Month: June 2015

“Гэр хорооллыг орон сууцжуулах зорилтын хүрээнд 7 дугаар хорооллын Г хэсгийн орон сууцны хороолол барих төслийг хэрэгжүүлэхэд шаардагдах хөрөнгийн зээлийг БНХАУ-ын Экзим банкнаас авч Төрийн орон сууцны корпорацид дамжуулан зээлдүүлэхийг Хөгжлийн банкны Төлөөлөн удирдах зөвлөлд зөвшөөрчээ.

БНХАУ-ын дарга Си Жинпиний манай улсад хийсэн айлчлалын үеэр БНХАУ-ын Экзим банк, Монгол Улсын Төрийн орон сууцны корпорацийн хооронд “Орон сууцны 7 дугаар хорооллын Г хэсгийг барих тухай” зээлийн ерөнхий гэрээ байгуулсан юм. Энэ гэрээний дагуу Сүхбаатар дүүрэгт тус хорооллын орон сууцны Г хэсгийн төслийг 3 үе шаттай санхүүжүүлэн хэрэгжүүлэхээр Төрийн орон сууцны корпораци, БНХАУ-ын “Бээжин Юни-Констракшн групп”-ын хооронд энэ оны нэгдүгээр сарын 7-нд гэрээ байгуулжээ. Төслийн нийт өртөг 221,447,5 мянган ам.доллар бөгөөд 85 хувийг Хөгжлийн банкаар дамжуулан олгохоор Экзим банкны үнэлгээний хороо шийдвэр гаргаж, үлдсэн 15 хувийг Төрийн орон сууцны корпораци санхүүжүүлэхээр болсон байна. Энэ төслийг хэрэгжүүлснээр 4460 айлын орон сууцны хороолол баригдаж, нийслэл хотын хүн амын орон сууцны хангамж нэмэгдэх юм.

УИХ-ын гишүүн Г.Баярсайханы санаачлан боловсруулсан “Зарим газар нутгийг улсын тусгай хамгаалалтад авах тухай” УИХ-ын тогтоолын төслийг хэлэлцэн дэмжээд тусгай хамгаалалтад авч байгаа тухайн газрын хилийн заагийг холбогдох байгууллагаар тогтоолгосны үндсэн дээр УИХ-д өргөн мэдүүлэх нь зүйтэй гэж үзжээ. Тогтоолын төслийг боловсруулахдаа байгалийн бүсийн хэв шинжийг төлөөлж чадах экосистемийн онцлог, унаган төрхөө хадгалж үлдсэн ач холбогдол, эрдэмтэн судлаачдын судалгааны ажлын үр дүн, иргэдийн санал дүгнэлтэд үндэслэсэн байна.

Зарим газар нутгийг улсын тусгай хамгаалалтад авах тухай тогтоолын төсөл гурван заалтаас бүрдэх бөгөөд Сэлэнгэ аймгийн Мандал сумын нутаг дахь Ноён уул орчмын нутгийг дурсгалт газрын ангиллаар улсын тусгай хамгаалалттай газар нутгийн сүлжээнд хамруулах, хавсралтаар хилийн заагийг батлахаар тусгажээ.

Ноён уулыг хамгаалалтад авснаар тус уулын ойн хүлэмжийн хий, агаарын бохирдлыг шингээх чадавхи, хүчилтөрөгчийн нөөцийн хангамжийг өнөөдрийн түвшинд хадгалж үлдээхээс гадна түүхийн хосгүй өв Хүннүгийн булш бунхныг хэвээр үлдээж, Хүннү гүрний төв одоогийн Монгол Улсын нутаг дэвсгэр байсныг гэрчлэх баримт хэвээр үлдээх чухал ач холбогдолтой. Ноён уулыг дурсгалт газрын ангилалд оруулснаар Засгийн газрын тогтоолоор баталсан нормативын дагуу хоёр хүртэл тооны байгаль хамгаалагчийг нэмж ажиллуулах юм байна

Эдийн засгийн байнгын хорооны өнөөдрийн хуралдаанаар дөрвөн асуудал хэлэлцэв. “Монгол Улсын эдийн засаг, нийгмийг 2016 онд хөгжүүлэх үндсэн чиглэл батлах тухай” Улсын Их Хурлын тогтоолын төслийн эцсийн хэлэлцүүлгийг хуралдааны эхэнд хийв. Хуралдаанаар тогтоолын төслийн талаарх зарчмын зөрүүтэй дөрвөн саналын томьёоллоор санал хураалт явуулан, чуулганы нэгдсэн хуралдаанаар тогтоолын төслийг батлуулах нь зүйтэй гэж үзсэн юм. Гишүүд “Аймгийн төвүүдэд дулаан хангамжийн шинэ эх үүсвэр барих ажлыг үргэлжлүүлэх” гэснийг “Архангай, Баянхонгор, Говь-Алтай, Дундговь, Завхан, Өвөрхангай, Хэнтий, Төв аймгийн төвүүдэд дулаан хангамжийн шинэ эх үүсвэр барих ажлыг эрчимжүүлэх” гэж өөрчлөхийг дэмжсэн. Мөн уул уурхайн үйл ажиллагаанаас болж эвдрэлд орсон талбайд нөхөн сэргээлт хийлгүүлэх гэсэн санал олонхийн дэмжлэгийг авав.

