6500 айлын “Буянт-Ухаа 2” хороолол ирэх 2016 он гэхэд ашиглалтад орохыг албаны хүн хэлж байна. Улмаар дэд бүтцийн асуудлыг давхар шийдвэрлэх шаардлага буй. Тиймээс уг хороолол чиглэлд үйлчлэх нийтийн тээврийн асуудлыг 2016 он гэхэд төлөвлөлтөд тусгаж өгнө үү гэх хүсэлтээ ТОСК-оос ийслэлийн засаг даргын тамгын газарт өгчихсөн байгаа ажээ.
Мөн уг хорооллын хүрээнд 1500 хүүхдийн хоёр ээлжээр хичээллэх хоёр сургууль, 240 хүүхдийн гурван цэцэрлэг, үйлчилгээний 12 төв, биеийн тамирын талбай, ногоон байгууламж, долоон давхар машины гарааш, кинотеатрын барилгыг ч барих аж.
Барилгын ажил одоо өвлийн улирал хэмээн зогсонги байгаа ч хавар гуравдугаар сарын дундуур гэхэд барилгын ажил үргэлжлэн хийгдэх ажээ.
Он гарсаар долларын ханш зогсолтгүй дээшилж байна. Арилжааны банкуудын зарж байгаа доларын ханш 1944-1948 төгрөгийн хооронд байгаа бол “Найман шарга” зах дээр 1945 төгрөг байна. Төсөвт долларын ханшийг 1800 төгрөгт барихаар суулгасан. Гэсэн хэдий ч гадаадын хөрөнгө оруулалт 845 сая доллар болтлоо зургаа дахин буурсан нь долларын ханш өсөх гол шалтгаан болсон байна. 
“Мобиком”, “Юнител” зэрэг ямар ч операторын дугаар барьдаг байсан өөр оператор руу шууд шилждэг болох гэж байна. Тухайлбал, 9904…. дугаартай бол үүнийгээ солихгүйгээр “Юнител”, эсвэл “Скайтел”, “Жи Мобайл” руу шилжиж болох юм. Энэ оны эхний улиралд багтаан уг үйлчилгээг нэвтрүүлэх тухай албаны хүн мэдээллээ. Энэ нь хэрэглэгчдийг хүндэтгэж, дугаарыг нь өөрийн өмч болгож байгаа хэрэг юм.
УИХ дахь Ардчилсан намын бүлгийн ээлжит хуралдаан өчигдөр боллоо. Энэ удаагийн хуралдаанаар А.Бакей гишүүний ахалсан Монгол Улсын 2015 оны төсвийн тухай хуульд нэмэлт, өөрчлөлт оруулах тухай хууль болон холбогдох хуулийн төслүүдийн талаар бүлгийн санал, дүгнэлт боловсруулах үүрэг бүхий ажлын хэсгийн мэдээллийг сонсч, хэд, хэдэн чухал шийдвэрт хүрсэн байна.
Өдрөөс өдөрт дэлхий ертөнц өөрчлөгдөж, үүнийг дагаад ч технологийн олон дэвшилттэй бүтээлүүд ар араасаа гарах болсон. Үүний нэг нь элсний хамгаалалттай спикер юм. Та урьд нь усны тоосны хамгаалалттай л гэж сонсож байснаас элсний хамгаалалт гэж сонсож байгаагүй байх.
Францын ерөнхийлөгч Франсуа Олланд Ойрхи Дорнод дахь “Исламын улс” бүлэглэлийн эсрэг тэмцэж буй цэргүүдийнхээ тоог нэмж, онгоц зөөвөрлөгч илгээх шийдвэр гаргасан билээ. Үүний дараа терроризмыг магтан дуулж буй хүмүүсийг хоморголон баривчлах ажлыг прокуроруудад даалгажээ. Парисын “Charlie Hebdo” сэтгүүл, супермакетад гарсан халдлагаар 17 хүн нас барсаны дараа Франц даяар 54 лалын шашинтныг терроризмыг дэмжсэн хэргээр баривчлаад байна. Баривчлагдсан хүмүүсийн дотор арьс өнгөөр ялгаварлан гадуурхалт болон Еврей нарын эсрэг үзлийг шүүмжилдэг алдартай шог зураачид байгаа юм. Тэдгээр хүмүүсийг террорист халдлагатай холбоотой байж болзошгүй хэмээн сэжиглэв. 
