УИХ-ын чуулганы үдээс хойших хуралдаанаар 2015 оны нэгдсэн төсвийн төслийг үргэлжлүүлэн хэлэлцсээр байна. Орон нутагт шилжүүлж буй хөрөнгө оруулалт, зардалтай холбоотойгоор шүүмж өрнөсөөр байсан бөгөөд нэгдсэн төсвийн бодлогыг задлаж байна гэсэн. Үүнд Ерөнхий сайд Н.Алтанхуяг “Нэгдсэн төсвийг задлаагүй. 800 тэрбумийн 200 тэрбумыг л орон нутагт шилжүүлж байгаа гэдгийг сайн ойлгох хэрэгтэй” хэмээн тайлбарласан юм.
Хуралдааны үеэр Д.Сумъяабазар гишүүн “Улс орны нийгэм эдийн засгийн байдал үнэхээр хүнд байна. Ард иргэдтэй уулзаж, барааны зах, нийтийн тээврээр явж байхад эдийн засгийн байдал уруудан доройтож буй тухай л ярьцгааж байна. Борлуулагч нар дор хаяж тав дахин буурчихаад байгаа тухай хэлж байна. Гэтэл энд бид төсвийг нь хамгаалсан аргацаасан байдлаар л батлах гэж байна” гэсэн бол Ё.Отгонбаяр гишүүн “Төсвийн орлого чинь босоо, зарлага чинь хэвтээ байна гэдгийг хүмүүс хэлээд байна шүү дээ. Салбарын нэгдсэн бодлого алдагдана шүү. Зарим нь боловсролдоо анхаарна, зарим нь эрүүл мэнддээ анхаарна. Улсын нэгдсэн бодлого алдагдаж болзошгүй шүү. Ямар заяа муутай нь сайдын багцад багтаад, ямар заяагүй нь тэр орон нутгийн багцад нь ордог юм” гэв.
Шүүмжлэлийг хүлээн зөвшөөрөхгүй байгаагаа ерөнхий сайд Н.Алтанхуяг илэрхийлэн “эрх мэдлийг орон нутагт өгнө гэдэг нь хариуцлагагүйгээр үлдээнэ гэсэн үг биш. Мэдээж шинэ зүйлээс болгоомжлох сэтгэлгээ байгааг ойлгож байна. Би тал еэвэнгийн тухай яриагүй. Тэр чинь кинон дээр л гардаг байх. Жишээ нь өмнө Боловсролын яам чинь барилгын боловсролын яам болсныг бид засч барилга барих асуудлыг барилгынх нь яам нь хариуцаг гэсэн шүү дээ. Байшин савтайгаа бодлогоо холиод байна. Та бид хоёр хамтдаа сууж хийсэн нэг буруу зүйлийг урхаг нь одоо ч гараагүй байна. Цэцэрлэгт гарч буй зардал дээр гэхэд 100 хүүхдийн хоолны мөнгөний 50 хувийг эцэг эх нь даадаг байсан. Гэтэл одоо бүгдэнгийнх нь 100 хувийг төр даадаг. Ингэхээр мөнгө алга болохгүй яадаг юм. Булган аймгийн нэг сургуулийн зардлыг энд УИХ дээр шийдэх хэрэг байхгүй, тэндээ өөрсдөө шийдэж яагаад болохгүй байгаа юм” гэсэн юм.
Мөн хэлэлцүүлгийн үеэр УИХ-ын гишүүн Ё.Отгонбаяр БШУ-ны сайд Л.Гантөмөрт хандан “Хувийн сургууль цэцэрлэгт урсгал зардлын мөнгө өгдөггүй болсон юм уу. Үндсэн хуулинд суурь боловсролыг үнэгүй олгоно гээд заачихсан байгаа. Цэцэрлэг, сургууль хүрэлцэхгүй байгаа үед энэ бол буруу шийдвэр шүү” гэв. Хариуд нь Л.Гантөмөр сайд “Хувийн сургууль, цэцэрлэгт урсгал зардал олгохгүй гэсэн ойлголт огт байхгүй шүү. Хүмүүс буруу мэдээлэл авах вий. Ирэх жил 82 цэцэрлэг ашиглалтад орно. Тэдний урсгал зардлыг тооцож төсөвт оруулсан. Энэ дунд хэд хэдэн хувийн цэцэрлэг байгаа” гэсэн юм.
БШУЯ-аас сургууль цэцэрлэгийн хүртээмжийг сайжруулах үүднээс олон хөтөлбөр хэрэгжүүлж байгаа тухай бид өмнө нь мэдээлж байсан. Боловсролын салбарт өнгөрсөн нэг жилийн хугацаанд сургууль, цэцэрлэг, спорт заалны 102 барилга шинээр ашиглалтад оруулсан байна. Мөн дан ганц байшин барихаас гадна хувийн цэцэрлэгүүдийн сул орыг гүйцэд ашиглах талаар тодорхой ажил эхлүүлээд байгаа юм байна. Өөрөөр хэлбэл цэцэрлэггүй үлдээд байгаа хүүхдүүдийг хувийн цэцэрлэгт бага зардлаар сургах боломжийг судалж байгаа аж..
