Month: September 2015

Нийслэлийн Мэргэжлийн хяналтын газраас энэ сард эм хангамжийн 11 байгууллага, иргэний үйл ажиллагаанд шалгалт явуулжээ. Ингэхэд хугацаа дууссан эм худалдаж байсан зөрчил илэрсэн байна. Тухайлбал, “Сүлдэн” эмийн санд 36 нэрийн 600 мянга гаруй төгрөгийн эмийг борлуулсан нь илэрчээ. Мөн “Сүлдэн”, “Ананас” эмийн санд Монгол Улсад бүртгэлгүй 54 нэр төрлийн хоёр сая орчим төгрөгийн эм худалдаалсан нь илэрсэн байна.

Тиймээс нэр бүхий эмийн сангуудад албан шаардлага хүргүүлж холбогдох мөнгөн торгууль оногдуулжээ. Цаашид “Ананас” эмийн сан, “Интимэйт” биологийн идэвхит бүтээгдэхүүн ханган нийлүүлэх байгууллагуудын тусгай зөвшөөрлийг цуцлах саналтай байгаагаа нийслэлийн Мэргэжлийн хяналтын газраас дурьджээ.

Тус байгууллагаас эмийн сангаас гадна сургууль, цэцэрлэгийн хичээлийн бэлтгэл, үдийн цайн хөтөлбөрт шалгалт хийсэн юм. Энэ мэдээллийг дэлгэрүүлэн эргэн хүргэх болно

“Чингис хаан” нисэх буудлаас өчигдөр өглөө 09:00 цагт хөөрөх ёстой байсан Улаанбаатар-Сөүлийн чиглэлийн нислэг техникийн саатлын улмаас хойшилжээ. Нисэх буудлын зүгээс нислэг үйлдэх байсан онгоцонд техникийн саатал гарсан учраас зорчигчдыг 14 цаг хүртэл хүлээхийг хүссэн байна.

Өчигдөр 14:00 цагт жижиг онгоцоор нислэг үйлдэж, Сөүл рүү нисэх байсан зорчигчдоос 36 хүн суудал хүрэлцэлгүй үлджээ. Тэдгээр зорчигчдыг өнөөдрийн нислэгээр явуулахаар болж, нөхөн төлбөрт 100 ам.доллар өгсөн байна.

Одоогоос 99 жилийн өмнө буюу 1916 оны энэ өдөр /09.17/ Бүгд Найрамдах Монгол Ард Улсын төрийн тэргүүн, Ерөнхий сайд, Монгол ардын намын /МАХН/ Ерөнхий нарийн бичгийн дарга, Улс төрийн товчооны гишүүн, Улсын баатар, Хөдөлмөрийн баатар, маршал Ю.Цэдэнбал мэндэлсэн түүхтэй. Өнөөдөр Ю.Цэдэнбал агсны мэндэлсэн ойг тохиолдуудан МАН, МАХН-ын удирдлагууд намын гишүүд болон гэр бүлийнхэн нь түүний хөшөөнд цэцэг өргөж, хүндэтгэл үзүүллээ. Маршал Ю.Цэдэнбал нь Монголын нам, төрийг 44 жил тэргүүлэхдээ улс орноо хөгжүүлэх, ард түмний аж амьдралыг дээшлүүлэн соёлжуулах, улсын тусгаар тогтнол, батлан хамгаалах хүч чадлыг бэхжүүлэхээр олон ажил хийсэн гэж эрдэмтэн судлаачид үздэг.

Баруун аймгуудыг нийслэлтэй хатуу хучилттэй авто-замаар холбох ажил үргэлжилж байна. Тухайлбал Баянхонгор аймгийн Бууцагаан сумаас Алтай чиглэлийн 126.7 километрийн замын зураг төсөл гарч, газар шорооны ажлаа эхлүүлжээ.

