Month: September 2014

Categories
онцлох-нийтлэл туслах-ангилал

Шинээр 29 цэцэрлэг, 1 бага сургууль ажиллаж эхэллээ

Нийслэлийн Засаг дарга “Сургууль
байгуулах тусгай зөвшөөрөл олгох тухай” А/756 дугаар , “Цэцэрлэг
байгуулах тусгай зөвшөөрөл олгох тухай” А/755 дугаар захирамж гаргалаа.
Нийслэлийн Засаг даргын 2014 оны A/608 дугаар захирамжаар томилогдсон
“Ерөнхий боловсролын сургууль, цэцэрлэг байгуулах тусгай зөвшөөрөл
олгох” шинжээчийн хэсгийн  2014 оны 08 дугаар сарын 30-ны өдрийн
дүгнэлтийг үндэслэн иргэн М.Туяагийн “Шилдэг”  бага  сургуулийг
байгуулж,  сургуулийн үйл ажиллагааг Монгол Улсын хууль тогтоомжид
нийцүүлэн явуулах, сургуулийг бүрэн хүчин чадлаар ашиглаж ажиллахыг
үүсгэн байгуулагчид даалгалаа.

_Мөн иргэн Ц.Энхгэрэлийн  “Ананд эрдэнэ”,
иргэн Ц.Мягмарсүрэнгийн “Жогжоохонхүү”, иргэн Л.Шархүүгийн “Багын
найзууд”, Шинэ эрины хүүхдүүд ХХК-ийн “Шинэ эриний хүүхдүүд”, иргэн
Д.Ариунболд “Нарлаг ирээдүй”, Их гүрний эрин үе ХХК-ийн “Их гүрний эрин
үе”, иргэн Э.Уртнасангийн “Чухаг”, иргэн Х.Мөнхзулын “Бумбардайн
найзууд”, Мандах эрин ХХК-ийн “Мандах эрин”, иргэн Л.Ганзоригийн
“Төгөлхөн ой”, иргэн Б.Бадамхандын “Хатан манцуй”,  иргэн Р.Баяраагийн
“Амилагийн найз нар”, Чин хайрын бэлэг ХХК-ийн “Чин хайрын бэлэг”, иргэн
Т.Батчулууны “Билэг авьяас”, иргэн Б.Буяндэлгэрийн “Ананд шавь”, иргэн
П.Анхбаярын “Ногоон төгөл”, Цасангоо ХХК-ийн “Цасангоо”, иргэн
О.Бадмаарагийн “Мандах наран”, иргэн Үнэнбатын “Зээмаа”, Халиун хангайн
орхон  ХХК-ийн “Халиун хангайн орхон”, иргэн Г.Оюунчимэгийн “Хөөрхөн
ертөнц”, иргэн Ц.Гантуяагийн “Эрдэмтэн найзууд”, иргэн Ж.Ламсүрэнгийн
“Энхрий хүүхдүүд”, иргэн Б.Дуламжавын “Энхрийхэн үрс”, иргэн
Ё.Баяраагийн “Анандын хүүхдүүд”, иргэн Ө.Одонсүрэнгийн “Солонго”, Эрх
дагина ТББ-ын “Эрх дагина”, Нарны жаалууд ХХК-ийн “Нарны жаалууд”, иргэн
Ү.Батбилэгийн “Талст-21” цэцэрлэгүүдийг  байгуулж,  Цэцэрлэгийн үйл
ажиллагааг Монгол Улсын хууль тогтоомжид нийцүүлэн явуулах, цэцэрлэгийг
бүрэн хүчин чадлаар ашиглаж ажиллахыг үүсгэн байгуулагч нарт үүрэг
болголоо.

