Month: August 2015

Монгол Улсын
Ерөнхийлөгч 2015 оны 1 дүгээр зарлигаараа 1945 оны Чөлөөлөх дайны
ялалтын түүхт 70 жилийн ойг улс орон даяар тэмдэглэн өнгөрүүлэхийг
Засгийн газарт чиглэл болгосон билээ.

Уг зарлигийн
дагуу Засгийн газрын тогтоол гарч ойд бэлтгэх, тэмдэглэн өнгөрүүлэх
ажлын хэсгийг Батлан хамгаалахын сайд Ц.Цолмон ахлан ажиллаж байна.

Ойг угтан
түүхэн ялалтын үнэ цэнэ, цэрэг эрсийнхээ байгуулсан гавьяаг сурталчлах,
мөнхжүүлэх, дайнд оролцогсод, ахмад дайчдадаа хүндэтгэл үзүүлэх, тэдний
эх оронч сэтгэл, зүтгэлийг залуу хойч үедээ өвлүүлэх, улс түмний
найрамдалт харилцаа, Зэвсэгт хүчний хамтын ажиллагааг баяжуулан
хөгжүүлэхэд түлхэц өгөхүйц цогц арга хэмжээг авч хэрэгжүүлж байна.

Ажлын хэсэг
Чөлөөлөх дайны ялалтын түүхт 70 жилийн ойг улс орон даяар тэмдэглэн
өнгөрүүлэх төлөвлөгөө гаргаж, олон ажлыг зохион байгуулж буй бөгөөд
тэдгээрийн нэг хэсэг нь нийслэл болон Дорноговь, Сүхбаатар аймгуудад
зохион байгуулж байгаа юм. Сүхбаатар, Дорноговь аймгуудад ялалтын баярыг
өнгөрсөн долоо хоногт ёслол төгөлдөр тэмдэглэсэн.

Тэгвэл нийслэлд энэ сарын 28-нд буюу маргааш ялалтын баярыг тэмдэглэн өнгөрүүлэхээр Батлан хамгаалах яамныхан ажиллаж байна.

Баярын үйл ажиллагааны хөтөлбөр,

1.00-12.00
цагийн хооронд Зөвлөлтийн дайчдын хөшөө, Маршал Г.К.Жуков, Жанжин
Ж.Лхагвасүрэнгийн хөшөөнд төр, засгийн удирдлага, БХЯ, ЗХЖШ-ынхан, ахмад
дайчид, манай улсад суугаа Элчин сайдын яамны төлөөлөл, ард иргэд цэцэг
өргөж, хүндэтгэл үзүүлнэ.

14.00-17.00
цагийн хооронд Нийслэлийн Соёлын төв өргөөнд баярын хурал, хүндэтгэлийн
концерт болно. Энэ үеэр Чөлөөлөх дайны үеийг илтгэх түүхэн бичиг баримт,
бүтээлүүд Соёлын төв өргөөнд дэлгэгдэх юм байна.

21.00-22.00 цагийн хооронд Чингис хааны талбайд үдшийн цэнгүүн, ёслолын буудлага хийхээр төлөвлөжээ.

Ашигт малтмалын газраас хайгуулын тусгай
зөвшөөрөл хүссэн өргөдлийн дугаар олгох цахим системийн Login серверт алдаа
гарч техникийн саатал үүссэн тул дугаар олгох үйл ажиллагааг түр хугацаагаар
зогсоогоод байсан. Тэгвэл системд гарсан доголдлыг засварласан бөгөөд маргааш
11:00-11:05 цагийн хооронд 5 минутын хугацаанд туршилт явагдах тул системд
нэвтрэх эрхтэй аж ахуй нэгжүүд өргөнөөр оролцохыг уриалж байна. Түүнчлэн
туршилт ямар нэгэн саадгүй амжилттай явагдвал дугаар олголтын ирэх даваа
гаригаас дахин олгож эхлэх юм байна. Д.Сүрэн