Харин Алтай-Дарви чиглэлийн 165 километр замын хөрс шорооны ажил жигдэрч, далан байгуулах, өнгөн хөрсийг хуулж, нягтруулах ажил үргэлжилж байна. Увс аймгийн Сонгино-Хяргас нуурын зүүн хаяа чиглэлийн 135.5 километр замын тухайд хөрөнгө оруулагч, захиалагч, гүйцэтгэгч хооронд хамтран ажиллах албан ёсны гэрээ хийгдээгүй ч замын хөрс хуулах, нягтруулах, ус зайлуулах хоолой, бетон гүүр барих ажлыг гүйцэтгэгч талаас хийж эхэлсэн талаар Аж үйлдвэрийн яамнаас мэдээллээ.

Энэ чиглэлийн төслийн гүйцэтгэгч БНХАУ-ын “Шинжан Шинфа” компани өөрсдийн хөрөнгөөр ажлаа гүйцэтгэж байгаа боловч хөрөнгө оруулагч “Бохема” компаниас хөрөнгө оруулалт өнөөг хүртэл хийгдээгүй байгаа юм байна. Гэхдээ графикийн дагуу зам барилгын ажил үргэлжилж байгаа ажээ.

Сонгино-Хяргасын зам нь баруун бүсдээ өндөр ач холбогдолтойд тооцогдож байгаа бөгөөд энэхүү зам ашиглалтад орсноор Увс аймгаас Завхан-Улаанбаатар хүрэх зам саадгүй болох юм.

Ингэснээр 2017 он гэхэд Монгол Улсын 21 аймаг Улаанбаатар хоттой хатуу хучилттай замаар холбогдоно гэдгийг Аж үйлдвэрийн яамнаас онцоллоо.

Өчигдөр Сүхбаатар аймгийн Мөнххаан сумын 5 дугаар багийн нутагт үйл ажиллагаа явуулдаг “Нутгийн анар” ХХК-ийн Бүрэнцогтын уурхай руу орсон гурван хүн сураггүй болжээ. Энэ талаарх дуудлагыг аймгийн онцгой байдлын хэлтэс өчигдөр буюу 16-ны өдрийн 16:45 иржээ. Тэд БНХАУ-ын иргэд байжээ. Нэг иргэний цогцсыг өчигдөр оройн 22:20 цагт гаргажээ. Харин хоёр хүн нь олдохгүй байгаа учраас эрлийн ажиллагааг үргэлжлүүлэн зохион байгуулж буй юм байна.

Л.Гансүх нарт холбогдох хэргийн шүүх хурал гэрчүүдийн мэдүүлгээр үргэлжилж байна. Яг одоо Үндэсний аудитын газрын байцаагчаар ажиллаж байхдаа Багануур компани 3.6 тэрбум төгрөгийн алдагдал хүлээсэн гэж дүгнэлт гаргасан Ш.Ичинхорлоо мэдүүлэг өгч байна. Тэрээр “Уг хөтөлбөрийн гүйцэтгэгчээр ажилласан “MGLSBD”, “MGLSB” болон бэлтгэн нийлүүлэгч Багануур компанийн хооронд байгуулсан нүүрс худалдах, худалдан авах гэрээн дээр худалдан авч буй барааны хорогдол, жингийн зөрүү гарсан тохиолдолд хэрхэн шийдвэрлэх ямар арга хэмжээ авах талаар тусгаагүй. Гэрээнд худалдан авагч нь вагоноос буусан нүүрсийг шуудайлсны дараах жигнэсэн жингээр тооцоо хийнэ гэж зөвхөн нэг талын эрх ашгийг хангасан заалтыг оруулж өгсөн. Үүнд Багануур болон MGLSBD, MGLSB компани бүгд буруутай” гэсэн юм. Өмгөөлөгч “Нүүрс борлуулсан болон худалдан авсан хоёр тал хоёулаа буруутай гээд байхад яагаад зөвхөн “MGLSBD” компаниар хохирлыг төлүүлэх ёстой гэж дүгнэсэн юм бэ” гэхэд “Үүнийг хууль хяналтын байгууллага шийдвэрлэх биз” гэсэн юм. Мөн тэрээр “Би тайландаа “MGLSBD” болон “MGLSB” компанийг шалгасан тухайгаа тусгасан. Түүнээс биш Л.Гансүх гэсэн нэр нэг ч дурдагдаагүй. Өөрөөр хэлбэл миний тайланд Л.Гансүх гэдэг хүн Багануур компанид хохирол учруулсан гэсэн үг үсэг байхгүй” гэсэн юм.

