Month: March 2015

Монгол Улс 2015 оны 01 дүгээр сарын 28-ны өдөр 3,000,000 дахь иргэнээ хүлээн авсан билээ. Үүнтэй холбогдуулан Монгол Улсын Ерөнхийлөгчийн Тамгын газраас санаачлан доорхи үзүүлэлт бүхий зоосыг Монголбанкны гэрээт зоос цутгагч байгууллага болох “Койн Инвест Траст” компанид захиалан цутгуулж зах зээлд гаргасан байна.

Мөн 2015 онд тохиож буй Аугаа их ялалтын баярын 70 жилийн ойд зориулан доорхи үзүүлэлт бүхий зоосыг Кипр улсын “Qualton trading ltd” компаний хүсэлтийн дагуу цутгуулан олон улсын зах зээлд гаргажээ.

Нийслэлийн төвийн зургаан дүүрэгт “Нийтийн үйлчилгээний Улаанбаатар нэгтгэл”-ийн 350 гаруй зам талбайн үйлчлэгч нар нийтийн эзэмшлийн гудамж зам талбайг өдөр бүр цэвэрлэж байна. Нарангийн энгэрийн төвлөрсөн хогийн цэгт өдөрт дунджаар 1360 тонн хог, Цагаан давааны төвлөрсөн хогийн цэгт 790 тонн хог, Мориндавааны төвлөрсөн хогийн цэгт 250 тонн хогийг тээвэрлэн хүргэж устгалд орууллаа.
Хавар болж цас, мөс хайлж уруйн үер буухаас урьдчилан сэргийлэн далан сувгийн цэвэрлэгээг эхлүүллээ. Дэнжийн 1000-ийн 1-р сувгийг найман хүний бүрэлдэхүүнтэй баг гарч, 650 урт метр суваг татаж, Сонгинохайрхан дүүргийн 27-р хороо Толгойтын даланд 1560 м3 мөсийг дөрвөн машин механизмаар гаргаж, нийт 10 рейсээр 60 тн мөс зөөвөрлөв. Мөн өдөр бүр далан сувгийг цэвэрлэн зам талбай, айл өрхүүд рүү цас, мөс хайлж урсахаас сэргийлж байна.
Замын хөдөлгөөний ачааллыг бууруулах ажлын хүрээнд МУБИС – ийн урд 3 никль хайс, Баянхошуу хөтөлийн гарцанд 2 хайс, Сонгинохайрхан дүүрэг 11-р байрны урд замд 20 уян түмбэ, Чингэлтэй дүүрэг Дамбын хуучин эцэст 1 туузан хайс, Богд уулын арын замд 2 туузан хайс тавьж, 1-р эмнэлэг, Гандийн гудамж, Замын цагдаагийн уулзвар, Сүхбаатар дүүрэг 32-ын тойрог, Баянгол дүүрэг Эх нялхасын тойрог, Баянзүрх дүүрэг Таван буудал зэрэг газруудад тэмдгийн арчилгаа хийлээ.

НҮБ-аас 2015 оны “Дэлхийн Усны өдөр”-ийг “Ус-Тогтвортой хөгжил” уриан дор тэмдэглэхээр зарласан. Тэгвэл манай улсад усны салбар үүсч хөгжсөний 77 жилийн ой давхцаж буй юм.
Энэ сарын 22-нд “Дэлхийн усны өдөр”-ийн хүрээнд Байгаль орчин, аялал жуулчлалын яамнаас “Ус-Тогтвортой хөгжил” эрдэм шинжилгээ, онол практикийн X бага хурлын энэхүү эрдэм шинжилгээ, онол практикийн X бага хурлыг зохион байгуулах гэж байна.
X бага хурлын зорилго нь дэлхий нийтийн өмнө тулгамдаад байгаа хүрээлэн буй орчин, Монгол орны усны нөөц, ашиглалт, чанарын асуудал, усан цахилгаан станц болон байгаль орчны бохирдлыг шийдвэрлэхэд их, дээд сургуулийн оюутан залуусын оролцоог нэмэгдүүлэх юм байна. Түүнчлэн оюутнуудын судалгаа шинжилгээний ажилд тусламж дэмжлэг үзүүлэх, бүтээлч сэтгэлгээг хөгжүүлэхэд энэхүү бага хурлын зорилго оршиж байгаа аж.

Холбогдох хууль, журмын дагуу Улсын бүртгэлийн Ерөнхий газрын бүтцийг өөрчилжээ. Ингэхдээ тус газрын бүтэц, орон тооны дээд хязгаарыг 155 байхаар баталсан байна.

