Олон Улсын бөхийн төрлүүдийн нэгдсэн холбоо /United World Wrestling /-ноос эмэгтэй чөлөөт бөхийн дэлхийн чансааг өчигдөр шинэчлэн гаргажээ. Энэхүү жагсаалтад манай 13 бөх багтсан байна. Тэднээс 60 кг-ын жингийн дэлхийд данслагдсан бөх, гавьяат тамирчин С.Цэрэнчимэд жингийн ангилалыг тэргүүлжээ.
Манай бөхчүүдээс 48 кг-ын жингийн 13 дугаарт Ц.Бямбазаяа, 19-т Э.Нарангэрэл эрэмбэлэгджээ. 53 кг-д есдүгээрт ОУХМ Э.Сумъяа, 55 кг-ын жингийн тавдугаарт С.Бямбацэрэн, есдүгээрт А.Батцэцэг, 11-т П.Орхон нар жагссан байна. Мөн 58 кг-ын13-т Б.Шоовдор, 18-т Т.Мөнхтуяа нар бичигдсэн бол 60 кг-ын жингийн ангилалын гавьяат тамирчин С.Цэрэнчимэд тэргүүлж буй аж.
Харин 63 кг-ын гуравдугаарт гавьяат тамирчин С.Батцэцэг, 69 кг-ын жингийн есдүгээр гавьяат тамирчин О.Насанбурмаа, 10-т Б.Одончимэг нар бичигджээ. 75 кг-ын жингийн долоодугаарт гавьяат тамирчин О.Бурмаа жагссан байна. Ийнхүү шинэчлэн гаргасан дэлхийн чансааны жин бүрт манай шилдэг бөхчүүд багтжээ.
Өнгөрөгч сарын байдлаар он гарсаар 14 аймгийн 36 суманд 39 удаа гарч, 154 толгой мал, амьтан хорогдон 6.8 сая төгрөгийн хохирол учирсан талаар ОБЕГ-аас мэдээллээ. Хорогдсон мал, амьтдыг булж устган, ариутгал, халдваргүйжүүлэлт хийж, уг өвчнөөс урьдчилан сэргийлэх зорилгоор 13673 толгой малыг вакцинжуулсан байна. Голомтод 123 хүн, 29 техник ажиллаж, 3.8 сая төгрөгийн зардал гаргасан ажээ.
Баян-Өлгий аймгийн Цэнгэл суманд өчигдөр газар хөдөлжээ. Цэнгэл сумын дөрөвдүгээр багийн нутаг, сумын төвөөс баруун хойш 128 км-ын зайтай “Цагаан шулуут” гэдэг газар хоёрдугаар сарын 4-ний өдрийн 07:47:39 цагт 4.29 магнитутын хүчтэй газар хөдлөлт бүртгэгдсэнийг Одон орон, геофизик судалгааны төвөөс мэдээлсэн байна. Он гарснаас хойш манай улсын нутагт газар хөдлөлтийн гурав дахь тохиолдол бүртгэгдсэн нь энэ юм. Увс, Булган, Баян-Өлгий аймгийн гурван сумын нутагт 3,5 магнитутаас дээш хүчтэй гурван удаагийн чичирхийлэл мэдрэгдсэн байна. Газар хөдлөлтийн улмаас аймаг, орон нутагт ямар нэгэн хохирол учраагүй ажээ. Түүнчлэн он гарснаас хойш ой хээрийн түймэр өчигдөр анх удаа гарчээ. Нийслэлийн Баянзүрх дүүргийн 11 дүгээр хороо, Богд уулын Төр хурахын аманд ой хээрийн түймэр гарч байгаа тухай мэдээллийг өчигдөр өдрийн 20.23 цагт хүлээн авч Аврах ангийн зургаан албан хаагч, 10 га орчим талбайн газрын хөвд, үндэс шатаж байсныг цурамд оруулан буцсан байна. Өнөө өглөөний 06.00 цагт Баянзүрх дүүргийн Онцгой байдлын хэлтсийн 51 албан хаагч, зургаан автомашин техник хэрэгсэлтэйгээр түймрийн голомтод ажиллахаар явжээ.
