Month: June 2015

Categories
мэдээ спорт

Т.Санчир Филиппиний өөр багтай гэрээ байгуулна

Монголын сагсан бөмбөгийн шигшээ багийн тамирчин Т.Санчир Филиппиний “Гинебра Сан Мигель” багтай өнгөрсөн дөрөвдүгээр сард гэрээ байгуулж, тус улсын лигт тоглож эхэлсэн. Гэвч тэрээр тавдугаар сарын сүүлээр Филиппиний багтай гэрээгээ цуцласан. Учир нь Т.Санчирыг урьсан дасгалжуулагч солигдож шинэ дасгалжуулагчтай үл ойлголцол үүсэн юм байна.

Харин Т.Санчир ирэх 12 дугаар сарын сүүлээр дахин Филиппин улс руу явж урилга илгээсэн хоёр багийн аль нэгт нь тоглохоор болжээ. Одоогийн байдлаар урьдчилсан тохиролцоо хийсэн ч аль багтай нь гэрээ хийхээ шийдээгүй байгаа аж.

Т.Санчирын хувьд эх орондоо ирээд сагсан бөмбөг болон англи хэлний вакумжуулсан сургалтад энэ сараас эхлэн сагсан бөмбөгийн мэргэжлийн хичээл заахаар бэлдэж байна.

Categories
мэдээ нийгэм

Цэцэг төв хүртэлх замын хөдөлгөөнийг нээнэ

Төв шуудангаас Цэцэг төв хүртэлх замын хөдөлгөөнийг хугацаанаас нь өмнө нээж, 2 дугаар шатны ажил эхэлнэ

Улаанбаатар хотод инженерийн дэд бүтцийн нийт 1153 төсөл, арга хэмжээг хэрэгжүүлэхээс хамгийн өргөн хүрээнд хийгдэх ажил нь Улаанбаатар хотын дулаан хангамжийн 3А,Б,В гол шугамыг ф600500 болгон өргөтгөх ажил юм.

Зам засвар, шугам хоолой солих ажлыг төлөвлөгөөний дагуу 2015 оны 06 дугаар сарын 07 ны өдрөөс эхлэн 2015 оны 08 дугаар сарын 16-ны өдөр хүртэл Энхтайвны өргөн чөлөөний Төв шуудангийн уулзвараас баруун 4 замын уулзвар хүртэлх замыг 3 үе шаттайгаар хааж гүйцэтгэнэ. Эхний үе шатны ажил буюу Төв шуудангийн уулзварын баруун талаас Цэцэг төвийн уулзварын зүүн тал хүртэл замын зорчих хэсгийг 06 дугаар сарын 07-ны өдрөөс хааж шинэчлэл, өргөтгөлийн ажил хийгдэж байна. Эхний хэсгийн ажлыг 06 дугаар сарын 25-ны өдөр дуусгахаар төлөвлөж байсан ч гүйцэтгэлийг графикт зааснаас түрүүлж хийж байгаа тул хугацаанаас нь өмнө буюу 21-ний өдөр дуусгана гэж холбогдох албаныхан мэдээллээ. Тус ажлын хүрээнд Цэцэг төвийн уулзварыг 06 дугаар сарын 19-ний 20 цагаас 06 дугаар сарын 21-ний 06:00 цаг хүртэл хаах юм. Тиймээс 06 дугаар сарын 21-ний 06:00 цагаас Төв шуудангаас Цэцэг төв хүртэлх уулзварын замын хөдөлгөөнийг нээж, 2 дугаар үе шатны ажил буюу Цэцэг төвийн уулзвараас УИД хүртэлх уулзварыг 06 дугаар сарын 21-ний 06:00 цагаас 07 дугаар сарын 05 хүртэл хааж шинэчлэл, өргөтгөлийн ажил хийнэ.

