Тахарын ерөнхий газрын Гэрч, Хүчирхийллийн эсрэг үндэсний төв, Хүйсийн тэгш эрхийн төв төрийн бус байгууллагууд хамтран ажиллах санамж бичиг байгуулсан.
Энэ хүрээнд төлбөрийн чадваргүй гэрч, хохирогчид хууль зүйн туслалцаа үзүүлэх чиглэлээр мэргэжлийн байгууллагуудтай хамтран ажиллах. Мөн орон нутаг дахь хамгаалах байр нэг цэгийн үйлчилгээний төвүүдийн хүчин чадал, үйл ажиллагааны талаар мэдээлэл солилцох, орон нутагт хамтын ажиллагааг дэмжих зэрэг ажил төлөвлөсөн байна.
2015 онд хамтран хэрэгжүүлэх ажлын төлөвлөгөөг баталж, Тахарын ерөнхий газрын Гэрч, хохирогчийг хамгаалах газрын дарга, тахар И.Даваажамьян, Хүчирхийллийн эсрэг Үндэсний төвийн захирал П.Золзаяа, Хүйсийн тэгш эрхийн төвийн захирал Г.Ганбаясах нар гарын үсэг зуржээ.
Аугаа их Эх орны дайны ялалтын 70 жилийн ойг тохиолдуулан Монгол цэргүүд ОХУ-ын Москва хотын Улаан талбайд, Монгол хүүхдүүд ОХУ-ын Ангарск хотод ялалтын парад алхах гэж байна. Улаан талбайд парад алхах Монголын дайчид дэлхийн цэргүүдтэй хамтарсан бэлтгэлээ базааж эхэлжээ. Парад алхах бүрэлдэхүүн энэ сарын 25-нд Москва хотноо очих аж. Монгол цэргүүд энэ сарын 26, 27-ны өдрүүдэд Москва хотын ойролцоо Алабины цэргийн сургалтын төвд нэгдсэн бэлтгэл хийсэн байна. Өнөө шөнө Улаан талбайд хамтарсан бэлтгэл хийхээр төлөвлөжээ. Ирэх сарын 4, 7-ны өдрүүдэд мөн улаан талбайд шөнийн бэлтгэл хийх аж. Аугаа их Эх орны дайны ялалтын 70 жилийн баярын цэргийн ёслолын жагсаалд 14 000 цэргийн алба хаагч, 194 нэгж хуягт техник, 150 онгоц, нисдэг тэрэг оролцуулан явуулахаар төлөвлөсөн байна. Мөн Оросын 26 хотод цэргийн жагсаалыг явуулахаар бэлтгэж байна.
Монгол улс, ХБНГУ-ын хороонд дипломат харилцаа тогтоосоны 40 жилийн ойг бүтэн жилийн туршид тэмдэглэсэн билээ. Энэ хугацаанд түүхэн ойд зориулсан арга хэмжээнүүдийн талаар өгүүлсэн “Үйл явдлын тойм” эмхэтгэлийг манай улс дахь Германы Элчин сайдын яамнаас гаргасан юм. Эмхэтгэлийг танилцуулах арга хэмжээг ХБНГУ-ын ЭСЯ-ны өргөөнд болсон юм. Элчин сайд Г.Тийдеманн уг арга хэмжээг нээж үг хэлэхдээ хоёр улсын харилцаа ямар түвшинд хөгжсөний нэгэн илэрхийлэл нь 40 жилийн ойн хүрээнд зохион байгуулагдсан арга хэмжээнүүд гэдгийг онцолж байсан юм. Монгол Германы харилцаа соёлын салбарт онцгой хөгжсөн гэдгийг онцлох нь зүйтэй. Түүнээс гаднадипломат харилцаа тогтоосны 40 ойг тэмдэглэж байх үед ХБНГУ-ын Гадаад хэргийн сайд доктор Франк-Вальтер Штайнмайер манай улсад айлчилсан билээ. Мянга гаруй жилийн түүхтэй Алтайн ятга хөгжмийг Германы мэргэжилтнүүд сэргээн засварласныг Үндэсний түүхийн музейд байрлуулж үзэгчдийн хүртээл болгох ёслолын ажиллагаа болсон билээ.
Ховд аймгийн Байгаль орчны газар, Хар ус нуур-Ховд голын сав газрын захиргаа болон Хар ус нуур орчмын улсын тусгай хамгаалалттай газар нутгийн захиргаа хамтран хадран загас хамгаалах уламжлалт сарын аяныг эхлүүлжээ. Аяны хүрээнд өнгөрсөн долоо хоногт Эрдэнэбүрэн сумын Сэжигтэй хавцал болон Дөргөний усан цахилгаан станцын хиймэл нууранд хяналт шалгалт хийсэн байна. Мөн орон нутгийн телевизээр дамжуулан Амьтны тухай хуулийг иргэдэд сурталчлан таниулж буй аж. Түүнчлэн сарын хугацаанд байгаль орчны хяналтын улсын байцаагч, цагдаа, байгаль хамгаалагчид Эрдэнэбүрэн сумын Сэжигтэй хавцлын постод ажиллах юм байна. Дөрөвдүгээр сарын 1-нээс зургадугаар сарын 1 хүртэл загасны үржлийн үе байдаг тул энэ хугацаанд загас агнахыг Амьтны тухай хуулиар хориглодог юм.
Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Татвар төлөгчдийн өдрүүдийг зохион байгуулах тухай” А/350 дугаар захирамж гаргалаа. Захирамжаар Татвар төлөгчдийн өдрүүдийг ирэх сарын 11-ний өдрөөс 15-ны өдрүүдэд нийслэлийн хэмжээнд зохион байгуулж, нийслэл, дүүргүүдийн бүтээн байгуулалтад бодитой хувь нэмэр оруулсан тэргүүний татвар төлөгч, аж ахуйн нэгж, иргэдийг шалгаруулан урамшуулж сурталчлах, татварын тухай хууль тогтоомжийг иргэд олон нийт, ирээдүйн татвар төлөгчдөд сурталчлан таниулах, нийслэлийн төсвийн зарцуулалтыг татвар төлөгчдөд тайлагнах ажлыг зохион байгуулахыг НЗДТГ-ын Санхүү, төрийн сангийн хэлтэст, нийслэлийн Татварын газарт үүрэг болгов.
АНУ-ын автомашины тэргүүлэгч үйлдвэрүүдийн нэг “Ford Motor” компанийн ашиг 6.6 хувиар буурч, 924 сая ам.доллар болжээ. “Ford Motor”-ийн алдарт “F-150” тэвштэй тэрэгний үйлдвэрлэл буурсан нь ашиг буурахад нөлөөлсөн байна. Энэ онд “F-150” автомашины үйлдвэр бүрэн хүчин чадлаараа ажиллаж эхлэх гэнэ. Ингэснээр татварын өмнөх ашиг нь 51 хувиар өснө гэж тооцоолжээ. “F-150” загвар нь сүүлийн 33 жилийн турш АНУ-д борлуулалтаараа тэргүүлсэн аж. Гэхдээ өнгөрсөн оноос эхлэн “Ford Motor” компани уг автомашины эх биеийг хөнгөн цагаанаар хийх болсонтой холбоотойгоор үйлдвэрүүдээ шинэчилж, үйлдвэрлэл нь буурсан юм байна. “F-150” загварыг хөнгөн цагаанаар хийснээр жин нь 15 хувиар буурч, түлш зарцуулалт нь 30 орчим хувиар багассан байна.
УИХ-ын Эдийн засгийн байнгын хороо Засгийн газраас өргөн мэдүүлсэн Тавантолгойн гэрээг хэлэлцэх, эсэхийг шийдэх хуралдаантай байсан боловч хуралдсангүй.
Монгол Улсын Боловсрол, соёл, шинжлэх ухааны яам, БНХАУ-ын Боловсролын яам хоорондын “Монгол Хятадын тусгай хөтөлбөр хэрэгжүүлэх тухай” санамж бичгийн дагуу ирэх хичээлийн жилд үнэ төлбөргүй суралцуулах оюутнуудын сонгон шалгаруулалтыг эхлүүлжээ.2015-2016 онд нийт 200 оюутан Хятадад тэтгэлгээр суралцах боломжтой. Үүнээс мэргэжлийн чиглэл харгалзахгүй бакалавр 20, магистр 140, доктор 40 оюутныг дараах мэргэжлийн чиглэлээр бүртгэж байна. 
Засгийн газрын тогтоолын дагуу тусгай зориулалтаар агнах агнуурын амьтдын тоо толгойг тогтоодог билээ. Өчигдөр Засгийн газар хуралдаж тусгай зориулалтаар 2015 онд агнах агнуурын амьтны тоог тогтоох тухай тогтоолд нэмэлт, өөрчлөлт оруулав. Уг өөрчлөлтөд 350 толгой тул загас барьж буцаан тавиулахаар, 150 толгой цагаан зээр, 300 хүртэл агнуурын шувуу агнуулахаар, гадаад оронд амьдаар гаргах идлэг шонхор шувуу 100 толгой байхаар тусгажээ. Засгийн газрын 2013 оны 15 дугаар тогтоолоор идлэг шонхрыг ашиг олох зорилгоор гадаад оронд гаргахыг таван жилийн хугацаагаар хориглосон. Гэвч өнгөрсөн онд 40 идлэг шонхрыг соёлын зориулалтаар гаргасан байна. Холбогдох хууль, тогтоомжоор уг шувуу түгээмэл ашиглах нөөцтэй “элбэг” амьтны ангилалд хамаардаг юм. Манай улс 2010 онд Монгол орны махчин шувуудыг хамгаалах зорилгоор Арабын нэгдсэн Эмират улсын Абу Дабигийн байгаль орчны албатай таван жилийн хугацаатай харилцан ойлголцлын санамж бичиг байгуулсан байна. Энэхүү санамж бичгийн хүрээнд идлэг шонхор шувууны байгаль дахь өндөглөх боломжийг нэмэгдүүлэх төслийг 2010 оноос Төв, Хэнтий, Сүхбаатар, Говьсүмбэр, Дорноговь аймгийн хорин суманд хэрэгжүүлж байна. Төслийн хүрээнд байгуулсан 5250 хиймэл үүрэнд 2011 онд 200 үржлийн хос үүрлэж 600 ангаахай, 2012 онд 380 үржлийн хос үүрлэж 1298 ангаахай, 2013 онд 500 гаруй үржлийн хос үүрлэж 2000 ангаахай үүрнээс ниссэн байна. Иймд 100 толгой идлэг шонхрыг гадаад улс орнуудад худалдаалахад тухайн зүйл амьтны популяцид сөрөг нөлөө үзүүлэхгүй гэж тооцож байгаа аж. 
“Conference Board” судалгааны байгууллагаас танилцуулдаг АНУ-ын хэрэглэгчдийн итгэлийн индекс 95.2 нэгж болж огцом буурчээ. Судалгаанд оролцогчдоос харахад америкчууд эдийн засгийн хэтийн төлөвтөө төдийлөн эерэг хүлээлтгүй байгаа нь ажиглагджээ. Тиймээс үүнийг дагаад хэрэглээний зарцуулалт, эрэлт буурах хандлагатай байгааг “Conference Board” байгууллага онцолж байна.