Month: February 2015

Монгол Улсын Хүний эрхийн Үндэсний Комиссоос Ерөнхий сайд Ч.Сайханбилэгт зөвлөмж хүргүүлжээ. Уг зөвлөмжид хүйтний улиралд морь уралдуулах нь унаач хүүхдийг эрсдэлд оруулдаг. Тиймээс Засгийн газраас тогтоосон өвөл, хаврын уралдааны товыг өөрчлөхийг хүссэн байна.

Зөвлөмж хүргүүлэх тухай

Комисс Монгол Улс дахь Хүний эрх, эрх чөлөөний байдлын талаарх 12 дахь илтгэлдээ морь унаач хүүхдийн эрхийг хамгаалах шаардлагатай байгааг дахин сануулсан билээ. Улсын Их Хурлын Хууль зүйн байнгын хороо тус илтгэл болон Комиссын санал, зөвлөмжийг хэрэгжүүлэх талаар 2013 оны 7 дугаар сарын 3-ны өдөр гаргасан 13 дугаар тогтоолдоо хүүхдийн эрхийг хамгаалахад чиглэсэн хууль тогтоомжид дүн шинжилгээ хийж, хүүхдийг үл хайхрах, хүүхдийн эсрэг хүчирхийллээс урьдчилан сэргийлэх, түүнтэй тэмцэх хууль тогтоомжийг шинэчилж сайжруулах, Стандартчиллын үндэсний зөвлөлийн 2011 оны 28 дугаар тогтоолоор баталсан “Үндэсний морин уралдааны морь унаач хүүхдийн хамгаалалтын хувцас, морины хэрэгсэлд тавих шаардлага” (MNS 6264-2011) стандартыг хангаж ажиллахыг Засгийн газарт чиглэл болгосон билээ.

Гэтэл Монгол Улсын Засгийн газрын 2015 оны 2 дугаар сарын 3-ны өдрийн хуралдаанаар хурдан морины бүсийн уралдааны 2015 оны хуваарийг баталжээ. Уг хуваарьт тусгасны дагуу төвийн бүсийн хурдан морины хаврын уралдааныг 2015 оны 2 дугаар сарын 22-ны өдөр, хангайн болон говийн бүсийн хурдан морины хаврын уралдааныг 2014 оны 3 дугаар сарын 1-ний өдөр тус тус зохион байгуулахаар болсон байна.

Өвөл, хавар цагийн уралдаан буюу 11 сараас 6 сар хүртэлх хугацаанд хүүхдээр хурдан морь унуулах нь хүүхдийн амь нас, эрүүл мэндэд шууд аюул учруулах эрсдэлтэй байдаг. Тодруулбал, энэ цаг үед зам харгуй хөлдүү, цас мөс, шавар шавхайтай байдаг учраас хүүхэд мориноос унах эрсдэл өндөр бөгөөд хүйтний улирал учраас хүүхдүүд гар, хацар, нүүрээ хөлдөөх явдал байнга гардаг.

Монголын морин спорт уяачдын холбооноос өвөл, хаврын улиралд хүүхдүүдийн зузаан хувцасны гадуур өмсөх хамгаалалтын хувцас, хэрэгсэл, малгайтай болсон гэсэн тайлбарыг Комисст ирүүлж байсан боловч хүрэлцээгүй байдаг байна.

Монгол Улсын нэгдэн орсон Хүүхдийн эрхийн тухай конвенцийн 6 дугаар зүйлийн 2-т “Оролцогч улс нь хүүхдийн амьдрах, эсэн мэнд хөгжих бололцоог дээд зэргээр бүрдүүлэн хангана.”, 24 дүгээр зүйлийн 3-т “Оролцогч улс нь хүүхдийн эрүүл мэндийг хохироох уламжлалт дадлыг устгах зорилгоор үр нөлөөтэй бөгөөд зохистой бүх арга хэмжээг авна.” гэж тус тус заасны дагуу Монгол Улсын төр НҮБ-ын өмнө үүрэг хүлээсэн байдаг. Түүнчлэн Хүүхдийн эрхийг хамгаалах тухай хуулийн 8 дугаар зүйлийн 8.1 дэх хэсэгт “…Ашиг хонжоо олох, хүүхдийн эрүүл мэнд, амь насанд аюул учруулах тоглоом наадамд оролцуулахыг хориглоно…” гэж заасан байдаг.

