Month: June 2015

Сэлэнгэ аймгийн Баруунхараад тослог ургамлыг боловсруулах бүрэн автомат үйлдвэр өнөөдөр нээгдлээ. “Делта холдинг” группын охин компани болох “Майнд тэч” компани энэхүү үйлдвэрийг ашиглалтад оруулж байгаа нь энэ юм. Үйлдвэрийг байгуулахад “Делта” группийнхэн өөрсдийн санхүүжилтээс гадна “Чингис” бондоос 22.5 тэрбум төгрөгийн хөнгөлөлттэй зээл авч үйлдвэрээ бүрэн ашиглалтад оруулсан байна. Үйлдвэр ашиглалтад орсноор эх орны хөрсөнд ургасан тослог ургамлыг боловсруулж, бидний өдөр тутмын хэрэгцээнд нийцэх, стандартын шаардлага хангасан эрүүл аюулгүй “Оргих” ургамлын тосыг гарган монголын зах зээлд нийлүүлж эхлээд байна. Түүнчлэн дан ганц ургамлын тос үйлдвэрлээд зогсохгүй рапсаас тосыг нь ялгаж яваад үлдэгдэл шаараар нь малын тэжээл, био дизель түлш зэргийг гаргаж байгаа аж.

Баруун Африкийн Нигерт гэрийн нэрмэл архинд 70 гаруй хүн нас барсан тухай мэдээллийг бид хүргэсэн. Тэгвэл Энэтхэгийн Мумбайд ч энэ явдал давтагдлаа. Тодруулбал тус хотын 33 иргэн хууль бусаар найруулсан архинд хордон нас барж, есөн хүний биеийн байдал туйлын хүнд байгаа гэнэ.

Сэлэнгэ аймгийн Хүдэр сумын Баянцагаан багийн нутаг “Зэлт гол” гэдэг газар энэ сарын 16-ны өдөр ойн түймэр гарсныг тус аймгийн Онцгой байдлын газрын 33 албан хаагч, Дархан-Уул аймгийн Онцгой байдлын газрын 24 албан хаагч, орон нутгийн 45 иргэн, 4 автомашин, нийт 102 хүн, 8 техник хэрэгсэлтэйгээр унтраахаар ажиллаж байна.

Мөн багийн нутаг “Янгаахайн-Ам”-нд гарсан түймрийг тус аймгийн Онцгой байдлын газрын 12 албан хаагч, орон нутгийн 10 иргэн, Хилийн цэргийн 3 нийт 25 хүн, 1 техник хэрэгсэлтэйгээр, Мандал сумын Түнхэл тосгоны “Идэмийн гол” гэдэг газар болон Ерөө голын халуун рашааны чиглэлд гарсан ойн түймрийг унтраахаар аймгийн Онцгой байдлын хэлтсийн алба хаагчид ажиллаж байгааг ОБЕГ-ын Гамшгийн шуурхай удирдлагын газраас мэдээлэв.

Түүнчлэн Булган аймгийн Бүрэгхангай сумын “Цоохор морьтын төхөм” гэдэг газар энэ сарын 19-ний өдөр хээрийн түймэр гарсныг унтраахаар тус аймгийн Онцгой байдлын газрын 12 албан хаагч, орон нутгаас 31 хүн, нийт 43 хүн 9 техник хэрэгсэлтэйгээр ажиллаж байгаа аж.

Мэргэжлийн хяналтын ерөнхий газраас “Оюутолгой” ХХК, “Зонхэн Юу Тиан” ХХК, Шивээ хүрэн, Гашуун сухайт хилийн боомт чиглэлийн нүүрс тээвэрлэдэг замд 2015.06.07-10-ны өдрүүдэд шалгалт хийсэн байна. Шалгалтын дүнг ерөнхий газрын Даргын зөвлөлийн 2015.06.19-ний өдрийн хуралдаанаар хэлэлцэн шийдвэр гаргалаа.

