Month: August 2014

Categories
мэдээ нийгэм

“Улс төрд шинэ манлайлагч” төслийнхөн замд гарлаа

Сайн бүхний эхлэл – UBS телевиз Монголын нийгэм, улс төр, эдийн засгийн
салбарт цоо шинэ сэтгэлгээний манлайлал бий болгох шинэ үеийн залуусыг
тодруулах “УЛС ТӨРД ШИНЭ МАНЛАЙЛАГЧ” зорилтот телевизийн төслийг
хэрэгжүүлж эхлээд байгаа. Энэхүү төслийг EBI хүрээлэн, Liberal House
бодлогын судалгааны хүрээлэнтэй хамтран орон даяар зохион байгуулж
байгаа юм.

“Улс төрд шинэ манлайлагч” зорилтот төслийн багийнхан өнөөдөр өглөө
06.00 цагт /найман сарын найманд/эх орны дөрвөн зүг, найман зовхист
ажиллахаар Чингисийн талбайгаас хөдөллөө. Уран бүтээлчид нийт дөрвөн
багт хуваагдан эх орны баруун хязгаар Баян-Өлгий, зүүн хязгаар Дорнод,
хойд зүг Хөвсгөл, өмнө зүгт Өмнөговь аймагт ажиллаж шинэ үеийн
манлайлагч залуустай уулзаж тэдний ажил амьдрал, санаа бодлыг сонсохоор
мордоцгоосон юм.

Тус төслийн хүрээнд үнэт зүйл, өөдрөг тэмүүлэлтэй, бүтээлч залуусын
бодит оролцоог дэмжиж, ёс зүйтэй, нээлттэй шударга өрсөлдөөнийг жишиг
болгон нийгэмд эерэг өөрчлөлт бий болгох аж.

“Улстөрд шинэ манлайлагч” зорилтот телевизийн төслийн хувьд үндэсний
хэмжээнд хийгдэж байгаа анхны том төсөл бөгөөд төсөлд эх орны дөрвөн зүг
найман зовхист болон дэлхийн өнцөг булан бүрт ажиллаж, амьдарч буй 
Монгол Улсын 22-40 насны иргэн “НАДАД ШИЙДЭЛ БАЙНА” сэдвийн хүрээнд 500
хүртэл үгтэй исээ /эссэ/ бичиж, төслийн багт цахим шуудангаар эсвэл
цаасан  хэлбэрээр ирүүлж оролцох юм байна.

Төслөөс шалгарсан шилдэг 30 оролцогч EBI хүрээлэнгээс АНУ-ын Вашингтон
хотод зохион байгуулах мэргэшүүлэх нэг сарын хөтөлбөрт 100 хувийн
тэтгэлэгтэй суралцаж, НҮБ-ын Ерөнхий Ассамблейд Монгол Улсаа төлөөлөн
оролцоно. Түүнчлэн үндэсний шилдэг нэг оролцогч Harvard University-ийн
манлайллын мэргэшүүлэх  хөтөлбөрт суралцах аж.

Г.ДАРЬ

Categories
мэдээ нийгэм

Адуу хулгайлж хил давахыг оролдсон Тува нарт ял оноожээ

ОХУ-ын Тувад энэ сарын долоонд Монголын хилийг зөрчин, мал хулгайлсан, албан үүргээ гүйцэтгэж байсан монгол хилчнийг буудан шархдуулсан хоёр тува иргэнийг шүүх хурал болжээ. Тувагийн Эрзинск дүүргийн Оралан Омак Белекович, Кенден Белек-Баир хэмээх хоёр иргэн 2012 оны 11 дүгээр сарын 03-04-нд шилжих шөнө хил зөрчин Монголын нутагт нэвтрэн орж, адуу хулгайлсан байна. Тэднийг буцах замд нь манай хилчид илрүүлэн баривчлахыг оролдсон боловч хил зөрчигчид галт зэвсэг хэрэглэн эсэргүүцэл үзүүлж, монгол хилчнийг шархдуулаад хил даван зугатсан юм. Монголын талаас өгсөн мэдээллийн дагуу ОХУ-ын хил, Цагдаагийн албаныхан эрэн сурвалжласны үр дүнд Тувагийн нутагт тэднийг баривчилсан байна. 

Сэжигтнүүдийг хил хууль бусаар зөрчсөн, хил даван хулгай хийсэн болон нэгэнд нь хилийн албаны ажилтны амь насанд халдсан хэргээр эрүүгийн хэрэг үүсгэн шалгаж, гэм бурууг нь тогтоосон байна.

