Монгол улсын гарьд, гавьяат тамирчин, чөлөөт бөхийн Ази тивийн аварга П.Сүхбат харамсалтайгаар амиа алдсан билээ. Тэрбээр БНХАУ-ын Эрээн хотын нэгэн зочид буудалд амьсгал хураасан байсан юм. Түүний үхлийн талаар Гадаад харилцааны яам “П.Сүхбат гарьд нь Эрээн хотын зочид буудалд байхдаа гадны нөлөөгүй таалал төгссөн” хэмээн олон нийтэд мэдэгдсэн. Гэвч талийгаачийн ар гэрийнхэн гадны нөлөөтэй нас барсан байж болзошгүй хэмээн хардаж байсан учир Хятадын цагдаагийн газар мөрдөн байцаалтыг явуулжээ. Тэд дүгнэлтээ саяхан гаргажээ. Дүгнэлтээр П.Сүхбат гарьд нь гадны нөлөөгүй нас барсан гэдэг нь тогтоогдсон байна. Үүнийг нь нотлох камерын бичлэг ирүүлсэн байна. Иймд Монгол улсын хүчит гарьд П.Сүхбат нь хэн нэгний гарт амиа алдаагүй зуурдаар талийгаач болсон гэсэн дүгнэлтийг Хятадын цагдаагийн газраас гаргасан байна.
Батлан хамгаалахын дэд сайд А.Баттөр өнөөдөр ОХУ-ын Москва хотын Улаанталбайд парад алхах бүрэлдэхүүний бэлтгэлийн явцтай танилцлаа. Тэрээр парад оролцогчдод “Дэлхийн орнуудын цэргүүдэд Монголын цэргийн сүр хүчийг гайхуулж, цог золбоолог гэдгээ харуул. Эр цэргийнхээ сүр хүчийг гайхуулах том боломж та нарын гарт байна” гээд захиасаа хэлж, амжилт хүссэн юм. Тэрээр бэлтгэл сайн базаагдсан байгааг ч энэ үеэр онцолсон юм. ОХУ нь жил бүрийн тавдугаар сарын 09-нд эх орны дайны ялалтын баярыг уламжлал болгон тэмдэглэж ирсэн бөгөөд 2010 онд 65 жилийн ойн баярын үеэр дайны үед холбоотон болон хуучин ЗХУ-ын бүрэлдэхүүнд байсан улс орнуудын цэргийн бүрэлдэхүүнийг анх удаа урьж оролцуулсан. Харин Монголын цэрэг анх удаа оролцохоор бэлтгэлээ хангаад дуусч байна. Эх орны дайны ялалтын 70 жилийн баярын цэргийн ёслолын жагсаалд 14 000 цэргийн алба хаагч, 194 нэгж хуягт техник, 150 онгоц, нисдэг тэрэг оролцуулан явуулахаар төлөвлөснөөс гадна тус улсын 26 хотод цэргийн жагсаалыг явуулахаар бэлтгэж байна.Монгол Улс, БНХАУ, Энэтхэг, Азербайджан, Армени, Белорусь, Тажикстан, Казакстан, Киргизстан, Серби зэрэг 10 улсын Зэвсэгт хүчнээс тус бүр 70 цэргийн алба хаагч бүхий нэг нэг салбар оролцоно. Жагсаалыг удирдаж Зэвсэгт хүчний 032 дугаар ангийн захирагч, хурандаа Л.Батболд алхах бол Монгол Улсын тугийг ахлах дэслэгч Ж.Баярцогт, дэслэгч А.Алтантүлхүүр, хошууч А.Төгс-Эрдэнэ нар залан алхана. Парад алхах бүрэлдэхүүн маргааш өглөө ОХУ-ыг зорино.
Европын Холбооны дээд хэмжээний уулзалт өнөөдөр эхлэх юм. Уг арга хэмжээг яаралтай зохион байгуулах саналыг Итали болон Мальтай улс гаргажээ. Сүүлийн өдрүүдэд Газрын дундад тэнгисээр дамжин Африкаас ирж буй дүрвэгсдийн асуудал дэлхийн нийтийн анхаарлыг татах болсон. Тиймээсасуудлыг яаралтай хэлэлцэжшийдэх арга замыг олох шаардлагатай болжээ.Өнгөрсөн ням гаригийн шөнө Ливиэс Италийг зорьж явсан усан онгоц осолдож 1000-аад дүрэгсэд амь үрэгдсэн юм. Нэг долоо хоногт хоёр ч удаа ийм осол гарч олон хүн амиа алдсан билээ. Өнгөрсөн даваа гаригт Люксембур хотноо Европын Холбооны гишүүн орнуудын Гадаад хэргийн сайдууд Люсембургт уулзахдаа мөн энэ асуудлыг хэлэлцсэн аж. 