.Нийслэлийн Засаг даргын олгосон үйл
ажиллагаа эрхлэх тусгай зөвшөөрлийг нийслэлийн Засаг даргын Нийгмийн
хөгжлийн асуудал хариуцсан орлогч Ц.Энхцэнгэл өнөөдөр сургууль,
цэцэрлэгийн удирдлагуудад гардууллаа. Ингэснээр сургууль, цэцэрлэгийн
удирдлагууд хуульд нийцүүлэн үйл ажиллагаагаа эхлэх боломжтой болж
байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

Хийн хоолой дамжуулах талаар санал солилцох төлөвтэй байна

Шанхайн хамтын ажиллагааны байгууллагын ээлжит дээд хэмжээний уулзалт энэ сарын 11, 12-ны өдрүүдэд Тажикстан улсын нийслэл Душанбед болох тов гарсан. Энэ үеэр Монгол Улсын Ерөнхийлөгч Ц.Элбэгдорж, БНХАУ-ын дарга Си Зиньпин болон ОХУ-ын Ерөнхийлөгч В.Путин нар гурван талын уулзалт хийхээр болсон тухай хэвлэлүүд мэдээлж эхэллээ.

Энэ оны тавдугаар сард Шанхай хотноо болсон Азид хамтран ажиллах, итгэлцлийг бэхжүүлэх бага хурал /АХАИББХ/-ын дөрөв дэх дээд хэмжээний уулзалтын үеэр Монгол Улсын Ерөнхийлөгч Ц.Элбэгдорж хөрш орнуудын төрийн тэргүүнүүд болох ОХУ-ын Ерөнхийлөгч, БНХАУ-ын дарга Си Зиньпин нарт гурван талын уулзалтыг Улаанбаатар хотноо зохион байгуулах саналыг тавьж байсан.  Манай Ерөнхийлөгчийн санаачилсан энэхүү уулзалтыг аль улсад зохион байгуулах вэ гэдэг дээр талууд өнгөрсөн хугацаанд хэлэлцсэний эцэст ийнхүү Душанбед уулзахаар болсон бололтой.

Ямартай ч тус уулзалтын үеэр гурван улсын харилцаанд шинэ дэвшил авчирах “Талын зам” хийн хоолойг Монголоор дамжуулах эсэх, түүнчлэн төмөр замын асуудлаар нэгдсэн шийдэлд хүрч болох ач холбогдолтой талаар судлаачид бичиж байгаа юм.

Дашрамд дуулгахад, энэхүү уулзалт нь 1914 оноос хойшхи гурван улсын төрийн тэргүүн нарын анхны албан ёсны уулзалт болох гэнэ.

Categories
мэдээ нийгэм

42 аж ахуйн нэгж, иргэдийн гаргасан гомдлын дагуу арга хэмжээ авчээ

ШӨХТГ-аас барилгын ажил үйлчилгээ эрхлэгчдийн үйл ажиллагаанд хяналт шалгалтыг явуулж буй. Хяналт шалгалтад нийт 73 аж ахуйн нэгж, хувь иргэнд 710 иргэнээс хохирол нэхэмжилсэн өргөдөл ирүүлээд байгаагаас одоогийн байдлаар нийт 42 аж ахуйн нэгж иргэдийн гаргасан гомдлын дагуу арга хэмжээ авчээ.

Давж заалдах шатанд явж байгаа аж ахуй нэгжүүд

“Ачлал трейд” ХХК, “Отбар” ХХК, “Өгөөмөр Монгол” ХХК, “Эн Эм Си Жи” ХХК гэсэн аж ахуйн нэгжүүд ШӨХТГ-аас гаргасан Улсын байцаагчийн албан шаардлага, дүгнэлт, торгуулийн арга хэмжээг хүлээн зөвшөөрөлгүй хуулийн хугацаандаа тус газарт давж заалдах гомдол гаргаад байна.

Шүүхээр хянан хэлэлцэгдэж байгаа аж ахуйн нэгжүүд

“Тайгам-Алтай” ХХК, “Тектоник” ХХК, “Сүрэг Агт” ХХК, “МД ТОФ” ХХК гэсэн аж ахуйн нэгжүүд тус газраас гаргасан шийдвэрийг хүлээн зөвшөөрөлгүй захиргааны хэргийн шүүхэд гомдол гарган шүүхийн байгууллагаар асуудал нь хэлэлцэгдэж байна.

Түүнчлэн “Тост-Өргөө” ХХК, “Монь ивээл” ХХК, “Нутгийн Зам” ХХК, “Эн Ар Си” ХХК, иргэн 3.Ууганцэцэг, “Коконар” ХХК, “Богда холдинг” ХХК, “Фужиан лянхө” ХХК гэсэн аж ахуйн нэгж, хувь иргэдийн нэр дээр гомдол гаргаад хяналт шалгалтын ажил хийгдэж байгаа аж.

