Month: June 2015

Мал, амьтны гоц
халдварт болон халдварт өвчний тухайд: 1 аймгийн 1 сумын нутагт “Хонины
цэцэг” өвчний 1, 1 аймгийн 1 сумын нутагт “Боом” өвчний 1, 4 аймгийн 5
сумын нутагт “Галзуу” өвчний 5, нийт 5 аймгийн 7 сумын нутагт 7
тохиолдлын голомтод тогтоосон хорио цээрийн болон хязгаарлалтын дэглэм
үргэлжилж байна.

Сүхбаатар аймгийн Сүхбаатар сумын Хулгар багийн нутаг “Хөөврийн гол”
гэдэг газар малчин А-ын 6 хонь 2015.06.02-ны өдөр халдварт өвчний шинж
тэмдэгтэйгээр өвчилснийг тусгаарлаж, дээж авч УМЭАЦТЛ-д шинжлүүлэхэд
2015.06.04-ний өдрийн хариугаар “Хонины цэцэг” өвчин болох нь;

Увс аймгийн Хяргас сумын Бугат багийн нутаг “Яварын гол” гэдэг газар
малчин Б, М нарын 3 үхэр 2015.06.07-ны өдөр халдварт өвчний шинж
тэмдэгтэйгээр хорогдсон тул сэг зэмийг устгаж, дээж авч аймгийн МЭАЦЛ-д
шинжлүүлэхэд 2015.06.10-ны өдрийн хариугаар “Боом” өвчин болох нь;

Говь-Алтай аймгийн Тайшир сумын Хуримт багийн нутаг “Улаан дэл” гэдэг
газар малчин З-ийн 1 үхэр 2015.05.25-ны өдөр халдварт өвчний шинж
тэмдэгтэйгээр хорогдсон тул сэг зэмийг устгаж, дээж авч аймгийн МЭАЦЛ-д
шинжлүүлэхэд 2015.05.27-ны өдрийн хариугаар “Галзуу” өвчин болох нь;

Булган аймгийн Орхон сумын Мааньт багийн нутаг “Мянган-Ямаат” гэдэг
газар малчин Л-ийн 1 үхэр 2015.05.27-ны өдөр халдварт өвчний шинж
тэмдэгтэйгээр өвчилснийг устгаж, дээж авч аймгийн МЭАЦЛ-д шинжлүүлэхэд
2015.06.06-ны өдрийн хариугаар “Галзуу” өвчин болох нь;

Говь-Алтай аймгийн Алтай сумын Урт багийн нутаг “Бунд” гэдэг газар
малчин Ц-ийн 1 морь 2015.06.06-ны өдөр халдварт өвчний шинж
тэмдэгтэйгээр өвчилснийг устгаж, дээж авч аймгийн МЭАЦЛ-д шинжлүүлэхэд
2015.06.10-ны өдрийн хариугаар “Галзуу” өвчин болох нь;

Увс аймгийн Түргэн сумын Баянхайрхан багийн нутаг “Шув тэвх” гэдэг газар
малчин Ц-ийн 1 хонь 2015.06.07-ны өдөр халдварт өвчний шинж
тэмдэгтэйгээр хорогдсон тул сэг зэмийг устгаж, дээж авч аймгийн МЭАЦЛ-д
шинжлүүлэхэд 2015.06.09-ний өдрийн хариугаар “Галзуу” өвчин болох нь;

Өвөрхангай аймгийн Тарагт сумын Туяа багийн нутаг “Цэцэн хөв” гэдэг
газар малчин Б-ийн 1 үхэр 2015.06.09-ний өдөр халдварт өвчний шинж
тэмдэгтэйгээр хорогдсон тул сэг зэмийг устгаж, дээж авч аймгийн МЭАЦЛ-д
шинжлүүлэхэд 2015.06.11-ний өдрийн хариугаар “Галзуу” өвчин болох нь тус
тус тогтоогдсон байна.