ХХАА-н сайд Р.Бурмаа, холбогдох албаныхан Хэнтий аймгийн Норовлин, Дорнод аймгийн Баян-Уул, Дашбалбар суманд гарсан ой хээрийн түймрийн нөхцөл байдалтай газар дээр нь танилцаж байна.
Оюуны өмч, зохиогчийн эрх түүнд хамаарах эрхийг хамгаалах хүрээнд жишиг тогтоох зорилгоор Монголын зохиолч, хөгжмийн зохиолч, уран бүтээлчдийн шилдэг дуу хөгжим, бүтээлийн жагсаалтыг Үндэсний Радио Телевизийн сувгуудаар олон нийтэд түгээх, мөн зохиогчийн эрх, түүнд хамаарах эрхийг хамгаалах чиглэлээр МҮОНРТ, МОСКАП, МДББҮТ, Hi-Fi Медиа групп хамтран ажиллахаар боллоо.
“Говь Повер” компанитай холбоотой асуудлаар “Эрдэнэс тавантолгой”-н захирал Я.Батсуурийг АТГ-аас баривчлан саатуулснаас хойш хоёр сарын хугацаа өнгөрч байна. Түүнийг албан тушаалаа урвуулан ашигласан хэрэгт буруутган АТГ-ын Мөрдөн шалгах хэлтсээс хориод байгаа. Тэгвэл Я.Батсуурь дөрөвдүгээр сарын 21-ний өдөр намынхандаа хандан захидал бичсэн талаар “Өдрийн сонин”-ы өчигдрийн дугаар дээр нийтэлсэн билээ. Тэрбээр Монголын төрд хоёргүй сэтгэлээр 30 жил зүтгэсний дараа шоронд хоригдож буйдаа гомдолтой байгаагаа илэрхийлсэн юм. Мөн энэ хэргийг шалгахдаа намайг батлан даалтад гарган шалгахыг АТГ болон бүх шатны прокурор, шүүхэд хандаж таван удаа хүсэлт явуулсан боловч тухай бүрт татгалзсан хариу авсан тул аргагүй эрхэнд журмын нөхдөдөө хандан энэ талаар туслалцаа дэмжлэг үзүүлэхийг хүссэн билээ. Өмгөөлөгч Х.Базаррагчаа нь Я.Батсуурийг Цагдан хорих 461 дүгээр ангийн хорих ангийн эмнэлэгт хэвтэн эмчлүүлж байгаа гэж мэдэгдэж байсан юм. Тэгэхээр Я.Батсуурь өнөөдөр батлан даалтад гарахаар болжээ.
Үндэснийхээ эрх ашгийн төлөө тэмцдэг бид бол үндсэрхэг үзэлтэн “Босоо хөх Монгол бүлгэмийнхэн” гэж өөрсдийгөө олон нийтэд өргөмжилдөг хэсэг нөхөд дахин гадны иргэдийг дарамтлан, мөнгө нэхжээ. Тодруулбал энэ сарын 21 ний өдөр “Босоо хөх Монгол” бүлгэмийн удирдах зөвлөлийн гишүүн Х.Алтанзаяа, Б.Булганбаяр нар согтуурсан үедээ нийслэлийн Налайх дүүрэгт байрлах тоосгоны үйлдвэр, барилга зэрэгт ажилладаг Хятад ажилчдыг шантаажилж, мөнгө нэхэн танхайрсан байна. Тэд өмнө нь Хан-Уул дүүргийн цагдаагийн нэгдүгээр хэлтэст бусдыг дарамталж, мөнгө авсан хэргээр шалгагдаж байсан юм. Өмнөх хэрэг нь шийдвэрлэгдээгүй, мөрдөн байцаалтын ажил үргэлжилж байхад дахин Налайх дүүрэгт танхайрсан гэж цагдаагийнхан тэднийг саатуулжээ. Эх сурвалжийн мэдээлснээр тэдэнд Налайх дүүргийн цагдаагийн хэлтсээс эрүүгийн хэрэг үүсгэн шалгаж эхэлсэн байна.
Мэргэжлийн Жюү-жицүгийн дэлхийн аварга шалгаруулах тэмцээн өнөөдөр АНЭУ-ын нийслэл Абу-Дабигийн “IPIC Arena”-д эхэлж байна. Манай улсаас 11 тамирчин хүчээ үзэхээр өнгөрөгч мягмар гарагт эх орноосоо мордсон. Эдгээр тамирчны дотор үндэсний бөхийн улсын аварга Г.Эрхэмбаяр, улсын арслан Д.Азжаргал, улсын начин Б.Сугаржаргал нар багтжээ.