Month: August 2015

Цагдаагийн ерөнхий газраас иргэд, аж ахуй нэгж, албан байгууллагад анхааруулга, сэрэмжлүүлэг өглөө. Тодруулбал, ХУД-ийн 11 дүгээр хорооны нутаг дэвсгэрт байрлах хүнсний дэлгүүр, БГД-ийн “Түмэн плаза” дэлгүүр болон бусад аж ахуйн нэгжүүдээр үйлчлүүлэхдээ 20 мянган төгрөгийн АВ2200647, АВ8839769 серийн дугаартай хуурамч мөнгөн дэвсгэртээр гүйлгээ хийсэн этгээдийг Цагдаагийн газраас эрэн сурвалжилж байгаа бөгөөд ийм хуурамч мөнгөтэй холбоотой мэдээлэл гарсан даруйд ЦЕГ-т хандахыг уриаллаа.

Хуурамчаар үйлдсэн мөнгөн дэвсгэртийг Улаанбаатар хотын нутаг дэвсгэрт бэлэн мөнгөөр худалдаа үйлчилгээ эрхэлдэг зах, хүнсний дэлгүүр, ТҮЦ, гар дээрээс наймаа эрхэлж байгаа иргэн, аж ахуйн нэгжүүдээр дамжуулан гүйлгээнд оруулж байгаа нь тогтоогдоод байна. Иймд бэлэн мөнгөөр худалдаа, үйлчилгээ эрхэлдэг иргэд энэ төрлийн гэмт хэргийн талаар мэдээлэл өгөх бол 96102102 утсанд хандахыг ЦЕГ-аас зөвлөлөө.

Одоогоор Эрүүгийн цагдаагийн газраас хуурамч мөнгөн тэмдэгтийн санд бүртгэгдсэн хуурамч мөнгөн тэмдэгтийн 25 хувийг эзэлж байсан өнгөт хэвлэгч төхөөрөмж ашиглан үйлдэгдсэн 47 серийн 662 ширхэгийг “У” гэгч нь хуурамчаар үйлдэн гүйлгээнд оруулсныг тогтоон эрүүгийн хэрэг үүсгэн шалгаж байна. Мөн эзэн холбогдогч нь тогтоогдоогүй үндэслэлээр түдгэлзүүлсэн 213 үйлдлийг нэгтгэн шалгаж прокурорын байгууллагад шилжүүлжээ.

Улаанбаатар хотод инженерийн шугам сүлжээний ажил гүйцэтгэх зорилгоор түр хугацаанд буюу 08 дугаар сарын 21-23-ны хооронд хаах авто замын хуваарь

Сүхбаатар аймгийн Баруун-Урт суманд энэ сарын 19-нд 1945 оны Чөлөөлөх дайны ялалтын 70 жилийн ойн баярыг тэмдэглэн өнгөрүүллээ. 1945 оны Чөлөөлөх дайнд оролцсон МАХЦ-ийн дивизүүдийн тугийг залж, тус аймаг дахь Үндэсний аюулгүй байдлыг хангах тусгайлсан чиг үүрэг бүхий байгууллагууд цэргийн ёслолын жагсаал алхлаа.

Харин үдээс хойш Зэвсэгт хүчний 084 дүгээр анги шүхрийн буулт, гардан тулааны үзүүлэх тоглолт, ЗХЖШ-ын дэргэдэх Үлгэр жишээ, үлээвэр найрал хөгжмийн үзүүлэх тоглолт, “Бид ялав” үзэсгэлэнгийн нээлт, баярын хурал, ЦДБЭЧ-ийн уран бүтээлчдийн хүндэтгэлийн тоглолт болсон. Арга хэмжээнд БХЯ-ны Төрийн нарийн бичгийн дарга, хошууч генерал З.Болдбаатар, ЗХЖШ-ын дэд дарга, хошууч генерал Б.Баярмагнай, БХЯ, ЗХЖШ-ын удирдах бүрэлдэхүүн, ахмад дайчид, орон нутаг дахь Үндэсний аюулгүй байдлыг хангах тусгайлсан чиг үүрэг бүхий байгууллагууд оролцжээ.