Гэтэл сар шинийн баяртай холбогдуулан уяачид олон бооцоот уралдаан зохион байгуулж, хаврын уралдааны бэлтгэл болох үсэргээ, сунгааны үеэр хүүхдээр хурдан морь унуулж, гэмтэл учруулсан харамсалтай тохиолдол цөөнгүй гарч байсан болно.

Мөн өнгөрсөн онуудад зохион байгуулсан улс, бүс, аймаг, сумын наадмаар хурдан морь унаач хүүхдийн амь нас хохирсон, олон арван хүүхэд гэмтэж бэртэн хөгжлийн бэрхшээлтэй болсон эмгэнэлтэй явдал дахин давтагдсаар байгааг Комисс тухай бүр анхааруулж ирсэн төдийгүй энэ асуудлаар НҮБ-ын Хүүхдийн сангаас албан ёсоор мэдэгдэл гаргасан билээ.

Иймд Монгол Улсын Хүний эрхийн Үндэсний Комиссын тухай хуулийн 19 дүгээр зүйлийн 19.3 дахь хэсэгт заасан бүрэн эрхийн дагуу, хүний эрхийн зөрчлөөс урьдчилан сэргийлэх зорилгоор өвөл, хаврын (хүйтний улиралд) уралдаанд хүүхдийг оролцуулахгүй байх үүднээс Засгийн газрын 2015 оны 2 дугаар сарын 3-ны өдрийн хуралдааны тогтоолоос “төвийн бүсийн хурдан морины хаврын уралдааныг 2015 оны 2 дугаар сарын 22-ны өдөр Хүй долоон худгийн Цагаан хөтөлд, 2015 оны 3 дугаар сарын 1-ний өдөр хангайн бүсийн хурдан морины хаврын уралдааныг Сэлэнгэ аймагт, говийн бүсийн хурдан морины хаврын уралдааныг Дорноговь аймагт” товлосон хугацааг өөрчилж, 2015 оны 6 дугаар сард зохион байгуулахыг ЗӨВЛӨМЖ болгож байна.

Монгол Улсын Хүний эрхийн Үндэсний Комиссын тухай хуулийн 19 дүгээр зүйлийн 19.3 дахь хэсэгт заасан хугацаанд Зөвлөмжийн хүрээнд хэрэгжүүлсэн арга хэмжээний талаар хариу мэдэгдэнэ үү.

ШӨХТГ-аас Монгол Улсын их сургуулийн шилжин суралцсан оюутнаас шилжилтийн төлбөр авч буй үйл ажиллагаанд хяналт шалгалтын ажлыг хийжээ. Гэтэл шалгалтаар Монгол Улсын их сургуулийн захирал оюутан шилжүүлэн суралцуулах журам батлах болон шилжилтийн төлбөр тогтоох тухай тушаалуудыг гаргаж, 2013-2014 оны хичээлийн жилд 241 оюутнаас хууль бусаар 347,182,000 төгрөг хураан авсан болох нь тогтоогдсон байдаг. Иймд улсын байцаагчийн дүгнэлт гарч, зөрчил арилгуулахаар улсын байцаагчийн албан шаардлага хүргүүлсэн.

Харин МУИС-ийн зүгээс эсэргүүцэн ШӨХТГ-ын улсын байцаагчийн шийдвэрийг эсэргүүцэж, “хууль бус шийдвэр гаргалаа” хэмээн шүүхэд нэхэмжлэл гаргасан. Уг хэргийг захиргааны хэргийн анхан шатны 20 дугаар шүүх хянан хэлэлцээд ШӨХТГ-ын улсын байцаагчийн дүгнэлт, албан шаардлагыг хүчингүй болгон шийдвэрлэж байлаа.

Харин ШӨХТГ нь анхан шатны шүүхийн шийдвэрийг эс зөвшөөрч давж заалдах гомдол гаргасан. Захиргааны хэргийн давж заалдах шатны шүүх гомдлын дагуу уг захиргааны хэргийг 2015 оны 1 дүгээр сарын 29-ний өдөр хянан хэлэлцээд анхан шатны шүүхийн шийдвэрт өөрчлөлт оруулж шийдвэрлэжээ.

Тэгвэл захиргааны хэргийн давж заалдах шатны шүүхээс байцаагчийн дүгнэлтийг бүхэлд нь хууль тогтоомжид нийцсэн гэж үзсэн бөгөөд МУИС-ын захирлын тушаалаар баталсан оюутан шилжүүлэн суралцуулах журмын төлбөртэй холбоотой хэсэг, шилжилтийн төлбөр тогтоох захирлын тушаалыг бүхэлд нь хүчингүй болгохыг шаардсан улсын байцаагчийн албан шаардлагыг тус тус хууль тогтоомжид нийцсэн гэж хэвээр үлдээсэн байна.