Автотээврийн үндэсний төв “Автотээврийн хэрэгслийг шинээр бүртгэх, шилжилт хөдөлгөөний өөрчлөлтийн бүртгэл”-ийг амралтын өдрүүдэд явуулахаар шийдвэрлэжээ. 
Барилгачдын талбайд ахмадууд жагсч байна. Тэд тэтгэврийн зээлийн хүүг бууруулах шаардлагыг тавьж буй юм. Улсын хэмжээнд нийт 200 гаруй мянган ахмад дундажаар сард 225 мянган төгрөгийн тэтгэвэр авдаг аж. Харин ийм хэмжээний тэтгэврээр амьдрах боломжгүй учраас зайлшгүй шаардлагаар зээл авдаг. Тэр зээл нь ахмадуудад дарамт болж буйг тэд хэлж байна. Тэтгэвэр авдаг нийт ахмадын 90 хувь нь зээлтэй байдаг гэнэ. Зээл бус зээлийн 18-24 хувийн хүү тэднийг дарамталж оруулж, амьдрал нь хүндэрч буйгийн шалтгаан болоод байгаа аж. Тиймээс ахмадууд нэгдэн жагсаал хийж, ХАХНХ-ын сайд, Монголбанк, НДЕГ-ын удирдлагуудад дараах шаардлагыг хүргүүлж байна. 
Өнөөдөр Нийслэлийн шүүхийн давж заалдах шатны шүүхэд “Монос” эмийн сангийн ажилтнуудын хэргийг хэлэлцлээ. Улмаар дахин шалгах шаардлагатай гэсэн үндэслэлээр нэмэлт мөрдөн байцаалтад буцаажээ. “Монос эх нялхас” эмийн сангийн жор баригч Б.Эрдэнэчимэг нь “Фенобарбитал” буюу люминал эмийг тун хэтрүүлэн олгосноос 16 нярайг хордуулсан гэх хэргээр анхан шатны шүүхээс 2 жилийн хорих ялаар шийтгүүлсэн. “Монос-Улаанбаатар” компанийн лавлах эмч Д.Жавхлантөгсд нэг жилийн хорих ял оноосон ч тэнссэн юм.
УИХ дахь МАН-ын бүлгийн дэд дарга Н.Номтойбаяр ШӨХТГ-ын дарга Т.Аюурсайханд хүсэлт илгээжээ. Уг хүсэлтэндээ тэрбээр Нийгмийн даатгалын сангийн чөлөөт мөнгөн үлдэгдлийн зарцуулалт нь хуульд нийцэж байгаа эсэхийг шалгах хүсэлтэй байгаагаа дурьдсан байна. 
Монгол Улсын Засгийн газар, Японы Жайка олон улсын байгууллагын буцалтгүй тусламжийн хүрээнд, “Хөгжлийн бэрхшээлтэй хүүхдэд үзүүлэх дэмжлэг, боловсролыг сайжруулах төсөл”-ийг 2015 онд хэрэгжүүлэхээр төлөвлөж байгаа. 
Нийгмийн дэмжлэг зайлшгүй шаардлагатай өрхүүдэд өгдөг хүнсний талонг энэ жил 135 мянган иргэнд олгоно. Тодруулбал, хүнсний талоны үнийг хүүхдэд 6500, том хүнд 13000 төгрөгөөр олгож байгаа аж. Энэ үйлчилгээг 2013 оноос Нийгмийн халамжийн тухай хуульд зааснаар хэрэгжүүлж эхэлсэн байна. 2013 онд 99 мянга гаруй иргэнд хүнсний талон олгосон. Харин 2014 онд энэ тоо 86 мянган иргэнд хүнсний талон олгосон байна.
Баянгол дүүргийн цагдаагийн хоёрдугаар хэлтсийн авто эргүүлийн албан хаагч ахмад Б.Ганхүү, ахлах ахлагч Г.Зоригтбаатар иргэний мэдээллийн дагуу хулгайчийг барьжээ. Иргэнээс Баянгол дүүргийн долоодугаар хороо “Blue Gym” төвийн гаднаас 55-75 дугаартай хар өнгийн land cruiser машиныг хулгайч нар ухаж байна гэсэн мэдээллийг авч, дуудлага өгөгч иргэнтэй холбогдож гэмт этгээдийг хөөн барьж саатуулсан байна.