Тухайлбал Дорноговь, Чойр чиглэлд нүүрс тээвэрлэх гэж байгаа замын чиглэлийг холбогдох хууль тогтоомж, журмын дагуу батлуулах, техник-эдийн засгийн үндэслэл, нарийвчилсан зураг төслийг ачаа тээвэрлэлтийн өнөөгийн нөхцөл байдалд тохируулж, авто тээврийн хэрэгсэл аюул осолгүй зорчих, байгаль орчинд сөрөг нөлөө үзүүлэхгүй нөхцөл бүрдүүлэхийг захиалагч тал нь төрийн захиргааны төв байгууллага хамтран шийдвэрлэх нь зүйтэй гэж үзлээ.

Мөн Өмнөговь аймгийн Гурвантэс сумын нутаг дэвсгэрт шинээр баригдсан Нарийнсухайт-Шивээхүрэн чиглэлийн 43.2 км хатуу хучилттай авто замаар нүүрс тээвэрлэх, Ухаа худаг-Гашуунсухайт чиглэлийн 239 км авто замын засвар, арчлалтын санхүүжилтийг гүйцэтгэгч байгууллагуудад олгож, засварыг тогтоосон хугацаанд хийлгэх зэрэг дүгнэлт, шийдвэрийг Засгийн газрын Хэрэг эрхлэх газар, Уул уурхайн яам болон холбогдох аж ахуйн нэгж, байгууллага, орон нутгийн захиргаанд хүргүүлэхээр тогтлоо. Шалгалтаар илэрсэн зөрчлийг заасан хугацаанд арилгахыг “Зонхэн Юу Тиан” ХХК-д албан шаардлагаар үүрэг болгосон байна.

Шалгалтын дүнгээс үзвэл Ухаа худаг-Гашуунсухайт чиглэлийн хатуу хучилттай 239 км авто замын Цагаан хад орчмын асфальтбетон хучилт цоорч доод суурь ил гарсан, хөндлөн дагуу, торон хагарал үүссэн, зарим босоо тэмдэг байхгүй, хэвтээ тэмдэглэлийг шинэчлээгүй зэрэг зөрчил илэрсэн байна. Хөрөнгө хүрэлцээгүйгээс замын томоохон эвдрэлтэй хэсгийг зассан хэдий ч өнгөрсөн жилийн засварын чанар хангалтгүй болсон шалгалтаар илэрчээ.

“Оюу толгой” ХХК шинээр баригдсан Оюутолгой-Гашуунсухайт чиглэлийн 85.7 км хатуу хучилттай авто зам, замын байгууламжийг паспортжуулж, засвар хийн тээврийн хэрэгсэл хэвийн зорчих нөхцлийг хангуулах шаардлагатай гэж хурлаас үзлээ.

Одоогийн байдлаар уул уурхайн бүтээгдэхүүнийг “Оюу толгой” ХХК-ийн талбай-Гашуунсухайт хилийн боомт чиглэлийн 85,7 км зам болон Цагаан хаднаас Таван толгой-Гашуунсухайт чиглэлийн хатуу хучилттай авто замаар тээвэрлэдэг. Төслийн хүрээнд 921 тээврийн хэрэгсэл ачаа, зорчигч тээврийн үйлчилгээ эрхэлж байна. Компанид ажиллагсдын 94.85 хувь нь монгол, 5.15 хувь нь гадаад хүн байна.

БНСУ-д тархаад байгаа коронавирусээр 165 хүн өвчилж 23 хүн нас бараад байна.Эл өвчнөөр дэлхийн нэр бүхий улсад 1329 хүн өвчилж 468 хүн нас барсан тухай Дэлхийн эрүүл мэндийн байгууллага мэдээллээ.

Энэ вирусын халдвар бүрэн судлагдаагүй, вакцин, өвөрмөц эмчилгээ байхгүй, эндэгдэл өндөртэй тул онцын шаардлагагүй бол өвчлөл гарсан орнуудад зорчихгүй байх, БНСУ-д эмчилгээнд явах гэж буй хүмүүс онцгой сэрэмжтэй байхыг анхааруулж байна. Коронавирус хил дамжин орж ирэхээс урьдчилан сэргийлэх зорилгоор бэлэн байдлаа хангаж ажиллах тухай Албан даалгаврыг Мэргэжлийн хяналтын ерөнхий газрын дарга, улсын ерөнхий байцаагч Ш.Раднаасэд өмнө нь хилийн боомт дахь Мэргэжлийн хяналтын алба, хэлтэст хүргүүлсэн.