Өнөөдөр Цөлжилттэй тэмцэх олон улсын өдөр тохиож байна. Цөлжилтөд нэрвэгдсэн, газрын доройтолд өртөмтгий хуурай, гандуу бүс нутаг дэлхийн эх газрын 42 хувийг эзэлж байгаа бөгөөд энэ бүс нутагт 1,5 тэрбум орчим хүн оршин сууж байна. Цөлжилт, газрын доройтол нь тухайн бүс нутгийн ард иргэдийн амьжиргаа, эрх тэгш байдлыг бууруулах зэрэг эдийн засгийн сөрөг үр дагавар ихтэй бөгөөд үүнээс үүдэн гарах хор хохирол дэлхийн хэмжээнд жилд 42 тэрбум ам.долларт хүрч байна.

Хуурай, гандуу бүс нутгийн ард иргэд хүнсний хомсдолд орох магадлал өндөр бөгөөд үүнээс үүдэн дэлхий нийтэд хүнсний бүтээгдэхүүний үнэ огцом өсөх, нийлүүлэлт багасах эрсдэлтэй аж. Манай орны хувьд ч уур амьсгалын өөрчлөлт, хүний үйл ажиллагаанаас шалтгаалсан цөлжилт, хөрсний доройтол тулгамдсан асуудлын нэг болж байгаа бөгөөд нийт нутаг дэвсгэрийн 77.8 хувь нь их, бага ямар нэг хэмжээгээр цөлжилтөд өртөөд байна. НҮБ-ын Цөлжилттэй тэмцэх конвенцийн газраас гаргасан тодорхойлолтоор манай орны нийт газар нутгийн 90 орчим хувь нь газрын доройтол, цөлжилтийн аюулд өртөх эмзэг бүс нутагт хамаарагддаг. Байгалийн хүчин зүйлээс гадна бэлчээрийн талхагдал газрын доройтолд хамгийн хүчтэй нөлөө үзүүлж байна. НҮБ-ын Цөлжилттэй тэмцэх Конвенцийн газраас дэвшүүлсэн 10 жилийн стратегийн зорилттой уялдуулан Монгол Улсын Засгийн газар Цөлжилттэй тэмцэх үндэсний хөтөлбөрөө шинэчлэн хэрэгжүүлж байна. Мөн Хөрс хамгаалах, цөлжилтөөс сэргийлэх тухай хуулийг анх удаа батлан хэрэгжүүлж байна. “Газрын хөрс бол үнэгүй зүйл биш. Эрүүл хөрсөнд хөрөнгө оруулцгаая” гэсэн НҮБ-ын Цөлжилттэй тэмцэх конвенцийн 2015 оны уриаг хэрэгжүүлж, цөлжилтийн эсрэг хамтдаа тэмцэхийг Та бүхэнд хандан уриалж байна хэмээн УИХ-ын гишүүн, БОНХАЖ-ын сайд Д.Оюунхорол энэ өдөрт зориулсан уриалгадаа дурджээ.

Улаанбаатар хотод олон улсын хэмжээний томоохон хурал, чуулган, ирэх онд АСЕМ-ын уулзалт зохион байгуулахтай холбогдуулан бүтээн байгуулалтын тендерийн ажлыг богино хугацаанд чанартай хийх чадвартай, хариуцлагатай компанийг шалгаруулах, компанийн ажилчид, хөндлөнгийн иргэдийн амь нас, эрүүл мэнд, эд хөрөнгийг эрсдэлээс хамгаалахад нийслэлийн Худалдан авах ажиллагааны газар анхаарал тавин ажиллаж байна. Улаанбаатар хотын дулааны шугам хоолойн засварын ажил болон зуслангийн чиглэлийн автозам шинэчлэх ажил ид өрнөж байгаа энэ үед компаниудад хөдөлмөрийн аюулгүй байдал, эрүүл ахуйн стандарыг чанд мөрдөж ажиллахыг анхааруулж байна. Жил бүрийн зун, намрын улиралд бүтээн байгуулалтын ажил тэр дундаа барилгын салбарт хөдөлмөрийн аюулгүй байдал алдагдсанаас болж осол гэмтэл олноор гарч, хүний амь нас эрсддэг тохиолдол цөөнгүй гардаг. Үүнээс урьдчилан сэргийлэх, таслан зогсоох зорилгоор нийслэлийн ИТХ – ын Тэргүүлэгчдийн 75 дугаар тогтоолоор “Барилга угсралтын үйл ажиллагаанд хөдөлмөрийн аюулгүй байдал, эрүүл ахуйн асуудлыг зохицуулах нийтлэг журам” – ыг баталж, мөрдөн ажиллаж байгаа юм. Мөн нийслэлийн Худалдан авах ажиллагааны газраас тендерт оролцогчдод “мэргэжлийн хөдөлмөр хамгааллын инженертэй байх бөгөөд үндсэн ажилтан байх”, “Ажилчдын болон гуравдагч этгээдийн амь нас, эрүүл мэнд, эд хөрөнгийг даатгуулсан байх” гэсэн шаардлагыг тавьдаг. Иймд аж ахуйн нэгжүүд хөдөлмөр хамгааллын

