Month: May 2015

Монгол Улсын Ерөнхийлөгчийн ивээл дор зохион байгуулж буй “Бичиг соёл-2015” уран бичлэгийн олон улсын үзэсгэлэнг Хэнтий аймгийн Чингис хот, Дэлгэрхаан суманд зохион байгууллаа.

Үзэсгэлэнгийн нээлтийн ёслол Чингис хотод болж, Ерөнхийлөгчийн Тамгын газрын болон олон улсын үзэсгэлэнгийн төлөөлөгч, Хэнтий аймгийн удирдлага, монгол хэл, бичгийн багш нар, сурагчид, иргэдийн төлөөлөл оролцов. Энэ жилийн “Бичиг соёл” үзэсгэлэнд Хэнтий аймгийн Иргэдийн төлөөлөгчдийн Хурал хамтран зохион байгуулагчаар ажиллаж байгаа бөгөөд үзэсгэлэнд оролцогч олон улсын төлөөлөгчдийг тус аймгийн ИТХ аймаг, орон нутагтаа хүлээн авч Монголын нууц товчооны дурсгалт газруудаар аялуулан, орон нутгийн түүх соёл, зан заншилтай танилцуулсан юм.

Уламжлал болгон зохиож буй уг үзэсгэлэнгийн энэ жилийн нээлт 2015 оны 5 дугаар сарын 22-ны өдөр Улаанбаатар хотод Монголын Урчуудын Эвлэлийн хорооны үзэсгэлэнгийн танхимд болж, энэ сарыг дуустал иргэдэд үнэ төлбөргүй дэлгэгдэж байна.

Монгол Улсын Ерөнхийлөгчийн Тамгын газар “Бичиг соёл” уран бичлэгийн үзэсгэлэнг Дундговь, Архангай, Орхон аймагт тус тус зохион байгуулаад байгаа билээ.

Жил бүрийн зургадугаар сарын эхний долоо хоногийн бямба гаригийг “Автомашингүй өдөр” болгон тэмдэглэдэг уламжлалтай. Энэ жилийн автомашингүй өдөр ирэх сарын 06-ны өдөр тохиож байна. Мөн эл өдөр бүх нийтээр биеийн тамир, спортыг дэмжих өдөр болгон “Улаанбаатар-марафон” гүйлтийн тэмцээнийг зохион байгуулдаг. Энэ жил уг тэмцээнийг марафон болон сонирхогчдын гүйлт гэсэн хоёр төрөлд явуулах ажээ. Марафоны төрөлд нь тогтмол гүйлтээр хичээллэдэг хүмүүс оролцох бол сонирхогчдын гүйлтийг дөрвөн насны ангилалд явуулах юм байна.

Өнөөдөр Мобиком Корпораци болон Байгаль Орчин, Ногоон Хөгжил, Аялал Жуулчлалын Яам хамтран Монгол Улсад төдийгүй дэлхийд нэн ховордсон мазаалай баавгайг хамгаалах чиглэлээр “Хамтын ажиллагааны санамж бичиг” байгууллаа. Уг санамж бичигт БОНХАЖЯ-ны Төрийн нарийн бичгийн дарга ноён Ц.Цэнгэл болон Мобиком Корпорацийн Гүйцэтгэх захирал ноён Дэвид Холлидэй нар гарын үсэг зурсан байна. Энэхүү санамж бичиг нь 2015 оны 6 дугаар сарын 1-нээс 2017 оны 12 дугаар сарын 31-нийг хүртэл хүчин төгөлдөр байх юм.

Арга хэмжээний үеэр ноён Дэвид Холлидэй хэлэхдээ “Үндэсний өв соёлоо хайрлан, хамгаалах нь Мобикомын үндсэн үйл ажиллагааны нэг бөгөөд Монгол Улсын хувьд ховор нандин энэхүү амьтныг хамгаалахын төлөө бид чадах бүхнээ хийнэ.”

Зөвхөн Монголын говь цөл нутагт идээшин амьдардаг мазаалайг судлах боломжийг нэмэгдүүлэх үүднээс Мобиком Корпораци харилцаа холбооны дэвшилтэд технологийн дэмжлэгийг үзүүлэх болно. Тухайлбал, алсаас мэдрэгч төхөөрөмжийн тусламжтайгаар судлаачид цаг уурын өөрчлөлтөөс шалтгаалан гадаргын усны нөөц бууралттай холбоотойгоор баавгайн дуртай шүүслэг гишүүнэ ургамлын нөөцөд үзүүлж буй нөлөө зэрэг баавгайд нөлөөлөх байгаль орчны аюулыг тодорхойлох боломжтой болох юм.