Categories
гадаад мэдээ

Охидын “Ladies Code” хамтлагийн хоёр гишүүн автын ослоор амиа алдлаа

Энэ сарын 3-нд хамтлагаараа Сөүл рүү явж
байгаад автомашины осолд орсны улмаас “Ladies Code” хамтлагийн гишүүн
Юн Би газар дээрээ нас барсан бол Райс тархины хүнд бэртэлтэй эмнэлэгт
ирээд, олон цаг үргэлжилсэн мэс засалд орсон боловч хагалгаагаа даалгүй
өчигдөр өглөө нас баржээ.

Бороо орж гулгаа үүссэн зам дээр хурд
хэтрүүлэн явж байгаад осолдож, хэд хэдэн удаа эргэхдээ замын хашлага
төмөр очиж мөргөсний улмаас ийнхүү “Ladies Code” хамтлагийн хоёр гишүүн
амь насаа алдсан байна. Харин хамтлагийн үлдсэн гурван гишүүний хувьд
хөнгөн бэртэл авчээ. Машинд явсан хамтлагийн стилист, менежер болон
жолооч бараг бэртэж гэмтээгүй аж.

Ослын улмаас газар дээрээ нас барсан Юн
Бинийг оршуулах ёслол өнгөрсөн баасан гарагт болжээ. Харин дуучин
Райстай салах ёс гүйцэтгэх ёслолыг Сөүлийн их сургуулийн эмнэлэгт хийж
буй юм байна.

 

Categories
гадаад мэдээ

Малайзид гашуудал зарлажээ

Малайзын  Ерөнхий сайд Нажиб Разак өнөөдөр орон даяар гашуудал зарлажээ. Түүний гашуудал зарласан нь өнгөрсөн гуравдугаар сард осолдсон “МН370” онгоцны осолтой холбоотой юм. Тус ослооор  224 зорчигч, онгоцны багийн 15 гишүүн амиа алдсан билээ. Ерөнхий сайд эл өдөр   зорчигч болон багийн гишүүдийн гэр бүлээс уучлалт гуйж, эмгэнэл илэрхийлсэн байна. 

 Түүнчлэн Малайзын Засгийн газрын ордон дээр байрлах төрийн далбааг хагас бөхийлгөж, эзэн хаан Султан Абдул Халим Муадзам Шах Ерөнхий сайдтай уулзжээ. Эзэн хаан “МН370”-ийн эрлийн ажлыг дахин эхлүүлэхэд улсаас мөнгөн тусламж үзүүлэхээ зорчигчдын гэр бүлд амласан аж. “Malaysia Airlines” компанийн удирдлагууд зорчигчдын гэр бүлийг хүлээн авч, уучлалт гуйсан гэв.

Categories
мэдээ нийгэм

Б.Билэгтийн гомдлыг Төрийн албаны зөвлөл хүлээж авсангүй

Цагдаагийн ерөнхий газрын даргаар ажиллаж байсан Б.Билэгтийг үүрэгт ажлаас нь чөлөөлсөн. Тэгвэл тэрбээр үүрэгт ажлаас нь чөлөөлөх Засгийн газрыг тогтоолыг зөвшөөрөхгүй байгаагаа мэдэгдэж Төрийн албаны зөвлөлд гомдол гаргажээ.  Өнгөрсөн сарын 18-нд гаргасан уг гомдлыг Төрийн албаны зөвлөл хянан шийдвэрлэхийн тулд түүнийг ажлаас нь чөлөөлсөн шалтгаан, үндэслэлийн талаарх тайлбарыг долоо хоногийн дотор ирүүлэхийг Засгийн газраас хүссэн аж. Гэвч Засгийн газар хариу ирүүлээгүй тул Төрийн албаны зөвлөлөөс Б.Билэгтэд “Уг маргааныг хянан шийдвэрлэх эрх бүхий зохих байгууллагад хандах боломжтой” гэсэн хариуг өгчээ.

