Month: August 2015

Хил хамгаалах байгууллагын гэрээт хилчдийн анхан шатны сургалт
наймдугаар сарын 5-ны өдрөөс эхэлжээ. 21 хоногийн хугацаатай үргэлжлэх
уг сургалт Баянчандмань дахь Хил хамгаалах албаны тусгай бэлтгэлийн
цогцолборт явагдаж байгаа юм.

Сургалтад 21 аймгаас ирсэн хилчид хамрагдаж байгаагаас бүрэн дунд болон
дээд боловсролтой залуус 90-ээс дээш хувийг нь эзэлж байна. Мөн
гэрээгээр алба хаах сонирхолтой 20 гаруй залуусыг хилийн ангиудаас
илгээсний дагуу давтан сургалтад хамруулжээ. Түүнчлэн Улаанбаатар хотын
Замын цагдаагийн газартай хамтран гэрээт хилчин жолооч бэлтгэхээр
энэхүү сургалтандаа А ангиллын буюу мотоцикль жолоодох эрхийн үнэмлэх
олгох хичээлийг ч багтаажээ. Гэрээт хилчид 21 хоногийн хугацаатай
албандаа дадлагажаад Хилийн 0198, 0132, 0129, 0168 дугаар ангиудад
хувиарлагдан улсын хил хамгаалах үйлсэд хүчин зүтгэх юм.

Өмнө нь амьдралдаа алдаж, хорих ангид ял эдэлсэн иргэд
өнөөдөр УИХ-ын ээлжит бус чуулганаар хаалттай хэлэлцэж баталсан
Өршөөлийн хуулийн талаарх үзэл бодлоо илэрхийллээ. Эдгээр залуус
“Манлайбаатар ирээдүй” ТББ байгуулан, нэгдсэн хүмүүс аж.

Эдгээр иргэд хулгай, танхайн хэргээр “аавын хаалга” татсан байна.
“10-30 жил төмөр торны цаана сууна гэдэг хатуу шийтгэл. Гэхдээ бид
хийсэн хэргээ зөвтгөж байгаа юм биш. Амьдралдаа алдсан нэгнийгээ нийгэм
нь бүү ад үзэж, ялгаварлаж хандаач ээ. Нэгэнт өршөөлийн хуулийг баталж,
ялтангуудаа өршөөх гэж байгаа бол өнөөдөр төмөр торны цаана хоригдон
суугаа 6000 гаруй хоригдлоо бүү ялгаварлаач, бүгдийг нь өршөөж, олон
жилийн ялтай хоригдлуудынхаа ялаас нь нэг, хоёр жил ч гэсэн хасч өгөөч”
гэсэн гуйлт, хүсэлтийг эдгээр хүмүүс тавьсан юм.

• Монгол Улсын Үндсэн хуульд хүн бүр тэгш эрхтэй гэсэн байдаг. Энэ
  хуулийн заалтын дагуу иргэн бүр Өршөөлийн хуульд хамрагдах эрхтэйг иргэн
  Н.Сүхбат тодотголоо. Тэрбээр одоогоос 12 жилийн өмнө 110 мянган
  төгрөгийн гар утас хулгайлсан хэргээр 11 жилийн хорих ял авч, Булган
  аймгийн онцгой дэглэмтэй хорих ангид 11 жил хоригдсон байна. 2009 онд
  Монгол Улсын Ерөнхийлөгчийн гаргасан Өршөөлийн хуульд хамрагдах хүсэлтээ
  хорих ангийн удирдлагуудад гаргасныхаа төлөө үлдсэн таван жилийн ялаа
  гянданд өнгөрүүлсэн гэж ярив. Тэрбээр өнгөрсөн оны тавдугаар сард
  суллагджээ.
• Иргэн н.Сүхбат хэвлэлийн хурлын үеэр хорих ангиудад хүний эрх
  зөрчигдөж байгаа ярихдаа “Өлзийбат гэж дэд хурандаа хорих ангиудаар явж,
  хоригдлуудад буу тулган зодож, тамладаг байсан” гэлээ.
• Одоогийн Өршөөлийн хуульд ял эдэлж буй 6000 ялтны 2000-ыг нь хамруулах
  тухай мэдээлэлтэй байгаагаа эдгээр залуус ярьж байлаа. Тэд энэ талаар
  “Үлдсэн 4000 ялтныг өршөөхгүй байж магадгүй. Хамгийн гол нь бид энэ
  асуудлыг хөндөж, тэдний ар гэр, үр хүүхдүүдийнх нь сэтгэлийг нь дэвтээж,
  УИХ-аас батлагдсан Өршөөл үзүүлэх тухай хуулиар хоригдлуудад тэгш
  боломж олгож, өршөөх ёстой” гэсэн юм.