Улсын Драмын Эрдмийн театраас Төв шуудан хүртэлх дулааны шугамыг 1959 онд, Төв шуудангаас Баруун 4 зам хүртэлх шугамыг 1987 онд барьж, ашиглалтад оруулсан бөгөөд дулааны шугамын ачааллыг бууруулах, Гэр хорооллын дахин төлөвлөлтийн ажилтай уялдуулан нийслэлийн гэр хороололд дэд бүтэц татах боломжоор хангах зорилготой уг ажлыг Хөгжлийн банкны санхүүжилтээр хийж байгаа юм гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ улс-төр

Аж үйлдвэрийн бодлогыг баталлаа

Төрөөс аж үйлдвэрийн талаар баримтлах бодлого батлах тухай УИХ-ын тогтоолын төслийн эцсийн хэлэлцүүлгийг хийж, гишүүдийн 65.1 хувь дэмжин баталлаа.

УИХ-аас Аж үйлдвэрийн бодлогыг баталснаар ирэх 2030 он хүртэл Монгол Улс аж үйлдвэрлэлийн салбарыг хөгжүүлэхэд ямар бодлого баримталж ажиллах вэ гэдэг нь ийн тодорхой болж байна. Бодлогод аж үйлдвэрийн салбарыг гурван үе шаттай хөгжүүлэхээр тусгаж, ингэхдээ импортыг орлохуйц, экспортыг дэмжсэн аж үйлдвэрлэлийг хөгжүүлэхэд татварын болоод бусад төрлийн дэмжлэг үзүүлэхээр тусгаад байгаа юм. Нөгөөтэйгүүр, дотооддоо үйлдвэрлэж чадаж байгаа бүтээгдэхүүнийг импортын ижил төрлийн бүтээгдэхүүнээс хамгаалах бодлого барина.

Хэлэлцүүлгийн шатанд УИХ-ын гишүүн Ц.Даваасүрэн “Аж үйлдвэрийн бодлогыг дэмжиж байгаа, сайн ч төсөл. Гол нь Хөгжлийн бодлого, төлөвлөлтийн тухай хуулийн төсөлтэйгээ холбож өгөхгүй бол тавьсан зорилт хэрэгжихгүй болох. Шинээр Засгийн газар байгуулагдахад бодлого нь өөрчлөгдөж, аж үйлдвэрийн салбарыг хөгжүүлэх зорилт саарах вий гэсэн болгоомжлол төрж байна” гэдгээ онцолсон юм.

Одоо чуулганы нэгдсэн хуралдаанаар Үйлдвэржилтийг дэмжих тухай хуулийн төслийг хэлэлцэж эхлээд байна. Уг төслийн хэлэлцэх эсэхийг шийдэх юм.

Categories
мэдээ улс-төр

Ч.Сайханбилэг В.Путинтай уулзлаа

ОХУ-ын Ерөнхийлөгчийн ивээл дор жил бүр зохион байгуулагддаг, дэлхийн бизнесийн лидерүүд, улс орны удирдагчид оролцдог чуулга уулзалт Санкт Петербург хотноо өчигдөр /2015.06.18/ эхэллээ. Монгол Улсын Ерөнхий сайд Ч.Сайханбилэг энэхүү чуулга уулзалтад оролцож байгаа юм. Чуулга уулзалтын үеэр Монгол Улсын Ерөнхий сайд Ч.Сайханбилэг ОХУ-ын ерөнхийлөгч В.Путинтай уулзсан байна. Тэд хоёр улсын эдийн засгийн хамтын ажиллагааны талаар ярилцсан байна.

Ерөнхий сайд уржигдар /2015.06.17/ Москва хотод Евразийн эдийн засгийн комиссийн Сайд нарын зөвлөлийн дарга В.Б.Христенкотой уулзаж, “Монгол Улсын Засгийн газар, Евразийн эдийн засгийн комисс хоорондын хамтын ажиллагааны тухай санамж бичиг”-т гарын үсэг зурлаа.
Монгол Улс болон Евразийн эдийн засгийн комиссийн гишүүн орнууд бүх талын хамтын ажиллагаагаа хөгжүүлэх, худалдааны үр ашгийг нэмэгдүүлэхэд дэмжлэг үзүүлэх, худалдааг хөгжүүлэхэд тулгарч буй саад бэрхшээлийг арилгахад чиглэсэн арга хэмжээг хэрэгжүүлэхээр санамж бичиг байгууллаа. Энэхүү санамж бичиг нь хамтын ажиллагааны эхлэл гэж дүгнэж буй юм. Мөн хамтын ажиллагаанд бодитой ахиц гарна гэдэгт талууд итгэлтэй байгааг онцолжээ.