инженерийг талбайд ажиллуулж холбогдох дүрэм, журам, стандартыг хангуулах, технологийн шинэчлэлтэй холбогдуулан тэдгээрийн аюулгүй ажиллагааны зааварчилгааг тогтмол өгч хэвших, хөдөлмөр хамгааллын хувцсаар хангах болон хэрэглэж хэвшүүлэх, туслах ажилтныг мэдээллээр хангах, шаардлагатай тэмдэг тэмдэглэгээ, хашлага хаалтыг стандартын дагуу хийж байршуулах зэрэг анхан шатны шаардлагыг хатуу баримтлах, дагаж мөрдөхийг анхааруулж байна гэж Нийслэлийн Худалдан авах ажиллагааны газраас мэдээллээ.

Нийслэлийн Засаг дарга “Хөрөнгө оруулалтын ажлыг зохион байгуулах тухай” А/485 дугаар захирамж гаргалаа. Захирамжаар Улсын төсвийн хөрөнгөөр 2015 онд санхүүжүүлэх Баянгол дүүргийн 85 дугаар цэцэрлэгийн сантехникийн засварын 70 сая төгрөгийн ажлын гүйцэтгэгчийг сонгон шалгаруулах Үнэлгээний хороог нийслэлийн Засаг даргын захирамжаар байгуулан, худалдан авах ажиллагааг холбогдох хууль журамд нийцүүлэн зохион байгуулахыг нийслэлийн Худалдан авах ажиллагааны газарт даалгав.

Хөрөнгө оруулалтын ажлыг гүйцэтгэлээр санхүүжүүлэхийг нийслэлийн ЗДТГ –
ын Санхүү, төрийн сангийн хэлтэст, захиалагчийн хяналт тавьж ажиллахыг
нийслэлийн Хөрөнгө оруулалтын газарт, хөрөнгө оруулалтаар бий болсон
хөрөнгийг нийслэлийн өмчид бүртгэн авч, эзэмшилт, ашиглалтын байдалд
хяналт тавьж ажиллахыг Өмчийн харилцааны газарт тус тус үүрэг болголоо
гэж Нийслэлийн ЗДТГ – ын Хэвлэл мэдээлэл, олон нийттэй харилцах хэлтсээс
мэдээллээ.

Дөрвөн настай охиноо онц хэрцгийгээр зодож, амь насыг нь хөнөөсөн гэх Г.Маралмаа болон Т.Цогт нарт холбогдох хэргийн шүүх хурал ШШГЕГ-ын харьяа хорих 461 дүгээр ангид болж байна.Шүүгдэгч Г.Маралмаагийн бие муудаж, цус алдсанаас дусал хийлгэх шаардлагатай гэж үзэн шүүх хурлыг түр завсарлуулжээ. Г.Маралмаа нь 27 долоо хоногтой жирэмсэн юм байна.

