Month: January 2015

Аутизмын хүрээний эмгэгтэй хүүхдүүдэд эмчилгээний сургалт, засал явуулах, эцэг, эхчүүдийг чадавхжуулах зорилготой “Анд хүүхдүүд” ТББ-аас санаачлан “Зөвлөх ээж” бэлтгэх төсөл хэрэгжүүлэхээр болсон билээ. Энэхүү төслийн хүрээнд 20 хүүхдэд үнэ төлбөргүй үзлэг хийж, зөвлөгөө өгөхөөр болсон байна.

Энэхүү үзлэгийг Тайвань улсын терапист Wei-ping Chen хийж, хүүхэдтэйгээ хэрхэн ажиллах талаар эцэг эхчүүдэд зөвлөгөө өгөх аж. Энэхүү үзлэгт аутизмын хүрээний эмгэгтэй байж болзошгүй хүүхдийг хамруулна. Тухайн хүүхэд өмнө нь тус байгууллагаас явуулсан гурван удаагийн үзлэг оношилгоонд хамрагдаагүй байх шаардлагатай гэж холбогдох эх сурвалж мэдээлэв.

Тус үзлэгт хамрагдахыг хүсвэл хүүхдийнхээ овог, нэр, төрсөн он, сар, өдөр, регистрийн дугаар болон аутизмтай байх магадлалтай гэж үзсэн шалтгаанаа товч бичин psychologist@autismmongolia.mn хаягаар явуулах хэрэгтэй юм байна.

Өнөөдөр Шударга өрсөлдөөн хэрэглэгчийн төлөө газрын дарга Т.Аюурсайхан сэтгүүлчдэд цаашид хийх ажлынхаа талаар мэдээлэл өгч ярилцлаа. Тэрбээр юуны өмнө Шударга өрсөлдөөн хэрэглэгчийн төлөө газрын өмнө нь хийж байсан ажлуудыг үргэлжлүүлнэ гэдгээ хэлсэн юм. Мөн Үнэ тогтворжуулах хөтөлбөрт хамрагдсан аж ахуйн нэгжүүд хөнгөлөлттэй зээлээ зориулалтын дагуу ашигласан эсэхийг шалгана гэдгээ мэдэгдлээ.

Сүхбаатар аймгийн Баяндэлгэр сум энэ жил түүхт 90 жилийн ойгоо тэмдэглэнэ. Ойн хүрээнд сумын иргэдийн хүсэлтээр “Адуучин” нэвтрүүлэг хийхээр болжээ. Энэхүү нэвтрүүлгийн зураг авалтын үеэр “Морьтон Монгол” парад болно. Жагсаалд оролцож буй иргэд үндэсний хувцасаараа гоёж, зураг авах “Арын ихэр” хэмэх газарт тухайн өдөр тээврийн аливаа хэрэгслийг явахыг түр хугацаагаар хориглосон байна.

Увс, Сүхбаатар, Дорнод, Баян-Өлгий аймгийн Хилийн отрядын хариуцсан хэсгээр 483 тооны адуу, 122 тооны үхэр бэлчээрээр улсын хил давсныг хилчид тогтоож эздэд нь хүлээлгэж өгчээ. Тиймээс хилийн ойр орчимд нутагладаг айлууд малаа байнгын хариулга маллагаатай байлгахыг Хил хамгаалах ерөнхий газраас анхаарууллаа. Дэлгэрэнгүйг хүргэж байна.

Аж үйлдвэрийн талаар төрөөс баримтлах бодлогын баримт бичигт салбар бүрийн асуудлыг шинжлэх ухааны үндэслэлд тулгуурлан тусгах зорилгоор Аж үйлдвэрийн сайд Д.Эрдэнэбат өчигдөр эрдэмтэн судлаачидтай уулзлаа. Өмнө нь ийм уулзалтыг мэргэжлийн салбарын холбоодын гишүүдтэй хийж байсан юм.

