Сингапур улсыг үүсгэн байгуулагч, тус улсын Ерөнхий сайд агсан Ли Кван Ю таалал төгссөнтэй холбогдуулан Монгол Улсын Ерөнхийлөгч Ц.Элбэгдорж Бүгд Найрамдах Сингапур улсын Ерөнхийлөгч Тони Тан Кенгэд эмгэнэл илэрхийлэв.
Уг эмгэнэлд “Сингапурын ард түмний хайр хүндэтгэлийг хүлээсэн улс төрийн нэрт зүтгэлтэн, Сингапур улсыг үүсгэн байгуулагч “эцэг”, Ерөнхий сайд агсан Ли Кван Ю өвчний улмаас таалал төгссөнд миний бие гүнээ харамсаж байна. Өнөөдөр Ази тивд төдийгүй дэлхий дахинаа нэр хүндтэй, нийгэм, эдийн засгийн хөгжлөөрөө Азийн нэг “бар” хэмээн зүй ёсоор нэрлэгддэг Сингапур улсын тусгаар тогтнолыг тогтоож, хөгжил цэцэглэлтэд үнэтэй хувь нэмэр оруулсан талийгаачийн яруу үйл хэрэг ямагт хүндэтгэн дурсагдах болно.
Монголын ард түмний нэрийн өмнөөс болон хувиасаа талийгаачийн гэр бүл, Сингапур улсын ард түмэнд гүн эмгэнэл илэрхийлж байгааг минь хүлээн авна уу ” гэжээ.
Д.Жаргалсайханы “De facto” нэвтрүүлэгт Баабар ярилцлага өгөв. Баабар нэг зүйлд гайхаж байгаагаа хэлж байна. “Олон түмнээс оноо цуглуулахын тулд, үр уршгийг нь бодохгүйгээр популизм хийж байгаа улсуудыг сонгохгүй байж болно. Хувийн хэвшлийнхэн Монголын үндэсний нийт үйлдвэрлэлийн 80 хувийг хийдэг байлаа, сүүлийн үед төр баяжаад улсын юм олдоод л арай багассан байх л даа. Хувийн хэвшлийнхэн бүгдийг тэжээдэг шүү дээ.Гэтэл нөгөөдүүл нь өөрсдийг нь хорлоод бизнесийг нь явуулдаггүй. Тэгэхээр бизнес хийж байгаа хүмүүс мөнгөө нийлүүлж байгаад ч хамаагүй энэ нөхдүүдийг гаргахгүй байж болдоггүй юм уу. Энэ хүнийг битгий сонгоорой гээд тэмцэж болно. Оюу толгойд гэхэд л шууд хамтран ажилладаг гурван зуу гаруй компани байлаа. Туслан гүйцэтгэдэг 1200 гаруй компани байлаа. Тэнд хэдэн мянган хүн ажиллаж байлаа. Бүгд ажилгүй болсон. Хэдэн өвчтэй юмнаас болоод. Одоо тэр ажилгүй болсон улсууд яагаад юу ч хэлдэггүй юм. Цөмөөрөө нэгдээд яагаад жагсаалаа хийдэггүй юм” гэж Баабар ярина лээ. Хэдэн өвчтэй юмнууд гэдэг нь өнөөх популистуудыг хэлээд байгаа юм. 
Шинэ Монгол, Мон Турк зэрэг сургуулиуд сурагчдаа ухаалаг утас барихыг хориглочихож. Мон Турк бол бүр анхнаасаа ийм утас барихыг зөвшөөрдөггүй байжээ. Шинэ Монгол харин саяхнаас хэрэгжүүлсэн аж. Гэхдээ ахлах ангийнхныг ухаалаг утас барихыг одоогоор хориогүй юм билээ. 
Германы Germanwings агаарын тээврийн пүүсд харьяалагддаг Airbus А320 онгоц өнөөдөр Испаний Барселон хотоос нисч Францын өмнөд хэсгийн уулархаг нутаг руу орох үедээ холбоо тасарч тун удалгүй онгоцны аюулгүй ажиллагааны тусламж хүссэн дохио ажиллаж эхэлсэн тухай france press мэдээлж байна. Германы Дюссельдорф хот орхоор нисч байсан энэ онгоцонд 148 зорчигч нисч явсан гэх бөгөөд аврах ажиллагаанд оролцож байгаа хүмүүсийн хэлснээр бол өндөр уулсын дунд цас мөстэй газар огцом өндрөө хаяж унасан дээрх онгоцны зорчигчдод амьд үлдсэн байх магадлал тун бага гэж үзэж байна. 
