Month: October 2014

Эбола цусархаг халууралт халдварт өвчин 2013 оны сүүлээр Баруун Африкийн Сьерра-Леон, Либери, Нигери, Гвиней улсад дэгдэж, одоогийн байдпаар АНУ, Испани, Сенегал Улсад бүртгэгдээд байгаа билээ.

Иргэний харьяалал, шилжилт хөдөлгөөний ерөнхий газар тус өвчний тархалт өндөр байгаа бүс нутгийн иргэдэд тодорхойгүй хугацаагаар хувийн урилга, виз олгохгүй байгаа болно.
Манай байгууллага улсын хилээр зорчигч, тээврийн хэрэгслийг шалган, нэвтрүүлэх чиг үүргийнхээ хүрээнд иргэд эбола цусархаг халууралт халдварт өвчин бүртгэгдсэн бүс нутаг, улсад зорчихоос зайлсхийж, холбогдох улсын иргэдийг урихгүй байхыг зөвлөж байна.

Иргэний харьяалал, шилжилт хөдөлгөөний ерөнхий газар

Засгийн газрын эдийн засгийг эрчимжүүлэх 100 хоногийн хүрээнд Монгол Улсын Шадар сайдын “Жагсаалт батлах тухай” 2014 оны 60 дугаар тушаалаар “Хилийн мэргэжлийн хяналтад хамрагдах импортын барааны жагсаалт”-ыг баталсан.

Уг тушаалын дагуу нийт 5744 ангиллын бараанд хяналт хийж байсан хуучин эрх зүйн орчинг шинэчлэн, эрсдэл багатай 3550 ангиллын барааг хилийн мэргэжлийн хяналтаас чөлөөлж гадаад худалдааг хөнгөвчлөх эрх зүйн орчинг бүрдүүлж, импортын хяналтын үйл ажиллагаанд ашиглаж эхлээд байгаа билээ.

Импортлогчид “Хилийн мэргэжлийн хяналтад хамрагдах импортын барааны жагсаалт” -д ороогүй бараа импортлох тохиолдолд хилийн мэргэжлийн хяналтын байгууллага хяналт шалгалт хийхгүй бөгөөд хуульд заасны дагуу импортлогч нь хүн, мал, амьтан, ургамал, байгаль орчинд сөрөг нөлөө үзүүлэх, болзошгүй эрсдэлээс урьдчилан сэргийлэх, гарсан хор уршгийг арилгах үүрэгтэй юм.

Шүүхийн Ерөнхий зөвлөлөөс өнөөдөр нөлөөллийн мэдүүлгийн асуудлаар мэдээлэл хийлээ. Одоогийн байдлаар Шүүхийн ерөнхий зөвлөлд шүүгч, шүүх бүрэлдэхүүнээс нийт есөн нөлөөллийн мэдүүлэг хөтөлж ирүүлсэн байна. Нийт ирсэн нөлөөллийн мэдүүлгийн 56 хувь нь дарамтлах заналхийлэх, 22 хувь нь гүтгэх доромжлох, 11 хувь нь шийдвэрийг урьдчилан хэлэлцэхийг санал болгох, 11 хувь нь нөхцөл байдлыг тайлбарлах зэргээр шүүгчийн шийдвэрт нөлөөлөхийг завдсан байна. Үүнээс холбогдох хууль тогтоомжийн дагуу дээрх мэдүүлгэд ажиллагаа хийж таван хэргийг эрх бүхий байгууллагад шилжүүлснэс хоёр хэргийг шийдвэрлэж, торгуулийн арга хэмжээ оногдуулса бол хоёр хэргийг хэрэгсэхгүй болгож, нэг хэргийг нэмэлт мөрдөн байцаалтад буцаажээ. Харин үлдсэн дөрвөн хэрэгт ажиллагаа хийж байгаа талаар мэдээллээ. Шүүгчид нөлөөлөхийг завдсан нь тогтоогдвол иргэнийг хөдөлмөрийн хөлсний доод хэмжээг 10 дахин нэмэгдүүлсэнтэй тэмцэх хэмжээний төгрөгөөр торгох, гадаадын иргэнийг Монгол Улсаас албадан гаргах, албан тушаалтныг ажлаас нь чөлөөлөх, улс төрийн нам, төрийн болон төрийн бус байгууллага, хуулийн этгээдийг нэг сарын хөдөлмөрийн хөлсний доод хэмжээг арав дахин нэмэгдүүлсэнтэй тэнцэх хэмжээний төгрөгөөр торгох эсвэл уг байгууллагыг албадан татан буулгах, 30 хүртэлх хоног баривчлах зэргээр арга хэмжээ авах юм байна. Шүүхийн ерөнхий зөвлөлд ирсэн дээрх есөн хэргийн олонх нь иргэний хэргүүд бөгөөд шүүгчийг гүтгэх, доромжлох, заналхийлэх байдлаар нөлөөлөхийг завджээ.