Энэ дагуу хилээр нэвтэрч байгаа иргэдийн халууныг хэмжих, голомттой бүс нутгаас ирсэн бол эрүүл мэндийн асуумж, судалгаа бөглүүлэн тандалт хийж, мэдээ мэдээлэл, сэрэмжлүүлэг, зөвлөмжийг зорчигчдод өгч байна. Хилийн мэргэжлийн хяналтынхан сэжигтэй тохиолдол илэрсэн үед үзлэг хийх, анхан шатны тусламж үзүүлэх, тусгаарлах зэрэг бэлтгэлээ бүрэн хангаж, хамгаалалтын хувцас хэрэгсэл, ариутгал, халдваргүйтгэлийн бодисын нөөцөө бүрдүүлээд байгаа юм байна.

Авлигатай тэмцэх газраас явуулсан албан тушаалтны хувийн ашиг сонирхлын мэдүүлэг болон хөрөнгө, орлогын мэдүүлгийн бүрдүүлэлтийн хяналт шалгалтаар илэрсэн зөрчлүүдийг арилгах чиглэлээр тодорхой арга хэмжээг авч хэрэгжүүлснээ Архивын ерөнхий газраас мэдэгдэв.

Архивын ерөнхий газраас албан тушаалтнуудын хувийн ашиг сонирхлын мэдүүлэг болон хөрөнгө, орлогын мэдүүлгийг хүлээн авсан тухай бүртгэлийг гарын үсэг зурж баталгаажуулах, мэдүүлэг болон түүнтэй холбоотой тайлан мэдээг хадгалах, Үндэсний төв архивын ТҮ-9 ангилал зэрэглэлийн төрийн үйлчилгээний 8 албан хаагчийн албан тушаалыг түр түдгэлзүүлж, урьдчилсан мэдүүлгийг хянуулах, худалдан авах ажиллагаа зохион байгуулах үед үнэлгээний хорооны гишүүдээр мэдэгдэл гаргуулах, мэдүүлгээ хожимдуулж гаргасан албан тушаалтанд зохих арга хэмжээ авах зэрэг үйл ажиллагааг зохион байгуулжээ.

Цаашид мэдүүлгийг бүртгэх, хянах, хадгалах эрх бүхий албан тушаалтны үйл ажиллагааг сайжруулж, авлигын эсрэг хууль тогтоомжийг хэрэгжүүлж ажиллахад анхаарч ажиллах болно гэдгээ Авлигатай тэмцэх газарт мэдэгдлээ.

“Унадаг дугуйн зогсоолтой Улаанбаатар” төсөл өнгөрсөн сараас хэрэгжиж эхлээд байгаа бөгөөд нийт 500 аж ахуйн нэгж, байгууллагад санал хүргүүлэх юм байна.

Монголын Залуучуудын Холбоо, “Trek” дугуйн дэлгүүр нь олон улсын стандартад нийцсэн 10 төрлийн унадаг дугуйн зогсоолыг саналыг боловсруулжээ.

Энэ саналаа танилцуулга хэлбэрээр бэлдэн 500 орчим байгууллагад албан ёсоор илгээх бөгөөд одоогоор 300 гаруй байгууллагад хүргээд байгаа аж.

Монголын Залуучуудын Холбоо, “Залуу дугуйчин” клуб, “Найс байк клуб”, “Trek” дугуйн дэлгүүр хамтран “Унадаг дугуйтай Улаанбаатар” хөтөлбөрийн хүрээнд энэ төслийг хэрэгжүүлж буй бөгөөд хэрэгжсэнээр дугуйчдад хамгийн их хэрэгцээтэй нийслэлд үйл ажиллагаа явуулдаг их, дээд сургууль, төр хувийн хэвшлийн бүхий л байгууллагуудад дугуйн зогсоол нэмэгдээд зогсохгүй дугуй унах иргэдийн тоо нэмэгдэж, нийслэл хотын агаарын бохирдол болон замын түгжрэлийг бууруулах боломжтой гэж үзэж байгаа юм.