Увс аймгийн хоёр газар түймэртэй байна. Тодруулбал тус аймгийн Сагил сумын Баянзүрх багийн “Хотлын дэнж” /сумаас 30 км/ гэдэг газар ойн түймэр гарчээ. Түймрийг унтраахаар өчигдөр 00.05 цагт аймгийн Онцгой байдлын газрын 10 албан хаагч, 1 техник хэрэгсэлтэйгээр гар,ч голомтод хүрч очжээ.
Мөн Зүүнговь сумын Тохой багийн “Тохойн хөвөө” /сумаас зүүн хойд зүгт 70 км-т/ гэдэг газар ОХУ-ын талаас хил даван хилийн 216-217 дугаар тэмдэгтээр 200 метрт хээрийн түймэр орж ирсэн байна. Энэ тухай дуудлага өнгөрсөн шөнийн 00:10 цагт аймгийн онцгой байдлын газарт ирсэн байна. Дуудлагын дагуу Баруунтуруун сумын Хилийн цэргийн 0311 дугаар ангийн 3, 4 дүгээр заставын 43 албан хаагч, 2 автомашин, орон нутгийн 26 иргэн нийт 69 хүн 2 техник хэрэгсэлтэйгээр ажиллаж байна.
Монголын сурагчдын холбоо, Нийслэлийн боловсролын газраас сурагчдад зориулсан нийтийн тээврээр зорчих цахим картыг үйлчилгээнд нэвтрүүлэхээр “Улаанбаатар смарт карт” компанитай хамтран ажиллаж эхэлжээ. Сурагчдын цахим карт нь сурагчийн үнэмлэхийн хамт хүчинтэй аж. Тиймээс сурагчид нийтийн тээврээр зорчихдоо сурагчийн үнэмлэхээ биедээ авч явах ёстой бөгөөд хугацаа нь дууссан болон огт үнэмлэхгүй бол сургуулийнхаа захиргаанд хандаж асуудлаа шийдвэрлэх хэрэгтэй гэдгийг Монголын сурагчдын холбооноос хэлж байна. Мөн цахим картан дахь мөнгө нь дууссан тохиолдолд сурагчийн үнэмлэхээ үзүүлээд 200 төгрөгөөр зорчих боломжтой аж. Цахим картыг сургуулиудын сурагчдын холбоогоор дамжуулан энэ сарын 21-нээс эхлэн нэгдсэн байдлаар тарааж эхлэх юм байна.
Хубилай хааны мэндэлсний 800 жилийн ойд зориулан хэвлүүлж буй есөн боть бүтээлийн нээлт өнөөдөр 14 цагаас “Интер ном” номын дэлгүүрт болох аж. 
Монголчуудын хэлж заншсанаар 22-ын товчооноос цааш буюу Сонгинохайрхан дүүргийн 32-р хороонд байрлах Авто худалдааны цогцолборын бүтээн байгуулалтын эхний ээлжийн ажил дуусчээ. Цогцолборыг ашиглалтанд оруулсанаар нийслэл дэх авто замын түгжрэл, агаар хөрсний бохирдол бууруулахад ихээхэн ач холбогдолтой юм.
Долларын ханш өнгөрсөн амралтын өдрүүдэд 2001 төгрөгт хүрсэн бол өнөөдрийн байдлаар “Найман шарга” зах дээр 1994 төгрөгтэй тэнцлээ. Тус захад нэг ам.долларыг 1993 төгрөгөөр авч, 1995 төгрөгөөр зарж байна. Харин арилжааны банкууд 1985 төгрөгөөр авч, 1996 төгрөгөөр зарж байна. Тавдугаар сард 1880 болж буурсан долларын ханш зургадугаар сараас өссөөр одоо 1995-2000 төгрөгийн хооронд хэлбэлзэж байна.