Өнөөдөр Монголын өмгөөлөгчдийн баярын өдөр. Энэ өдөр Улсын дээд шүүх Монголын Өмгөөлөгчдийн холбооны нэр төр сэргээх тухай гомдлыг эцэслэн шийдвэрлэлээ. Тодруулбал, Монголын өмгөөлөгчдийн холбооноос өмгөөлөгч Г.Батбаярыг “Нэр төр, алдар хүндэд халдлаа” хэмээн шүүхэд гомдол гаргасан юм.

Өмгөөлөгч Г.Батбаяр нь “80 жилийн түүхтэй Монголын өмгөөлөгчдийн холбоо гэсэн нэрийг хэсэг хүмүүс дураараа авч ашиглаж байж болзошгүй байна. Хуучин ажиллаж байсан байгууллагын нэр, байр, түүнд хадгалагдаж байсан мэдээллийн бааз, олон оронтой тогтоосон байсан холбоо, сүлжээ зэргийг Монголын хуульчдын холбооны дэргэдэх Өмгөөллийн хороо эзэмших ёстой. Түүнээс одоо эзэмшиж ашиглаж буй хүмүүст хуулийн дагуу өв залгамжлах эрх үүсээгүй” хэмээн хэвлэлд ярьсан билээ. Улмаар МӨХ гэсэн нэрийг хүчингүй болгуулахаар өнгөрсөн онд шүүхэд хандаж байсан удаатай. Энэ нь Монголын өмгөөлөгчдийн холбоог шүүхэд хандахад хүргэсэн байдаг.

Уг хэргийг иргэний хэргийн нэгдүгээр шүүхэд хэлэлцэж хэрэгсэхгүй болгох шийдвэр гаргаад байсан бол Нийслэлийн давж заалдах шатны аравдугаар шүүх гомдлыг мөн л хэрэгсэхгүй болгож, анхан шатны шүүхийн шийдвэрийг хэвээр үлдээсэн. Өнөөдөр хоёр шатны шүүхийн шийдвэрийг Улсын дээд шүүх хянан хэлэлцээд, МӨХ-ны нэхэмжлэлийг хэрэгсэхгүй болголоо.

Нийслэлчүүдийн дунд хүлээлт үүсгээд байгаа Амгалангийн дулааны цахилгаан станцын ажил 97 хувьтай байна. Маргаашнаас станцад туршилт хийж, ирэх сараас эхлэн нийслэлчүүдийг дулаанаар хангана гэв.

Амгалангийн станцын хувьд цахилгаан, дулааны эрчим хүчийг тусгаарласан гэдэг утгаараа Монголд анхдагч хэмээн нэрлэгддэг. Сүүлийн 30 гаруй жилд Монголын эрчим хүчний системд шинээр холбогдсон хамгийн том хүчин чадалтай станц, Салхитын салхин паркаас хойш ашиглалтад орж буй эрчим хүчний салбар дахь анхны бүтээн байгуулалт хэмээн үнэлж байна. Энэ станц ашиглалтад орсноор 3, 4 дүгээр станцын нуруун дээрх өндөр ачааллаас хуваалцах юм. Өөрөөр хэлбэл Амгалангийн станц ашиглалтад орсноор 20 мянган өрх, 250 орон сууцны дулаан хангамжийн нөхцөлийг сайжруулах юм. Харин шинээр 40 мянган өрх, 500 орон сууц шинээр дулаанаар хангагдах аж.