Categories
мэдээ улс-төр

Шүүх байгуулах тухай хуулийг баталлаа

УИХ-ын чуулганы хуралдаанаар Шүүх байгуулах тухай /шинэчилсэн найруулга/, Монгол Улсын Шүүхийн тухай хуульд нэмэлт, өөрчлөлт оруулах тухай, Шүүх байгуулах тухай хуулийг хүчингүй болсонд тооцох тухай хуулийн төслүүд, Шүүгчийн орон тоо батлах тухай Монгол Улсын Их Хурлын тогтоолын төслийн эцсийн хэлэлцүүлгийг хийж, хуулийг баталлаа. Уг асуудлыг өчигдөр хэлэлцэх явцад хуулийг дагаж мөрдөх хугацааг дэмжээгүй. Тиймээс Хуульзүйн байнгын хороо хуралдаж төслийн 5 дугаар зүйлийг “Энэ хуулийг Шүүх байгуулах тухай /Шинэчилсэн найруулга/ хууль хүчин төгөлдөр болсон өдрөөс эхлэн дагаж мөрдөнө” гэж өөрчилсөн юм.

Ингэснээр долдугаар сарын 1-нээс өмнө хуулийг хэрэгжүүлэх бэлтгэл ажлаа хангаж, шинэ системээр ажиллахыг УИХ-ын дарга санууллаа. Харин одоо Нягтлан бодох бүртгэлийн тухай хуулийн эцсийн хэлэлцүүлгийг хийж байна.

Categories
мэдээ улс-төр

“Монгол Улсын 2014 оны төсвийн гүйцэтгэлийг батлах тухай” тогтоолын төслийг өргөн барилаа

Монгол Улсын Их Хурлын дарга Зандаахүүгийн Энхболдод Улсын Их Хурлын гишүүн, Сангийн сайд Ж.Эрдэнэбат “Монгол Улсын 2014 оны төсвийн гүйцэтгэлийг батлах тухай” Улсын Их Хурлын тогтоолын төслийг өнөөдөр /2015.06.19/ өргөн барилаа.

Монгол Улсын 2014 оны төсвийн тэнцвэржүүлсэн орлого 6.276.6 тэрбум төгрөг, нэгдсэн төсвийн зарлага 7.144.6 тэрбум төгрөгийн гүйцэтгэлтэй гарч, улмаар нэгдсэн төсвийн нийт тэнцэл 868.0 тэрбум төгрөгийн алдагдалтай гарсан байна. Монгол Улсын 2014 оны төсвийн тэнцвэржүүлсэн орлого ба тусламжийн дүн 4.204.4 тэрбум, зарлага 5.229.2 тэрбум төгрөгийн гүйцэтгэлтэй, нийт тэнцэл 1.024.08 тэрбум төгрөгийн алдагдалтай гарчээ.

Засгийн газрын санхүүгийн нэгдсэн тайланд улсын болон орон нутгийн төсвийн ерөнхийлөн захирагчийн санхүүгийн нэгтгэсэн тайлан, төрийн болон орон нутгийн өмчит аж ахуйн нэгж, байгууллагын санхүүгийн тайлан, Засгийн газрын шугамаар авч ашиглаж буй зээл, буцалтгүй тусламжийн хөрөнгөөр хэрэгжиж буй төсөл сангуудын тайланг нэгтгэсэн байна хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ улс-төр

Захиргааны ерөнхий хуулийг баталлаа

УИХ-ын
чуулганы нэгдсэн хуралдаанаар Захиргааны ерөнхий хууль болон холбогдох бусад
хуулийн төслүүдийн эцсийн хэлэлцүүлгийг хийж, гишүүдийн 80.9 хувийн саналаар
баталлаа. Тодруулбал, чуулганы нэгдсэн хуралдаанд оролцсон 47 гишүүнээс 38 нь
эцсийн хэлэлцүүлгийг дэмжиж баталсан юм.