Зам, тээврийн яамны харьяа Далайн захиргаа гэж байгууллага байдаг. Удахгүй монгол залуу Панам улсын далбаатай, БНСУ-ын усан онгоцоор далайн тээвэрт гарна. Энэ тухай Далайн захиргааны ажилтнуудаас тодруулахаар тус байгууллагыг зорив. Манай улсаас 2013 онд арван залууг Солонгосын талын зардлаар БНСУ-ын Загас агнуур, технологийн их сургуульд сургажээ. Тус сургуульд монгол залуус 1.6 жил онолын хичээл үзэж, есөн сар их далайд дадлага хийнэ. Дөрвөн жилийн программыг богино хугацаанд үзэх учраас шалгуур өндөр. Англи, Солонгос хэлний өндөр мэдлэг хэрэгтэй. Энэ сургуулийг төгссөнөөр тэд удирдлагын офицер, инженер офицер гэсэн мэргэжилтэй болно. Одоогоор тус сургуулийг дөрвөн оюутан төгсчээ. Тэдний гурав нь эмэгтэй. Одоогоор тэд Зам, тээврийн яам, Далайн захиргаанд ажиллаж байна. Нэг эрэгтэй нь удахгүй далайд гарахаар бичиг баримтаа бүрдүүлж байгаа Э.Энхбаяр. Тэрээр Панамын усан онгоцон дээр арван сар дадлага хийсэн туршлагатай. Дадлага хийх хугацаандаа 13 орноор дамжсан. Гуравдугаар зэргийн инженер офицер. Түүний диплом олон улсад хүлээн зөвшөөрөгдөнө. Монгол орон жилийн дөрвөн улиралтай болохоор элдэв далайн өвчинд нэрвэгдэх нь бага гэнэ. Манай улс Солонгос улстай хамтарсан 50: 50 хувийн хөрөнгө оруулалттай далайн тээврийн компани байгуулсан аж. Солонгосын талаас хувь нийлүүлсэн компани нь зургаан хөлөг онгоцтой. Тэр нь янз бүрийн орны далбаан дор үйл ажиллагаа явуулах эрхтэй. Э.Энхбаярын ажиллах хүсэлтээ гаргасан усан онгоц нь Панамын далбаан дор үйл ажиллагаа явуулдаг Солонгосын хөлөг онгоц. Хөдөлмөрийн гэрээгээ байгуулсан. Жилд арван сараас доошгүй далайд хөвөх болзолтой. Гадаад харилцаа, Зам тээврийн яамдууд бичиг баримтыг бүрдүүлэх ажилд идэвхтэй дэмжлэг үзүүлсний дүнд тэрээр энэ ондоо багтаж хүссэн далайдаа аялах боломж бүрджээ. Э.Энхбаяр Монгол Улсынхаа далайн тээврийн ирээдүйг өөдрөгөөр төсөөлж байна. Өнөөдөр Солонгост дахин хоёр оюутан далайн мэргэжлээр сурч байгаа. Манай улс далайн хөлөг онгоцтой болж чадвал манай залуус гурван жилийн дотор бэлтгэгдэж амжина. Ямар ч үнэтэй усан онгоц худалдаж аваад өөрийн өртгөө маш богино хугацаанд нөхнө гэдгийг дэлхийн усан тээвэр баталдаг гэнэ. Дэлхий дээр усан онгоцныхоо тоогоор Панам, Хятад улс тэргүүлнэ. Дэлхийн тээврийн 70-80 хувийг усан тээвэр эзэлдэг бөгөөд хамгийн хямд, хүртээмжтэй тээвэрт тооцогддог гэнэ. Өнөөдөр тэнгис далайд Монгол Улсын далбааг мандуулсан 500 гаруй хөлөг аялж байгаа аж. Бидний ярианы явцад мэргэжилтэн эмэгтэй “Манайхан төрийн далбааны тухай хамаагүй ярьдаг үзэгдлийг зогсооход танай сонин туслах хэрэгтэй” гэсэн юм. Тус байгууллагын ажилтнуудад бусад орны хөлөг онгоцонд далбаагаа түрээслүүлдэг, худалддаг, өлгөдөг гэх мэтийн буруу хэллэг хүндхэн тусдаг гэнэ. Зүй нь “Монгол Улсын далбааг мандуулах эрх” гэсэн мэргэжлийн хэллэгийг ашиглах ёстой аж.
