Month: February 2015

Монголбанк, Эдийн засгийн хүрээлэн, “Тэнхлэг зууч, “Актив зууч”, “Монголиан пропертис” компанийн хамтарсан консерциум орон сууцны үнийн индексийг сар тутам гаргадаг болоод удаж байна. Тэд судалгаандаа Улаанбаатар хотод өнгөрсөн сард худалдаалахаар зах зээлд нийлүүлсэн шинэ, хуучин 4242 орон сууцийг хамруулсан байна.

Хамгийн сүүлийн буюу энэ оны нэгдүгээр сарын судалгаагаар орон сууцны нэг ам.метр талбайн үнэ өнгөрсөн оны сүүлийн хагаст буурсан үзүүлэлттэй гарчээ. Орон сууцны нэг ам.метр талбайн үнэ сүүлийн зургаан сар дараалан буурсан буюу нийт 5.8 хувиар хямдарсан байна.

Орон сууцны үнийн индексээс үзвэл шинэ орон сууны нэг ам метр талбайн үнэ одоо нийслэлд дунджаар 2160000 төгрөг бөгөөд энэ нь өнгөрсөн оны нэгдүгээр сарынхаас 1.7 хувиар хямдарсан үзүүлэлт ажээ. Шинэ орон сууцны дундаж үнэ Сонгинохайрхан дүүрэгт хамгийн хямд, Сүхбаатар дүүрэгт өндөр байжээ. Жишээлбэл, Сүхбаатар дүүрэгт шинэ орон сууцны нэг ам.метр талбайн үнэ гурван сая төгрөг байхад Сонгинохайрхан дүүрэгт 1.6 сая төгрөг байсан аж.

Билгийн тооллын XYII жарны хөхөгчин хонин жилийн хаврын тэргүүн сарын шинийн нэгэн дулаахан, нар ээсэн сайхан өдөр болж байна. Шинийн 1-ний өдрийн нараар тэр жилийнхээ өнгийг шинждэг уламжлал монголчуудад бий. Тийм ч учраас энэ жил зуд турхангүй, ногоо цагаа дэлгэрсэн сайхан жил болно гэж хөгшид хуучилж байна. Хонь өөрөө номхон амьтан учраас тогтуун сайхан жил болохыг зурхайчид ярьж байгаа. Та бүхэн сайхан шинэлээрэй.

Сар шинийн баярын өдрүүдэд нийтийн тээвэр шинийн 1,2,3 буюу 2 дугаар сарын 19, 20, 21–ний өдрүүдэд өглөөний 08.00-22.30 цаг хүртэл үйлчилнэ.

Монгол Улсын Ерөнхийлөгч Цахиагийн Элбэгдоржийн ивээл доор зохион байгуулагдаж буй “Сүүтэй Монгол” үндэсний аян нээлтээ хийлээ. Монголын Хүнсчдийн Холбоо, сүүн бүтээгдэхүүн үйлдвэрлэгчдийн санаачилгаар ХХААЯ, төрийн болон төрийн бус, олон улсын байгууллагуудтай хамтран хүн амын сүү, сүүний бүтээгдэхүүний хэрэглээг нэмэгдүүлэхэд энэхүү аяны зорилго чиглэж байгаа юм.

Монгол Улсын хүн амын сүү, сүүн бүтээгдэхүүний хэрэгцээ 2014 оны байдлаар 452,6 сая литр байгаагаас үйлдвэрийн аргаар боловсруулсан сүү, сүүн бүтээгдэхүүний хангамж 17,5 хувь байна. Харин орон нутагт уламжлалт аргаар үйлдвэрлэсэн сүү цагаан идээний үйлдвэрлэлд 68,8 сая литр сүү, цөцгийн тосны үйлдвэрлэлд 31,2 сая литр сүү ашигласнаас гадна 260 орчим сая литр сүү ямар нэгэн бүртгэл тооцоогүй зах зээлд нийлүүлэгддэг гэсэн судалгаа байдаг аж. Эрүүл мэндийн сайдын 2008 оны 257 тоот тушаалаар баталсан “Жишсэн дундаж хүний илчлэгийн хоногийн хэрэгцээг хангах хүнсний бүтээгдэхүүний жишиг хэмжээ”-нд заасны дагуу жишсэн дундаж нэг хүний хоногт хэрэглэх сүү (175 гр/хоног), сүүн бүтээгдэхүүн (248 гр/хоног)-ийн хэмжээг үндэслэн тооцоход 2015 онд Монгол Улсын нийт хүн амын сүү, сүүн бүтээгдэхүүний хэрэгцээ шингэн сүүнд шилжүүлснээр 459,8 сая литр аж.

