Өнөөдөр манай сонин 16 нүүрээр хэвлэгдлээ. Харамсалтайгаар амиа алдсан дөрвөн настай охинд хүндэтгэл үзүүлж, хүчирхийллийг зогсоохыг шаардсан жагсаал өнгөрсөн бямба гаригт “Чингэс”-ийн талбайд болсон. Уг жагсаалаас хийсэн “Монголчууд дөрвөн настай охиныхоо диваажинд хүрэх замыг гэрэлтүүллээ” сурвалжлага, даваа гариг бүрийн дугаарт уламжлал болгон гардаг “Танайд өнжье” булангаа нэгдүгээр нүүрт онцоллоо. Энэ удаад “Танайд өнжье” булангаа “ОБ пластик” үйлдвэрээс бэлтгэсэн юм. Уг нийтлэлийн дэлгэрэнгүйг 12, 13 нүүрээс уншаарай. “Улс төр”-ийн нүүрт Аж үйлдвэрийн сайд Д.Эрдэнэбат “Нефть боловсруулах үйлдвэр байгуулна гэдэг талхны үйлдвэр барихтай адилгүй” гэж ярьсан байна.
Манай сонины гуравдугаар нүүрт Монголын шилдэг нийтлэлчид нийтлэлээ байршуулдаг том талбар билээ. Өнөөдрийн дугаарын энэ нүүрт “Ард иргэд хүүхдийн төлөө эмгэнэж байхад Монголын улстөрчид Хүй долоон худагт хүүхдийн хувь заяагаар наадлаа” нийтлэл хэвлэгдлээ. Оросын сөрөг хүчний удирдагчдын нэг Б.Немцовт зэвсэглэсэн этгээд халдаж амь насыг хөнөөсөн хэрэг гарсан. Уг хэргийн эргэн тойронд өрнөж буй үйл явдлыг “Гадаад мэдээ”-ний нүүрнээс уншаарай. Энэ мэтээр дотоод гадаадад болж буй цаг үеийн, олны анхаарлыг татсан мэдээ, мэдээллийг уншигч та манай сониноос дэлгэрүүлж сонирхоорой.
Татвараас зайлсхийсэн хэргээр 5.6 жилийн ял сонсон хоригдож байсан “Саусгоби сэндс” компанийн гүйцэтгэх захирал асан Жастин Капла нарын гурван хүнд Ерөнхийлөгч өршөөл үзүүлсэн. Ийнхүү өршөөлд хамрагдан суллагдсан Жастин Капла нутаг буцаж Миннесота мужид уржигдар/02.29/ газарджээ. Тэрээр “Би их баяртай байна. Та суллагдаж гэртээ харина гэж хэлэхэд үнэхээр сайхан байсан. Монголын шорон бусад орны шорнуудын адил тийм муу орчин, нөхцөлтэй биш юм билээ. Хоригдож байх үед бидэнд хүндэтгэлтэй хандаж байсан гэдгийг онцлох нь зүйтэй. Одоо гэр бүлтэйгээ хамт байхыг л хүсч байна” гэж ярьсныг MyFoxTwincities.com. сайтад мэдээлжээ.
Монгол Улсын Ерөнхийлөгч Ц.Элбэгдорж гуравдугаар сарын 2-4-нд Герман улсад ажлын айлчлал хийхээр болжээ. Айлчлалын хүрээнд Монгол Улсын төрийн тэргүүн ХБНГУ-ын ерөнхийлөгч И.Гаук, Канцлер А.Меркельтэй тус тус уулзаж, Берлин хотноо зохиогдох Монгол, Германы бизнесийн форумд оролцоно. Мөн гуравдугаар сарын 4-8-нд ХБНГУ-ын Берлин хотноо болох олон улсын аялал, жуулчлалын “ITB Berlin 2015” үзэсгэлэнгийн нээлтийн ёслолын арга хэмжээнд түнш орны төрийн тэргүүний хувиар уригдан оролцож, үг хэлэх юм байна.
Их Британийн Засгийн газар өнгөрсөн долоо хоногт Сири улс руу явж, улмаар хэт даврагч болсон өсвөр насны гурван охиныг эрэн сурвалжилж эхэлжээ. 15 настай Кадиза Султана, 16 настай Амира Абасе, 15 настай Ветхамел гэх гурван охин Лондонд болох найзынхаа хуриманд оролцохоор гэрээсээ гарч яваад сураггүй алга болжээ. Мөрдлөгийн явцад тэд Турк улсаар дамжиж Сири, Иракт эрхээ тогтоогоод буй “Халифын вант улс” бүлэглэлийн дайчидтай уулзсан нь тогтоогджээ. Тэд амьд, үхсэн эсэх мэдээлэл нь тодорхойгүй байгаа юм. Охидын гэр бүлийнхэн “Тэд хэт даврагч болбол сайхан амьдарч болох болов уу” хэмээн асууж байсан гэж мэдүүлжээ. Мөн Амира Абасе фэйсбүүктээ “Ажил хийхийг хүсэхгүй байна. Британид ажил хийсэн ч Британи хүмүүс шиг цалин авахгүй. Би бол цагаач. Британийн иргэншилтэй ч британичууд намайг цагаач гэж нэрлэдэг” гэж бичжээ. 