“Үндэсний Бахархал Мазаалай” ТББ-ын судлаачдын хэлснээр “Байгаль хамгаалагчдын үзэж буйгаар тал нутагт ердөө л 22 мазаалай үлдсэн бөгөөд зөвхөн Монголын цөл нутагт орших, дэлхийд цорын ганц энэхүү баавгайг хамгаалах ажлыг одоо л эхлүүлэхгүй бол хэтэрхий хожимдох болно” гэжээ.

Иймд улс даяар энэхүү нэн ховор мазаалайг хамгаалах ажлыг Монгол Улсын харилцаа холбооны тэргүүлэгч оператор Мобиком Корпорациас ивээн тэтгэж буй “ICT Expo 2015” үзэсгэлэнгээр эхлүүлсэн юм.

Нийслэлийн ИТХ – ын ээлжит 27 дугаар хуралдаан болж, НИТХ-ын 2015 оны “Нийслэлийн 2015 оны төсөвт нэмэлт, өөрчлөлт оруулах тухай” 24/04 дүгээр тогтоолд өөрчлөлт оруулах тухай, Улаанбаатар хотын төлбөрийн чадварт нийцсэн орон сууцны стратегийн баримт бичгийг дэмжих тухай асуудлыг хэлэлцэн баталлаа.

БНХАУ-ын Засгийн газраас Монгол Улсын Засгийн газарт олгох экспортын хөнгөлөлттэй зээлээр барих Замын цагдаагийн газрын баруун уулзвар болон төмөр зам дээгүүр барих гүүрэн гарц, Яармагийн шинэ гүүр барих, хуучин гүүрийг засварлах ажилд нийт 2,2 тэрбум төгрөг шаардлагатай юм. Нийслэлийн ИТХ-ын 2015 оны 5 дугаар сарын 28-ны өдрийн хуралдаанаар нийслэлийн 2015 оны төсөвт нэмэлт, өөрчлөлт оруулж, эхний ээлжинд 2 гүүрэн гарц шинээр барих 600 сая төгрөгийг тусгалаа. Хуралдаанд асуудлыг нийслэлийн Засаг даргын Зам тээвэр, дэд бүтцийн асуудал хариуцсан орлогч Н.Гантөмөр танилцуулав.

Эдгээр гүүрэн гарц нь Улаанбаатар хотыг 2020 он хүртэл хөгжүүлэх ерөнхий төлөвлөгөөний тодотгол, 2030 оны хөгжлийн чиг хандлагын баримт бичиг” – т тусгасны дагуу Улаанбаатар хотын авто замын түгжрэлийг бууруулах, агаарын бохирдлыг багасгах, төмөр зам болон авто замын замын хөдөлгөөний түвшинг тусгаарлах, төмөр зам, авто зам болон явган зорчигчийн аюулгүй байдлыг хангах зорилготой.

Улаанбаатар хотын Замын цагдаагийн газрын ойролцоо барих гүүрэн гарцын нийт хөрөнгө 42,38 сая ам.доллар, Чингисийн өргөн чөлөөнөөс Наадамчдын гудамж руу холбодог Яармагийн хуучин гүүрийг засварлаж, шинээр гүүр барьж хос болгох төслийн хөрөнгө нийт 30,26 сая ам.доллар юм.

“Улаанбаатар хотын төлбөрийн чадварт нийцсэн орон сууцны стратегийн баримт бичиг”-ийн төслийг Засгийн газрын хуралдаанаар хэлэлцүүлнэ

Нийслэлийн ИТХ-ын ээлжит 27 дугаар хуралдаанаар Улаанбаатар хотын төлбөрийн чадварт нийцсэн орон сууцны стратегийн баримт бичгийг дэмжих тухай асуудлыг хэлэлцэж, Монгол Улсын Засгийн газрын хуралдаан өргөн барихаар боллоо. Хуралдаанд асуудлыг нийслэлийн Засаг даргын Хот байгуулалт, дэд бүтцийн асуудал хариуцсан орлогч С.Очирбат танилцуулав.

Улаанбаатар хотын нийт өрхийн 60 орчим хувь нь гэр хороололд амьдарч байна. Мөн Улаанбаатар хотын нийт өрхийн 50 хувь нь сард дунджаар 870 мянган төгрөгөөс бага буюу дундаас доогуур болон бага орлоготой байгаа нь зах зээлд нийлүүлэгдэж байгаа орон сууцыг худалдан авах чадваргүй байгаа юм. Иймд хүн амын орлого багатай хэсгийн амьдрах орчин, орон сууцны асуудалд чиглэгдсэн нийслэлийн стратеги, бодлогыг тодорхойлж, хэрэгжүүлэх шаардлагатай байгаа юм.

“Улаанбаатар хотын төлбөрийн чадварт нийцсэн орон сууцны стратеги” нь нийслэлийн хүн амын бага болон дундаас доош орлоготой өрхүүдийг чанартай, аюулгүй, төлбөрийн чадварт нийцсэн орон сууцаар хангах урт хугацаанд нэгдсэн бодлого, үйл ажиллагааг тодорхойлох зорилготой.