Categories
мэдээ спорт

О.Гүндэгмаа, Ц.Мөнхзул нар өнөөдөр буудна

Дөрвөн жилд нэг удаа зохиогддог буудлага спортын Дэлхийн аварга
шалгаруулэх тэмцээн Испанийн Гранада хотод хоёр дахь өдрөө үргэлжилж
байна. 51 дэх удаагийн ДАШТ-д 100 орны 2027 бууч 55 дасгалд цэц мэргээ
сорьж байна.

Буудлагын дэлхийн аваргын хоёр дахь өдөр буюу өнөөдөр манай 10 тамирчин галын шугамд гарна.

1. 25 метрийн спорт гар бууны дасгалд МУГТ О.Гүндэгмаа, ОУХМ Ц.Мөнхзул,
Т.Баярцэцэг нар тогтоол 30 сумаа буудна. Тэмцээн Улаанбаатарын цагаар
15.00-19.30 цагт болох юм. Харин энэ дасгалд өрсөлдөх тамирчид маргааш хурдан 30 сумаа буудсанаар нэгдсэн дүн гарч, финалд дахин буудна.

2. 10 метрийн хийн урт бууны эмэгтэйчүүдийн дасгалд ОУХМ О.Янжинлхам,
Ч.Нарантуяа,Г.Нандинзаяа нар буудна. Тэмцээн УБ цагаар 18.00-20.35 цагт
 үргэлжилнэ.
Финал 22 цагаас эхэлнэ.

3. 50 метрийн сонгомол гар бууны эрэгтэйчүүдийн дасгалд ОУХМ Э.Даваахүү буудна.
Тэмцээн УБ цагаар 17.15-18.45 цагт дуусна.  Финал 20 цагаас эхэлнэ.

4. 50 метрийн сонгомол гар бууны залуучуудын дасгалд СМ Б.Буянбаатар,
Ш.Буянзаяа, О.Төгөлдөр нар буудна. Тэмцээн УБ цагаар 15.00-16.30 цагт
дуусна. Финал 18 цагаас эхэлнэ.

Categories
мэдээ спорт

Өнөөдөр Г.Мандахнаран, Д.Хүдэрбулга нар барилдана

Өнөөдөр Узбек улсын нийслэл Ташкент хотын “Гимнастикийн ордон”-д эрэгтэйчүүдийн 74, 97 кг-ийн жингийн барилдаан болно. Монгол улсаас 74 кг-ын жинд 32 бөх барилдаж байгаагаас олон улсын хэмжээний мастер П.Өнөрбат зодошлоно. Тэрбээр нэгдүгээр тойрогт казахстаны бөх Галымзан Иссербаевтай таарчээ. Энэ бөхийг ялбал гүржийн бөх Жумбер Захиров, туркийн бөх Сонер Демирташ нарын аль ялсантай барилдах юм.

 Харин 74 кг-ын жинд 32 бөх барилдаж байгаагаас олон улсын хэмжээний мастер П.Өнөрбат нэгдүгээр тойрогт казахстаны бөх Галымзан Иссербаевтай барилдахаар болоод байна. Энэ бөхийг ялбал дараагийн тойрогт казахстаны бөх Ермикамбет Инкар, австрийн бөх Жонас Людесжер хоёрын аль хожсонтой барилдана. 

Categories
онцлох-нийтлэл туслах-ангилал

ДАЛАЙ ЛАМ: Жирийн нэгэн лам надад хойд дүр хэрэггүй

Буддын шашны тэргүүн XIV Далай лам Германы “Welt am Sonntag”
сонины сурвалжлагчийг Дарамсала дахь өргөөндөө хүлээн авч уулзаж ярилцлага
өгснийг товчлон сонирхуулъя.

-Дээрхийн
гэгээнтэн, түвдүүдийн хувьд бол та бурхан. Баруунд ч таныг  амьд бурхан гэдэг. Танд ер нь сул тал гэж бий
юу?

-Би залхуу. Уг нь бол өглөө 3.30 цагт босч залбирч, бясалгалаа
хийж өглөөний цайгаа уудаг. Дараа нь дахиад бясалгал хийж энэ бүхэнд таваас
зургаан цаг зарцуулдаг. Гадна байдлаас харахад бол би залхуу биш. Гэтэл
онгоцонд яваа хүмүүсийг харахад  юм
уншиж, бичиж, илтгэлээ бэлтгэх зэрэг үргэлж ямар нэгэн зүйл хийдэг. Харин би
бол иймэрхүү зүйл хийдэггүй. Энэ бол миний залхуугийн нэг илрэл.