УИХ-ын
дарга З.Энхболд “Захиргааны ерөнхий хуулийг боловсруулахад олон хүний оролцоо,
мөн олон жилийн хөдөлмөр орсон. Хуулийн төслийг боловсруулахад голлон ажилласан
Ерөнхийлөгчийн Тамгын газар, Хууль зүйн яам, ажлын хэсгийнхэнд талархал
илэрхийлье” гэсэн юм.

УИХ-аас
энэхүү хуулийн төслийг батлагдсантай холбоотойгоор Засгийн газарт хандаж, мөн
тодорхой үүрэг хүлээж байна. Тухайлбал, 2015 оны аравдугаар сарын 1-ний дотор
багтаан хуулийн үзэл баримтлалыг сурталчилж, холбогдох хүмүүсийг сургалтад
хамруулах юм.

Мөн
хуралдаанаар Нийслэл хотын албан татварын тухай хуулийн төслийн эцсийн
хэлэлцүүлгийг хийж, гишүүдийн 76.6 хувийн дэмжлэг хүлээн батлагдлаа.

Энэхүү
төсөл батлагдсанаар Нийслэл хот татвартай болж байна.

Одоо
чуулганы нэгдсэн хуралдаанаар Төрөөс Аж үйлдвэрийн талаар баримтлах бодлого
батлах тухай УИХ-ын тогтоолын төслийн эцсийн хэлэлцүүлгийг хийж байна.

Categories
мэдээ нийгэм

Монголын ард түмэнд бороохой цөөдөөгүй

УИХ-ын гишүүд Эрүүгийн байцаан шийтгэх болон Прокурорын байгууллагын тухай хуульд нэмэлт оруулах тухай хуулийн төслийг санаачлан УИХ хэлэлцэж эхэллээ. Тодруулбал, хүмүүсийн хэлж заншсанаар АТГ-аас Прокурорын мөрдөнг салгах тухай асуудлыг УИХ хэлэлцэж эхэллээ гэсэн үг. Үүнийг олон түмэн талархан хүлээн авч, дэмжиж байна. Ер нь АТГ-ыг анх юу гэж ярьж байгуулсныг хүмүүс мартаагүй байх. Хээл хахуулийн эсрэг сурталчилгаа явуулж, соён гэгээрүүлэх ажлыг зохион байгуулна. Үүний зэрэгцээ төрд байгаа хээл хахууль өгсөн, авсан, зуучилсан хүмүүст арга хэмжээ авна гэсэн нэрийн дор энэ байгууллагын шав тавигдсан. Гэтэл АТГ алхам алхамаар томорсоор иржээ. Одоо харахад мөрдөн байцаах бүх эрхийг өөртөө авсан байна. Улстөрчид, гүйцэтгэх болон шүүх засаглал, цагдаа, прокурорын байгууллагыг харцаараа хөдөлгөх хэмжээнд хүрч бойжжээ. Түүнээс гадна Монголын эрх баригчдын хэн хүчтэйд нь үйлчилдэг, өрсөлдөгчийг нь захиалгаар намнадаг болчихож. Хамгийн харамсалтай нь нам доторх өрсөлдөгчийг нь захиалгаар нам дарж байгаа явдал.

