Month: March 2015

УИХ-ын гишүүн, УИХ-дахь МАН-ын бүлгийн дарга С.Бямбацогт Эдийн засгийн өршөөлийн хуулийн төсөлтэй холбогдуулж, Хууль зүйн сайд Д.Дорлигжав, Сангийн сайд Ж.Эрдэнэбат нарт асуулга хүргүүлжээ. Асуулгад “Уг хуулийн төсөл нь шударгаар тайлангаа мэдүүлж, хяналт шалгалтанд орсон аж ахуй нэгжүүдэд огт хүртээлгүй харин татвараа нуун дарагдуулж, хууль бусаар хөрөнгөжиж ирсэн этгээдүүдэд хамааралтай байхаар тусгасан нь шударга ёсонд нийцэхгүй” гэж үзжээ. Тодруулбал уг хуулийн төслийн 4.5-д татвараас бултаж, хөрөнгөө нуух замаар хяналт шалгалтаас бултаж чадсан этгээдүүдийг өршөөхөөр заасан байна. Гэтэл хуулиа дээдлэн, татварын алба, төрийн захиргааны байгууллагад хүндэтгэлтэй хандаж бүртгэл тайлангаа цаг тухайд нь ирүүлж, хяналт шалгалтанд хамрагдаж байсан ч эдийн засгийн хямралаас болж үйл ажиллагаа нь доголдож татварын өрөнд орсон, торгууль тавигдсан, хэрэг үүсгэгдсэн иргэд аж ахуй нэгжүүдэд хамааралгүй байхаар заасан нь буруу. Үүнийг шударга ёсонд нийцүүлж нэн түрүүнд татварын торгууль, акт тавиулсан болон хэрэгт шалгагдаж байгаа аж ахуй нэгжүүдэд өршөөл үзүүлэх ёстой” гэжээ.

Мөн тэрээр Засгийн газрын өргөн мэдүүлсэн Эдийн засгийн өршөөлийн хуулийн төсөлд нийт хэчнээн иргэн, аж ахуй нэгжид өршөөл үзүүлэх боломжтой байгааг нэг бүрчлэн нэрсийн жагсаалтын хамт гаргах. 2012-2014 онд хийгдсэн нийт татварын шалгалтын тайлан мэдээ, торгууль, тавигдсан актын дэлгэрэнгүй мэдээлэл, аж ахуй нэгжүүдийн жагсаалтыг гаргах, НӨАТ-ын хуурамч падаантай холбоотой актын мэдээлэл, түүнийг төлж барагдуулсан байдлын тухай холбогдох баримтуудыг нэгтгэн УИХ-ын нэгдсэн чуулганд сонсгохыг хүссэн байна.

Түүнчлэн эрүүгийн хэргээр ял шийтгэгдсэн этгээдийг өршөөлд хамруулж байгаа хэрнээ захиргааны хариуцлага хүлээсэн этгээдийг өршөөлд хамруулахгүй байхаар хуульчилж байгаа нь шударга ёсонд нийцэхгүй байна. Энэ нь цаашлаад аливаа төрлийн бүртгэл, тайлан мэдээг үнэн зөвөөр гаргахаас зайлсхийсэн хууль бус үйлдлийг өөгшүүлж дэмжсэн, нийгэмд сөрөг сэтгэгдэл төрүүлж болзошгүй гэдгийг сануулжээ.

УИХ-ын намрын чуулган завсарлахаас урьтаж, Засгийн газар Эдийн засгийн өршөөлийн тухай, Эдийн засгийн ил тод байдлыг хангах тухай хуулийн төслийг УИХ-д өргөн мэдүүлсэн юм. Үүнтэй холбоотойгоор компаниуд дунд хүлээлт үүсээд байгаа. Сангийн сайд Ж.Эрдэнэбат өнгөрсөн пүрэв гаригт сэтгүүлчидтэй хийсэн уулзалтынхаа үеэр татварын орлого эхний хоёр сарын байдлаар өмнөх оны мөн үеийнхээс 30 гаруй хувийн дутуу төлөлттэй байгааг онцолсон. Энэ нь Эдийн засгийн өршөөл, Эдийн засгийн ил тод байдлыг хангах тухай хуулиуд батлагдах болов уу гэсэн хүлээлт үүссэнтэй холбоотой байж мэдэшгүй гэж үзэж буй. Хуулиараа хаврын чуулган ирэх дөрөвдүгээр сарын 5-нд нээлтээ хийнэ.

