Байгаль орчин, хүнс, хөдөө аж ахуйн байнгын хорооны өнөөдрийн хуралдаанаар Төрөөс ойн талаар баримтлах бодлого батлах тухай УИХ-ын тогтоолын төслийн анхны хэлэлцүүлгийг хийлээ.
Монгол орны ойн экосистемийн тэнцвэрт байдлыг хадгалах, ойн хомсдол, доройтлыг зогсоох, ойг нөхөн сэргээх, ойжуулах замаар ойгоор бүрхэгдсэн талбайг нэмэгдүүлэх, зүй зохистой, тогтвортой ашиглахад чиглэсэн ойн тогтвортой менежментийг бий болгоход бодлогын гол зорилго оршиж байгаа юм. Улсын Их Хурлын гишүүн, ажлын хэсгийн ахлагч С.Оюун танилцуулга хийв. Ажлын хэсэг гурван удаа , дэд ажлын хэсэг зургаан удаа хуралдсан байна.
Хэлэлцүүлгийн шатанд Төрөөс ойн талаар баримтлах бодлого батлах тухай Улсын Их Хурлын тогтоолын төслийг хэлэлцүүлэгт бэлтгэх үүрэг бүхий ажлын хэсгээс гаргасан зарчмын зөрүүтэй саналын томьёолол болон найруулгын шинжтэй саналын томьёоллоор нэгбүрчлэн санал хураалт явуулав. Мөн хэлэлцүүлгийн явцад Улсын Их Хурлын гишүүдээс гаргасан зарчмын зөрүүтэй саналын томьёоллоор санал хураалт явуулсан бөгөөд дэмжигдсэн саналуудыг нэгтгэн томьёолж чуулганы нэгдсэн хуралдаанд оруулж хэлэлцүүлэхээр тогтлоо. Санал хураалтын явцад гишүүдийн зүгээс, бодлогын баримт бичгийг баталснаар ямар ахиц гарах, хаягдал модны хэмжээ, хязгаарыг тогтоохдоо бүс нутгийг харгалзан үзэж уян хатан тогтоох боломжтой эсэх, гаднаас орж ирж байгаа түймрийн хохирлын талаар авах арга хэмжээнд ямар зохицуулалт хийж байгаа талаар ажлын хэсгээс тодруулж, ой хамгаалах болон байгаль орчныг хамгаалах бодлогыг уул уурхайтай холбох, модны хулгайчдыг шууд хорих, торгох, машиныг нь хураах бус хохирлыг нөхөн төлүүлэх, улмаар мянгаас хоёр мянган мод суулгуулж байх зэрэг санал хэлж, бодлогын баримт бичгийг хэрэгжүүлэхэд төсөв, мөнгө хэрэгтэй гэв.
Мөн байнгын хорооны хуралдаанаар Ойн тухай хуульд нэмэлт, өөрчлөлт оруулах тухай хуулийн төсөл, түүнийг дагалдан өргөн мэдүүлсэн Байгаль орчныг хамгаалах тухай хуульд нэмэлт оруулах тухай, Засгийн газрын тусгай сангийн тухай хуульд нэмэлт оруулах тухай, Эрүүгийн хуульд нэмэлт оруулах тухай хуулийн төслүүдийг чуулганы нэгдсэн хуралдааны холбогдох шатны хэлэлцүүлэгт бэлтгэх үүрэг бүхий ажлын хэсгийг байгуулж, ажлын хэсгийн ахлагчаар Улсын Их Хурлын гишүүн Ж.Батзанданг томилох саналыг дэмжлээ. Түүнчлэн байнгын хорооны өнөөдрийн хуралдааны хэлэлцэх асуудлын дараалалд Байгаль орчны төлөв байдлын 2013, 2014 оны тайланг сонсохоор тусгасан ч салбарын сайд нь гадаадад томилолттой байгаа учир энэ удаад хойшлуулахаар шийдвэрлэлээ
АН-ын Ерөнхий нарийн бичгийн даргын үүрэг гүйцэтгэгч Л.Эрхэмбаяр өнөөдөр мэдээлэл хийлээ. Тэрбээр АН-ын фракцгүй нам болох санаачлагыг орон нутгийнхан дэмжсэн, төрийн албан хаагчдыг хоморголон халсан зарим яамдын тухай хөндөн ярьсан юм. Генсек Л.Эрхэмбаяр эхэнд нь “АН-ын фракцгүй намын төлөөх санаачлага намын жирийн гишүүдийн захиалга, даалгавраар хийгдсэн. Энэ шийдвэрийг аймаг орон нутгийн намын байнгууллагууд дэмжиж, фракцигүй АН болох уриалга ирүүлсээр байна. Өнөөдрийн байдлаар Архангай, Баянхонгор, Дундговь, Дархан-Уул, Өвөрхангай, Дорнод, Сүхбаатар, Увс, Ховд гэх мэт 12 аймгаас намын байгууллагууд фракцгүй АН-ыг дэмжиж уриалга ирүүллээ. Намын удирдлагуудын зүгээс фракцгүй, хүчтэй АН-ын төлөө явах чиг хандлагыг барьж ажиллах болно. Ардчилсан нам дөрөвдүгээр сарын 15-наас эхлэн аймгийн чуулган 2015 аяныг орон даяар зохион байгуулж байна. Орон нутгийн иргэдийн санаа бодлыг сонсох, анхан дунд шатны намын гишүүдэд сургалт зохион байгуулах, фракцгүй АН-ын хөгжлийн чиг хандлагаар гишүүдийн санаа бодлыг сонсож, нэгдмэл ойлголтод хүрэх зэрэг асуудлуудыг ярьж байгаа” гэлээ.