Нийслэлийн нэг хүнд ногдож байгаа сүү, сүүн бүтээгдэхүүний хэрэглээ 2012 онд 90 кг байгаа нь зөвлөмж хэрэгцээний дөнгөж 57.3 хувьтай тэнцдэг. Харин хөдөөд 1 хүнд ногдох сүү, сүүн бүтээгдэхүүний хэмжээ дэлхийн сүүний үйлдвэрлэл хөгжсөн орнуудын түвшинд ойртсоныг мэргэжилтнүүд хэлж байна. Гэтэл манай улсын хувьд хот, суурин газрын хүн амын сүү, сүүн бүтээгдэхүүний хэрэглээ хөдөөгийнхөөс 2 дахин бага, хангамж жигд бус. Сүү сүүн бүтээгдэхүүний зах зээлийн зөвхөн 24 хувийг дотоодын бүтээгдэхүүнээр хангана гэдэг нь мал аж ахуйд суурилсан эдийн засагтай манай орны хувьд туйлын хангалтгүй үзүүлэлт. Тиймээс цаашид сүүн бүтээгдэхүүний үйлдвэрлэл болоод малчид, фермерийн аж ахуй эрхлэгчдийн зах зээлийн эргэлт, нийлүүлэлтийг дэмжиж, нийт монголчууддаа экологийн цэвэр, чанар, аюулгүй байдлын шаардлага хангасан сүүн бүтээгдэхүүний хэрэглээг нэмэгдүүлэх шаардлага гарч байгааг ХХААЯ-ны удирдлагууд анхаарч ажиллана хэмээсэн. “Сүүтэй Монгол” аян улс орон даяар 4 сар үргэлжилнэ.

Баянгол дүүргийн Засаг дарга Д.Оросоо, Засаг даргын орлогч Г.Энхболд нар болон дүүргийн удирдлагууд билгийн тооллын XVII жарны хөхөгчин хонь шинийн нэгэнд дүүргийнхээ өндөр настнуудад хүндэтгэл үзүүлж гэрт нь очиж золголоо. Тус дүүрэгт 95-97 настай 38 азай буурал амьдардаг юм байна.

Гэр хорооллын дахин төлөвлөлтийн байршлууд болон “Авто худалдааны цогцолбор”-т орон сууц худалдан авах иргэдийн урьдчилгаа төлбөр дээр нийслэлээс дэмжлэг үзүүлэхээр яригдаж эхлээд байсан.

Урьдчилгаа 30 хувийг бүгдийг нь нийслэл төлөх, тодорхой хувийг нь төлөх гэсэн хоёр хувилбараар хотын удирдлагууд нэлээд ярилцсаны эцэст урьдчилгаа төлбөрийн 50 хувийг нийслэлээс эргэн төлөгдөх нөхцөлтэйгөөр төлөхөөр журмын төсөлд тусгалаа.

Дээр дурдсан байршлуудын хорооллоос 60 м.кв-аас доош талбайтай орон сууц худалдан авч байгаа эмч, багш, цагдаа ….зэрэг нийслэлээс цалинждаг албан хаагчдаас гадна төрийн үйлчилгээнд ажилладаггүй ч өрхийн голч орлогоос доогуур орлоготой иргэдийг хамруулахаар журмын төсөлд тусгаад байна.

Сар шинийн 1, 2- нд бүх нийтээрээ амрах баярын өдрүүд, 3, 4-нд амралтын өдрүүд таарч байгаа тул 2 дугаар сарын 19, 20, 21, 22 –ны өдрүүдэд тээврийн хэрэгслийн улсын дугаарын хязгаарлалт үйлчлэхгүй. Харин 2 дугаар сарын 23-ны Даваа гарагаас эхлэн авто тээврийн улсын дугаарын хязгаарлалтыг ердийнхөөрөө мөрдөнө гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Хоёр монгол хүний нэг нь идүүдэл жинтэй хэмээх статистик бий. Тийм ч учраас Эрүүл мэнд спортын яамны мэргэжилтэнүүд сар шинийн өмнөхөн хэвлэлийн хурал хийж нэг ширхэг буузны калориг тооцсон юм.Сар шинийн баярын гол зоогуудын илчлэгийг тооцвол дунд зэргийн бууз ойролцоогоор 200 хүртэл ккал буюу илчлэгтэй байхад нэг жижиг дийзтэй нийслэл салат 260 ккал, 50 грамм цагаан архи 115 ккал гэж байлдаг аж.

Монголчууд золголт хийж явахдаа өдөрт хамгийн багадаа гурван айлаар орж, айл болгонд 3-5 бууз, нэг таваг салат идэн гурван хундага сархад тогтооно гэвэл өдөртөө хамгийн багадаа 4000 ккалори илчлэгийг хоол хүнсээрээ авна гэсэн үг юм.

Гэтэл эрүүл мэндийн байгууллагын зөвлөмжөөр эрүүл чийрэг дундаж насны эрэгтэй хүний хоногт дунджаар авах илчлэгийн хэмжээ 2500ккал, эмэгтэй хүнийх 2000ккал байдаг.Дээр тооцсон илчлэгийн хэмжээг эрүүл мэндийн байгууллагын зөвлөмжтэй харьцуулбал хоёр дахин ихгарч байна. Үүнээс ч олон айлд орж, илүү их бууз, амттан зооглох хүн бишгүй бий. Тиймээс л цагаан сарын хэд хоногт жин нэмэгдэх нь бараг л үндэсний хэмжээний асуудал болж орхиод байна. Хоолондоо тогтсон стандарт барьдаг эрхмүүд бий.

Гадаад харилцааны сайд асан Л.Эрдэнэчулуун гэхэд л цагаан сараар нэг айлд таван минут зарцуулдаг агаад нэг айлд нэг л бууз иддэг нормтой гэж нэгэнтээярьж байсан юм. За тэгээдбуузны тооцоондоо эргэж оръё. 3500 калори болгон 420 гр өөх болж хувирдаг.Тэгэхээр биеийн жингээ тогтмол барихын тулд өдөрт хамгийн багадаа 250 калори илчлэг шатаах хэрэгтэй аж. Энэ нь дунджаар 30 минут алхсантай тэнцэхүйц хөдөлгөөн юм байна шүү.