Шүүх хуралдааны эхлэл хэсэгт охиныэцэгТ.Цогт мэдүүлэг өгсөн. Тэрээр “2015 оны хоёрдугаар сарын 1-нээс 15-ны хооронд ээлжийн амралттай байсан. 14-нд охин минь шатнаас уначихлаа гээд ярьсан. Тэр үед эмнэлэгт очиход эмч нар “Ямар ч байсан өнөөдөртөө эмнэлэгт нь байлгаж байдлыг харзнах шаардлагатай” гэсэн. Тэгэхэд би аваад явж болох уу гэж асуухад эмч нар “Болно, гэхдээ гарын үсэг зурах ёстой” гэхээр нь гарын үсгээ зурсан. Түүнээс биш хүчээр авч явсан зүйл байхгүй. Хоёрдугаар сарын 15-нд ажилдаа явахад охин маань гэртээ сэргэлэн, цовоо үлдсэн. Гэтэл орой нь бас ухаан алдаад, татчихсан гэсэн. Хоёрдугаар сарын 16-ны өглөө явахад охин маань “Таныг явахаар Маралмаа аниа намайг зодно доо… гэж байсан” хэмээн мэдүүлжээ.

Т.Цогт мөн охины төрсөн ээж нь охиноо хүнд үрчлүүлэх бодолтой байсныг дурджээ.

Шүүх хурал үргэлжилж байна.

Төрийн байгуулалтын байнгын хорооны өнөөдрийн хуралдаанаар Монгол Улсын
Ерөнхийлөгчөөс өргөн мэдүүлсэн Нийтийн сонсголын тухай хуулийн төслийн
анхны хэлэлцүүлгийг хийх байсан ч хойшлууллаа. Учир нь Мөрдөн шалгах
сонсголыг хэрхэн явуулах талаар нэгдмэл ойлголтод хүрч чадаагүй учир
хойшлуулах хүсэлтийг зарим гишүүд гаргажээ. Уг хүсэлтийг МАН-ын гишүүд ч
дэмжсэн байна. Харин уг хуулийн төслийн Ажлын хэсгийн ахлагчаар
ажилласан УИХ-ын гишүүн Х.Тэмүүжин санал хураалт явуулах санал гаргасан
ч дэмжлэг авсангүй. Мөрдөн шалгах сонсголоор Ажлын хэсэг дээр нэгдмэл
ойлголтод хүрсний дараа хэлэлцэх нь зүйтэй гэж үзлээ.

Тулгар төрийн 2224, Их Монгол Улсын 809, Ардын хувьсгалын 94 жилийн ой, Үндэсний их баяр наадмыг угтан нийслэлийн төвийн зургаан дүүргийн тохижилт, үйлчилгээний байгууллагууд, “Нийтийн үйлчилгээний Улаанбаатар нэгтгэл” Төв цэнгэлдэх хүрээлэн, Хүй долоон худагт цэвэрлэгээ, ногоон байгууламж, тэмдэг тэмдэглэгээний ажлуудыг хийж эхэллээ. Улаанбаатар хотын Захирагчийн ажлын албанаас хариуцсан талбайн хуваарилалтыг хийж, дүүргүүдэд ажлын ерөнхий зааварчилгаа өгч ажиллаж байгаа бөгөөд мод хэлбэржүүлэлт, түүвэр цэвэрлэгээнээс гадна замын хашлага, хайс, Төв цэнгэлдэх хүрээлэн рүү орох хэсгийн тугны суурийн цагаан өнгийг сэргээн, цэнгэлдэхийн гадна талын ногоон бүслүүрийг будаж, 12 дугаар секцийн дотор байрлах нийтийн бие засах газрыг засварлах зэрэг ажлуудыг гүйцэтгэнэ.

“Нийтийн үйлчилгээний Улаанбаатар нэгтгэл” 40 том мод, 600 метр урт ургамлан хашлагыг тэгшлэн засч, өнгө үзэмжийг нь сайжруулах юм. Наадмын үеэр дүүрэг тус бүрээс 15-20 шар хантаазтан талбайд ажиллаж, 120 хогийн сав байрлуулж хог хаягдлыг тухай бүрт цэвэрлэн ачих бөгөөд түүвэр цэвэрлэгээ хийсэн газруудад ногоон байгууламжийн усалгааг өдөр бүр хийх юм гэж Улаанбаатар хотын Захирагчийн ажлын албанаас мэдээллээ.