Ийм дарангуйлагч байгууллагын гашуун түүх Монголын өнгөрсөнд олон бий. До яам гэж байв. Тэд АТГ-ын нэгэн адилаар ард түмнийг дарлаж болох бүхий л эрх мэдлийг эдэлснээр ямар гашуун мөрийг түүхэнд үлдээсэн билээ. Тэд байгаа онилсон л бол барьж цагдаж, шалтгаангүй байсан ч гүйцэтгэх ажиллагаа явуулж эх орны дайсан гэж зарлаад эцэст нь амь насыг нь авч салдаг байсан. Гоо төгөлдөр эхнэрийг нь авахын тулд жирийн албан хаагчийг хэрэгт гүтгэн ялд унагаж халуун сумаар асуудлыг шийдсэн түүх хэдэн зуугаараа тоологдоно. Одоо АТГ ийм болж эхэлсэн байна.

Хээл хахууль, малын хулгай гэх зэргээр нэг хэргийг тусгайлан сонгож түүнд гүйцэтгэх ажиллагаа явуулдаг байгууллагатай болохоор ийм болдог бололтой. Уг нь хээл хахууль гэдэг гэмт хэрэг мөн юм бол шүүх, цагдаа нь шийднэ биз. АТГ байх ёстой гэж үзвэл соён гэгээрүүлэх ажлаа л хийг. Хээл хахуультай тэмцэхийн тулд ийм хүчирхэг байлгаж яах гээд байгаа юм. Монголын ард түмнийг дарлах бороохой цөөдөөгүй л байлтай. До яамнаас эхлэлтэй цагдаа, шүүх, тахар, ШШГЕГ хэн нь ч ард түмнийг бороохойдох эрхтэй. Үүн дээр АТГ хэмээх аймшигтай газар байгууллага бас бий болчихоод байгаа нь энэ. Нэг жилийн дотор 300 орчим хүнд хилийн хорио тавихад 20 орчим хувь нь АТГ-ын хүсэлтийн дагуу шийдэгдсэн байдаг. Энэ жилийн эхний хагаст 286 иргэнийг шалгаж 100 гаруй хүнийг гэмт хэргийн шинжтэй үйлдэл хийсэн гэж баахан шалгаж байцаасны эцэст 24-д нь эрүүгийн хэрэг үүсгэжээ. Ер нь жилийн жилд тав зургаан зуун жирийн иргэн, аж ахуйн нэгжийг шалгаж, байцааж зовоодог юм байна. АТГ-ынхан зүгээр байцааж, шалгана гэж байхгүй. Прокурорын мөрдөн АТГ-т очсоноор эрүүдэн шүүлт 20, 30 хувиар нэмэгдсэн судалгааг Хүний эрхийн комисс гаргачихаад байна. Эрүүдэн шүүлтийн явцад амь насаараа хохирсон тохиолдол ч бий. Газрын тосны газрын дарга асан Д.Амарсайхан АТГ-ынхны тамлалыг даалгүй шоронд бие барсан нь саяхан. Ер нь АТГ хүнийг тарчлааж тамлах ажлаа гүтгэж гүжирдэхээс эхэлдэг. Үүний нэг жишээ нь УИХ-ын гишүүн Ё.Отгонбаярын гэргий О.Эрдэнэсолонгын гэх хэрэг нотолно. Түүнийг мөнгө угаасан, авлига өгч авсан гээд АТГ зарлаж нийгэм нэг хэсэг шуугиж байлаа. Олон ч улстөрч, бизнесмен, төрийн албан хаагч ийм гүжирдлэгт автаж хохирсон доо. Эцэст нь АТГ-ынхан “Худлаа байжээ” хэмээн сулхан дуугардаг нь эхэлж шуугисан шигээ олны анхааралд оролгүй үлддэг.

