Month: July 2015

Улаанбаатар хотын Захирагчийн Наран дахь ажлын албаны “Тэнүүн сайхан” иргэдийн бүлэг гэр хороололд хүүхдийн тоглоомын талбай байгууллаа. Тоглоомын талбайг нийслэлийн хамгийн их хүн амтай Сонгинохайрхан дүүргийн 7 дугаар хорооны 0119 дүгээр цэргийн ангийн 1 дүгээр гудамжинд барив. Гэр хорооллын айлуудын дунд байрлах ашиглагдахгүй байгаа газарт тоглоомын талбай байгуулах санаачлагыг тус хорооны оршин суугч Б. Чинболд гаргасан. Цаашид оршин суугчидтай хамтран тоглоомын талбайн арчлалт хамгаалалтыг нь хариуцан ажиллах юм гэж Улаанбаатар хотын Захирагчийн Наран дахь ажлын албанаас мэдээллээ.

Нийслэлийн онцгой байдлын газраас иргэдэд зориулж анхааруулга гаргажээ. Тус газраас “Баяр наадмын өдрүүдэд нийслэлчүүд ногоон бүсэд аялж зугаалдаг. Аялал зугаалгаар явахдаа галын аюулгүйн төхөөрөмжөөр тээврийн хэрэслээ тоноглох, үнс нурмаа ил, задгай асгахгүй байх, ил түлсэн гал, цог нурам, татсан тамхи, шүдэнзний галыг бүрэн гүйцэд унтраах хэрэгтэй. Мөн ногоон бүсэд үйл ажиллагаа явуулдаг иргэн, аж ахуй нэгж байгууллага, амралтын газрууд ой хээрийн түймрээс урьдчилан сэргийлэх чиглэлээр хамгаалалтын зурвас татаж, түймэр унтраах багаж хэрэгслийг зайлшгүй бэлтгээрэй” хэмээн анхааруулж байна.

Үндэсний их баяр наадам, Тулгар төрийн 2224 жил, Их Монгол Улсын 809 жил, Ардын хувьсгалын 94 жилийн ойн баяр наадмын хурдан морины уралдааны цагийн хуваарь гарчээ. Уралдааны цагийн хуваарийг танилцуулъя.

Үл хөдлөх хөрөнгийн Тэнхлэг зууч компаниас өнгөрсөн “Орон сууцны үнийн индекс”-ийн судалгааг олон нийтэд танилцууллаа.

Тус судалгаагаар орон сууцны үнийн индекс зургадугаар сард 14 хувьтай гарчээ. Энэ нь өмнөх сараас 2.37 хувиар буурсан үзүүлэлт аж. Харин оны эхэн үетэй харьцуулахад -4.15 хувь, өнгөрсөн оны мөн үетэй буюу 12 сарын өмнөхтэй харьцуулахад 8.4 хувиар буурчээ.

Шинэ орон сууцны үнийн индекс 26.5 хувьтай гарчээ. Энэ нь өмнөх сараас 0.17 хувиар буурсан үзүүлэлт юм байна. Харин оны эхэн үеэс -0.2 хувь, өнгөрсөн оны мөн үетэй харьцуулбал -1.14 хувиар буурсан байна.

Хуучин орон сууцны үнийн индекс суурь үеэс 7.6 хувьтай гарлаа. Энэ нь өмнөх сараас -2.24 хувиар, оны эхэн үеэс -7.4, өнгөрсөн оны мөн үеэс -12.0 хувиар буурсан үзүүлэлт юм.

Орон сууцны үнийн индексийг Хедоник регрессийн аргаар тооцоолж байгаа аж. Энэхүү тооцоололд тухайн сард Улаанбаатар хотод борлуулагдахаар зах зээлд нийлүүлэгдсэн шинэ, хуучин нийт 4635орон сууцны мэдээллийг хамруулжээ.

Улаанбаатар хотын Захирагчийн ажлын албанаас “Найрсаг Улаанбаатар” хөтөлбөрийн хүрээнд хотын өнгө үзэмжийг зурган тохижилтоор гоёх зорилготойгоор 127 метр квадрат талбайд 3D зургууд зурж байна. Төв шуудангийн баруун тал, Чингис хааны талбайн баруун урд цэцэрлэг, талбайн баруун тал Төв шуудангийн хана, Талбайн зүүн урд цэцэрлэг, Чингис хааны талбайн баруун урд цэцэрлэг, Циркийн баруун тал, 13 дугаар хороолол автобусны буудал, Бага тойрог 5 дугаар сургуулийн баруун урд, Циркийн баруун тал, Зориг сангийн баруун тал, Төв шуудангийн баруун тал,Мэдээлэл технологийн үндэсний парк, Талбайн зүүн урд цэцэрлэг, Хүүхдийн урлан бүтээх төв зэрэг 16 байршилд 3D зургууд зурах юм. Урлаг дизайны академийн уран бүтээлчид эдгээр зургийг зурж, олны хүртээл болгож байна гэж Улаанбаатар хотын Захирагчийн ажлын албанаас мэдээллээ.

