Гадаад хэргийн яамнаас Дипломат төлөөлөгчдийн газруудад ээлжит болон ээлжит бус дотоодын аудитын хяналт шалгалт хийдэг. Өнгөрсөн оны арванхоёрдугаар сарын 4-нөөс 7-ны өдрүүдэд тус яамны Төрийн нарийн бичгийн даргын 2014 оны А/47 тоот тушаалаар томилогдсон Дотоод аудитын ажлын хэсэг Бээжин хотноо ажиллан, Монгол Улсаас БНХАУ-д суугаа ЭСЯ-ны Консулын хэлтэст шалгалт хийжээ.
Ажлын хэсгийн дүгнэлтэд дурдсанаар, шалгалтын явцад санхүүгийн болон бусад зөрчлүүд илэрсэн аж. Иймд холбогдох хууль тогтоомжийг зөрчин, ажилдаа хариуцлагагүй хандсан хэмээн үзэж ЭСЯ-ны Консул болон зарим ажилтныг томилолтын хугацаанаас нь өмнө эргүүлэн татах юм байна.
Санхүүгийн зохицуулах хорооны ээлжит хурал болж, “Үнэт цаасны зах зээлийг урвуулан ашиглахаас сэргийлэх тухай журам”-ыг баталжээ. Уг журмын хүрээнд Үнэт цаасны зах зээлийн тухай хуульд тусгагдсан үнэт заасны зах зээлд дотоод мэдээлэл ашиглан арилжаанд оролцох, зах зээлийг урвуулан ашиглахыг хориглох үйл ажиллагааг Санхүүгийн зохицуулах хорооноос нарийвчлан зохицуулах юм байна. Ингэснээр хөрөнгийн зах зээлд хувьцаа болон бусад үнэт цаасны ханш чөлөөтэй, шударга, эрэлт, нийлүүлэлтийн үндсэн дээр тогтох боломжтой болох аж.
МҮСБХ-ны Үндэсний супер лигийн плэй-оффийн найман багийн өрсөлдөөн ширүүн өрнөж байна. Өчигдөр “SBL Хасын хүлгүүд” өрсөлдөгчөө хожсоноор хагас шигшээд гурван хожилтой шалгарсан эхний багаар тодорлоо. Өмнө нь “SBL Хасын хүлгүүд”, наймдугаар байраар шалгарсан “Хан талстын ирвэсүүд”-тэй плэй-оффт өрсөлдөхөөр шалгараад байсан юм. 
Монголын үндэсний сагсан бөмбөгийн холбооны санхүүжилтээр спортын шинэ ордон Хандгайтад баригдаж байна. Энэхүү ордны барилгын ажил дуусах шатандаа оржээ. NBA-гийн стандартын дагуу баригдаж буй тус ордны нээлтийн ажиллагаа ирэх дөрөвдүгээр сарын эхээр болохоор төлөвлөгдсөн байна.
“Үнэт цаасны төлбөр тооцоо төвлөрсөн хадгаламжийн төв” ТӨХХК-ийн Төлөөлөн удирдах зөвлөлийн шийдвэрээр тус компанийн Гүйцэтгэх захирал Т.Гандуламыг үүрэгт ажлаас нь чөлөөлөөд байсан юм. Тэгвэл түүний ажлыг үргэлжлүүлэх хүнийг томилжээ. Тус компанийн Төлөөлөн удирдах зөвлөл өчигдөр хуралдаж, Ж.Алдаржавхланг Гүйцэтгэх захирлын үүрэг гүйцэтгэгчээр томилсон байна.
Перу улсын засгийн газар Чосика хотод 60 хоногийн онц байдал тогтоожээ. Нийслэл Лима хотоос 50 хүрэхгүй км-ийн зайтай орших Чосикад хоёр цаг үргэлжилсэн аадар борооны дараа үер, хөрсний нуралт болсон аж. Хөрсний гулгалт, нурангийн үеэр автомашины хэмжээтэй бул чулуу уулнаас өнхөрч байшин барилгуудыг сүйтгэсэн байна. Хөрсний нурангид долоон хүн амь үрэгдэж, 65 байшин сууц сүйдсэн бөгөөд баруун, зүүнийг холбосон гол хурдны зам боогджээ. Онцгой байдлын албаныхны зүгээс гамшигт өртсөн бүс нутагт гэрэл цахилгаан, ундны усны хангамж хүргэж, цэвэрлэх ажиллагааг эхлүүлээд байгаа аж.