Казах охидын өмнөөс халх охин олимпийн их наадмын дэвжээнд зодоглохоор боллоо. Тодруулбал, Монголын жүдо бөхийн үндэсний шигшээ багийн тамирчин, олон улсын хэмжээний мастер Галбадрахын Отгонцэцэг 2016 оны Рио-гийн олимпод Казахстан улсын нэрийн өмнөөс дэлхийн шилдэг тамирчидтай хүч сорихоор болж байна. Тэрээр жүдо бөхийн 48 кг-ын жингийн Монголын эмэгтэй шилдэг тамирчдын нэг юм. Олон улсын зэрэглэл бүхий тэмцээнд түүний үзүүлсэн бахдам амжилтуудыг бид мэднэ. “Энэ даруухан охиноос ийм их дотоод хүч, эр зориг гарч буй нь гайхалтай. Дэвжээн дээр өөрийгөө бүрэн дайчилж, ямар ч шилдэг тамирчинтай ялна гэсэн сэтгэхүйгээр барилдаж буй нь өөрөө маш том ялалт юм” хэмээн түүний багш Монгол Улсын гавьяат тамирчин Хишигтийн Эрдэнэт-Од нэгэнтээ дуу алдсан байдаг. 
Бүх нийтийн боловсролыг дэмжих “Хөгжим” хөтөлбөрийн хүрээнд 2015 оны нэгдүгээр улиралд “Монгол уран бүтээл” хөгжмийн уран бүтээлийн төслийг санаачлан хэрэгжүүлж байгаа билээ. Төслийн эхний тоглолт болох Морин хуур чуулгын “Уран сэтгэмж” дан хөгжмийн бүтээлийн тоглолт өнөөдөр 19 цагт болно.Тоглолтод нэрт хөгжмийн зохиолчид болох Ц.Нацагдорж Б.Шарав З.Хангал Н.Жанцанноров нарын бүтээлүүд эгшиглэх юм байна.
Мэргэжлийн сумогийн 71 дэх их аварга Какүрюү М.Ананд сүйт бүсгүйгээ албан ёсоор танилцуулав. Тэрээр энэ сарын башё эхлэхээс хэдхэн хоногийн өмнө өөрийнхөө дэвжээнд сэтгүүлчдийг урин хэвлэлийн бага хурал хийсэн. Энэхүү хуралд дэвжээний багш болон сүйт бүсгүйнхээ хамт оролцжээ. Их аваргын сонгосон бүсгүйг Дашнямын Мөнхзаяа гэдэг, 23 настай. Японд очоод хоёр жил болж буй бөгөөд Токио хот дахь япон хэлний сургуулийн хоёрдугаар курсын оюутан гэнэ. Тэд өнгөрсөн жил Риогоку дүүрэг дэх “Улаанбаатар” нэртэй монгол хоолны газар танилцжээ. Танилцсан цагаасаа хойш утсаар ярин байнга холбоотой байсан гэнэ. Харин М.Анандыг гуравдугаар сарын башёд түрүүлсний дараа буюу их аварга цолтой болсноос хойш болзож эхэлжээ. Удалгүй бие биедээ хайртай болсноор нэг гэрт хамт амьдрах болсон байна. 
Шинэ үндсэн хууль батлагдсаны 23 жилийн ойн өдөрт зориулан бөхчүүдийн дунд зохиогддог уламжлалт шатрын тэмцээн болж өндөрлөжээ. Тэмцээнд улсын заан Д.Мягмар, Д.Лхагвасүрэн, улсын начин Х.Амараа, МҮБХ-ны дэд тэргүүн Д.Данзан нарын улс, аймгийн цолтой бөхчүүд, жаяг дэгийн багийнхан, гарын даа нар, бөхийн сэтгүүлчид гэсэн зургаан багаас бүрдсэн 24 шатарчин тойргоор өрсөлдсөн байна. Сэтгүүлчдийн болон аймаг, цэргийн цолтнуудын багийн оноо тэнцсэн ч хоорондох хожлоороо сэтгүүлчдийн баг тэргүүн байр эзэлж аймаг, цэргийн цолтнуудын баг удаалжээ.