Нийтийн тээвэрт ухаалаг систем нэвтрүүлэх зорилгоор НИТХ-ын тэргүүлэгчид өнгөрсөн онд “Улаанбаатар смарт карт” компанийг байгуулахаар болсон. Тус компани “Улаанбаатар хотын нийтийн тээврийн үйлчилгээнд бүртгэл хяналт, мэдээллийн болон цахим төлбөрийн (BMS, BIS, e-ticketing) систем цогцоор нь ашиглалтад оруулахаар ажиллаж байгаа. Харин зарим автобус стандартын шаардлага хангахгүйгээс болж нийтийн тээвэрт смарт карт нэвтрүүлэх ажлыг ирэх сарын 20 хүртэл хойшлуулсан байна.
“Улаанбаатар смарт карт” компани одоогоор автобусны зогсоолд ойр 30 газартай гэрээ байгуулахаар тохирчээ. Хэтдээ карт ашиглах смарт карт борлуулах 500 орчим төв байгуулахаар төлөвлөсөн байна. Эдгээр төвөөс иргэд смарт картыг 3600 төгрөгөөр худалдан авч 500-90 мянган төгрөгөөр цэнэглэх юм. Харин нийтийн тээврээр зорчихдоо хөнгөлөлт эдэлдэг иргэдэд карт олгоно хэмээн албаныхан хэллээ.
Энэхүү карт нийтийн тээврийн үйлчилгээнд нэвтэрснээр том оврын автобуснуудад кондуктар ажиллах шаардлагагүй болох юм. Мөн нийтийн тээврийн хэрэгслийн бүртгэл, хяналт сайжирч, зорчигчид гар утас болон картаар төлбөрөө хийх боломжтой болох аж.
Ард иргэдийн ая тухтай амьдрах нөхцлийг бүрдүүлэх, орон нутгийн нийгэм, эдийн засгийн хөгжилд хувь нэмэр оруулах, шаардлагатай дэд бүтцийг бий болгоход Эрчим хүчний яамны зүгээс онцгой анхаарч Өмнөговь аймгийн Ханбогд, Баян-Овоо сумдыг төвийн эрчим хүчний системтэй холбож хямд үнэтэй эрчим хүчээр хангахаар боллоо.
Монгол Улсын Ерөнхийлөгч Ц.Элбэгдоржийн урилгаар Мьянмарын Холбооны Бүгд Найрамдах Улсын Ерөнхийлөгч У Тейн Сейн энэ сарын 28-30-ны өдрүүдэд манай улсад төрийн айлчлал хийх гэж байна. Энэхүү айлчлал нь 1956 онд хоёр орны хооронд дипломат харилцаа тогтоосноос хойш Мьянмарын төрийн тэргүүний түвшинд хэрэгжиж буй анхны айлчлал гэдгээрээ түүхэн ач холбогдолтой болох юм. Монгол, Мьянмарын найрсаг харилцааг хөгжүүлэх, дээд, өндөр хэмжээний харилцан айлчлалын давтамжийг хадгалах, харилцааны эрх зүйн орчныг бэхжүүлэхэд чухал ач холбогдолтой айлчлал болно.
Энхтайвны өргөн чөлөөнд хийгдэж байгаа олон жилийн насжилттай 3А,Б магистраль шугамыг Ф600/500 болгон өргөтгөх ажлын хүрээнд Цэцэг төвийн 4 замын уулзварын автозамын хөдөлгөөнийг 2015 оны 06 дугаар сарын 26-ны 23:00 цагаас 06 дугаар сарын 27-ны 23:00 цаг хүртэл хааж, 24 цагийн хугацаанд автозамын ажлыг бүрэн дуусгахаар төлөвлөжээ гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
УИХ дахь МАН-ын бүлгийн дарга С.Бямбацогт МАН-ын бүлгийн гишүүдийн өргөн мэдүүлсэн хуулийн төслүүдийг яаралтай хэлэлцэх, хоёр намын зөвшилцлийн хүрээнд харилцан тохиролцсон Үндсэн хуульд нэмэлт, өөрчлөлт оруулах тухай болон Сонгуулийн хуулийн төслийн боловсруулалт, хэлэлцүүлгийн шуурхай байдалд анхаарах чиглэлээр УИХ-ын дарга, АН-ын дарга З.Энхболдод шаардлага хүргүүллээ.