Тээврийн хэрэгслийн албан татвар хураамжаа төлөөгүй болон автомашины
үзлэг, оношилгоондоо ороогүй жолооч нарт хүлээлгэх хариуцлагыг
чангатгахаар Замын хөдөлгөөний аюулгүй байдлын тухай хуульд заасан. Шинэ
хууль ирэх есдүгээр сарын 1-нээс хэрэгжиж эхэлнэ. Тус хуулийн
хэрэгжилт болон авто тээврийн хэрэгслийн албан татварын хураамжийн
төлөлт, хариуцлагын талаар өнөөдөр Авто Тээврийн үндэсний төв /АТҮТ/
болон Замын цагдаагийн газраас мэдээлэл хийлээ.

Улсын хэмжээнд энэ сарын 19-ний өдрийн байдлаар 351 474 тээврийн
хэрэгсэл үзлэг оношлогоондоо хамрагджээ. Улаанбаатар хотод 164 мянган
тээврийн хэрэгсэл техникийн хяналтын үзлэгт хамрагдсан байна. АТҮТ-ийн
тооцооллоор 2015 онд 500 гаруй мянган тээврийн хэрэгсэл үзлэгт хамрагдах
ёстой аж.

Есдүгээр сарын 1-нд багтаж үзлэгтээ хамрагдахыг албаныхан уриалж байна.
Хэрэв Замын хөдөлгөөний хариуцлагын тухай хууль хэрэгжээд эхэлвэл
үзлэг, оношлогоондоо хамрагаадаагүй иргэнийг 96 мянган төгрөгөөр, аж
ахуйн нэгж, байгууллагыг 192 мянган төгрөгөөр торгож, тээврийн
хэрэгслийг нь журамлана гэв.

Одоогоор үзлэг оношилгоонд хамрагдах ёстой нийт тээврийн хэрэгслийн 35
орчим хувь оношилгоондоо хамрагдаагүй байна. Тиймээс бүртгэл, хяналт,
техникийн хяналтын үзлэгийн төвүүд уртасгасан цагийн хуваариар ажиллах
юм. Тээврийн хэрэгслийн бүртгэлийн газрын “Хөсөг”, “Да Хүрээ”, “Таван
ган” салбарууд амралтын өдрүүдэд уртасгасан цагийн хуваариар ажиллана.
Баянгол, Баянзүрх, Сонгинохайрхан дүүргийн техникийн хяналт, үзлэгийн
төвүүд ажлын өдрүүдэд 08:30-20:30, амралтын өдрүүдэд 09:00-19:00 цаг
хүртэл ажиллах юм байна.

Нийслэлийн хэмжээнд цэцэрлэгийн хүрэлцээ хангалтгүй байгааг ашиглан сургалт эрхлэх тусгай зөвшөөрөлгүйгээр цэцэрлэг ажиллуулж, хууль зөрчих тохиолдол цөөнгүй гардаг. Эцэг, эхчүүд хүүхдээ төрийн бус өмчийн цэцэрлэгт явуулахаар шийдсэн бол тухайн байгууллага нь сургалт эрхлэх тусгай зөвшөөрөлтэй, зөвшөөрөл нь үүсгэн байгуулагчийн нэр дээр байгаа, зөвшөөрлийн хугацаа дууссан эсэхийг сургалтын байгууллагаас лавлаж тодруулж байхыг Мэргэжлийн хяналтын ерөнхий газар зөвлөж байна.

Тусгай зөвшөөрөл авсан байгууллага нь таны хүүхдийг тав тухтай эрүүл, аюулгүй орчинд асарч хамгаалан, хөгжүүлэх, хүмүүжүүлэх, сургах чиглэлээр ажиллахаас гадна болзошгүй осол, гэмтэл, хоолны хордлого зэргээс урьдчилан сэргийлэх үүрэгтэй.

Төрийн өмчийн бус цэцэрлэг ажиллуулах тусгай зөвшөөрлийн гэрчилгээг бусдад худалдах, бэлэглэх, барьцаалах болон гэрчилгээ гаргаж өгөх нэрээр бусдаас их хэмжээний мөнгө залилан авах хэрэгт автахгүй байхыг сэрэмжлүүлж байна.

Гэрчилгээг бусдаас худалдаж болон бэлгэнд авсан тохиолдолд тухайн тусгай зөвшөөрлийг хүчингүй болгодог хуулийн заалттайг Мэргэжлийн хяналтын ерөнхий газар анхааруулж байна.