-Үүндээ
бухимддаг уу?

-Үгүй. Ямар нэгэн юмыг албадлагаар хийх нь  хиймэл юм шиг санагддаг. Төлөвлөхгүйгээр
гэнэт хийх нь илүү. Бүх юмыг чин сэтгэлээсээ хийдэг.

-Тантай
энэ ярилцлагыг хийх гэж намайг ямар их бэлдсэнийг та мэдэх үү?

-Та герман хүн шүү дээ. Бүх юм яг таг байх ёстой. Түүнээс гадна
тавих асуулт  сонин байх ёстой. Хэрвээ би
асуулт тавих ёстой байсан бол бас л чамгүй бэлдэх байсан. Гэхдээ би зөвхөн
хариулах ёстой. Хариуг нь мэдэхгүй бол мэдэхгүй гэдгээ л хэлнэ.

-За
ойлголоо. Тэгвэл богино хугацаанд яаж дэлхийг эдийн засгийн хямралаас гаргах
вэ?

-Үүний хариултыг  би
мэдэхгүй. Улстөрчид л үүнийг шийдэх ёстой. Би мэргэжилтэн биш. Энэ нь
терроризм, хүчирхийлэлтэй хэрхэн тэмцэх вэ гэдэгтэй ижил. Удахгүй улс орны
Засгийн газрын тэргүүнүүд уулзаж олон түмнийг хэрхэн аюулаас гаргах талаар ярих
ёстой. Энэ бол зөв. Гэхдээ давчуу хугацаанд уулзахдаа асуудлын мөн чанарыг
хэлэлцэхээ мартахгүй байх ёстой.

-Таныхаар
бол хямралын үндэс суурь нь юу вэ?

-Шунал, шударга бус явдал. Хүмүүс, бизнес эрхлэгчид нэг
зорилготой. Юу гэвэл  мөнгө, илүү их
мөнгө олох. Бусадтай үр ашгаа хуваалцах гэсэн шунал бол зөв. Зөвхөн өөртөө авах
гэсэн шунал өвчин болдог. Зөвхөн өөрөө илүү мөнгөтэй болох гэсэн сэтгэл  эцэс сүүлдээ компанийг, тэр хүнийг үгүй
хийнэ.Энэ бол  менежерүүдийн хамгийн том
сул тал. Үүнээс болж эдийн засаг хямралд автсан.

-Бусадтай
баялгаа хуваалцаж, ашиг орлого олох бол зүгээр юм байна шүү дээ.

-Зөв замаар, бусдад болон байгаль дэлхийд хохирол
учруулалгүйгээр олсон баялаг бол буруу юм биш. Аз жаргалтай амьдралын нэг хэсэг
бол тухлаг орчинд амьдрах явдал хэмээн буддын шашинтнууд бид үздэг. Гэхдээ
тэрбумтан ч гэсэн аравхан хуруутай, ихээр бодоход нэг хуруундаа гурваас дөрвөн
бөгж зүүнэ шүү дээ. Саятнуудын толгойд олсон ашгаа хураах гэсэн ганцхан бодол
байдаг. Энэ бол бодит зүйл биш зөвхөн тэдний хийсвэр сэтгэлгээ. Үүний оронд
ядуурлыг хэрхэн багасгах талаар бодож байх ёстой.

-Барууны
компаниуд  ард иргэд нь орлого багатай
орнуудад хөрөнгө оруулалт хийж байгаа талаар таны бодлыг сонсох гэсэн юм. Энэ
нь тус улсыг мөлжиж байгаа хэрэг үү эсвэл тус болж байна уу?