Үндэсний их баяр наадмаа аймгууд хэзээ тэмдэглэх хуваарийг хүргэж байна. Энэ жилийн хувьд Увс аймгийн түүхт 90 жилийн ой тохиож байгаагаас гадна тус аймгийн зургаан сум мөн түүхт ойгоо тэмдэглэх юм байна. Түүнчлэн Сүхбаатар, Ховд, Дорнод, Баян-Өлгий, Булган, Дундговь аймгийн зарим сумд наадамчдын хөлд дарагдаж, түүхт 90 жилийн ойгоо тэмдэглэх аж.
“Найрсаг Улаанбаатар” хөтөлбөрийн хүрээнд зохион байгуулж буй “UB Dance Festival” чөлөөт бүжгийн үдшийг өнөөдөр 19 цагаас Их эзэн Чингис хааны нэрэмжит талбайд зохион байгуулах гэж байна. Чөлөөт бүжгийн олон төрлийг нэг дор нэгтгэсэн бүжгийн наадам дэлхийн 40 гаруй улс оронд жил бүр болдог уламжлалтай ч Монгол улсад анх удаа болж байгаагаараа онцлог юм. 
ТТ-н гэрээний төслийг Засгийн газар эргүүлэн татахаар болсныг өчигдөр УИХ-ын дарга З.Энхболд мэдэгдсэн юм. Засгийн газар уг төслийг засч, сайжруулаад удахгүй УИХ-д өргөн барих юм байна. Таван Толгой-Гашуунсухайт чиглэлийн 267 километр төмөр замын 51 хувийг “Монголын төмөр зам” ТӨХК-ийн мэдэлд өгнө гэсэн ажлын хэсгийн саналыг тусгаж оруулж ирэх гэнэ. М.Энхсайханы хувьд энэ өөрчлөлтийг гэрээнд тусгах асуудлыг хөрөнгө оруулагчид сайшаахгүй гэдэг үндэслэлийг хэлж асуудалд оролцохгүй гэдгээ мэдэгджээ. Ийм шалтгаанаар М.Энхсайхан биш С.Баярцогт цаашид хариуцахаар болсон аж. Ямартай ч гэрээний төсөлд зүүн чиглэлийн 1300 километр шинэ төмөр замыг барих заалт багтах нь тодорхой болжээ. Санхүүжилтийг нь хөрөнгө оруулагч нар гаргах, Тавантолгой- Гашуунсухайт чиглэлийн 267 километр төмөр замын 51 хувийг “Монголын төмөр зам” ТӨХК- ийн мэдэлд өгөх гэсэн заалтууд ч гэрээний төсөлд орж таарах нь. 
Монголын Засгийн газар олон улсын зах зээлд “Dim Sum” бонд гаргалаа гэсэн мэдээллийг Хятадын хэвлэлүүд өгч байна. Монгол Улс Хятадын Банкаар дамжуулан 3.66 тэрбум ам.долларын бонд гаргахаар болсон гэнэ. “Dim Sum” гэдэг нь үндэсний мөнгөн тэмдэгтийг ашиглахгүйгээр Хятадын мөнгөн тэмдэгтээр буюу юаниар Хятадаас гадна зах зээлд гардаг бонд аж. “Ройтерс” агентлагийн мэдээлснээр эхний ээлжинд өчигдөр нэг тэрбум юанийн бондын арилжааг олон улсын зах зээлд гаргасан байна. Жилийн хүү нь 7.5 юм байна. Монгол Улс Их Британийн дараа олон улсын түвшинд “Dim Sum” бонд гаргаж буй хоёр дахь орон болж байгаа аж. Энэ үйл явдал Хятадын Банкны хувьд Бээжингийн хуучин болон шинэ (далайн) торгоны замын хөрөнгө оруулалт, худалдааг нэмэгдүүлэх “Нэг бүс”, “Нэг зам” төлөвлөгөөнд ашиглах 20 тэрбум долларын зээлийн шугамыг өргөжүүлэхэд тустай юм байна. 
Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Ажлын хэсэг байгуулж, хөрөнгө гаргах тухай” А/529 дүгээр захирамж гаргалаа. Захирамжийн дагуу Улаанбаатар хотын нутаг дэвсгэр дэх түүх, соёлын үл хөдлөх дурсгалын үзлэг тооллогын ажлыг 2015 оны 06 дугаар сарын 20-ноос 09 дүгээр сарын 20-ны хугацаанд зохион байгуулна. Түүх, соёлын үл хөдлөх дурсгалын үзлэг тооллогын ажлыг зохион байгуулах ажлын хэсгийг баталлаа. Ажлын хэсгийн ахлагчаар нийслэлийн Засаг даргын Нийгмийн хөгжлийн асуудал хариуцсан орлогч Ц.Энхцэнгэл ажиллана.