Их жанжнаараа овоглосон Сүхбаатар аймгийн ард түмэн эх орноо батлан хамгаалах, хил хязгаарын халдашгүй дархан байдлыг сахин хамгаалах, залуу үеэ эх оронч үндэсний үзлээр хүмүүжүүлэхэд их хувь нэмэр оруулсан. ХХ зууны эхэн үеэс энэ нутагт ардын хувьсгалт цэргийн анги, салбар болон хязгаарын цэргийн отряд, заставууд байрлаж эх орныхоо аюулгүй байдлын манаанд соргогоор зогсож ирсэн гэдэг. Дэлхийн II дайны жилүүдэд энэ нутагт тухайлбал, Байшинтад Монгол ардын хувьсгалт цэргийн 7 дугаар морьт дивиз байрлаж байсан. БНМАУ Чөлөөлөх дайнд орох үед Тамсагбулаг, Матад, Өндөрхаанд байрлаж байсан морьт дивизүүд Зөвлөлтийн улаан армийн ангиудын хамт Дарьганга сумын нутагт хүч хуралдуулж, улмаар 1945 оны 8 дугаар сарын 9-нд Долоннуур-Жэхэгийн чиглэлээр дайнд орсон түүхтэй.

Сүхбаатар аймагт энэ өдөр ялалтын баярыг тэмдэглэсэн бол Дорноговь аймагт энэ сарын 22-нд мөн адил ёслол төгөлдөр тэмдэглэлээ. Харин нийслэлд энэ сарын 28-нд ялалтын баярт зориулсан арга хэмжээ үргэлжилнэ. Соёлын төв өргөөнд баярын хурал, хүндэтгэлийн концерт, цэрэг дайчдын хөшөөнд цэцэг өргөж хүндэтгэл үзүүлэх ажиллагаа зохиохоор Батлан хамгаалах яамнаас төлөвлөөд байна.

Монгол Улсын Ерөнхийлөгч 2015 оны 1 дүгээр зарлигаараа 1945 оны Чөлөөлөх дайны ялалтын түүхт 70 жилийн ойг улс орон даяар тэмдэглэн өнгөрүүлэхийг Засгийн газарт чиглэл болгосон билээ. Уг зарлигийн дагуу Засгийн газрын тогтоол гарч ойд бэлтгэх, тэмдэглэн өнгөрүүлэх ажлын хэсгийг Батлан хамгаалахын сайд Ц.Цолмон ахлан ажиллаж байна.

Нийслэлийн иргэдэд цахим хэлбэрээр газар өмчлүүлэх дөрөвдүгээр ээлжийн бүртгэл ажлыг зохион байгуулах бэлэн болжээ. 4 дүгээр ээлжинд нийслэлийн Баянзүрх, Сонгинохайрхан, Хан-Уул дүүргийн нийт 22 байршлын 8727 га газарт 34857 иргэнд газар өмчлүүлэх аж.
Цахим бүртгэл 08 дугаар сарын 25-ны өдөр 12 цагаас эхлэх бөгөөд бүртгэл эхэлснээс хойш 14 хоногийн хугацаанд WWW.UMCH.UB.GOV.MN, WWW.ULAANBAATAR.MN сайтуудаар хүсэлт хүлээн авна. Цахим газар өмчлөлийн талаарх дэлгэрэнгүй мэдээллийг 1800-1285 тусгай дугаар болон 11 319215, 11 315334 дугааруудаас лавлах боломжтой юм байна.