Үүний дараа “Төрөөс эрчим хүчний талаар баримтлах бодлого батлах тухай” Улсын Их Хурлын тогтоолын төслийн анхны хэлэлцүүлгийг хийв. Хэлэлцүүлгийн үеэр гишүүд тавдугаар цахилгаан станц барих ажил ямар шатанд яваа, гуравдугаар цахилгаан станц буюу Амгалангийн станд энэ жил ашиглалтад орох эсэхийг тодруулж байлаа. Эрчим хүчний сайд Д.Зоригтын хариулснаар, тавдугаар цахилгаан станцыг Баянзүрхийн товчоо, Налайх дүүргийн дунд барихаар газрыг сонгон концессын гэрээг байгуулаад байгаа аж. Тэрхүү гэрээг дагасан 10 гаруй гэрээг байгуулахаар ажиллаж байгаа бөгөөд эрчим хүчний, нүүрсний гэрээтэй холбогдуулан хэд хэдэн удаагийн уулзалтыг хийгээд байгаа юм байна. Гэрээг эцэслэн хийсний дараа бүтээн байгуулалтын ажил эхлэх юм байна. Амгалангийн станцын хувьд энэ оны наймдугаар сараас туршилт, тохируулгын ажил хийгдээд, есдүгээр сарын сүүлээр байнгын үйл ажиллагаагаа эхлэх юм байна. Энэхүү станц Улаанбаатар хотын зүүн хэсгийг дулаан, цахилгаанаар хангана гэж сайд Д.Зоригт хариулсан юм. Ингээд тогтоолын төслийн талаарх ажлын хэсгийн саналын томьёоллуудаар санал хураалт явуулан чуулганы нэгдсэн хуралдаанд танилцуулахаар тогтлоо.

Энэ өдрийн хуралдаанаар Эрчим хүчний тухай тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийлээ. Хуулийн төсөлд “сэргээгдэх эрчим хүчний ногоон тариф” хэмээн тусгасан байсныг “дэмжих тариф” гэж өөрчлөхөөр ажлын хэсгээс санал оруулсан бөгөөд үүнийг хуралдаанд оролцсон гишүүдийн олонх дэмжсэн юм. Түүнчлэн Сэргээгдэх эрчим хүчний тухай хуульд нэмэлт, өөрчлөлт оруулах тухай болон холбогдох бусад хуулийн төслүүдийнанхны хэлэлцүүлгийг хийх үеэр дэмжих тарифтай холбоотой санал гарч гишүүдийн олонх ийнхүү өөрчлөхийг дэмжсэн юм. Дээрх хуулийн төслүүдтэй холбоотой ажлын хэсгээс гаргасан саналын томьёолол тус бүрээр санал хураалт явуулан чуулганы нэгдсэн хуралдаанаар хэлэлцүүлэхээр тогтлоо.

Таван толгойн ордыг ашиглах Хөрөнгө оруулалтын болон дагалдах бусад гэрээг байгуулах асуудлаар дүгнэлт гаргаж, шийдвэрийн төсөл боловсруулах Улсын Их Хурлын ажлын хэсэг хуралдаж, дэд ажлын хэсгийн ажлын явцыг сонсчээ.

Таван толгойн ордыг ашиглах Хөрөнгө оруулалтын болон бусад дагалдах гэрээний англи хэл дээрх төслийг Засгийн газраас Ажлын хэсэгт зургадугаар сарын 5-нд хүргүүлсэн юм байна. Ажлын хэсэгт ажиллаж байгаа хуульчид гэрээний англи болон монгол хэл дээрх төслийг харьцуулан шалгаж байгаа аж. Англи болон монгол хэл дээрх төсөлд маш их зөрүү гарч байгаа учир Гадаад хэргийн яам руу шилжүүлж албан ёсны орчуулга хийлгэх нь зүйтэй гэж үзснэ гэнэ.