Өнөөдөр Нийслэлийн Иргэдийн
Төлөөлөгчдийн Тэргүүлэгчид хуралдлаа. Хурлаар Нийслэлийн ачиж, журамлах
төв аж ахуйн тооцоот үйлдвэрийн газар байгуулах тухай асуудлыг хэлэлцсэн
байна. Авто машин ачиж журамлах ажил нь Замын хөдөлгөөний удирдлагын
төвд харьяалагддаг. Харин ирэх есдүгээр сараас Замын хөдөлгөөний аюулгүй
байдлын тухай хууль хэрэгжих гэж буйтай холбоотойгоор Ачиж, журамлах
төв байгуулах нь зүйтэй гэж албаныхан үзсэн байна. Ингэснээр бие даасан
аж ахуйн тооцоот үйлдвэрийн газар болох юм.

Түүнчлэн Усан спорт сургалтын төвийг
хязгаарлагдмал хариуцлагатай компани болгох хувьчлалтай холбоотой
асуудлыг хэлэлцэж тодорхой бус хугацаагаар хойшлуулжээ.

Сонгинохайрхан дүүргийн 26 дугаар хороо 18 мянга орчим хүн амтай, нийт
өрхийн 80 орчим хувь нь амьдралын баталгаажих түвшингээс доогуур
орлоготой байдаг аж. Тиймээс айл өрхүүдийн тодорхой хэсэг нь
Улаанчулуутын хогийн цэгийн түшиглэн амьдралаа залгуулдаг байна.

Хичээлийн шинэ жилийн өмнөхөн тэдгээр өрхүүдийн 70 гаруй хүүхэд иж бүрэн
хичээлийн хэрэглэл, хөлбөмбөгийн бөмбөгтэй болжээ. Тодруулбал
Сонгинохайрхан дүүргийн ИТХ-ын дарга Х.Нямбаатар болон тус дүүрэгтэй
байнгын хамтын ажиллагаатай Япон улсын автомашин экспортын Be Forward
компанийн Монгол дахь салбарын захирал М.Жаргалсайхан, дүүргийн
Боловсролын хэлтэсийн дарга М.Баяраа нар хүүхдүүдэд хичээлийн хэрэглэл
гардуулах ажлыг өчигдөр зохион байгуулсан аж. Мөн энэ үеэр тус дүүргийн 4
дүгээр хорооны 20-ид хүүхдэд хичээлийн хэрэглэл бэлэглэжээ.

Дашрамд дуулгахад, Ве forward компанийнхан өмнө нь тус дүүргийн “Хүүхэд
гэр бүл хөгжлийн төв”-д автомашин, 350 сая төгрөгийн ахуйн хэрэглээний
бараа бүтээгдэхүүн бэлэглэж байсан гэнэ.

Нийтийн тээврийн үйлчилгээг хувиараа эрхлэгч 20 аж ахуйн нэгж
өнөөдрөөс эхлэн үйлчилгээндээ гарахгүй ажил хаяхаа мэдэгдээд байсан билээ.
Тэд хэд хэдэн шаардлагыг нийслэлийн Засаг дарга Э.Бат-Үүл, НИТХ-ын
дарга Д.Баттулга нарт тавьсан юм. Тэгвэл тэдний
хүсэлтийг Нийтийн тээврийн газраас хүлээн авч зөвшилцөлд хүрэхээр
ярилцсан байна. Тиймээс ажил хаяхаа түр азнаад байгаа гэнэ.