Монгол Улсын нэрийн хуудас, монголчуудын бахархал болсон “Морин хуур” чуулгыг үүсгэн байгуулагч, уран сайхны удирдаач, ардын жүжигчин Ц.Батчулууны гадаадад элэг шилжүүлэх эмчилгээний зардлыг бүрдүүлэх “Эгшгэн өргөл” аян өрнөж байна. Энэхүү аяны хүрээнд энэ сарын 20, 21, 22-ны өдрүүдэд Соёлын төв өргөөнд “Эгшгэн өргөл” хандивын тоглолт болох юм.
Оросын нэрт хөгжмийн зохиолч М.И.Глиникийн нэрэмжит олон улсын дуурийн дуулаачдын уралдаанд түрүүлж амжилт гаргаж байсан Улсын Филармонийн дуучин, Гавьяат жүжигчин Г.Ариунбаатар дахин олон улсын дуурийн наадмын тэргүүн байрыг эзэлсэн баяртай мэдээг дуулгалаа. Тэрбээр энэ удаад ЗХУ-ын Ардын жүжигчин, дэлхийн нэрт дуучин Муслим Магомаевын нэрэмжит олон улсын дуурийн дуучдын 3-р уралдаанд амжилттай оролцон тэргүүн байрыг эзэллээ.
Улсын дуурь бүжгийн эрдмийн театрын уран бүтээлчдийг “Большой” театрт тоглохыг урьжээ. Дэлхийн томоохон театруудын нэг болох эл театрт Дуурийн театрын уран бүтээлчдийг урьсан нь монголын сонгодог урлагийн чансааг тодорхойллоо.
Баруун Африкаас гаралтай Эбола вирус нь Гвиней, Либери, Сьерра-Леон, Нигер, Сенегал, Испани, АНУ, Бүгд Найрамдах Ардчилсан Конго зэрэг улсуудад тархсанаар нийт 9284 тохиолдол бүртгэгдэж 4604 хүн тус өвчнөөр нас бараад байна.
Монгол Улсын Филармоноос бүх нийтийн боловсролыг дэмжих “Хөгжим” хөтөлбөр хэрэгжүүлж эхэллээ. Энэхүү хөтөлбөр нь 43 дахь жилийн үзвэрийн хүрээнд хйигдэж байгаагараа онцлог юм. Тус хөтөлбөр нь нийгмийг бүхэлд хамаран, дунд сургуулийн хөгжмийн хичээлд хүртэл нөлөөлөл үзүүлэх бөгөөд газар тариалан, уул уурхай, малчдын хотонд хүртэл хүрч хэрэгжих зохилт тавьжээ.
Орчин үеийн мэргэжлийн урлагийн ууган байгууллага Улсын Драмын Эрдмийн Театрын ерөнхий найруулагч төрийн соёрхолт Н.Наранбаатарын санаачлагаар 2014 оны 4 сараас долоон өөр ертөнц долоон өөр найруулагч уриатай “Бэсрэг жүжгийн” төслийг хэрэгжүүлж эхлэсэн нь өдгөө амжилттай хэрэгжиж 6-н бэсрэг жүжгийг өөрийн тайзнаа амьлуулаад байгаа бөгөөд төслийн хамгийн сүүлийн жүжиг болох Найруулагч Э.Ёндоншаравын найруулга “Буруугүй Буруутан” уянгын драмын жүжиг 2014 оны 10 сарын 24-ны баасан гарагт нээлтээ хийх гэж байна.
АНУ-ын Төрийн нарийн бичгийн дарга асан Хиллари Клинтон Конгрессын сонгуулийн өмнөхөн намдаа санхүүгийн дэмжлэг үзүүллээ. Тэрээр өөртэй нь цуг хооллох хүсэлтэй хүмүүсийг Брентвуд хотын “Tavern” зоогийн газар цуглуулжээ. Ингэхдээ 32400 ам.долларын тасалбар зарсан байна. Экс Төрийн нарийн бичгийн даргатай цуг хоолох тасалбарыг авсан хүмүүс нь Ардчилсан намын “Crassroots Victory Project” хороонд доод тал нь 211 мянган ам.доллар хандив өргөх ёстой байжээ. Нийт 60 хүн тасалбар худалдан авч Хиллари Клинтон уг арга хэмжээгээр Ардчилсан намд 2.1 сая ам.долларын хандив өргөсөн байна.
Японы Засгийн газрын тэргүүн Шинзо Абэ нь Хууль зүй, Эдийн засаг болон үйлдвэрлэлийн яамны сайдуудыг шинээр томиллоо. Японы Либераль-Ардчилсан намын гишүүн, Сангийн яаманд олон жил ажилласан Еити Миядзаваг Эдийн засаг болон үйлдвэрийн яамны сайдаар томиллоо. Харин Хууль зүйн яамыг Еко Камикава тэргүүлэхээр болов. Шинэ сайдуудаг уг албанд томилохыг тус улсын эзэн хаан Акихито зөвшөөрч байгаа өнөөдөр мэдэгдлээ.