Монголын Хэвлэл мэдээллийн зөвлөл өчигдөр хуралдаж, нэгэн иргэний гомдлыг хэлэлцлээ. Тэрээр 14 хоног тутмын нэгэн сонины 2015 оны №05 дугаарт нийтлэгдсэн “Монголын трансжендерүүд өөрсдийгөө гадаадын гаж донтнуудад хямдхан борлуулж эхэллээ” гарчигтай нийтлэл нь “Хэвлэл мэдээллийн ёс зүйн зарчим”-ын 3.2 дох заалт болох “Хэнийг ч арьс өнгө, яс үндэс, гарал угсаа, хүйсийн байдал, нас, хөгжлийн бэрхшээл, эрүүл мэнд, бэлгийн чиг баримжаа, шашин шүтлэг, гэр бүлийн байдлаар нь ялгаварлан гадуурхалтын золиос болгохгүй”, 4 дэх заалт болох “Аливаа мэдээллийг зохисгүй хэлбэрээр дуулиантайгаар түгээхээс татгалзана”гэсэн заалтуудыг зөрчсөн гэж үзээд Хэвлэл мэдээллийн зөвлөлд гомдол гаргасан юм.

Энэ гомдолд тайлбар өгөх боломжийг Хэвлэл мэдээллийн зөвлөлөөс тухайн сонинд олгосон боловч татгалзсан байна. Гомдлыг үндэслэлтэй гэж үзэж, Хэвлэл мэдээллийн зөвлөлийн Сонин сэтгүүл сайтын ёс зүйн хорооны 2015 оны 7 дугаарын сарын 8-ны хуралдаанаар авч хэлэлцээд уг сонин “Хэвлэл мэдээллийн ёс зүйн зарчим”-ын 3.2 дох заалт болох “Хэвлэл мэдээллийнхэн нийгэмд оршиж байгаа хэвшмэл ойлголтуудыг улам дэвэргэхээс зайлсхийнэ”, 4 дэх заалт болох “Аливаа мэдээллийг зохисгүй хэлбэрээр дуулиантайгаар түгээхээс татгалзана”гэсэн заалтуудыг зөрчсөн байна гэж дүгнэлээ.

Энэхүү дүгнэлтийг тухайн сонинд мэдэгдэж, гаргасан алдаагаа засах зөвлөмжийг хүргүүлэх, уг сонины нэрийг дурдалгүйгээр олон нийтэд мэдээлэх шийдвэрийг гаргасан байна хэмээн Монголын Хэвлэл мэдээллийн зөвлөлөөс мэдээллээ.

Хууль сахиулахын их сургуулиас “Хууль сахиулах байгууллагуудын хамтын ажиллагаа” сэдэвт олон улсын эрдэм шинжилгээний хурал-эрдэмтдийн уулзалтыг Хөвсгөл аймгийн Хөвсгөл нуурын хөвөөнд байрлах “Харуул занги” цогцолборт 2015 оны 07 дугаар сарын 17,18-ны өдрүүдэд зохион байгуулна.

Хууль сахиулахын их сургууль нь 2011 онд их сургуулийн статустайгаар үйл ажиллагаа явуулж эхэлснээс хойш олон улсын эрдэм шинжилгээний хурлыг тав дах удаагаа зохион байгуулах гэж байна.

Хөдөө орон нутагт, бүс нутгийн зааг Хөвсгөл аймагт зохион байгуулж буй энэ удаагийн хурлын гол зорилго нь хууль сахиулах, гамшгаас хамгаалах салбарт, түүний дотор хилийн бүс нутаг, хил орчмын нутаг дэвсгэр, орон нутаг дахь хууль сахиулах байгууллагын хамтын ажиллагаанд тулгамдсан асуудлыг хэлэлцэж, тодорхой шийдлийг эрэлхийлэхэд оршиж байгаа юм.

Энэ удаагийн олон улсын эрдэм шинжилгээний хуралд Хууль зүйн яам, харъяа агентлагуудын удирдлагын төлөөлөл, хууль сахиулах, эрдэм шинжилгээний байгууллага, хүрээлэн, их, дээд сургуулиуд болон Австрали, Унгар, ОХУ, БНСУ, БНТУ, Япон, ХБНГУ-ын эрдэмтэн, судлаачдын төлөөлөл, Монгол Улсад суугаа Элчин сайд, хууль сахиулах асуудал хариуцсан атташе нарын нийт 70 гаруй эрдэмтэн, судлаач, багш, практик байгууллагын ажилтнууд оролцоно.

Хурлын үеэр хууль сахиулах салбарын сургалт, эрдэм шинжилгээ, судалгааны хамтын ажиллагаа, оролцогч орнуудын эрх зүйн шинэчлэл, гэмт хэрэгтэй тэмцэх, хил хамгаалах, шүүхийн шийдвэр гүйцэтгэх, гамшгаас урьдчилан сэргийлэх болон аюулгүй байдлын чиглэлээр туршлага, мэдээлэл солилцох юм.