Монгол Улс ийм аймаар байгууллагатай байх хэрэг байгаа юм уу. Байх ёстой гэж үзвэл араа шүдгүй болгох шаардлага байна. Анх шавыг нь тавьсанчлан хээл хахуулийн эсрэг сурталчилгаа явуулж, соён гэгээрүүлэх ажлыг хийдэг болгож байранд нь буцаамаар байна. АТГ анх байгуулагдсан хүрээнээсээ хальж өнөөдөр хээл хахууль өгсөн, авсан, зуучилсан, төрийн албан тушаалтан албан тушаалаа хэтрүүлэх, урвуулах, төрийн бус нэгжийн албан тушаалтан албан тушаалаа хэтрүүлэх, урвуулах, төсвийн хөрөнгийг зориулалтын бусаар зарцуулах, үндэслэлгүй хөрөнгөжих, мөнгө угаах зэрэг гэмт хэрэг гэж хэлж болох бүхий л зүйлчлэлээр гүйцэтгэх ажиллагаа явуулж байгааг зогсооё.

Ер нь УИХ л ийм араатан шинжтэй байгууллагыг бий болгосон. Эхлээд АТГ-ыг байгуулахдаа тэдэнд хуулийг яаж ч гажуудуулж байсан хариуцлага тооцдоггүй эрх зүйн системийг нь хийж өгсөн. Дараа нь улстөрчид, гүйцэтгэх болон шүүх засаглал, цагдаа, прокурорын байгууллага, юм бүхнийг хянах эрхийг олгосон. Эцэст нь өөрийг нь хянах ёстой байгууллагыг өөрт нь харьяалуулж хамгаас хүчирхэг болгоодхов. Энэ алдаагаа УИХ даруйхан засч, залруулах цаг аль хэдийнэ болчихож. Эхний ээлжинд зарим УИХ-ын гишүүдийн санаачилсны дагуу Прокурорын мөрдөнг АТГ-аас салгаж араас нь алхам тутамдаа сайжруулах, соён гэгээрлийн чиглэлээр ажилладаг болгох шаардлага байна. Эс тэгвээс Монгол Улс ардчилсан улс байхаа болилоо.

Л.Мөнхтөр

Categories
мэдээ эдийн-засаг

Ж.Батаа:Ам.долларын ханш тогтворжих хандлагатай байна

Монголбанкны Валют, эдийн засгийн газрын
Санхүүгийн зах зээлийн хэлтсийн захирал Ж.Батаагаас ханшийн талаар тодрууллаа.

-2000 төгрөг рүү дөхөөд байсан төгрөгийн
ам.доллартай харьцах ханш сүүлийн хоёр сар хагасын турш чангарсан хэдий ч хэд
хоногийн өмнөөс буцаад суларч эхэллээ. Ямар учраас ханшийн чиглэл ийнхүү
өөрчлөгдөх болсныг тайлбарлахгүй юу?

-Тийм ээ, 3 дугаар сарын сүүлээр 2000 төгрөг
дөхөөд байсан төгрөгийн ханш долоо хоногийн өмнө доод цэгтээ буюу 1860 орчим
төгрөгт хүрч, нийт 7 хувиар чангарсан. Энэ нь сүүлийн 3 жилийн хугацаанд
хамгийн удаан үргэлжилсэн ханшийн чангаралт болсон юм. Харин долоо хоногийн
өмнөөс төгрөгийн ханш буцаад суларч эхэлсэн бөгөөд өнөөдрийн байдлаар банкууд
1920 орчим төгрөгөөр ам.доллар арилжаалж байна. Валютын зах дээр томоохон
хөдөлгөөний дараа энэ мэт тохиргоо хийгддэг нь хөрөнгийн болон хувьцааны зах
зээл дээр ажиглагддагтай ижил зах зээлийн хэвийн үзэгдэл. Бид уг тохируулга
хийгдсэнээр ханшийн хэлбэлзэл энэ түвшиндээ аажмаар тогтоно гэж харж байна.

-Цаашид ханш хэрхэн өөрчлөгдөх бол?

-2015 оны эхний 4 сарын байдлаар, төлбөрийн
тэнцлийн алдагдал өнгөрсөн 3 жилийн мөн үетэй харьцуулахад 37%-иар буурч,
тогтмол өндөр алдагдалтай байсан манай улсын барааны гадаад худалдаа энэ онд
анх удаа 418 сая ам.долларын ашигтай гарсан нь Монгол Улсын валютын захын
тогтвортой байдалд эерэгээр нөлөөлөхөөр байна.

