ОХУ-ын Ерөнхийлөгч В.Путин тус улсад авсан эдийн засгийн хориг арга хэмжээний зарлигт гарын үсэг зуржээ. Тухайлбал, Украины зүүн хязгаарт болж буй зөрчил мөргөлдөөн, Малайзын агаарын тээврийн “МН17” онгоцны осолд Оросыг буруутгаж “Их 7” бүлэглэл, Европын холбоо болон АНУ, Их Британи, Герман улсууд эдийн засаг, газрын тосны салбар болон визний хориг тавьсан юм. Мөн Европын орнуудад данстай Орос компаниудын дансыг царцаасан билээ. Эдгээр хориг арга хэмжээнээс улбаалан Ерөнхийлөгч В.Путин Украин, АНУ, Их Британи, Герман, Канад, Австрали орнуудаас хүнсний бүтээгдэхүүн, хөдөө аж ахуйн түүхий эд импортлохыг хориглосон гэж Ерөнхийлөгчийн хэвлэлийн төлөөлөгч Дмитрий Песков мэдэгджээ. Путин өчигдөр Засгийн газрын хуралдааныг зарлаж дотоодын бараа бүтээгдэхүүний үнийг тогтвортой барьж, иргэдэд дарамт учруулахгүй байхыг сануулсан байна. Тэрбээр энэхүү ажлыг Ерөнхий сайд Дмитрий Медеведевт даалгасан тухай “Орт 1” телевиз мэдээлэв. Тус хүнсний хориг 2014 оны наймдугаар сарын 6-наас 2015 оны наймдугаар сарын зургаан хүртэл нэг жилийн турш хүчинтэй байх аж. Харин АНУ-ын Засаг захиргаа энэхүү хоригийн асуудлаар маргааш шуурхай хуралдаан зохион байгуулахаар болжээ.
Сайрам нуурын экологийн орчныг хамгаалах чиглэлээр энэ жил 51 ажил хийхээр төлөвлөсөн ба нийт зардалд нь 720 сая юань зарцуулна хэмээн Шинжаан Уйгурын өөртөө засах орны Байгаль орчны танхимаас мэдээлжээ. Улсын хөрөнгөөр хамгаалдаг Хятадын 15 гол мөрөн, нуур, бүрдийн нэг нь Сайрам нуур юм. Энэ жил улсын төсвийн мөнгөөр 10 мянга гаруй га бэлчээр, нуурыг тойрсон 80 гаруй км сараалж, хүн малын ундны усны 50 цэг, ус татах 50 км хоолой бүхий цахилгаан сүлжээ, хамгаалалтын 15 постыг засаж сэлбэх гэнэ. Шинжаан Уйгурын өөртөө засах орны баруун хэсэг, Борталд орших үзэмжит Сайрам нь далайн төвшнөөс 2073 метр өргөгдсөн, 460 га талбайтай, 92 метрийн гүнтэй, цэнгэг уст нуур юм. Далайн түвшнээс хамгийн өндөрт өргөгдсөн нуур гэдгээрээ Хятад улсдаа алдартай билээ.
Монголбанкнаас тогтмол зохион байгуулдаг Гадаад валютын дуудлага худалдаа өчигдөр боллоо. Энэ удаагийн дуудлага худалдаагаар банкууд ам.доллар, юань худалдан авах санал ирүүлсэн бөгөөд Монголбанк 1880.00 төгрөгийн хаалтын ханшаар 18.0 сая ам.доллар, 304.50 төгрөгийн хаалтын ханшаар 128.5 сая юань тус тус худалдлаа.
Нийслэлийн удирдлагын зөвлөлийн ээлжит хуралдаанаар V цахилгаан станцын газрын асуудлыг хэлэлцлээ.
Үндэсний их баяр наадмын тухай хуулиар бөхийн барилдаанд шөвгөрсөн бөхчүүдээс сэргээшийн шинжилгээ авдаг. Тэгвэл хуулийн дагуу наадам дуусахад сэргээшийн шинжилгээ авч, нарийн лабораторид шинжлүүлэхээр БНСУ руу илгээжээ. Шинжилгээний хариу 21 хоногт багтаж ирнэ хэмээн Монголын үндэсний бөхийн холбооноос мэдэгдлээ. Одоогоор хариу нь ирээгүй байгаа аж. Шинжилгээний хариу ирснээс хойш хуулийн дагуу 14 хоногт багтаан олон нийтэд мэдээлэх үүргийг Монголын үндэсний бөхийн холбоо хүлээдэг аж.
