“Х-ТҮЦ” продакшны жүжигчин, менежер С.Батзоригтой ярилцлаа.
–Өөрийнхөө талаар танилцуулаач. Хэзээ сургуулиа төгссөн билээ?
-СИУС-ийг жүжигчний мэргэжлээр 2011 онд МУАЖ Ж.Лхамхүү багшийн удирдлагад төгсөж байлаа. Манай багш Баярмагнай, Алдар, Туяа, Тэмүүжин, Амгаланбаатар гээд жүжигчдийг сургаж байсан хүн. Би “Тусгай салаа” киноны Номингийн дүрд тоглодог жүжигчин Гэрэлчулуун, Чинзориг, “Маск” продакшнд байсан Золоо гэх залуустай хамт нэг анги төгссөн юм.
–Яагаад жүжигчин мэргэжлийг сонгов. Гэрийнхэн тань дэмждэг байсан уу?
-Багадаа хүүхдийн ордны драмын дугуйланд явдаг байсан. Тиймээс урлагт хорхойсч жүжигчин болъё гэж шийдсэн гэх үү дээ. Анх гэрийнхэн маань намайг жүжигчин болно гэхэд дэмждэггүй байсан. “Миний хүү урлагийн хүн болж чадахгүй байх. Манай удамд нэг ч урлагийн хүн байхгүй” гэдэг байсан. Манай өвөөгийн аав морин хуурч хүн байсан юм билээ. Нээрээ л өөр ямар ч урлагийн хүн байгаагүй л дээ. Дэмжихгүй байхад нь би өөрөө хүчээр СУИС-д очиж шалгалт өгөөд тэнцсэн хүн. Сүүлдээ гэрийнхэн маань дипломын жүжиг үзээд “За болох байлгүй дээ” гэж л хэлсэн. Хүсэл сонирхлоороо жүжигчин болсон учраас урлагийн Янжинлхам бурхан ивээх байлгүй дээ.
-“Х-ТҮЦ” продакшнд хэзээ ямар шалгуураар орж байв?
-“Х-ТҮЦ” жүжигчин шалгаруулж авч байна гээд очоод шалгалт өгөөд орсон. Гурав дахь жилдээ ажиллаж байна.
–Анх ямар дүрд тоглож байсан бэ. Тухайн үеийн сэтгэгдэл ямар байсан бэ?
-Хамгийн анх “Х-ТҮЦ”-д ороод тайзан дээр гарч байсан юм. Тухайн үед гавьяат жүжигчин Одноо эгчтэй хамтарч “Учиртай гурван толгой”-н дүрд тоглосон. Амьдралдаа анх удаа тайзан дээр гараад, ядаж байхад хамтарч тоглосон хүн нь гавьяат. Хамаг бие салганаад тухайн дүрээ дуусгаж байлаа. Их сандардаг юм билээ.
–Оюутан байхдаа нэвтрүүлэг хийдэг байсан гэсэн?
-Оюутан байхдаа С1, MN25 телевизэд ажиллаж байсан. Хүүхдийн хоёр ч кинонд тоглосон шүү. Тухайн үед “Боролдой, Долдой” гээд нэврүүлгийг С1 телевизийн өглөө хөтөлбөрөөс хийх санал тавиад хийж байсан.Тэр үедээ л хийсэн зүйлдээ сэтгэл хангалуун байлаа. Одоо бодохоор алдаатай юм зөндөө л байдаг байх. Өглөө хөтөлбөрт ажиллаж байхдаа нэг агентлагт менежер хийж байсан юм. Тэр туршлагаараа “Х-ТҮЦ” продакшны менежерээр давхар ажиллаж байгаа.
–Киноны санал ирж байна уу. Жүжигчнээр ажиллахаасаа илүү менежерээрээ ажиллаад байна уу?
-Аль алийг нь амжуулах гээд л явж байна. Хөдөө орон нутагт явахад толгой бригадад л явна даа. Түрүүлж очоод бүх юмаа амжуулчихаад хамтлагийнхнаа хүлээж байна. Тэднийг ирсний дараа өөрөө голд нь ороод л явна шүү дээ. “Х-ТҮЦ” продакшнд орсноос хойш олон тоглолтонд орсон. Манайх жилдээ 4-5 шоу хийж байна. Дээрээс нь драмын жүжиг, теле жүжиг, шинэ жилийн зохиомж гээд хамтлагаас гаргаж буй тоглолтонд их, бага хэмжээгээр оролцсон.
Киноны тухайд ганц, хоёр санал ирсэн. Боловсрол телевизийн “Хөгжилтэй гэр бүл” кинонд тоглосон байгаа. Бас нэг киноны гол дүрийн санал ирчихсэн байна.
