 дугаар хорооны нутаг дэвсгэрт байрлах “Ви Си” ХХК-ийн хашаанд “Тэнүүн зоргол” хоршоо “Ойн тухай” хууль зөрчин иргэдээс хууль бусаар бэлтгэсэн 50-60 орчим тонн хуш модны самар худалдан авч нөөцөлж байсныг шалгалтаар илрүүлжээ. Энэ асуудлыг Улсын мөрдөн байцаах газартай хамтарч үргэлжлүүлэн шалгаж байгаа аж. 
СЭРЭМЖЛҮҮЛЭГ:
Өнөөдөр Улс төрийн хилс хэрэгт хэлмэгдэгсдийн дурсгалыг хүндэтгэх өдөр тохиож, хэлмэгдэгсдийн хөшөөнд цэцэг өргөлөө. Цэцэг өргөх ёслолд Монгол Улсын Ерөнхийлөгч Ц.Элбэгдорж, Улсын Их Хурлын дарга З.Энхболд, МАН-ын Удирдах зөвлөлийнхөн, Батлан хамгаалах яам, МоАХ, Цагаатгах ажлыг удирдан зохион байгуулан комиссынхон, хэлмэгдэгсдийн ар гэр, үр хүүхдэд, ахмадууд оролцлоо. Энэ өдрийг тохиолдуулан “Улс төрийн хэлмэгдүүлэлт ба цагаатгал” сэдэвт гэрэл зургийн үзэсгэлэнг нээсэн юм. Үзэсгэлэнд хэлмэгдэгсдийн гэрэл зураг, улс төрийн хилс хэрэгт 1939-2013 онд цагаатгагдсан хэлмэгдэгсдийн ажил, мэргэжил, нас, ялын болон шийтгэгдсэн оны судалгаа зэргийг нарийвчлан гаргаж дэлгэн үзүүлжээ.
Та бүхэн доорх бичлэгээс Унгарын хилээр орохоор хүүхдээ тэвэрсэн дүрвэгч эрийг дэгээдэж унагасан телевизийн зураглаач Petro Laszlo-ийн дүрсийг харж байна. Түүний энэ үйлдлийг дэлхий нийтээр жигшин, олон нийтийн сүлжээгээр маш хүчтэй шүүмжилсээр байгаа юм.
Орчин үеийн Хил хамгаалах байгууллага үүсч, хөгжсөний 82 жилийн ойг тохиолдуулан Хил хамгаалах байгууллагын “Шилдэг ахлагч” шалгаруулах тэмцээн явагдаж байна. Мөн Хил хамгаалах байгууллагын 2015 оны зорилт, “Эрүүл чийрэг-хилчин” хөтөлбөрийг хэрэгжүүлэх үүднээс гэрээт хилчдийн бүрэлдэхүүний цэргийн мэргэжил, албаны ур чадвар, үүрэг гүйцэтгэх чадавхийг дээшлүүлэх зорилготой шилдэг гэрээт хилчин шалгаруулах тэмцээн давхар явагдаж байна.
Төрийн байгууллагын архив, албан хэрэг хөтлөлт, ажлын зохион байгуулалтын улсын үзлэг энэ сарын 7-ны өдөр эхэлсэн. Одоогоор Архангай, Увс, Баянхонгор, Хөвсгөл, Завхан аймагт улсын үзлэг явагдаж байгаа аж.