Month: August 2015

Өндрөөс унах гэж байсан иргэнийг аварчээ. Нийслэлийн Баянгол дүүргийн 2 дугаар хороо, 2 дугаар хорооллын 70 дугаар байрны 6 давхраас иргэн М /36 настай, эрэгтэй/ унах гээд байна гэсэн дуудлага нийслэлийн Онцгой байдлын газарт иржээ.

Дуудлагын дагуу нийслэлийн Онцгой байдлын газрын Аврах ангийн зургаан албан хаагч 2 техник хэрэгсэлтэй ажиллаж аюулгүй болгож, иргэнийг дүүргийн цагдаагийн албан хаагчид хүлээлгэн өгсөн байна.

Ази Номхон Далайн бүс нутгийн Хүний эрхийн Үндэсний Байгууллагуудын Чуулганы 20 дугаар ээлжит хурал, энэ сарын 26-28-ны өдрүүдэд Улаанбаатар хотноо болох тухай мэдээллийг өнөөдөр ХЭҮК-оос өглөө. Мөн 29-30-ны өдрүүдэд хоёр жил тутмын бага хурал буюу Эрүү шүүлтийн эсрэг элчин сайдуудын уулзалт арга хэмжээ болох юм байна.

Ази Номхон Далайн бүс нутгийн Хүний эрхийн Үндэсний Байгууллагуудын Чуулган нь бүс нутагтаа хүний эрхийн үндэсний байгууллагуудыг байгуулах, бэхжүүлэх үйл ажиллагааг дэмжин ажилладаг, гишүүн байгууллагуудаараа дамжуулан өөрийн бүс нутагт хүний эрхийг хөхиүлэн дэмжих, хамгаалах үндсэн зорилготой, ашгийн бус байгууллага юм.

Тус бүс нутгийн Хүний эрхийн Үндэсний Байгууллагууд АНДЧ-д гишүүнээр элсэх нь нээлттэй бөгөөд одоогоор 15 бүрэн эрхэт гишүүн, 7 харилцагч гишүүнтэйгээр үйл ажиллагаа явуулж байна. Бүрэн эрхэт гишүүнээр Парисын Зарчимд нийцсэн Хүний эрхийн Үндэсний Байгууллагыг элсүүлдэг бол Парисын Зарчимд бүрэн нийцээгүй нь харилцагч гишүүн болно. Бүрэн эрхэт гишүүн нь байгууллагыг төлөөлж, АНДЧ-ны шийдвэр гаргах байгууллага болох Чуулганы зөвлөлд санал өгөх эрхтэй зөвлөлийн төлөөлөгчтэй.

Монгол Улсын Хүний эрхийн Үндэсний Комисс нь АНДЧ-ны бүрэн эрхэт гишүүн бөгөөд 2015 оны 8 дугаар сараас буюу 20 дугаар ээлжит хурлаас эхлэн тус чуулганы даргаар ажиллах юм байна.

“Сингапур-2015” дэлхийн маркны үзэсгэлэнгээс Монгол Улсын Үндсэн хуулийн цэцийн орлогч дарга, Монгол Улсын гавьяат хуульч, доктор, профессор Н.Жанцангийн туурвисан Монгол Улсын ховор марк, мөнгөн тэмдэгтийн тухай ном нь мөнгөн медаль хүртэж Монгол маркны нэр хүндийг дэлхий дахинд өргөхөд хувь нэмрээ оруулав.

Н.Жанцан докторын энэ бүтээл нь гадаадын болон монголын нэртэй марк цуглуулагчдын цуглуулга, бүтээлд тулгуурласан бөгөөд монголын ховор, нэн ховор маркны шалгуурыг тодорхойлж, задлан шинжилгээ хийсэн анхны бүтээл боллоо.

Монгол маркны нэр хүнд дэлхий дахинд өсөж, монголын зарим ховор марк олон улсын дуудлага худалдаанд 50-100 сая төгрөгийн ханшид хүрч Монголын морин өртөөний үед хэрэглэж байсан нэн ховор захидлын дугтуй 100 мянган ам. доллараар зарагдсан үед энэхүү ном хэвлэгдэн гарч олны хүртээл болов.

Энэ номыг “Мөнхийн үсэг” компани 500 ширхэг хэвлэжээ.

Залуучуудын иргэний нийгмийн байгууллагуудын хөгжлийг дэмжих нь нийгэмд эерэг өөрчлөлт авчирч буйг таниулж, залуучуудын иргэний оролцоог нэмэгдүүлэх зорилгоор Монголын Залуучуудын Эвсэл ТББ-аас “Залуучуудын иргэний нийгмийн анхдугаар чуулган”-ыг Монголын залуучуудын өдрийг тохиолдуулан зохион байгуулж байна.