Улаанбаатар хотын худалдааны танхимын Удирдах зөвлөлийн гишүүн UFC группийн ерөнхийлөгч О.Амартүвшин “Өдрийн сонин”-д сонирхолтой ярилцлага өглөө. Бизнес эрхлэгчид төртэй адил төвшинд тоглоё гэж Улаанбаатар танхимыг байгуулжээ. Уг танхимыг яагаад байгуулах болсон юм, гишүүдээр нь ямар хүмүүс сонгогдсон хийгээд бизнес эрхлэгчдэд ямар ач холбогдолтой вэ зэрэг олон асуудлыг энэ ярилцлагаар хөндсөн байгаа. 
Монголын дүрслэх урлагт импрессионизмын агаар амьсгалыг анх оруулж ирсэн Ардын уран зохиолч Бадамжавын Чогсом гуайн ярилцлага “Өдрийн сонин”-ы лхагва гаригийн дугаарт нийтлэгдлээ. Ардын цолтон булангаараа түүний амьдрал уран бүтээлийн талаар энгүүн сайхан яриа өрнүүлсэн байгаа. Дөчөөд оны амьдралыг биеэрээ амссан түүний сонирхолтой ярилцлагыг энэ дугаараас тольдоорой. 
Хятадаас хэл, ёс заншил, шашин шүтлэг ондоо уйгур үндэстнүүд Шинжаан дахь Бээжингийн дарангуйллыг эсэргүүцэн бослого, тэмцэл өдүүлэх нь энгийн үзэгдэл болсон.
АНУ-д ажиллаж амьдарч байсан хоёр монгол бүсгүй хүчирхийлэлд өртсөн тухай мэдээлэл цацагдсан. Тэд нутаг нэгт Белла эмэгтэйн золиос болсон байна. Энэ талаарх дэлгэрэнгүй сурвалжлагыг “Өдрийн сонин”-ы лхагва гаригийн дугаараас уншаарай. Хэрэг болохоос өмнө чухам юу болсон, охид мансууруулах бодистой дарс ууснаас болж гэмт хэргийн золиос болсон уу гээд олон асуултын хариултыг эндээс авах болно. Ямартай ч охидыг хүчирхийлсэн сэжигтнүүдийг баривчлаад байгаа ажээ. 
“Улаанбаатар сан” ОНӨААТҮГ-ыг НИТХ-ын Тэргүүлэгчдийн саналаар татан буулгахаар боллоо. Татан буулгах үйл ажиллагааг хууль тогтоомжид нийцүүлэн зохион байгуулж ажиллахыг нийслэлийн Засаг даргад даалгав. Уг газрын эргэлтийн бус хөрөнгөд бүртгэлтэй хөрөнгүүдийг “Нийтийн үйлчилгээний Улаанбаатар нэгтгэл” ОНӨААТҮГ, нийслэлийн Өмчийн харилцааны газар, Улаанбаатар хотын Захирагчийн ажлын алба, Чингэлтэй дүүргийн ЗДТГ, “Авто худалдааны цогцолбор”, “Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн нэгжид тус тус шилжүүлнэ. Тус газрыг татан буулгах ажлын хэсэг байгуулж ажиллах юм.
Жил бүрийн хоёрдугаар сарын 15-ны дотор албан тушаалтан, төрийн албан хаагчид хувийн ашиг сонирхлын болон хөрөнгө орлогын мэдүүлгээ Авлигатай тэмцэх газарт өгдөг. Тус байгууллага энэ жилийн хувьд улсын хэмжээнд 38423 мэдүүлэг гаргагч бүртгэгдсэнээс 38422 мэдүүлэг хүлээн авчээ. Хуульд заасан хугацаандаа 38421 мэдүүлэг гаргагч бүртгүүлсэн бол нэг мэдүүлэг гаргагч хугацаа хожимдуулсан, нэг мэдүүлэг гаргагч мэдүүлгээ гаргаж өгөхөөс татгалзсан байна.