Шинэ бүтцээр Тамгын газар, Мэдээллийн технологийн газар, Иргэний бүртгэл, гадаад паспортын газар, Эд хөрөнгийн бүртгэл, цахимжуулалтын газар, Гадаадын хөрөнгө оруулалт, хуулийн этгээдийн бүртгэлийн газар, Бүртгэлийн хяналтын газар, Улсын бүртгэлийн төв архивын газар, Санхүүгийн хэлтэс, Сургалт, эрх зүйн хэлтэс, Дотоод аудитын хэлтэс гэсэн 7 газар, 3 хэлтэстэйгээр үйл ажиллагаагаа явуулахаар боллоо.

Тус газар өмнө нь 6 газар, 13 хэлтэс, 182 албан хаагчтайгаар үйл ажиллагаагаа явуулж байсан бол одоо 7 газар, 3 хэлтэс 155 төрийн албан хаагчтайгаар ажиллахаар болов. Мөн аймаг, дүүргийн Улсын бүртгэлийн хэлтэс нь дотроо үндсэн 2 нэгжтэй байсан бол шинэ бүтцээр нэгж, тасаггүй болоод байна.

Швейцарийн Женев хотноо Хүний эрхийг хөхиүлэн дэмжих, хамгаалах Үндэсний Байгууллагуудын Олон Улсын Зохицуулах Хорооны хурал болж байна. Энэ хуралд манай улсаас Хүний эрхийн Үндэсний Комиссын дарга Ж.Бямбадорж, референт Ө.Ундрах нар оролцож буй юм. Уг хурлын үеэр Монгол Улсын Хүний эрхийн Үндэсний Комиссыг Хүний эрхийг хөхиүлэн дэмжих, хамгаалах Үндэсний Байгууллагуудын Олон Улсын Зохицуулах Хорооны Товчооны гишүүнээр сонгожээ.

Хүний эрхийг хөхиүлэн дэмжих, хамгаалах Үндэсний Байгууллагуудын Олон Улсын Зохицуулах Хороо нь ХЭҮБ-уудын үйл ажиллагаа болон НҮБ-ын хүний эрхийн тогтолцооны хамтын ажиллагаа, харилцан уялдааг хангадаг төдийгүй Парисын Зарчимд нийцсэн магадлан итгэмжлэлийн дотоод тогтолцоогоороо НҮБ-ын хүний эрхийн гэрээний хороодод хүрч ажилладаг онцлогтой байгууллага юм.

Харин Олон Улсын Зохицуулах Хорооны Товчоо нь гишүүнээр элсэхээр хүссэн ХЭҮБ-ын хүсэлтийг авч хэлэлцэн, үнэлэлт дүгнэлт өгөх, Магадлан Итгэмжлэх Дэд Хорооноос зөвлөмж гаргасны дараа магадлан итгэмжлэлийн статусыг хэлэлцэн шалгаж, шийдвэрлэх зэрэг үндсэн үүрэг хүлээх аж.

Монголын оюутны холбооноос санаачилсан оюутан байх хугацаандаа цэргийн албыг дүйцүүлэн хаах боломжтой“Оюутан цэрэг” хөтөлбөр хоёр дах жилдээ хэрэгжинэ. Энэхүү төслийн зорилго Монгол улсын их дээд сургуульд суралцаж байгаа оюутан залуусыг суралцах хугацаанд нь цэргийн бэлтгэл сургалтад хамруулан цэргийн алба хаших, эрүүл чийрэг бие бялдар, сэтгэл зүйн болон цэргийн бэлтгэлтэй залуусын тоог нэмэгдүүлж, улс орныг батлан хамгаалах чадавхийг нэмэгдүүлэх зорилгоор батлагдан хэрэгждэг. “Оюутан цэрэг” хөтөлбөр 2014 оны гуравдугаар сарын 17-ны өдөр нээлтээ хийж, 2014 онд улсын болон хувийн42 их, дээд сургуулиудын 418 оюутан цэрэг хөтөлбөрт хамрагдсан байна. Энэ жилийн хувьд 1000 оюутан царгийг бэлтгэх зорилготой байгаа аж. Их, дээдсургуулийн нэгдүгээр курсын 18-25 настай оюутнууд, хоёрдугаар курсын 18 настай оюутнуудыг гуравдугаар сарын есний өдрөөс тухайн сургуулийн сургалтын албан дээр бүртгэж эхлээд байгаа юм байна.