Украины Ерөнхийлөгч Петр Порошенко твиттер хуудсаараа дамжуулан Оросын улстөрч Борис Немцовын гэр бүлд эмгэнэл илэрхийлсэн тухай “Ройтерс” агентлаг мэдээллээ. Порошенко “Дэндүү харамсалтай байна. Таны аминд хүрсэн гэмт этгээдүүд хурдан баригдаж, шүүхийн өмнө зогсоосой. Немцовын гэр бүлд эмгэнэл илэрхийлье. Эмгэнэлийг минь хүлээн авна уу” гэж жиргэжээ. 
Нүүрсний эрэлт сар шинийн өмнө суларсантай холбоотойгоор экспорт буурчээ. Мөн нүүрсний борлуулалт төлөвлөгөөнийхөө тал хувьтай тэнцсэн байна. Ашигт малтмалын газрын мэдээллээр нэгдүгээр сард нүүрс олборлогчид 1.9 сая тонн нүүрс борлуулснаас 1.1 саяыг нь экспортод гаргажээ. Үүнийг өмнөх онтой харьцуулахад борлуулалт 3.4 хувь харин экспорт 12.5 хувиар буурсан байна.
Нийслэлд 600 гаруй мянган тээврийн хэрэгсэл байдаг ба эдгээр тээврийн хэрэгслүүдийн эзэмшигч иргэдийн 70-80 хувь нь зам ашигласны, агаарын бохирдлын төлбөр, тээврийн хэрэгслийн татвараа төлдөг. Харин үлдсэн нь нийслэлд бүртгэлтэй ч хөдөө орон нутагт удаан хугацаагаар ажилладаг, эвдэрсэн, сэлбэгэнд зарагдсан, эсвэл шилжилт хөдөлгөөний бүртгэлээ хийлгээгүй гэх мэт шалтгаанаас болж нийслэлийн тээврийн хэрэгслийн бүртгэлээс хасуулаагүй байдаг.
ОХУ-ын Ерөнхийлөгч Владимир Путин энэ хэргийг захиалгат бөгөөд өдөөн хатган турхирсан аллага боллоо гэж үзэж буйгаа илэрхийлжээ. Тэрээр Немцовыг буудаж хөнөөсөн аллагын мөрдөн шалгах ажиллагааг өөрийн биеэр удирдахыг хууль сахиулах байгууллагын дарга нартаа тушаажээ.
Оросын сөрөг хүчнийг 20 жил удирдсан, “Солидарность” хөдөлгөөнийг үүсгэн байгуулагч, удирдагчдын нэг, 55 настай Борис Немцовыг өнгөрсөн баасан гаригийн шөнө дунд Москвагаас холгүй орших Большой Москворецкийн гүүрэн дээр найз бүсгүйтэйгээ хамт явах үед нь цагаан өнгийн машинтай үл таних этгээдүүд араас нь буудсан. Түүн рүү зургаан удаа буудсанаас дөрвөн сум нуруун тус газар нь онож, тэрээр газар дээрээ нас барсан талаар Оросын хэвлэлүүдэд бичсэн байна. Тэрээр “РПР-ПАРНАС” улс төрийн намыг хамтран даргалагч, Оросын сөрөг хүчний зохицуулах зөвлөлийн гишүүн байв.
Дүнжингарав-2015″ хурдан морины уралдаан Төв аймгийн нутаг Хүй долоо худагт боллоо. Засгийн газрын тогтоолын дагуу зохиогддог төвийн бүсийн “Дүнжингарав-2015″ хурдан морины уралдааныг шинийн гурванд хийхээр төлөвлөөд байсан ч цаг агаар эрс хүйтэрсний улмаас түр хугацаагаар хойшлуулсан юм. Өнөөдөр эрлийз дээд нас, азарга, их нас, соёолон гэсэн морьдын уралдаан боллоо. Ингээд айргийн тавд хурдалсан ажнай хүлгүүдийг танилцуулья.
Залуучуудын Хөдөлмөрийн Төв Бирж биржид өнөөдрийн байдлаар цагийн ажлын нээлттэй орон тоо 220 байна. Үүнд байгууллагын сурталчилгаа, брошур, сонин, урилга тараах, цэвэрлэгээ хийх, лавлах утасны оператор, ачаа зөөх, айл нүүлгэх, борлуулалт, зөөгч, хүргэлт, гадаад хэлний цагийн багш, бүх төрлийн хөгжмийн багш, орчуулга гэх мэт ажлын байрууд байна.