Month: September 2014

Манай оронд 1990-ээд оны эхэн хүртэл хууль бус мод бэлтгэл байгаль орчны
эсрэг хэргийн 10 хувийг л эзэлж байсан бол одоо хууль бусаар ашигт
малтмал олборлох, мод бэлтгэх үйлдэл экологийн гэмт хэргийн 1, 2 дугаар
байрт нэрлэгдэж байна. Улс дамнасан энэ төрлийн гэмт хэргийн улмаас
дэлхийн хэмжээнд жилд 10 тэрбум ам.долларын хохирол учирдаг тул
экосистемийг зохицуулагч түлхүүр болох ойн нөөцийг хамгаалах, нөхөн
сэргээхэд бүх улс орон онцгойлон анхаарч байна.

МонголУлс 2012 онд байгаль орчны хуулиа багцаар нь шинэчилсэн. Зах
зээлийн өнөөгийн нөхцөлтэй уялдуулсан шинэ зохицуулалтын үр дүнд орон
нутагт ойн ангийн бүтэц ажиллаж эхэлсэн ч хууль бус мод бэлтгэлтэй
холбоотой нэмэлт зохицуулалт шаардлагатай байна гэж салбар хариуцсан яам
үзжээ. Энэ асуудлыг зохицуулахаар БОНХЯ-наас боловсруулсан Ойн тухай
хуульд нэмэлт, өөрчлөлт оруулах тухай хуулийн төслийн үзэл баримтлалыг
Засгийн газрын өнөөдрийн хуралдаанаар хэлэлцээд, дэмжлээ.

Одоогийн тогтолцоогоор манайд Байгаль орчны эсрэг хэрэг зөрчилд
шинжээчийн дүгнэлт гаргах, байгаль орчинд учирсан хохирлын хэмжээг
тогтоох мэргэжлийн шинжээч, лаборатори болон тусгайлсан нэгж байхгүй.
Иймд байгаль орчны мэргэжлийн байгууллагатай гэрээ байгуулан тодорхой
хэмжээний төлбөр төлж хохирлын хэмжээг тогтоолгох, шинжээчийн дүгнэлт
гаргуулдаг болохоор хуулийн төсөлд тусгажээ. Түүнчлэн, олон нийтийг
идэвхтэй оролцуулсан хяналтын тогтолцоо бий болгох, урамшуулах,
урамшуулал олгох санхүүжилтийн эх үүсвэрийг нарийвчлан тодорхойлжээ. 

Энэ үзэл баримтлалын дагуу УИХ-аас Ойн тухай хуульд нэмэлт, өөрчлөлт
оруулж баталбал төр, иргэн, хувийн хэвшлийн байгууллага хоорондын хамтын
ажиллагаа эрс сайжирч, хэрэг зөрчил гаргагчдад хүлээлгэх хариуцлага
дээшилж, эцсийн дүндээ хууль бус мод бэлтгэл дорвитой буурна гэж тооцож
байна.

Ганц худаг буюу Хорих 461 дүгээр ангиас өчигдөр хоёр хоригдол оргожээ.

Эх сурвалжийн мэдээлснээр хоригдлуудын нэг нь хүн амины ноцтой гэмт хэрэг үйлдэн ялаа эдэлж байсан аж.

Тэд өчигдөр орой харуул хамгаалалт буух үеийг тааруулан ийнхүү оргосон байна.

Энэ талаар Шүүхийн шийдвэр гүйцэтгэх ерөнхий газрын хэвлэл мэдээллийн
албанаас тодруулахад, “Бидэнд энэ мэдээ ирсэн. Гэхдээ дэлгэрэнгүй
мэдээлэх боломжгүй байна” гэлээ.

МАХН-ын гишүүн, Хууль зүйн яамны дэд сайд Э.Эрдэнэжамъянд холбогдох
шүүх хурал болж, түүнд 12.8 сая төгрөгийн торгууль ноогдуулж, албан
тушаалаас нь огцруулах шийдвэрийг гаргасан. Тэгвэл тэрбээр Давж заалдах
шатны шүүхэд гомдол гаргах талаараа хэлж байсан билээ. Түүний давж
заалдах шатны шүүхийн тов хараахан гараагүй байсан ч энэ сарын 5-нд буюу
маргааш болохоор болсон байна.