Харин 241 оюутнаас хууль бусаар авсан 347 сая 182 мянган төгрөгийг буцаан олгохыг шаардсан нь ШӨХТГ-ын бүрэн эрхэд хамаарахгүй тул хохирсон оюутнууд өөрсдөө нэхэмжлэх боломжтой юм байна.

Эрүүл мэндийн яамны Шуурхай удирдлагын төвийн мэдээллийг хүргэж байна.

Угаарын хийн хордлого, албан:

Баян-Өлгий аймгийн Өлгий сумын 4-р багт 2 дугаар сарын 10-нд угаарын хийн хордлогод өртсөний улмаас 2 хүн (15 настай, эмэгтэй, 57 настай, эрэгтэй) нас барсан байна.

Эх сурвалж: Баян-Өлгий аймгийн ЭМГ

Томуу, томуу төст өвчин, Нийслэлд, албан:

Нийслэлийн эрүүл мэндийн байгууллагуудад нийт 73493 хүн амбулаторийн үзлэгт хамрагдсанаас 5210 тохиолдол буюу нийт үзлэгийн 7.1хувийг томуу, томуу төст өвчин эзэлжбайна. Энэ нь өнгөрсөн долоо хоногийн үзүүлэлтээс 0.2 хувиар буурсан хэдий ч Сүхбаатар дүүрэгт 1.8 хувь, Баянгол дүүрэгт 1.7 хувийг, Налайх дүүрэгт 0.7 хувь, Чингэлтэй дүүрэгт 0.6 хувиар тус тус өссөн, бусад дүүргүүдэд 0.2%-2.7%-иар буурсан үзүүлэлттэй байна.

Эх сурвалж: НЭМГ

Агаарын чанарын төлөв байдал, албан:

2 дугаар сарын 2-ноос 8-ны хооронд Улаанбаатар хотын гэр хорооллын орчмын агаар “Их” болон “Маш их” бохирдолтой, орон сууцны хорооллын орчимд “Их”, “Дунд зэргийн” бохирдолтой байна. Агаар бохирдуулах бодисын долоо хоногийн дундаж агууламжийг өмнөх оны мөн үетэй харьцуулахад хүхэрлэг хий (SO2), азотын давхар исэл (NO2) 1.1-2.2 дахин их, нарийн ширхэглэгт тоосонцор (PM2.5) 1.4 дахин их, том ширхэглэгт тоосонцор (PM10),CO, O3 ойролцоо түвшинд байна.

Архины хордлого, албан: 2 дугаар сарын 3-наас 2 дугаар сарын 9-нд Нийслэлийн эмнэлгүүд болон Энэрэл, Наркологийн төвд нийт 461 хүн хандаж, 27 хүн хэвтэн эмчлэгдэж, 1 хүн нас барсан байна. Энэ үзүүлэлт нь өмнөх долоо хоногоос 6.7 хувиар (31) нэмэгджээ.

“Таванбогд трейд” тэргүүтэй 16 компани “Үнэ тогтворжуулах хөтөлбөр”-ийн хөрөнгөөс завшжээ

Шударга өрсөлдөөн, хэрэглэгчийн төлөө газар/ШӨХТГ/-аас Барилга, хот байгуулалтын яамтай хамтран “Барилгын салбарыг дэмжих, улмаар орон сууцны үнийг тогтворжуулах” дэд хөтөлбөрийн хүрээнд хэрэгжсэн үнэ тогтворжуулах гэрээний биелэлтийг шалгажээ. Шалгалтаар “Таванбогд трейд” ХХК, “Кью эс си” ХХК, “Пума” ХХК зэрэг гурван аж ахуй нэгж гэрээний үүргээ зөрчсөн болохыг тогтоосон байна. Эдгээр компаниуд гэрээгээр хүлээсэн үүргийн дагуу цемент, арматур нийлүүлэх ёстой байсан ч огт нийлүүлэлт хийгээгүй байгаа аж.

Мөн “Монос констракшн” ХХК, “Мост интернешнл”, “Очир ням” ХХК, ХХК, “Орд гео” ХХК, “Монтул” ХХК, “Бүрд констракшн” ХХК, “Төмөр транс” ХХК зэрэг долоон аж ахуй нэгжүүд хөнгөлттэй зээлийн мөнгийг зориулалтын бусаар зарцуулсан гэдгийг тогтоосон аж. Үүний зэрэгцээ “Анимук” ХХК, “Мөнгөн балгиа” ХХК, “Энх дөлгөөн далай” ХХК, “Баялаг говь” ХХК, “БОСБД” ХХК, “БТТ Инженеринг” ХХК-иуд нь гэрээний биелэлт, тайлангаа огт гаргаж өгөөгүй байна.