Мөн Засгийн газраас Энержи Ресурс ХХК болон Чайна Шенхуа Энержи компанийн хооронд байгуулах “Хамтарсан компани байгуулах гэрээ”, Энержи Ресурс болон Эрдэнэс Тавантолгой ХК-ийн хооронд байгуулах “Эрх үүрэг шилжүүлэх гэрээ”-ний төслүүдийг Ажлын хэсэгт хүргүүлээгүй, хүлээгдэж байгаа юм байна.

УИХ дахь Өргөдлийн байнгын хорооны дарга О.Баасанхүү өнөөдөр мэдээлэл хийв. Тус байнгын хорооноос ажлын хэсэг томилж, Дорнод аймагт газрын тосны олборлолт явуулдаг “Петро Чайна Дачин Тамсаг” компанийг газар дээр нь очиж, шалгалт хийх болсныг дуулгалаа. Учир нь тус компанитай холбоотой өргөдөл гомдол олноор ирэх болсон байна. Тиймээс Ажлыг хэсэг “Петро Чайна Дачин Тамсаг” компаниас гэрээний үүргээ биелүүлэхийг шаардах аж. О.Баасанхүү гишүүн хэлэхдээ “Дайчин Тамсаг компанитай холбоотой мэдээллийг төрийн зарим байгууллагаас авах гэтэл өгөхгүй байна. Энэ компанитай холбоотой улс төрчдийн лобби байгаа гэж хардаж байна. Ялангуяа АТГ тус компанитай холбоотой материалыг ирүүлэхгүй хаацайлж, хамгаалж байгаа. АТГ-т ингэх ямар шалтгаан байна вэ” гэв.

“Петро Чайна Дачин Тамсаг” компани нь Монгол Улсын газар нутагт 23 жил үйл ажиллагаагаа явуулахдаа гэрээгээр хүлээсэн үүргээ огт биелүүлээгүй байна. Тухайлбал, бүтээгдэхүүн хуваах гэрээний дагуу 200 км засмал замыг Дорнод аймгийн газар нутагт тавих үүрэгтэй ч өнөөдрийг хүртэл тавиагүй аж. Мөн монгол ажилчдыг ажиллуулах ёстой ч ажиллуулалгүй өдийг хүрсэн байна. Сүүлийн үед тус компанийн зөрчил хэрээс хэтэрч байгаа учраас МХЕГ-аас 560 сая төгрөгийн торгуулийг тавьжээ. Мөн Нийслэлийн Нийгмийн даатгалын газраас 1 тэрбум 400 сая төгрөгөөр тус компанийг торгосон байна.

УИХ дахь Өргөдлийн байнгын хороо Оюу толгойн гэрээтэй холбоотой асуудлаар нээлттэй хэлэлцүүлэг зохион байгуулна гэв. Энэ тухай тус байнгын хорооны дарга, УИХ-ын гишүүн О.Баасанхүү мэдээлэв. Хэлэлцүүлгийг Өргөдлийн байнгын хороонд ирүүлсэн иргэдийн гомдол саналын дагуу, хаврын чуулган завсарласны дараа хийх аж.

Өнгөрсөн сард Ерөнхий сайд Ч.Сайханбилэг АНЭУ-д айлчлах үеэрээ Оюу толгойн далд уурхайн санхүүжилтийн төлөвлөгөөнд гарын үсэг зурсан билээ. Үүнийг нь хууль зөрчсөн хэмээн үзэж, зарим гишүүд заалт бүрээр нь авч үзэж, тайлбар хийсэн. Тухайлбал УИХ-ын гишүүн Ч.Улааны манайд сонинд өгсөн ярилцлагыг http://admin.dnn.mn/%D1%87-%D1%83%D0%BB%D0%B0%D0%B0%D0%BD-%D0%B0%D0%B6%D0%BB%D1%8B%D0%BD-%D0%B1%D0%B0%D0%B9%D1%80%D1%82%D0%B0%D0%B9-%D0%B1%D0%BE%D0%BB%D0%BB%D0%BE%D0%BE-%D0%B3%D1%8D%D1%8D%D0%B4-%D0%B1%D1%83%D1%83%D0%B6-%D3%A9%D0%B3%D1%81%D0%BD%D0%B8%D0%B9-%D0%B0%D1%80%D0%B4-%D1%8E%D1%83-%D0%B0%D0%BB%D0%B4%D0%B0%D0%B6-%D0%B1%D0%B0%D0%B9%D0%B3%D0%B0%D0%B0%D0%B3%D0%B0%D0%B0-%D1%82%D0%BE%D0%BE%D1%86%D0%BE%D0%B6-%D0%B1%D0%B0%D0%B9%D0%BD%D0%B0-%D1%83%D1%83/энэ линкээс уншаарай.