Хоёр улсын ерөнхийлөгч нар өчигдөр
Жуковын хөшөөнд цэцэг өргөх үеэрээ “Дайчин
нөхөрлөлийн замаар” тойрон аялалд оролцсон Монгол-Орос
залуустай  уулзсан юм. Энэ үеэр хоёр улсын
ерөнхийлөгч нар Монголын Залуучуудын Холбооны Ерөнхийлөгч Аюушийн Мөнхбатад
энэхүү аяллын зохион байгуулалтад өндөр ач холбогдол өгч оролцон, залуучуудаа
идэвхижүүлж, хоёр орны залуучуудын найрамдлын гүүр болсонд талархснаа илэрхийллээ.
Мөн ирэх онд болох чөлөөлөх дайны 70 жилийн ойгоор Монгол, Орос, Хятадын
залуучуудын тойрон аяллыг зохион байгуулахаа амлаж, “Дайчин нөхөрлөлийн замаар”
тойрон аялалд оролцсон бүх залуучуудыг урьсан байна.  

Тэртээ 1939
онд Монголын дорнод хилийн Халх голын орчимд Японы цэргийн хүчийг Монгол,
Зөвлөлт холбоот улсын хамтарсан хүчээр бут цохиж, Монгол Улсын тусгаар тогтнол,
бүрэн эрхт байдлыг хамгаалсан Халхын голын дайны ялалтын 75 жилийн ойг хот
хөдөөгүй өргөн дэлгэр тэмдэглэсэн. Халх голын
ялалтын 75 жилийн ойн хүрээнд хийгдэж буй томоохон ажлын нэг нь “Дайчин
нөхөрлөлийн замаар” хэмээх тойрон
аялал байсан
юм. Орос-Монголын хамтарсан 150 залуу
Халх голын байлдаан болж байсан түүхэн газруудаар аялж, ахмад дайчиддаа хүндэтгэл
үзүүлжээ.
Монгол-Оросын залуучууд оролцсон “Дайчин нөхөрлөлийн замаар” тойрон аялал энэ
сарын 19-ний өдөр Эрхүү хот – Алтанбулаг – Сэлэнгэ – Орхон – Дархан-Уул –
Улаанбаатар – Хэнтий – Дорнод – Халх гол гэсэн маршрутаар нийт 5500 км аяласан.
Тэдний аялал 20 гаруй хоног үргэлжилж энэ сарын 3-нд улаанбаатар хотноо ирсэнээр өндөрлөсөн юм.

Монгол, Австри улсын Засгийн газрын гэрээ хэлцлийн дагуу “Цэргийн эмнэлгийн шинэчлэл” хөтөлбөр хэрэгжиж буй. Уг хөтөлбөрийн хүрээнд цэргийн эмнэлэгт тоног төхөөрөмж нийлүүлэх гэрээнд маргааш 15.00 цагт Батлан хамгаалах яамны Сайдын зөвлөлийн өрөөнд гарын үсэг зурна. Монгол, Австри улсын төлөөллийн гарын үсэг зурах гэрээний дагуу Батлан хамгаалах, хууль сахиулах алба хаагчдын нэгдсэн эмнэлгийн дөрвөн тасаг иж бүрэн шинэ тоног төхөөрөмжтэй болох аж. Батлан хамгаалах, хууль сахиулах алба хаагчдын нэгдсэн эмнэлэг нь  Зүүн бүсийн төв эмнэлэг болох зорилготой юм байна.

АНУ-ын
Олон улсын хөгжлийн агентлагаас Монголын сонсголын бэрхшээлтэй иргэдэд зориулан
буцалтгүй тусламжийн төсөл хэрэгжүүлэхээр болжээ. Төслийн нийт санхүүжилт
294.114 ам.доллар аж. Уг төсөл энэ оны долоодугаар сараас  2016 оны
долоодугаар сар хүртэлх хоёр жилийн хугацаанд 29 дүгээр тусгай дунд сургууль,
189 дүгээр тусгай цэцэрлэг болон дөрвөн аймагт хэрэгжих юм байна. Энэхүү төсөл
нь Монголын сонсголгүй болон сонсголын бэрхшээлтэй хүүхдүүдийг эрт оношилж,
эмчилгээ хийх зорилготой аж. Төслийг АНУ-ын Олон улсын хөгжлийн агентлаг,
Дохионы хэлний хэлмэрч орчуулагчдын холбоо, Монгол Улсын сонсголгүй болон
сонсголын бэрхшээлтэй хүүхэд залуучуудын холбоотой хамтран хэрэгжүүлнэ.

Судалгаагаар
1 000 хүүхэд тутмын 2-3 нь сонсголгүй эсвэл сонсголын бэрхшээлтэй төрдөг байна.
Гэтэл энэ хүүхдүүдийн эцэг эхчүүдийн 90 гаруй хувь хэвийн сонсголтой байдаг аж.