Энэ чуулган нь Нэгдсэн Үндэсний Байгууллагаас 2015 оны Олон улсын залуучуудын өдрийг “Залуучуудын иргэний оролцоо” сэдвийн хүрээнд зохион явуулахаар тогтсонтой уялдаж байгаа бөгөөд ХАХНХЯамны дэмжлэгтэй “Залуучуудын хөгжлийн сарын аян”-ы хүрээнд зохион байгуулагдаж буй томоохон арга хэмжээ юм.

“Залуучуудын иргэний нийгмийн анхдугаар чуулган”-аар Монгол Улсын Үндсэн Хуулиар тунхагласан “Иргэний, хүмүүнлэг, ардчилсан нийгмийг цогцлуулан хөгжүүлэх” эрхэм зорилгод хүрэхэд залуучуудын утга учир бүхий идэвхтэй оролцоо зайлшгүй болохыг таниулж, нийгэмд эерэг өөрчлөлтийг авчрахыг уриалсан баримт бичгийг батлах болно. Энэхүү баримт бичиг нь нийт залуучуудад хандахаас гадна ХАХНХЯ-ын Сайд С.Эрдэнэ, НҮБХАС-ын суурин төлөөлөгч Ноами Китахара нарт гардуулах аж.

Иймд энэхүү чуулганы уриаг “Залуус+Оролцоо=>Өөрчлөлт” хэмээн нэрлэсэн ба чуулганд Монголын залуучуудын эвсэлийн гишүүн байгууллагууд, бусад хүүхэд залуучуудын чиглэлээр үйл ажиллагаа явуулдаг төрийн бус байгууллага, холбоо, НҮБХАС-ийн зорилтот аймаг, сум, дүүргийн ЗХТ болон олон улсын байгууллагууд, залуучуудын асуудал хариуцдаг ХАХНХЯ, бусад төрийн захиргааны байгууллагууд зэрэг нийт 300 орчим төлөөлөгч оролцож байна.

Чуулганыг зохион байгуулснаар залуучуудын эрх ашиг, сонирхолд нийцсэн үйл ажиллагаа өрнүүлж тэдний идэвх хариуцлагыг өндөрсгөх бөгөөд чуулганаас батлах баримт бичгийг хэрэгжүүлэхэд Монголын Залуучуудын Эвсэл болон залуучуудын байгууллагуудын хамтарсан төлөвлөгөө боловсруулан, нөлөөллийн ажлыг нэг жилийн хугацаанд зохион байгуулж, дараа жилийн чуулганд үр дүнг танилцуулах юм байна.

Солонгос улсын Сөүл хотын Курү дүүргийн цагдаагийн газар тус улсад аялал жуулчлалын визээр зорчиж байсан Монгол улсын иргэн эгч дүү Б, А нарыг саатуулжээ. Тэдгээр нь 36, 32 настай бөгөөд дохиоллын систем дотор нь хийсэн хувцаснуудыг мэдрэхгүй байдлаар зориуд тоноглосон цүнх ашиглаж, нийт найман удаагийн үйлдлээр таван сая 620-н мянган воны хувцас, гутал, эд зүйлс хулгайлсан нь тогтоогджээ.

Хэргийг шалгаж байгаа мөрдөн байцаах газрынхан Монгол эгч, дүү хоёрын хулгай хийхдээ ашигладаг тоноглосон гар цүнхэнд арван ширхэг хувцас хийсэн ч дохиоллын систем ажиллахгүй байгааг туршиж үзсэн байна. Тэд хулгайлсан эд зүйлсээ газрын шуудангаар Монгол руу илгээдэг байсан бөгөөд сүүлийн хоёр жилийн турш Солонгос улсад арав гаруй удаа зорчихдоо зөвхөн хулгай хийх зорилгоор очдог байсан байх магадлалтай ажээ.

Тэднийг олон хоног эрэн сурвалжилсаны эцэст Монголчууд хамгийн их цуглардаг Сөүл хот дахь Монгол Тауны дэргэд хулгай хийхдээ ашигладаг цүнхээ үүрэн явж байхад нь саатуулсан байна.

Нийслэлийн иргэдэд цахим хэлбэрээр газар өмчлүүлэх дөрөвдүгээр ээлжийн бүртгэл ажлыг зохион байгуулах бэлэн боллоо. 4 дүгээр ээлжинд Баянзүрх, Сонгинохайрхан, Хан-Уул дүүргийн нийт 22 байршлын 8727 га газарт 34857 иргэнд газар өмчлүүлэх бөгөөд бүртгэл 08 дугаар сарын 25-ны өдөр 12 цагаас эхэлнэ. Бүртгэл эхэлснээс хойш 14 хоногийн хугацаанд WWW.UMCH.UB.GOV.MN,WWW.ULAANBAATAR.MN сайтуудаар хүсэлт хүлээн авна. Цахим газар өмчлөлийн талаарх дэлгэрэнгүй мэдээллийг 1800-1285 тусгай дугаар болон 11 319215, 11 315334 дугааруудаас лавлах боломжтой.