Монгол Улсын Зэвсэгт хүчнээс АНУ-ын Зэвсэгт хүчинтэй хамтран зохион байгуулдаг “Khaan quest” сургууль энэ сарын 20-ноос Зэвсэгт хүчний 311 дүгээр ангийн сургалтын төвд эхлэх гэнэ. Монгол Улсын Зэвсэгт хүчний болон оролцогч улсуудын бие бүрэлдэхүүний энхийг дэмжих ажиллагааны арга техникүүдэд сурган дадлагажуулах, Зэвсэгт хүчний энхийг дэмжих ажиллагаанд оролцох чадавхийг нэмэгдүүлж, сургуульд оролцогч орнуудын цэргийн хамтын ажиллагааг хөгжүүлэх зорилготой аж.

Хоёр орны хамтарсан сургуулилт 2003 оноос эхэлсэн бөгөөд 2006 оноос өргөжин олон улсын сургууль болон өргөжсөн юм. Энэ сургууль нь Ази-Номхон далайн бүс нутгийн орнуудын энхийг дэмжих чадавхийг нэмэгдүүлэх чиглэлээр хэрэгждэг таван гол арга хэмжээний нэг юм байна.

“Khaan quest” энхийг дэмжих ажиллагааны олон улсын сургуулийн хүрээнд батальоны түвшний команд штабын сургууль, салааны түвшний тактикийн хээрийн сургууль, барилга инжерийн ба эмнэлгийн хүмүүнлэгийн хамтарсан ажиллагааг зохион байгуулж, Зэвсэгт хүчний энхийг сахиулагчдыг сургаж бэлтгэхийн зэрэгцээ, олон улсын цэргийн эмч, барилгын мэргэжилтнүүдтэй хамтран ажиллаж, туршлага солилцон, орон нутгийн ард иргэдэд хүмүүнлэгийн тусламжийн үйлчилгээ үзүүлдэг.

Эмнэлгийн хүмүүнлэгийн хамтарсан ажиллагааны хүрээнд хөдөө орон нутаг болон Улаанбаатар хотын захын дүүргүүдийн хүн амд эмнэлгийн анхан шатны тусламж, үйлчилгээ үзүүлдэг юм. Энэ жишгээр 2004 оноос хойш 75 мянга орчим иргэдэд үйлчилсэн байна. Мөн энэ үеэр тухай орон нутгийн эмч эмнэлгийн ажилчидтай харилцан туршлага солилцох сургалтыг зохион байгуулж, ард иргэдэд эрүүл мэндийн чиглэлээр сургалт явуулж, зөвөлгөө өгөх нь уламжлал болон тогтжээ.

Харин Барилга инженерийн хүмүүнлэгийн хамтарсан ажиллагааг 2006 оноос эхлэн зохион байгуулсан юм. Энэ сургуулилтын хүрээнд орон нутаг болон нийслэлийн захын дүүргүүдэд байрлах сургууль, цэцэрлэг, дотуур байрууд, өрхийн эмнэлгийн барилга байгууламжид засвар хийх, худаг, халуун усны байр барих зэрэг тусламжийн ажлыг АНУ-ын барилгын цэргийн бүрэлдэхүүнтэй хамтран хийдэг.

Сургуульд Монгол Улс, АНУ, ОХУ, БНХАУ, БНСУ, ХБНГУ, Франц, Бүгд Найрамдах Чех Улс, Австрали, Бангладеш, Беларус, Канад, Бүгд Найрамдах Энэтхэг улс, Индонези, Япон, Пакистан, Польш, Тажикстан, Турк, Их Британи, Умард Ирландын Нэгдсэн Вант Улс зэрэг 23 орны Зэвсэгт хүчний алба хаагчид оролцоно. Олон Улсын “Khaan quest” сургуулийн нээлт энэ сарын 20-нд болох юм.