Салбарын сайдын онцолсноор Аж үйлдвэрийн салбарт баримтлах төрийн бодлогын баримт бичиг үндсэндээ боловсруулагдаж, ирэх долоо хоногийн Засгийн газрын хуралдаанаар хэлэлцүүлэх шатандаа оржээ. Бодлогод нэгдүгээрт, Аж үйлдвэрийн салбар нь төр-шинжлэх ухаан, хувийн хэвшилд түшиглэсэн экспортын чиг баримжаатай, өндөр технологи, өрсөлдөх чадвар бүхий үйлдвэрлэл, үйлчилгээг хөгжүүлэх Монгол Улсын тэргүүлэх салбар чиглэл байна гэж тодорхойлсон аж. Ингэхдээ дотоодын үйлдвэрлэлийг түлхүү хөгжүүлэх бодлого тусч, түүнийг хөгжүүлэхэд худалдааны зохицуулалт шаардлагатай хэмээн үзжээ. Бодлогод үйлдвэрлэлийг гурван үе шаттай хөгжүүлэхээр тусгасан юм байна. Тодруулбал, 2015-2020 он, 2020-2025 он, 2025-2030 он гэж тодорхойлжээ.

Мөн өнгөрсөн хугацаанд хүнд үйлдвэрлэлийн салбарыг хөгжүүлэх тухай олонтаа ярьсан ч бэрхшээлтэй тулж ирсэн нь яаж ажлыг эхлүүлэх вэ гэдэг нь тодорхойгүй байсантай холбоотой гэнэ. Нөгөө талдаа геофолитик, эдийн засгийн гаргалгааг зөв гаргаж өгөх нь хамгийн чухал тул эрдэмтэн, судлаачдын зөвлөгөө чухал байна гэдгийг энэ үеэр сайд Д.Эрдэнэбат онцлов.

Эрдэмтэн судлаачид “Аж үйлдвэрийн бодлого нь бие даасан хэлбэрээр төрийн бодлого болж батлагдаж байгаагүй, үндсэндээ шоовдорлогдсон байсан. Бие даасан яам байгуулагдсанаар бодлоготой болж, дунд, урт хугацаанд хийгдэх ажлууд тодорхой болсноор их өөрчлөлт, шинэчлэлт хийгдэнэ. Бодлогын баримт бичигтэй танилцахад дүн нуруу нь сайн гарсан байна. Бодлогод аж үйлдвэрийн салбараа сайн дэмжихээр тусгасан шигээ хамгаалах бодлого мөн цуг тусах ёстой. Ингэхдээ одоо байгаа үйлдвэр, шинээр байгуулагдах үйлдвэрүүд нь дотоодын хэрэгцээний хэдэн хувийг хангах боломжтой вэ гэдгийг илүү нарийвчлах. Аж үйлдвэрийн хөгжил, технологийн хөгжил хоёрыг хамтад нь авч үзэх. Шууд хамааралтай асуудлыг салангид авч үздэг байснаас олон төсөл хэрэгжих шатандаа мухардалд орж байсныг сануулав. Тухайлбал, Дулааны цахилгаан станцыг түшиглэн хагас коксжсон түлшний үйлдвэртэй болно гэж төрөөс тэрбумаар нь хөрөнгө хаясан. Гэтэл төсөл хэрэгжүүлэгч нэгж нь үйлдвэрлэлд нэвтрээгүй технологийг ашиглан үйлдвэр байгуулах гэснээс энэ бүхэн бэрхшээлтэй тулж, эргээд мөнгө угаах хэрэгсэл болон хувирч болзошгүй зүйл рүү орж байгаа тул үүнд анхаарах.

Нөгөө талдаа боловсон хүчнийг бэлтгэхэд Боловсрол, соёл, шинжлэх ухааны яамтай хамтран ажиллах. Чадвартай мэргэжлийн боловсон хүчинтэй байж аж үйлдвэрийн салбар хөгжинө. Өнөөдөр аж үйлдвэрийн салбарт ажиллах боловсон хүчин байхгүй гэж хэлэхэд хилсдэхгүй болсон юм байна. Тиймээс бодлогоор хүний нөөцөө бэлтгэхэд анхаарч энэ асуудлыг Аж үйлдвэрийн талаар төрөөс баримтлах бодлогод тусгах. Нэгдсэн судалгааны төвтэй болох. Ой модны үйлдвэрлэлийг хөгжүүлэхэд анхаарах. Энэ хүрээнд ойн хоёрдогч түүхий эдийг боловсруулдаг болох зэрэг олон чухал саналыг дэвшүүлсэн юм.

Салбарын сайд Д.Эрдэнэбат “Аж үйлдвэрийн салбарыг хөгжүүлэхэд хамгийн түшиг тулгуур нь болох ёстой хүмүүс нь эрдэмтэн судлаачид та бүхэн. Бодлогын баримт бичигт та бүхний санал туссанаар үндсэндээ Засгийн газрын хуралдаанаар хэлэлцэгдэж, УИХ-д өргөн баригдах боломжтой болно” гэж уулзалтын төгсгөлд онцлон хэлэв.