-Хөрөнгө оруулагч ямар санаа агуулснаас шалтгаална. Гэхдээ
Хятад, Энэтхэгийн компаниудад хөрөнгө оруулалт хийж буй барууныхан хятад,
энэтхэгчүүдийн амьдрал дээшлээсэй гэж бодож байгаа гэдэгт би итгэхгүй байна.
Тэд хямд хөдөлмөрийн хүчийг ашиглаж байгаа. Хэрвээ барууны хөрөнгө оруулагч ёс
суртахууны үүднээс тус улсын хүмүүсийн амьжиргааг сайжруулах зорилготой бол өөр
хэрэг. Барууны хөрөнгө оруулагчид нь Хятадад ардчиллыг хөгжүүлж, хүний эрх,
хэвлэл мэдээллийг эрх чөлөөтэй болгоход хувь нэмрээ оруулах боломжтой.

-Аливаа
компанийн удирдах зөвлөлийн гишүүн халааг нь авах сайн хүнтэй болохыг хүсдэг.
Харин таны дараагийн дүрийн тухай асуудал бол үүнээс илүү чухал. Энэ тухай
бодол таны олон шөнийн нойрыг хулжаасан уу?

-Үгүй. Энэ бол тийм хэцүү асуудал биш л дээ. Би жирийн нэгэн лам
тул хорвоогоос халихад хойд дүр хэрэггүй. Харин төрийн тэргүүний албыг хашиж
байсан Далай ламын хувьд бол би найман жилийн өмнө ажлаа өгсөн. Нэг үгээр
хэлэхэд ямар ч асуудал байхгүй. Би 1969 онд хэлж байсан. XV Далай ламыг
тодруулах эсэхийг түвдүүд өөрсдөө л шийдэх ёстой. Би бол ердөө санал дэвшүүлсэн
бөгөөд үүнээс илүүг хийж чадахгүй.  

-Энэ
зуунд  хурдтай хөгжиж буй Хятад дэлхийд
давамгайлна гэдэг үнэн үү?

-Хятад маш их эрчтэй болсон. Үүний нэг тод жишээ бол чөлөөт зах
зээлийн зарчмыг нэвтрүүлэхэд эдийн засаг хэрхэн хөгжсөн явдал. Гэхдээ Хятадын
нийгэм дэх үнэт зүйлс дутагдаж байгаа. 
Коммунизмын үнэт зүйлс аль хэдийнэ замхарсан. Түүний оронд мөнгө хамгийн
үнэт зүйлс болчихлоо. Хятадын дээдчүүд нь зөвхөн мөнгө, эрх мэдлийн тухай бодож
байна. Ийм байдал  бүхнийг үгүй болгох
аюултай.

-Шашин,
төр, эдийн засаг гурав нягт холбоотой. Та эсвэл Ромын пап дэлхийн энэ байдлыг
өөрчилж чадна гэдэгт  итгэдэг үү?

-Би дэлхийн улс орнуудаар шашны тэргүүний хувьд аялдаггүй. Би
жирийн нэг хүн, ердийн  лам. Намайг Далай
ламын хувьд хүлээж авдаг тул мэдээжийн хэрэг илүү боломжтой. Би 50 жил хилийн
чанадад амьдарч, чамгүй туршлага хуримтлуулсан тул бусадтай хуваалцах зүйл ч
багагүй бий. Бидний энд яриад байгаа ёс зүйн зарчим нь надад эрч хүч өгч
байдаг. Эрч хүч нь надад дотоод сэтгэлийн тайвшрлыг бий болгодог. Ингэснээр би
олон хүнд хүрнэ гэж боддог.

-Та
гадаадад дээд зэрэглэлийн зочид буудалд буусан байхад ямар сэтгэгдэл төрдөг вэ?

-Чин үнэнээ хэлэхэд зочид буудлын өргөн орон дээр хэвтэхэд тийм
ч сайхан санагддаггүй. Өрөөнд ямар нэгэн сүнс байж магадгүй гэж боддог. Тиймээс
энгийн зочид буудалд буулгахыг хүсдэг. Орчин үеийн, цэвэрхэн, тухтай газарт
дуртай л даа. Ихэнхдээ иймэрхүү юманд би нөлөөлж чаддаггүй.

-Тансаг
газар байхад эвгүй санагддаг уу?

-Яагаад ингэх ёстой юм бэ гэж боддог. Надад сайхан байгаа бол
бусдад ч илүү сайн сайхан зүйл хийнэ. 
Мэдээж тансаг газар буусан байхад ядуу хүмүүсийг хараад сэтгэл өвддөг.