Стратегид орон сууцны асуудлыг цогц байдлаар авч үзэж, хүн амын орлого багатай хэсэгт чиглэсэн орон сууцны нийлүүлэлт, санхүүжилт, бүтэц, зохион байгуулалтын хүрээнд хийх өөр хоорондоо уялдаа бүхий стратегийн 3 үндсэн чиглэлийг тодорхойлсон. Үүнд:

• Төлбөрийн чавдарт нийцсэн орон сууцны сонголтыг нэмэгдүүлэх
• Төлбөрийн чавдарт нийцсэн орон сууцны хүртээмжийг дээшлүүлэхэд чиглэсэн санхүүгийн тогтвортой механизм бий болгох
• Төлбөрийн чавдарт нийцсэн орон сууцны байгууллагын бүтэц, эрх зүйн орчныг бий болгох, оролцогчдын хамтын ажиллагааг бэхжүүлэх чиглэлийн хүрээнд 12 зорилтыг тусгажээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Батлан хамгаалах салбарын албан хаагчдын тулгамдсан асуудал бол нийгмийн хамгааллыг сайжруулах тухай юм. Тэр дундаа нэгдсэн байдлаар хөнгөлттэй үнээр орон сууцжуулах, зээл олгох асуудал орхигдож байсан. Тэгвэл үүнийг шийдвэрлэхээр Батлан хамгаалах яам, ХААН банк хамтран ажиллах санамж бичиг байгууллаа. Санамж бичигт Батлан хамгаалах яамны Төрийн нарийн бичгийн дарга, хошууч генерал З.Болдбаатар, ХААН банкны гүйцэтгэх захирал ноён Норихико Като нар гарын үсэг зурж баталгаажуулсан байна.

Тодруулбал, “Монгол цэрэг бүтээн байгуулалт хөтөлбөр”, “Батлан хамгаалах салбарын нийгмийн хамгаалал хөтөлбөр”, “Цэргийн алба хаагчдын орон сууцны хөтөлбөр”-ийн хүрээнд хамтран ажиллах, банкны зүгээс цэргийн алба хаагчдыг хувийн мөнгөн хадгаламж, орон сууцны төлбөрийн хуримтлалтай болгох зэрэг банк санхүүгийн бүхий л төрлийн үйлчилгээ үзүүлэх зорилготой ажээ. Батлан хамгаалах яамны зүгээс салбарынхаа ажиллагсдын нийгмийн хамгаалалд чиглэсэн хөрөнгийг банкинд төвлөрлүүлэн байршуулах, орон сууцны зээлийн баталгаа болон ажилтнуудад орон сууцны урьдчилгаа төлбөрийн хөнгөлөлт үзүүлэх нөхцлийг бүрдүүлэх юм байна. Харин банкны зүгээс Засгийн газраас хэрэгжүүлж буй дэд хөтөлбөрийн орон сууцны ипотекийн зээлийн шаардлага хангасан батлан хамгаалах салбарын ажилтнуудад орон сууцны зээлийг олгох ажээ.

“Нийтийн үйлчилгээний Улаанбаатар нэгтгэл” ОНӨААТҮГ нь нийслэлийн төвийн зургаан дүүргийг хамарсан нийтийн эзэмшлийн 27 гудамж талбай бүхий 600 гаруй км замын засвар арчлалтыг хариуцан ажиллаж байна. Энэхүү ажлын хүрээнд 2013 онд зам угаах технологи нэвтрүүлсэн нь өнөөдөр Улаанбаатар нэгтгэлийн хамгийн идэвхитэй үйл ажиллагаануудын нэг болоод байгаа юм.

Авто замыг угааснаар замын хөдөлгөөний нөлөөгөөр агаарт дэгддэг тоосонцрын хэмжээг бууруулах, иргэдийн ая тухтай зорчих боломжийг бий болгох, цаашлаад эрүүл мэндэд ач холбогдолтой. Зуны улиралд замыг угаахаас гадна бороожуулах ажлыг хийдэг бөгөөд агаарын чийгшлийн хэмжээг нэмэгдүүлнэ. Замын хөдөлгөөний ачааллаас хамаарч зам угаах ажлыг ихэвчлэн шөнийн цагаар хийдэг бөгөөд “Чингисийн талбай”-г долоо хоног бүрийн даваа болон пүрэв гаргуудад тогтмол угааж байна. Харин ногоон байгууламжийн талбайг өдөр шөнийн ээлжээр хоёр хоног тутамд усалж байгаа юм гэж Нийтийн үйлчилгээний Улаанбаатар нэгтгэл ОНӨААТҮГ мэдээллээ.