Гэрээний үүргээ зөрчсөн гэх 16 компанид хариуцлага тооцох тухай хүсэлтийг ШӨХТГ-аас холбогдох байгууллагад хүргүүлжээ. Тодруулбал, хөтөлбөрийн хүрээнд авсан хөнгөлөлттэй зээлийг банкны зээлийн хүүгээр тооцон төлүүлэх, тендерт оролцох эрхийг хасах зэрэг арга хэмжээ авахыг сануулжээ.

Мобиком корпораци” ХХК-ийн хэрэглэгчтэй байгуулж буй дараа төлбөрт үйлчилгээний гэрээ болон түүний нөхцөл хэрэглэгчдийг хохироож буйг Шударга өрсөлдөөн, хэрэглэгчийн төлөө газраас тогтоожээ. Шалгалтаар хэд хэдэн зөрчил, дутагдал илэрсэн байна. Жишээлбэл, “Мобиком корпораци”-ийг

-Хэрэглэгчдэд роуминг үйлчилгээний нөхцөл, үнэ тарифын мэдээллийг тодорхой өгдөггүйн улмаас хэрэглэгч өөрийн хэрэглээний үнэн зөвийг шалгах боломжгүй нөхцөл байдлыг бий болгосон. Тухайлбал, хэрэглээ нь 300 мянган төгрөг болсон тул үйлчилгээг хязгаарласан гэх мэссежийг өгдөг боловч төлбөр бодогдоход уг мэдээллээс хэд дахин илүү төлбөр гарсан байдаг нь тогтоогдсон.

-Үйлчилгээний үнэ тариф болон нөхцөлд өөрчлөлт оруулах тохиолдолд ажлын таваас доошгүй хоногийн өмнө мэдэгдэхээр гэрээндээ заасан байдаг. Гэтэл хэрэглэгч утсаа ашиглаагүй тохиолдолд суурь хураамж авдаггүй байсан нөхцөлийг өөрчилсөн шийдвэрийг хэрэглэгчдэд мэдэгдэлгүй гаргасан. Энэ нь хэрэглэгчдийн эрх, хууль ёсны ашиг сонирхолд нийцээгүй буюу холбогдох журмыг зөрчсөн.

-Компанийн сүлжээний тасалдал, доголдолын улмаас үүссэн хариуцлагыг хүлээхгүй байх тухай гэрээнд заасан нь Иргэний хуулиар тогтоосон нөхцөлийг зөрчсөн. Мөн хэрэглэгчтэй байгуулсан гэрээнд өөрчлөлт оруулахдаа зөвхөн олон нийтийн мэдээллийн хэрэгслээр мэдэгдэх гэж заасан нь гэрээний тэгш байдлын зарчмыг алдагдуулсан гэхчлэн буруутгажээ.

Иймд ШӨХТГ-аас дээрх зөрчлүүдийн улмаас хохирсон иргэдийн хохирлыг бүрэн төлүүлэх, хууль бус гэрээний заалтуудыг цуцлах шаардлагыг “Мобиком корпораци” ХХК-д хүргүүлээд байгаа аж.

Мэргэжлийн сумогийн 69 дэх аварга Хакухо Даваажаргал энэ сарын 15 буюу ирэх ням гаригт эх орондоо ирнэ. Тэрбээр кюүшюү башёд түрүүлж, Японы мэргэжлийн сүмогийн түүхэнд рекорд тогтоосон Тайхо их аваргын амжилттай зэрэгцсэн юм. Ингэж Японы үндэсний спортын дээд амжилтыг эвдсэн түүнийг Мэргэжлийн сүм бөхийн холбооны Ерөнхийлөгч Хитаноуми “Хакүход одоогоор өрсөлдөгч алга даа” хэмээн үнэлсэн билээ.

Дашрамд дуулгахад сар шинийн үеэр Хакуход Хөдөлмөрийн баатар цол олгох тухай яригдаж буй. Мөн саяхан түүнийг Монгол Улсын Соёлын элчээр томилж, гэрчилгээ, 33 дугаартай дипломат паспортыг Ерөнхий сайд Ч.Сайханбилэг гардуулаад байгаа юм.