Монгол улсын Засгийн газрын 2012-2016 оны үйл ажиллагааны хөтөлбөрт тусгагдсан “Зөв Монгол хүүхэд” хөтөлбөрийг хэрэгжүүлэх зорилгоор Нийслэлийн Баянзүрх дүүргийн Засаг даргын Тамгын газар, Нийгмийн хөгжлийн хэлтэс, Хүүхэд, гэр бүлийн хөгжлийн төв хамтран “Эх орон 36” арга хэмжээг зохион байгуулж, зорилтот бүлгийн 150 хүүхдийг зусланд амраалаа.

Манай орны ихэнх нутгаар энэ зун гандуу байсан тул малчид гол горхины эрэг хавиар ургасан жаахан өвсөө булаацалдахад тулаад байна. Зарим сумын ЗДТГ-аас өвсний гарц арай ахиутай газруудыг малчдад хувааж өгч байна. Хэн хаана хэр том талбайн өвс хадаж авах вэ гэдэг нь малынх нь тооноос хамаарах аж. Өөр аймгийн нутгаас хаддан бэлтгэж буй газар ч бий. Төв аймаг гэхэд Дорнодын Матад, Хөлөнбуйр, Цагаан- Овоо, Булган, Баянтүмэн сумын 200 мянган га талбайгаас өвс хадаж эхэлжээ. Хоёр аймгийн Засаг даргын байгуулсан хамтран ажиллах гэрээний хүрээнд ийм зохицуулалт хийсэн юм байна.

Төв аймагт өнгөрсөн жил бэлтгэсэн 15 мянган боодол өвс байгаа аж. Бичин жилийн өвлийг өнөтэй давахын тулд үүн дээр нэмж, 100 мянга орчим тн өвс бэлтгэх шаардлагатай гэнэ. Иймээс тус аймгийн Засаг дарга захирамж гарган, 20-иос дээш насны иргэн бүр 20 кг өвс бэлтгэж, сум, багтаа тушаахыг даалгажээ.

“Хөршийн өдөр” арга хэмжээг угтан Баянзүрх дүүрэг дэх цагдаагийн хоёрдугаар хэлтсээс хариуцсан нутаг дэвсгэрийн 11 хорооны Засаг дарга, 88 СӨХ-ийн захирал, 11 хорооны 65 хэсгийн ахлагч нартай уулзалт зөвлөгөөнийг зохион байгууллаа.

Энэ уулзалт зөвлөгөөнөөр орон сууцны СӨХ болон гэр хорооллын хэсгийн хариуцсан гудамж, байр, нийтийн эзэмшлийн талбайд үйлдэгдэж байгаа гэмт хэрэг, зөрчлийн судалгааг танилцуулан түүнээс урьдчилан сэргийлэх “Хөршийн хөтөлбөр, Хөршийн хяналтын журам”-ыг хэрэгжүүлэх чиглэлээр тэргүүн туршлага нэвтрүүлсэн СӨХ-ийн үйл ажиллагааг сурталчилж бусдад нэвтрүүлэх, СӨХ, хороодын Засаг дарга, хэсгийн ахлагч нараар дамжуулан иргэдийн дунд “Хөршийн бүлэг” байгуулах ажлыг идэвхжүүлэх талаар харилцан санал солилцон цаашид авч хэрэгжүүлэх ажил арга хэмжээг тодорхойлж байгаа нь үр дүнтэй арга хэмжээ болж байгаа юм.

Мөн тус хэлтсээс хулгайн гэмт хэргээс урьдчилан сэргийлэх чиглэлээр хариуцсан нутаг дэвсгэрийн хэмжээнд үйл ажиллагаа явуулдаг 65 барьцаалан зээлдүүлэх газрын захиралуудтай уулзалт зохион байгуулж, харилцан мэдээ мэдээлэл солилцох “Facebook” групп нээн хамтран ажилласнаар иргэд, аж ахуйн нэгж байгууллагаас цагдаагийн байгуулагад ирүүлэх гэмт хэрэг, зөрчлийн мэдээ мэдээлэл нэмэгдэж үр дүнгээ өгч байна.