Бэлхийнхэн цэцэрлэгтэй болжээ

Сүхбаатар дүүрэг нь цэцэрлэгийн насны 11027 хүүхэдтэй, үүнээс төрийн өмчийн хамран сургах тойргийн 27 цэцэрлэгт 7837 хүүхэд цэцэрлэгт хамрагдаж, цэцэрлэггүй 2, 5, 9, 12, 19 дүгээр хороод байгаа бөгөөд дүүргийн хэмжээнд цэцэрлэгт хамрагдаагүй 3190 хүүхэд байна.

Иймд дүүргийн хөрөнгө оруулалтаар 18 дугаар хорооны Бэлхийн 49 дүгээр гудамжинд газрын асуудлыг шийдвэрлэж, Дэлхийн Зөн Монгол олон улсын байгууллагын санхүүжилтээр 70 хүүхдийн ортой хүүхэд, байгаль, орчинд ээлтэй технологиор “Эко цэцэрлэг”-ийн барилга барих шав тавих ёслолын үйл ажиллагааг өнөөдөр зохион байгууллаа.

Арга хэмжээнд Засаг даргын орлогч Л.Амарзаяа, 18-р хорооны Засаг дарга З.Төмөрбаатар, Засаг даргын Тамгын газрын холбогдох мэргэжилтнүүд болон Дэлхийн Зөн Монгол олон улсын байгууллага, иргэдийн төлөөлөл оролцов.

2016 оны 09 дүгээр сард тус цэцэрлэг ашиглалтанд орсоноор 4-5 насны 70 хүүхэд байгаль орчинд ээлтэй технологиор баригдсан Эко цэцэрлэгт сургуулийн өмнөх боловсрол эзэмших боломж бүрдэх юм.

Өчигдөр нийслэлд ахуйн чанартай гал түймэр нэг гарчээ. Тодруулбал, Сүхбаатар дүүргийн 19 дүгээр хорооны “Шарга морьт”-ын задгайд иргэн Д-ийн байшин шатаж байна гэсэн дуудлагыг 2015.08.19-ний өдрийн 16:48 цагт хүлээн авч Баянгол дүүргийн Онцгой байдлын хэлтсийн Гал унтраах, аврах 18 дугаар ангийн 6 албан хаагч ажиллаж унтраасан байна.

Харин орон нутагт гал түймрийн хоёр дуудлагатай хоножээ. Тухайлбал, Булган аймгийн Булган сумын Ачуут багийн “Шинэ хороо”-ны 22 дугаар гудамжийн 5 тоотод иргэн Э-ийн 5 ханатай гэр шатаж байна гэсэн дуудлагыг 2015.08.19-ний өдрийн 16:50 цагт хүлээн авч тус аймгийн Онцгой байдлын газрын Гал унтраах, аврах 20 дугаар ангийн 7 албан хаагч унтраажээ. Хэнтий аймгийн Хэрлэн сумын 1 дүгээр багийн “Хийд”-ийн 18 дугаар гудамжийн 13 тоотод иргэн З-ийн 4 ханатай гэр шатаж байна гэсэн дуудлагыг 2015.08.20-ны өдрийн 03:35 цагт хүлээн авч тус аймгийн Онцгой байдлын газрын Гал унтраах, аврах 32 дугаар ангийн 8 албан хаагч, 2 техник хэрэгсэлтэйгээр тус тус ажиллаж унтраасан байна.

Туул голын сав газарт хамрагдах Улаанбаатар хотын зургаан дүүрэг, таван
аймгийн 38 сумын гол горхи, булаг шандыг тоолж бүртгэжээ. Уг ажлыг Туул
голын сав газрын захиргааныхан сум, дүүргийн ЗДТГ-ын албан хаагчидтай
хамтран гүйцэтгэсэн байна. Тооллогын дүнд урьдчилсан байдлаар сав газрын
хэмжээнд нийт 305 гол горхи, 514 булаг шанд, 40 рашаан, 107 нуур
тойром, 7393 худаг байгааг тогтоожээ. Мөн газрын доорх усны хяналтын 46
цооног, 10 усан сан, услалтын 15 систем, үерийн хамгаалалтын 25 далан
суваг, 29 цэвэрлэх байгууламж зэргийг тооллогод хамруулсан аж. Нийт гол
горхийн 242 нь байнгын урсацтай, булаг шанд 514 байсны 41 нь ширгэсэн,
14 нь сэргэсэн байгааг энэ үеэр тогтоосон аж. Мөн эхийг нь хашиж
хамгаалах шаардлагатай 11 рашаан байжээ. Энэ онд цооног, худгийн тоо
өөрчлөгдөөгүй бол гол горхи, булаг, нуур тойрмын тоо нэмэгджээ. Гэхдээ
булаг шанд, гол горхи өмнөх жилүүдтэй харьцуулахад нэмэгдсэн байгаа нь
ширгэсэн, шинээр бий болсон, сэргэсэн зэрэг олон шалтгаантай байж болно.