Жил бүрийн гуравдугаар сарын 22-нд өдөр, шөнө тэнцэх өдрөөр казах түмэн Наурызын баяр, Нарны баяраа тэмдэглэдэг уламжлалтай. Наурызийн баярт зориулсан “Домборын эгшиг-2015” урлагийн тоглолт өнөөдөр Соёлын төв өргөөнд болж, Монгол Улсын Ерөнхийлөгч Ц.Элбэгдорж, УИХ-ын гишүүдийн төлөөлөл оролцлоо.

Монгол Улсын Ерөнхийлөгч Ц.Элбэгдорж урлагийн тоглолтод хүрэлцэн ирэгсэд болон казах түмэнд хандаж хэлсэн үгэндээ “Өнөөдөр уламжлалт сайхан баяр, Наурызийн баяр эхэлж байна. Өдөр, шөнө тэнцэж Наурызийн баяраа тэмдэглэж байна. Казах түмэн маань баяраа тэмдэглэж, уулзаж, учирч, хуучин ёс заншлаа хэлэлцэж, өвгөд хөгшдөө хүндэлж дээдлэх ёс уламжлал энэ өдрүүдэд үргэлжилдэг.

Наурызийн баяр манай ард түмний эрдэнэ мэт эрхэмлэдэг сайхан баяр болж, жил бүхэн уламжлал болон тэмдэглэж байдагт би туйлын баяртай байдаг. Газар орон бүхэнд, Монгол Улс даяар оршин сууж байгаа казах олон түмэн маань энэ баяраа монгол ах дүүстэйгээ хамтарч улам өргөн дэлгэр сайхан тэмдэглэж байгаа.

Энэ жил бидэнд олсон ололт, гаргасан амжилт дүүрэн байна. Хавар цаг ирж байна. Сайхан цаг ирж байна. Энэ жилийн өвөл, хавар маш сайхан өнтэй байлаа. Наурызийн баярын өмнөхөн манай ихэнх нутгаар бидний хэлдгээр шар тос болсон цас орлоо. Хаврын өдөр жилийнхээ өнгийг даадаг гэж ярьдаг. Энэ өдрүүдэд байгаль дэлхий маань ивээж байгаа учраас энэ жил ч сайхан жил болох нь ээ. Монголын ард түмний хийж бүтээх үйлсэд улам их урам өгсөн сайхан жил байх нь ээ гэж бэлгэшээж байна. Бид амны бэлгээс ашдын бэлгэ гэж ярьдаг. Энэ бүхэндээ бэлгэшээж хандах ёстой.

Наурызийн баярын хамгийн гол онцлог бол ахмадаа, уламжлалаа хүндэтгэдэг. Бие биедээ орж зочилдог. Эв нэгдэлтэй байдаг. Ийм сайхан баяр юм. Энэ баярыг агсам согтуугүй, архигүй тэмдэглэдэг уламжлалтай. Энэ сайхан уламжлал баяр, баяр дээр улам нэмэгдэж өргөжих болтугай. Архи гэдэг ундаанаас монголчууд бүгдээрээ хол байх ёстой. Наурызийн баяр, хаврын баяр, казах түмнийхээ энэ сайхан баяраас үлгэр жишээ авах ёстой.

Өнөөдөр энд хүрэлцэн ирсэн болон орон даяар энэхүү тоглолтоо үзэх гэж байгаа нийт иргэддээ хаврын баяр, Наурызийн баярын мэндийг хүргэж, чин сэтгэлээсээ хамгийн сайн сайхныг хүсэн ерөөе. Та бүгдийн маань буян заяа үргэлж дэлгэрч байх болтугай. “Наурыз мейрамы құтты болсын! Ақ мол болсын” гэсэн Наурызийн баярын мэндчилгээг та бүхэнд дахин дэвшүүлье. Баяр хүргэе. Та бүхэнд баярлалаа” гэлээ.