Тэд ажил хаях болсон шалтгаанаа “Нийтийн тээврийн удирдлага мэдээллийн
болон цахим төлбөрийн систем” төслийг хэрэгжүүлж эхлээд нэг сар болж
байна. Төсөл хэрэгжүүлэх явцад нийслэлийн зорчигч тээврийн үйлчилгээнд
авч хэрэгжүүлэх шаардлагатай асуудлуудын талаар зорчигч тээврийн
үйлчилгээ эрхлэгч аж ахуйн нэгж байгууллагууд 2015 оны 8 дугаар сарын
18-ны өдөр хамтарсан албан мэдэгдлээр хүргүүлсэн боловч тодорхой шийдвэр
гаргалгүй цаг хугацаа алдаж асуудал хариуцсан төрийн зарим албан
тушаалтан, төрийн өмчийн аж ахуйн нэгжийн удирдлагууд эсрэг байр суурь
баримталж өнөөдрийг хүртэл шийдвэрлэгдэхгүй байгаагаас аж ахуйн
нэгжүүдийн хэвийн үйл ажиллагаа ажиллагсдын хөдөлмөрийн эрх зөрчигдөж
нийгмийн захиалгат үйлчилгээ хүндэрч байна” гэж тайлбарлаж буй. Мөн
нийтийн тээврийн шинэ бодлогоос шалтгаалан 1500 гаруй кондуктор ажлын
байргүй болох эрсдэлд ороод байгааг шийдвэрлэх, хувийн хэвшлийг шахаж
өмчийн ялгавар гаргаж байгаа Зорчигч тээврийн нэгтгэлийн захирал
Ц.Одонтунгалагийг огцруулахыг мөн шаардсан юм.

Орхон аймгийн онцгой байдлын газарт
аврах гал унтраах үндсэн зориулалтын, байгалийн онцгой, хүнд нөхцөлд
ажиллах хүчин чадалтай ОХУ-д үйлдвэрлэгдсэн 2015 оны шинэ загварын Урал
4320 маркийн автомашиныг хүлээлгэн өглөө.

Галын үндсэн албаны Урал-4320 автомашин
нь 7-8 хүний багтаамжтай, туулах чадвар сайтай 3 тэнхлэгтэй цуваа
дугуйтай ус шавар, цас, болон бартаат замд явах чадалтай юм. Түүнчлэн
5000 литр ус, 360 литр хөөс агуулах багтаамжтай мөн 7,4 метрийн гүнээс
40 минутын хугацаанд ус соруулан дүүргэх бөгөөд секундэд 20 литр ус
шүршдэг. Гал унтраах багаж хэрэгслээр бүрэн тоноглогдсон, 20 метр
хүртэлх өндөр галыг унтраах хүчин чадалтай буюу ОБГ-т одоо ашиглагдаж
байгаа автомашинаас 1 дахин илүү хүчин чадалтай ажээ.

Энэхүү автомашиныг авахад орон нутгийн төсвөөс 200 сая төгрөгийг
зарцуулсан бөгөөд тус техник нь хүнд нөхцөлд ажиллах хүчин чадалтай
гэдгээрээ онцлог юм. Ард иргэдийн аюулгүй амьдрах нөхцөл бололцоог
хангаж ажиллах үүрэг бүхий онцгой байдлын газрын тоног төхөөрөмжийн
бүрэн бүтэн байдал, өндөр хүчин чадал бүхий техник төхөөрөмж зэрэгт
аймаг орон нутгийн зүгээс онцгой анхаарч ажилладаг.

Орхон аймгийн онцгой байдлын газар нь энэ онд онцгой байдлын ерөнхий
газрын санхүүжилтээр өндрийн нөхцөлд ажиллах аврах шат болон холбогдох
тусгай хэрэгслүүдийг хүлээн авсан. Энэ удаад хүнд нөхцөлд ажиллах аврах
автомашиныг хүлээн авснаар манай аймгийн онцгой байдлын газрын техникийн
шинэчлэл 80 хувьд хүрч байгааг онцоллоо.

БНХАУ фашизм, Японы түрэмгийллийн эсрэг дайнд ялсны 70 жилийн ойд
зориулсан ёслолын арга хэмжээнд идэвхтэй бэлтгэж байна. Тэгвэл мягмар
гаригт Заньжякоу хотын орлогч дарга Жоу Лиминь, ОХУ-ын элчин сайд Андрей
Денисов, Монгол Улсын элчин сайд Цэдэнжавын Сүхбаатар нар болон
Монголын хоёр ахмад дайчны хамт Жанчхүүгийн даваанд байрлах (Жанбэй
хошууны Иеху уул) Зөвлөлт, Монголын дайчдын хөшөөнд хүндэтгэл үзүүлжээ.