Хөдөлмөрийн сайд тушаал гаргаснаар өчигдөр 21 аймгийн Хөдөлмөрийн хэлтсийн дарга, мөн Мэргэжлийн сургалт үйлдвэрлэлийн төвийн захирлуудыг албан тушаалаас нь чөлөөлжээ. Ийн олноор нь нэгэн зэрэг ажлаас чөлөөлөх шийдвэр гаргасан шалтгааныг тус яамнаас лавлахад “Мэргэжлийн сургалт үйлдвэрлэлийн төвийн захирал, Хөдөлмөрийн хэлтсийн дарга нарын дийлэнх нь түр орлон гүйцэтгэгч нар байсан. Төрийн албаны хуульд нийцүүлэхийн тулд түр орлон гүйцэтгэгч нарыг чөлөөлж, сонгон шалгаруулалт зарласан” гэсэн хариулт өглөө. Шинэчлэлийн Засгийн газар байгуулагдсаныхаа дараа яамдын Төрийн нарийн бичгийн дарга нарыг шинээр томилсон юм. Гэхдээ Хөдөлмөрийн яамны Төрийн нарийн бичгийн даргыг томилохдоо жинхлээгүй, түр орлон гүйцэтгэгчээр томилж байжээ. Үндсэндээ 2.5 жилийн хугацаанд тус яамны Төрийн нарийн бичгийн дарга нь түр орлон гүйцэтгэгч байсан аж. Үүнтэй холбоотойгоор аймгуудын Хөдөлмөрийн хэлтсийн дарга, Мэргэжлийн сургалт үйлдвэрлэлийн төвийн захирлууд мөн жинхлэгдэж чадалгүй түр орлон гүйцэтгэгчээр ажиллаж байсан нь шинэ сайд томилогдох хүрээнд “шахагдсан” нь энэ бололтой. Дээрх шийдвэртэй холбоотойгоор Мэргэжлийн сургалт үйлдвэрлэлийн төвийн захирлын ажлыг сургалтын албаны даргад, Хөдөлмөрийн хэлтсийн дарга нарын ажлыг ахлах мэргэжилтэнд нь түр хариуцуулжээ.
Зам тээврийн ослын улмаас 2014 онд улсын хэмжээнд нийт 503 хүн нас барж, 1460 хүн гэмтсэн, үүнээс Улаанбаатар хотод 138 хүн нас барж 726 хүн хүнд, хүндэвтэр гэмтэл авсан байна. Энэ нь 2013 онтой харьцуулахад улсын хэмжээнд нас баралт 18,6 хувь, гэмтсэн хүний тоо 13,9 хувиар өссөн, нийслэлийн хэмжээнд нас баралт 17,9 хувь өссөн үзүүлэлттэй байгаа юм. Мөн өнгөрсөн онд улсын хэмжээнд 48 хүүхэд амь насаа алдаж 1164 хүүхэд гэмтсэн байх бөгөөд үүнээс нийслэлд 10 хүүхэд амь насаа алдаж, 1069 хүүхэд гэмтсэн байна. 
Хаврын улирал ирж, нийт нутгаар хуурайшилт ихссэнтэй холбоотойгоор хээрийн түймэр гарах нь ихэслээ. Дорнод, Сүхбаатар аймгийн нутгуудаар хээрийн түймэр гарсан тухай Онцгой байдлын газраас өмнө нь мэдээлж байсан. Тэгвэл Дорнод аймгийн Матад суманд түймрийн улмаас нэг хүн нас барж, хоёр хүн хүнд гэмтэж гурван айлын гэр шатсан байна. Эх сурвалжийн хэлж буйгаар нас барсан хүн нь тус суманд гарсан түймрийг унтараахаар ирсэн Дорнод аймгийн иргэн аж. 
МХЕГ-ын хяналт шалгалтын нэгдсэн төлөвлөгөөний дагуу Сонгинохайрхан дүүрэгт үйл ажиллагаа явуулж буй “Мах-Импекс” компанийн Хиам консервийн үйлдвэрийг энэ сарын 17-20-ны өдрүүдэд шалгасан талаараа сайтдаа мэдээлжээ.