Хэдийгээр зарим томоохон төслүүдийн үйл явц
хэрхэн шийдвэрлэгдэх нь тодорхой бус хэвээр байгаа ч, бидний төсөөлж байгаагаар
2015 онд төлбөрийн тэнцлийн дарамт өнгөрсөн оны үзүүлэлтээс нэлээд хувиар
буурах эерэг дүр зурагтай байгаа. Үүний нэг илрэл нь Худалдаа хөгжлийн банк
олон улсын санхүүгийн зах зээл дээр 500 сая ам.долларын бондыг арилжаалж эх
үүсвэрийг татсан, Монголбанк Хятадын Ардын банктай байгуулсан үндэсний мөнгөн
тэмдэгт солилцох хэлцлийн эх үүсвэрийн боломж нэмэгдсэн, уул уурхайн төслүүдийн
хөрөнгө оруулалтын асуудал шийдвэрлэгдэх эхний алхамууд хийгдсэн зэрэг юм. Иймд
эдийн засгийн суурь үзүүлэлт талаасаа валютын ханш огцом сулрах эрсдэл эрс
буурсан гэж ойлгож болно.

-Энэ үед Монголбанкны валютын зах дахь
оролцоо ямар байна?

-Монголбанк төгрөгийн гадаад валюттай харьцах
ханш нь санхүүгийн болон макро эдийн засгийн тогтвортой байдлыг хангах, эдийн
засгийн гадаад тэнцвэрийг дэмжихүйц уян хатан тогтож байх зарчмыг баримталдаг.
Энэ ч үүднээс бид богино хугацааны эрэлт, нийлүүлэлтийн зөрүү, улирлын
нөлөөлөл, хүлээлтийн хүчин зүйлээс шалтгаалан валютын ханшийн огцом хэлбэлзэл
үүссэн тохиолдолд түүнийг бууруулах зорилгоор валютын захад тухай бүр оролцож
ирлээ. Энэ долоо хоногт гэхэд Монголбанкнаас ханшийн огцом хэлбэлзлийг
бууруулах зорилгоор нийт 42.0 сая ам.долларыг дуудлага худалдаагаар валютын
захад нийлүүлээд байна. Цаашид, шаардлагатай үед валютын зах дахь оролцоогоо
хадгалсан хэвээр байна.

Categories
мэдээ улс-төр

МАН-ын бүлэг Үл хөдлөх эд хөрөнгийн барьцааны тухай хуулийн төслөөр завсарлага авлаа

УИХ-ын чуулганы баасан гаригийн нэгдсэн хуралдаанаар яг одоо Шүүх байгуулах тухай хуулийн эцсийн хэлэлцүүлгийг хэлэлцэж байна. Үүний өмнө Засгийн газраас өргөн мэдүүлсэн Үл хөдлөх эд хөрөнгийн барьцааны тухай хуульд нэмэлт оруулах тухай болон холбогдох бусад хуулийн төслүүдийн анхны хэлэлцүүлгийг үргэлжлүүлж, байнгын хорооноос гаргасан саналаар санал хураалт явуулав. Гэвч гишүүд хуралдааны танхимаас гарч явсаар 33 гишүүн үлдсэн тул санал хураалт хэсэг саатлаа. Одоогийн байдлаар АН-аас 21, Шударга ёс эвслээс 8, ИЗНН-аас 2, бие даагч нэг гишүүн хуралдаандаа сууж байгаа юм. Харин МАН-аас нэг ч гишүүн ирээгүй байсан. Хэсэг хугацааны дараа Ө.Энхтүвшин гишүүн хуралдааны танхимд ирж “Бүлгийн байр суурь дэмжигдэхгүй бол завсарлага авахаар ярьсан. Тиймээс хуулийн төслөөр ажлын тав хоногийн завсарлага авч байна” гэсэн юм.