Нэг удаа Вена хотод унтахынхаа өмнө цонхоор хартал нэг хүн
гудамжинд унтаж байхыг харсан. Өглөө босоод хартал нөгөө хүн тэндээ унтаж л
байсан. Би түүнд талх, жимс өгч явуулсан. Түүнийг зовлонгоос хэсэг хугацаанд ч
гэсэн нимгэлэх гэж.

-Та  хамгийн сүүлд хэзээ шударга бус загнасан бэ?

-Заримдаа тэвчээр алдархаар. Гэхдээ дараа нь би уучлал гуйдаг.
Үе үе ийм юм тохиодог.

Categories
мэдээ спорт

Э.Бэхбаяр тавдугаар байрт оров

Бөхийн чөлөөт барилдааны дэлхийн аварга
шалгаруулах тэмцээнийн эхний өдрийн барилдаан Узбек улсын Ташкент хотын
“Гимнастикийн ордон”-ы дэвжээнээ өчигдөр болж өндөрлөлөө. Тэмцээний
эхний өдөр эрэгтэйчүүдийн 57 кг, 70 кг, 86 кг, 125 кг-ын жингийн
барилдаан болж, манай дөрвөн бөх барилдлаа. 57 кг-ын жинд хүч үзсэн
Э.Бэхбаяр мөнгө, хүрэл медалийн төлөөх барилдаан хийж, шагналт тавдугаар
байрт шалгарсан амжилтыг үзүүлэв. Мөн 125 кг-ын жинд барилдсан ОУХМ
Ж.Чулуунбат долоодугаар байрт шалгарч багтаа шагналын оноо авчирлаа.

Харин 70 кг-ын жинд олон улсын хэмжээний
мастер Б.Анхбаяр Тажикийн бөх З.Есуповтой барилдаж ялагдал хүлээсэн бол
86 кг-ын жинд О.Үйтүмэн хоёрдугаар тойрогтоо Грекийн бөх Тимофей
Ксенидистэй таарч 4:11 онооны харьцаагаар ялагджээ.

Тэмцээний эхний өдрийн барилдааны дүнг хүргэж байна.

Эрэгтэй чөлөөт бөх

57 кг

1. Кьонг Ил Янг /БНАСАУ/

2. Владимир Хинчегашвили /Гүрж /

3. Владислав Андреев /Беларусь/

3. Хасан Рахими /Иран /

5. Эрдэнэбатын Бэхбаяр /Монгол/

70 кг

1. Хетаг Цаболов /ОХУ/

2. Якуп Гор /Турк/

3. Бекзод Абдурахманов /Узбек/

3. Али Шабанов /Беларусь /

26. Батчулууны Анхбаяр  /“Харгант-Цамхаг” клуб/

86 кг

1.Абдулрашид Садуллаев /ОХУ/

2. Рейнерис Перес Салас /Куба/

3. Селим Яшар /Турк/

3. Мохаммадхоссейн Аскари .Мохаммадиан /Иран/

26. Оргодолын Үйтүмэн /“Аврагч” спорт хороо/

125 кг

1. Таха Акгуль /Турк/

2. Комейл Гашеми /Иран/

3. Хажимурат Гацалов /ОХУ/

3. Тэрвэл Длагнев /АНУ/

7. Жаргалсайханы Чулуунбат /”Сүлд” спорт хороо/

хӨнөөдөр эрэгтэй чөлөөт бөхийн 61 кг-ын
жинд ОУХМ Э.Ням-Очир нэгдүгээр тойрогт Словакийн бөх Микола Болотняктай
барилдах оноолт таарсан бол 65 кг-ын жинд МУГТ Г.Мандахнаран эхний
тойрогт Украйны бөх Титал Жафарянтай хүч үзэх нь ээ.

Мөн 74 кг-ын жинд ОУХМ П.Өнөрбат
нэгдүгээр тойрогт Казакстаны бөх Галымзан Иссербаевтай учраа таарсан
байна. Тэмцээний 97 кг-ын жингийн ангилалд ОУХМ Д.Хүдэрбулга эхний
тойрогт Узбекийн бөх Омар Омаровтой барилдахаар болжээ.

Тамирчиддаа амжилт хүсье.