–Танай энэ удаагийн тоглолт юугаараа онцлог вэ?
-“Супер ээж” тоглолтоо эмэгтэйчүүдийн баяр, цэргийн баяр, инээдмийн баярыг тохиолдуулаад хийж байгаа. Ээж гэдэг хамгийн агуу мэргэжил гэдгийг хошин байдлаар үзүүлж байна. Тоглолт бүх насныханд зориулагдсан. Тоглолт маань нийтдээ зургаан номертэй. Хамтлагт байгаа арав гаруй шинэ залуу жүжигчид маань орж байгаа. Энэ удаад би гурван номерт оролцон тоглож байна.
–Тоглохыг хүссэн дүр бий юу. Драмын театрт тоглох хүсэл байдаг уу?
-Жүжигчин болсных тоглохыг хүссэн дүр бий. Гэхдээ Ромеогийн дүрд хэзээ ч тохирохгүй байх өө. Пап ламын дүрд л тохирох байлгүй. Бас эсрэг дүрд тоглохыг хүсдэг л дээ. Даанч миний царайг тохирохгүй гээд байдаг юм.
–Гэр бүлийнхээ тухай яриач?
-Би гурван хүүхэдтэй айлын голынх нь. Аав маань багш хүн байлаа. Ээж маань санхүүч. Одоо гэр бүл зохиогоод сайхан гэргийтэй болсон.
–Танай хамтлагаас “Эмоци” продакшн тусдаа гарсан. Яагаад гарсан юм бол?
-Хувь хүн уран бүтээлчийн сонирхол шүү дээ. Тэд нар миний хайртай уран бүтээлч ах, эгч нар. “Х-ТҮЦ”-ийнхэн дөрөв дэх үеийнхээ уран бүтээлчийг бэлтгэж явна. Би тэрнийх нь нэг хэсэг болоод л уран бүтээлч болох гэж зүтгэж яваа хүний нэг. Эхний үеийнхэн Дооёо, Аяа гээд л мундаг хүмүүс байсан бол араас нь Батаа ах, Төөтөө ах нар бас тусдаа гарсан. Энэ бол зах зээлийн хууль шүү дээ. Тиймээс ах, эгч нартаа бас амжилт хүсье.
-“Х-ТҮЦ” продакшн хөдөө орон нутгаар тоглолтоор яваад ирсэн гэсэн. Сүүлийн үеийн төлөвлөгөө юу байна?
-Энэ жил “Х-ТҮЦ” продакшны хувьд нэлээд өгөөжтэй жил болсон. Манай хамтлаг Хэнтий, Дорнод, Сүхбаатар, Багануур гээд зүүн аймгуудаар тоглолтоо хийж эхлээд хойшоо Дархан, Эрдэнэт, Булган, Хөвсгөл болон говийн аймгуудаар тоглолтоо хийсэн. “Супер ээж” тоглолтоо дуусгаад манай хамтлаг Америк руу тоглолтоор явах гэж байна. Америкт байгаа монголчуудад зориулж долоон хотоор тоглоно. Буцаж ирээд зургадугаар сарын нэгэнд хүүхдүүддээ зориулаад хүүхдийн жүжиг тоглох төлөвтэй байна. Энэ ажлыг би өөрөө хариуцаж хийж байгаа. Мөн “Болсон явдал” кино хийснээс хойш үзэгчид киногоо хийгээчээ гэсэн санал ирүүлээд байгаа учраас кино хийнэ. Кино зохиол сонголтон дээр явж байгаа.
–Хошин урлагийнхан кино хийхээр шог талдаа ороод зураг авалт нь ч хурдан дуусчихдаг. Энэ тал дээр танайх ямар байр суурьтай байна?
-Хүмүүс тэгж яриад байдаг юм. Би энэ тал дээр эсрэг байр суурьтай байдаг. Манай хамтлаг байгуулагдаад 19 жил болсон байна. Хүнээр бол нас биед хүрчихсэн гэсэн үг шүү дээ. “Х-ТҮЦ” продакшн түүхэндээ хоёр л кино хийсэн. Тэр нь “Миний хөрш чөтгөр”, “Болсон явдал”. Мөн “Сэргээш-1,2,3” гээд гурван мюзикл хийсэн байдаг. Аль аль нь их даацтай болсон шүү дээ. Манай уран бүтээлийг үзсэн хүмүүс халтуурны гэж хэлэхгүй байх.