Улсын Их Хурлын гишүүн, Хууль зүйн байнгын хорооны дарга Д.Ганбат, Улсын Их Хурлын гишүүн С.Дэмбэрэл, Ц.Оюунбаатар, Ц.Оюунгэрэл нар болон Хүний эрхийн үндэсний комиссын зарим гишүүд өнөөдөр /2015.04.21/ Шүүхийн шийдвэр гүйцэтгэх ерөнхий газрын харъяа цагдан хорих 461 дүгээр ангийн үйл ажиллагаатай танилцав.
“Хууль тогтоомжийн төсөл боловсруулах, өргөн мэдүүлэх, хууль тогтоомжийг хэрэгжүүлэх журмын тухай” хуулийн төслийн хэлэлцүүлэг өнөөдөр Иргэний танхимд боллоо. УИХ-ын Тамгын газар, НҮБ-ын Хөгжлийн хөтөлбөр хамтран хэрэгжүүлж буй “Иргэдийн оролцоотой хууль тогтоох үйл ажиллагааг дэмжих нь” төслийн дэмжлэгтэйгээр Засгийн газраас өргөн барьсан уг төслийг боловсруулах хүрээнд хийж буй тав дах удаагийн хэлэлцүүлгийг Хууль зүйн байнгын хороо, Хуульчдын холбоо хамтран зохион байгуулсан юм.
Нийслэлийн Засаг даргын Тамгын газар Нийслэл Улаанбаатар хотын үйлдвэрчний эвлэлүүдийн холбоо, Монголын ажил олгогч эздийн нэгдсэн холбоотой хамтран ажиллах хамтын ажиллагааны гурван талт хэлэлцээр байгуулах ёслолын ажиллагаа боллоо.
Туркийн Гадаад эдийн засгийн харилцааны хороо, түүний дэргэдэх Турк, Монголын Бизнесийн зөвлөл болон Монгол Улсаас БНТУ-д суугаа ЭСЯ хамтран Монгол, Туркийн бизнес уулзалтыг Истанбул хотноо өчигдөр зохион байгуулжээ. 
ОХУ-ын хойд нийслэл гэгддэг Санкт-Петербург хотын хоккейн баг болох “СКА” олон жилийн мөрөөдлөө биелүүлж КХЛ-ийн аварга болж Гагарины нэрэмжит цомыг хүртлээ. Тивийн Хоккейн Лиг буюу КХЛ нь Европын болон Оросын шилдэг хоккейн багуудын хооронд он дамжин тоглогддог нэр хүндээрээ Хойд Америкийн Лигийн дараа орохуйц томоохон тэмцээн юм. Сүүлийн хэдэн жил “Газпром”-ын асар их хөрөнгө оруулалт дээр түшиглэн шилдэг хоккейчдыг цуглуулан, баг бүрдүүлж тоглох болсон “СКА” жил бүр сүүлчийн мөчид бүдэрдэг байсан заншлаа энэ жил зогсоож анх удаа аваргалж чадлаа. 
Нийслэлийн Засаг дарга бөгөөд Улаанбаатар хотын Захирагч Э.Бат-Үүл “Шинээр санаачлан, хэрэгжүүлсэн ажлыг батламжлах тухай” А/326 дугаар захирамж гаргалаа. Захирамжаар “Монгол Улсын иргэнд газар өмчлүүлэх тухай” хуулийн хэрэгжилтийг хангах, нийслэл дэх газар өмчлөлийн ажлыг эрчимжүүлэх үндсэн зорилгын хүрээнд нийслэлийн Өмчийн харилцааны газар, Мэдээллийн технологийн газар нь батлагдсан байршлуудад нийслэлийн иргэдэд гэр бүлийн хэрэгцээний зориулалтаар газар өмчлүүлэх ажлыг цахим хэлбэрээр зохион байгуулах шинэ санаачилга гарган, амжилттай зохион байгуулсныг батламжиллаа.
“Тавантолгой”-н хөрөнгө оруулалтын гэрээний төслийг УИХ-ын Тамгын газраас өчигдөр буцаасан. Үүнтэй холбогдуулан ЗГХЭГ-ын дарга С.Баярцогт “УИХ-ын Тамгын газраас төсөл өргөн барихтай холбоотой бичиг баримтын бүрдүүлэлт дутуу байна. Энэ сарын 20-ны өдрийн 16.00 цагт бүрдүүлж өг гэсэн албан бичиг ирүүлсэн. Энэ сарын 20 буюу даваа гаригийн 16.00 цагт Засгийн газрын ээлжит хуралдаан болдог. Уг асуудлыг Засгийн газрын ээлжит хуралдаанаар хэлэлцээд дутуу байна гэсэн хоёр асуудлыг хэлэлцэн шийдвэрлэсэн. Өнөөдөр УИХ-д өргөн барина” гэлээ. Харин УИХ уг гэрээг хүлээж авахаас дахин татгалзвал асуудлыг хуулийн дагуу шийдвэрлэнэ гэж Засгийн газраас үзэж буй ажээ.
“Эйндховен” энэ жил Европын багуудын дотроос хамгийн түрүүнд улсынхаа аварга болж байна. Тэд өнгөрөгч амралтын өдөр “Херенвэн”-ийг 4:1-ээр хожиж 79 оноотой болсон бөгөөд ингэснээр Нидерландын аварга шалгаруулах тэмцээн дуусахаас гурван тойргийн өмнө хоёрдугаар байрт байгаа “Аякс”-аас оноогоор тасарч барианд орлоо. Ийнхүү Эйндховен хотын ПСВ “Эйндховен” баг 22 дахь удаагаа улсынхаа аварга болж дараа жилийн Аваргуудын Лигийн тэмцээний үндсэн хэсэгт багтах эрхээ халааслалаа.