Ахмад дайчид болох 1945 оны Чөлөөлөх дайнд оролцсон тухайн үед Хилийн
цэргийн Хэрлэнгийн 31 дүгээр отрядын цэрэг байлдагч Төмөрийн Бат-Очир,
мөн 8 дугаар морьт 23 дугаар хороо, 6 дугаар сумангийн нам эвлэлийн
дарга Эрэнцэнгийн Лувсанбалдан нар багтсан. Эдгээр ахмад дайчдын хувьд
94-95 настай.

Жанчхүүгийн даваанд байрлах уг байгууламж нь 1945 онд баригдсан, 396
метр квадрат талбайтай, нийт таван хэсгээс бүтдэг юм байна.

Монголын ардын армийн 21 мянга гаруй хувьсгалт цэрэг 1945 онд Японы
түрэмгийлэгчдээс Хятадыг чөлөөлөх дайнд Эрээн-Жанчхүү, Долонуур-Жэхэ
гэсэн хоёр чиглэлээр оролцсон байдаг. 1945 оны Чөлөөлөх дайны хамгийн
хүнд, ширүүн тулаан Жанчхүүгийн даваанд болсон бөгөөд Монголын ардын
армийн эрэлхэг баатар Аюуш, Жанчив зэрэг 13 дайчин энэ тулаанд амиа
алдсан билээ.

Жанчхүүгийн давааны бэхлэлтийг эвдэж, Японы цэргийн томоохон
бүлэглэлийг устгах ширүүн тулалдаан наймдугаар сарын 19-21-нд болсон юм.

1945 онд дайнд Монгол ардын хувьсгалт цэргээс (МАХЦ) нас барсан,
шархадсан, сураггүй болсон дайчдын дурсгалд зориулан Жанчхүүгийн даваанд
хөшөө босгожээ. Харин 1957 онд БНХАУ-ын Төрийн зөвлөлийн шийдвэрээр
хөшөөг цамхаг болгон шинэчилсэн байна. Цамхагийг тойруулан цэцэрлэгт
хүрээлэн барьсан бөгөөд энэхүү бунхан нийт 13 га талбайг эзэлж байна.
Мөн бунханы эргэн тойронд мод тарьж, цэцэрлэгжүүлсэн бөгөөд одоо музей
шинэчлэн барьж байгаа аж.

1945 оны Чөлөөлөх дайны хамгийн хүнд, ширүүн тулаан
Жанчхүүгийн даваанд болсон бөгөөд Монголын ардын армийн эрэлхэг баатар
Аюуш, Жанчив зэрэг 13 дайчин энэ тулаанд амиа алдсан билээ.

1. Лувсанцэрэнгийн Аюуш
2. Магсар Жанчив
3. Б.Сахьяа
4. Манлайн Жүгдэр
5. Пэлжээн Нямаа
6. Гомбосүрэнгийн Дашдондог
7. Тувааны Самданжамц
8. Цэрэннадмидийн Маамуу
9. Доон Дагва
10. Гүнээн Лхамрагчаа
11. Галсангийн Чулуунбат
12. Сандагийн Шагдар
13. Батын Пүрэв

Ирэх есдүгээр сарын 3-ны өдөр Бээжин хотноо болох 1945 оны чөлөөлөх
дайнд ялалт байгуулсны 70 жилийн ойд зориулсан баярын парадын бэлтгэлд
Ардын чөлөөлөх армийн 12 мянган цэрэг, байлдааны 200 онгоц оролцож
байгаа аж. Цэргийн ёслолын жагсаалд оролцох Монголын цэрэг эрс бэлтгэлээ
10 гаруй орны цэргүүдтэй Бээжин хотын төв дэх Тянь Ань Миний талбайг
дуурайлган хийсэн талбайд хийж байна. Уг арга хэмжээнд дэлхийн 20 орны
төрийн тэргүүн хүрэлцэн ирэхээр болсон тухай БНХАУ-ын Гадаад хэргийн
сайдын орлогч Чэн Гопин мэдээллээд байна.