С.АРИУН
Энэ жил Улаанбаатар хотын 92 гудамж цэцэрлэгт ногоон байгууламжийн тарилт, арчлалт хамгаалалтын ажлыг хийнэ. Энэхүү ажилд 5.8 тэрбум төгрөг зарцуулахаар төлөвлөөд байна. Хаврын улиас хэлбэржүүлэлтийн ажил гуравдугаар сарын 10-наас эхэлсэн бөгөөд дөрөвдүгээр дүгээр сарын 1-нээс цэцэг усалж, зүлэгт талбайг самнаж цэвэрлэн, 10-наас мод бут, сөөг, ургамлан хашлагыг шинээр болон нөхөн тарих ажил хийгдэнэ. Хотын гудамж талбайд энэ жил нийт 500-гаад мянган мод сөөг тарихаар төлөвлөж байна. Харин дөрөвдүгээр сарын 20-ноос гудамж талбайн модыг шохойдож, тав дугаар сарын 1-нээс ногоон байгууламжийн хөрсийг ариутгах ажлыг хийсний дараа зургадугаар сарын 1-нээс зүлэг тарьж, 5-наас цэцэг тарих юм. Ойролцоогоор 300-гаад мянган м2 зүлэг, 400-гаад мянган ширхэг цэцэг тарихаар төлөвлөж байна. Зургадугаар сарын 15-наас наймдугаар сарын 15 хүртэл хоёр сарын турш зэрлэг ургамлыг устгах ажлыг хийнэ гэж Улаанбаатар хотын Захирагчийн ажлын албанаас мэдээллээ. 
“Монгол цэргийн өдөр”, Зэвсэгт хүчний 94 жилийн ойн баярыг тохиолдуулан Жанжин Д.Сүхбаатарын хөшөөнд цэцэг өргөж, Их эзэн Чингис хааны хөшөөнд хүндэтгэл үзүүлэх ёслол боллоо. Ёслолд Батлан хамгаалахын сайд Ц.Цолмон, Зэвсэгт хүчний жанжин штабын бие бүрэлдэхүүн, БХЯ-ны бие бүрэлдэхүүн, бэлтгэл хурандаа, офицерууд, батлан хамгаалах салбарынхан оролцов.Соёлын төв өргөөнд “Монгол цэргийн өдөр”, Зэвсэгт хүчний 94 жилийн ойн баярын хурал, концерт боллоо. Цэргийн баяр угтсан энэ арга хэмжээнд Батлан хамгаалахын сайд Ц.Цолмон, Зэвсэгт хүчний жанжин штабын бие бүрэлдэхүүн, БХЯ-ын бие бүрэлдэхүүн, бэлтгэл хурандаа, офицерууд,батлан хамгаалах салбарын анги нэгтгэлүүд оролцож байгаа аж. Мөн Тусгаар тогтнолын ордонд “Цэрэг эр танаа” хүндэтгэлийн арга хэмжээ боллоо. Уг арга хэмжээнд чөлдөөнд байгаа генерал, хурандаа, офицер, албан хаагчид оролцсон юм. 
Ерөнхий сайдын дэргэдэх Эдийн засгийн зөвлөл хоёр дахь удаагийн хурлаараа дөрвөн бүлэгт хуваагдан, санал боловсруулж ажиллахаар шийдвэрлэсэн. Өнөөдөр бизнесийн орчныг сайжруулах болон макро эдийн засгийн тогтвортой байдлыг бий болгох дэд бүлгүүдийн хуралдаан боллоо.
Тоглолтын хоёрдугаар үе эхлэхэд Ерөнхийлөгч Ц.Элбэгдорж цэнгэлдэх хүрээлэнд хүрэлцэн ирлээ. Тэрээр энэ удаа багаа дэмжихээр ирсэн ч Английн Ливерпүүл багийн хөгжөөн дэмжигч аж. Хөлбөмбөгийн “2050” ТББ-ыг үүсгэн байгуулсан юм. 
Монгол-Зүүн Тиморын хөл бөмбөгийн шигшээ багийн тоглолт Монголын хөлбөмбөгийн шигшээ багийн цэнгэлдэхэд болж байна. Цэнгэлдэх хүрээлэн 3800 хүний суудалтай ч бүх суудал эзэнтэй байлаа.
Япон дэх АНУ-ын Элчин сайд Кэролайн Кеннедигийн амийг хорооно хэмээн үл таних этгээд заналхийлсэн байна. Өнгөрсөн сард үр таних этгээд Токио дэх АНУ-ын Элчин сайдын яам руу утасдаж ингэж хэлжээ. Ингэхдээ англиар ярьсан байна. Үүний өмнөхөн БНСУ дэхАНУ-ын Элчин сайдад халдаж нүүрийг нь зүссэн хэрэг гарч нэлээд шуугиан тарьсан билээ.