Баруун гурван аймгийн усны эрчим хүчний нөөц бололцоог тодорхойлох, цаашид ашиглах чиглэлээр Бүгд Найрамдах Турк Улсын “ZTM”компани өөрийн хөрөнгө оруулалтаар Баян-Өлгий аймгийн Ногооннуур сумын нутаг дэвсгэрт “Тавалтайн хавцал” хэмээх газар усан цахилгаан станц барих ТЭЗҮ боловсруулаад байна. Энэхүү ТЭЗҮ-ээр Туркын тал дэвшилтэд технологи ашиглан 88,7 МВт хүчин чадалтай УЦС-ын байгуулах боломжтой гэж үзжээ.

Эрчим хүчний яамны Төрийн нарийн бичгийн дарга Д.Дэлгэрцогт “ZTM” тускомпаний төслийн зохицуулагч профессор Тургут Озтас болон албаны хүмүүсийг хүлээн авч уулзан, УЦС-ын ТЭЗҮ-тэй танилцлаа. Түүнчлэн “ZTM”компани нь Баян-Өлгийн аймгийн Ховд гол дээр УЦС байгуулах ажлыг Монгол Улсын Концессын тухай хуулийн дагуу “барих ашиглах шилжүүлэх” нөхцөлтэй гүйцэтгэх сонирхолтой байгаагаа уулзалтын үеэр хүссэн бөгөөд Баруун бүсийн усны эрчим хүчний мастер төлөвлөгөө боловсруулах ажлыг компаний хөрөнгө оруулалтаар гүйцэтгэж байгаагаа танилцууллаа.

Гэрэл зурагчин Б.Анхбаяр, Ө.Баттайван нар хамтран Монголын утга зохиолын салбарын төлөөлөгчдийн хөрөг зургийг “12” гэрэл зургийн үзэсгэлэнгээ “Blue Moon” арт галерейн үзэсгэлэнгийн танхимд нэдүгээр сарын 22-25-ны хооронд толилуулах гэж байна. Үзэсгэлэнд утга зохиолын салбарын төлөөлөл болгож 17 зохиолч, яруу найрагчийн хөрөг зургийг буулгаж олноо танилцуулах гэж байна. “12” төсөл нь Монголын шинжлэх ухаан, утга зохиол, урлаг, уран зураг, хөгжим бүжиг гэх мэт аливаа улсын оюуны болон соёлын салбарыг авч явдаг эрдэмтэн мэргэд, зохиолчид, судлаачид, яруу найрагчид соёлын зүтгэлтнүүдийн хөрөг зургийг буулгаж ард түмэндээ дэлгэн үзүүлж, Монголынхоо ирээдүй хойч болсон үр хүүхдүүддээ таниулах зорилготой төсөл юм. Мөн эдгээр зохиолчдын хөрөг зургуудыг аймаг, орон нутгийн сургуулиудын утга зохиолын тэнхимд дурсгал болон үлдээх ажээ.

Багануур дүүрэгт хот байгуулах асуудлаар иргэдийн санал авах ажиллагаа 2 дахь өдрөө үргэлжилж байна. Өнөөдөр 07 цагаас эхэлсэн санал асуулга 20 цагт дуусч, дүн мэдээгээ нэгтгэнэ. Эхний өдрийн /01.21/ 20 цагийн байдлаар ирцийн мэдээ нэрсийн жагсаалтад бичигдсэн 16251 иргэнээс 34,99 хувь буюу 5689 иргэн санал өгсөн юм гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Сүүлийн үед цаг агаар дулаарсантай холбогдуулан түлээ нүүрсний үнэ буужээ. Тухайлбал, нийслэлийн дүүргүүдэд байрлах Түргэн үйлчилгээний цэгүүдэд нэг жижиг шуудай мод 2000-2500, нүүрс дундажаар 3500 төгрөг болж хямдарчээ. Мөн өндөрлөгөөгүй портер машин налайхын нүүрс 200-250 мянган төгрөгний үнэтэй байсан юм. Харин өдгөө 120-140 мянган төгрөг болгон үнээ бууруулсан байна. Нүүрсний үнэ цаашдаа тогтвортой байна гэдгийг худалдагчид онцолж байсан.