Харин шүүгч алдаатай буруу шийдвэр гаргасан тохиолдолд иргэд Шүүгчийн ёс зүйн хороонд хандах эрхтэй. Тус хороонд шүүгчтэй холбоотой 100 гаруй өргөдөл, гомдол иржээ. Өнөөдрийн байдлаар Монгол Улсын хэмжээнд 439 шүүгч ажиллаж байна.

Нийслэлийн 375 жилийн ойд зориулан “Нийслэлийн өдөр”-өөр буюу 10 сарын 29-ний өдөр Их эзэн Чингис хааны талбайд “Их хотын хямдрал 375” өдөрлөгийг 2 дахь жилдээ зохион байгуулах гэж байна. Тус үйл ажиллагааны талаар Улаанбаатар хотын Захирагчийн ажлын албаны Хүнс худалдаа үйлчилгээний хэлтсийн дарга О.Нарантуяа болон хямдралтай худалдаанд оролцож буй аж ахуйн нэгжийн төлөөллүүд сэтгүүлчдэд мэдээлэл өглөө.

Нийслэлийн ЗДТГ, Улаанбаатар хотын Захирагчийн ажлын албатай хамтран 2 дахь жилдээ зохион байгуулж буй “Их хотын хямдрал 375” өдөрлөгт үндэсний томоохон үйлдвэрлэгч, худалдаа үйлчилгээ эрхлэгч 100 гаруй аж ахуй нэгжүүд оролцож, 20-50 хувийн хямдралтай, урамшуулалтай, бэлэгтэй худалдаа явуулна. Тухайлбал:

“Дархан нэхий” ХК -50 хувь, “Буян” ХХК өөрийн үйлвэрийн 100 нэр төрлийн барааг -50 хувь, “BEST SHOES” ХХК -50 хувь, “Эксклюзив” ХХК бүх бараандаа -50 хувь, “Саян-Уул” ХХК мах махан бүтээгдэхүүндээ 20 хувь, “Талх чихэр”, “Өгөөж чихэр боов”, Транс трейд”, “Мах-Импекс”, “Очир дагинас”, “MCS кока кола” ХХК, “Миш маш” ХХК, “Тесо” корпораци, “Сүү”, “Алтантариа” ХХК, “НВЦ” ХХК-иуд Нийслэлийнхээ төрсөн өдрийн баяраар иргэддээ хямдрал, бэлэгтэй худалдаагаар үйлчлэх юм. Мөн өөрийн байрандаа Боса худалдааны төв 50 хувь, Үсчин,гоо сайхны газрууд хямдралтай тарифаар иргэдэд үйлчилнэ.

Энэхүү хямдрхалтай худалдааг нийслэлийн төв талбайгаас гадна дүүрэг бүрд зохион байгуулах юм.

-Хан-Уул дүүргийн 5 дугаар хороо “Яармаг” худалдааны төвийн гадна талбайд
– Сүхбаатар дүүргийн 4 дүгээр хороо Цэрэндоржийн гудамж
-Сонгинохайрхан дүүргийн 14 дүгээр хороо “Цамбагарав” худалдааны төвийн гадна талбайд
– Баянгол дүүргийн 15 дугаар хороо Энэбишийн өргөн чөлөө Байгаль эх цогцолборын гадна талбайд, 19 дүгээр хороо Ард Аюушийн гудамж “Смарт” худалдааны төвийн гадна талбайд
– Чингэлтэй дүүрэг 5 дугаар хороо Тусгаар тогтнолын талбайд, Баянзүрх дүүрэг 4 дүгээр хороо Жуковын нэрэмжит талбайд тус тус болох юм.

Хямдралтай худалдаа Их эзэн Чингисийн талбайд 11 цагаас иргэдэд үйлчилж эхлэх бол 13:30 цагаас худалдааны цан цохиж албан ёсоор эхэлнэ. Энэ үеэр “НВЦ” ХХК 5 метр диаметртэй хамгийн том Омлет хийж, залуу тахианы тэжээллэг өндөгөө 180 төгрөгөөр худалдаалах бол Арьс ширний холбооноос Нийслэлийн ойг тохиолдуулан 375 хос арьсан бээлийг 50 хувийн хямдралтай борлуулах зэрэг олон бэлэг иргэддээ барихаар төлөвлөж байна. Харин аж ахуйн нэгжүүдийн хямдралтай худалдаж буй хүнсний бараа бүтээгдэхүүний чанар, аюулгүй байдалд мэргэжлийн байгууллагынхан хяналт тавьж ажиллана. Хямдралтай худалдааг дэмжин ажиллаж, идэвхтэй оролцож буй аж ахуй нэгжүүдийн төлөөлөл “Эдийн засгийн хямралтай байгаа энэ үед түрээсийн мөнгө төлөхгүйгээр иргэддээ үйлчлэх боломж олгож байгаа зохион байгуулагчдад талархал илэрхийлээд, өргөн сонголттой бараа бүтээгдэхүүнүүдээ хямдралтай худалдаална” гэдгийг онцлон хэллээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.