Шүүхээс тэднийг гэм буруутай гэж үзэн, манай хилчнийг шархдуулсан Кенденд чанга дэглэмтэй хорих ангид 14 жил, түүний хамсаатан Ораланд жирийн дэглэмтэй хорих ангид гурван жил хорих ял оноожээ.

Categories
мэдээ эдийн-засаг

Зарим компаниудын арилжаанд оролцох эрхийг хязгаарлав

“Монголын хөрөнгийн бирж” ТӨХК-ийн Гүйцэтгэх захирлын 2014 оны наймдугаар сарын 8-ны өдрийн 117 дугаар тушаалаар “Хамтран ажиллах гэрээ”-гээр хүлээсэн үүргээ биелүүлээгүй дараах 26 гишүүн компанийн арилжаанд оролцох эрхийг 2014 оны наймдугаар сарын 11-ний өдрөөс эхлэн холбогдох журам болон гэрээгээр хүлээсэн үүргээ бүрэн хэрэгжүүлэх хүртэл хязгаарлах шийдвэр гаргалаа.

Үнэт цаасны арилжаанд оролцох эрх хязгаарлагдсан гишүүн компаниудын жагсаалт:

№ Гишүүн компанийн нэр   

 1 Ай трейд ХХК

 2 Аргай бэст ХХК

 3 Бага хээр ХХК

 4 Бумбат Алтай ХХК

 5 Грандлайн ХХК

 6 Грийт секьюритис ХХК

 7 Ди си эф ХХК

 8 Лайфтайм инвестмент ХХК

 9 Мөнх огторгуй ХХК

 10 Новел инвестмент ХХК

 11 Өндөрхаан инвест ХХК

 12 Сикап ХХК

 13 Скайхан капитал ХХК

 14 Тавантолгой хишиг ХХК

 15 Түшиг траст ХХК

 16 Хүннү Эмпайр ХХК

 17 Эм Ай Си Си ХХК

 18 Эм Даблью Ти Эс ХХК

 19 Эф Си Икс ХХК

 20 АБЖЯ ХХК

 21 Догсон  ХХК

 22 Зууны гарц секьюритис ХХК

 23 Очир-Эрдэнэ инвест ХХК

 24 Соёмбо инвестмент корпораци ХХК

 25 Юу Би Би Ди ХХК

 26 Би Би Эс Эс ХХК 

Categories
мэдээ эдийн-засаг

Татварын цахим төлбөрийн шинэ системийг ашиглаж эхэллээ

Монгол Улсын Татварын ерөнхий газар (ТЕГ) нь АНУ-ын Олон улсын хөгжлийн агентлаг (ОУХА)-ийн санхүүжилтээр хэрэгжиж буй Бизнесийг дэмжих санаачилга төслийн дэмжлэгтэйгээр хөгжүүлсэн татварын цахим төлбөрийн шинэ системийг нээлтийг хийлээ. ТЕГ-аас 2014 оны 1-р сард шинээр нэвтрүүлсэн цахим татварын тайлангийн системийг одоогийн байдлаар татвар төлөгчдийн 70-аас илүү хувь нь ашиглаж байна.  Голомт, Хаан банк, Төрийн банк зэрэг арилжааны банкууд ТЕГ-тай хамтран хоёрдахь хувилбарыг амжилттай туршиж, нийт татвар төлөгчдийн 80 гаруй хувийг цахим татвар төлөлтийн системд холбох боломжийг бүрдүүлсэн бөгөөд ТЕГ цаашид энэ үйлчилгээг дотоодын арилжааны бүх банкаар дамжуулан татвар төлөгчдөд хүргэхээр төлөвлөж байна. 

“Мэдээллийн технологийг сайжруулах нь татварын шинэчлэлийг хэрэгжүүлэхэд чухал үүрэг гүйцэтгэх бөгөөд МТА-ны үйл ажиллагааг шинэ шатанд аваачих юм. Энэ ажлыг гүйцэтгэхэд арилжааны банкуудтай амжилттай хамтран ажиллах нь Монгол Улсын хэмжээнд манай татвар төлөгчид бэлэн мөнгөнөөс бэлэн бус гүйлгээнд шилжихэд голлох үүрэг гүйцэтгэнэ” гэж ТЕГ-ын дарга Т. Батмагнай хэллээ. 

ТЕГ болон арилжааны банк хоорондын хамтын ажиллагааны талаар Голомт банкны Гүйцэтгэх захирал Г. Ганболд “Татварын цахим төлбөрийн системийг ашиглах нь өөрийн харилцагч, үйлчлүүлэгчдэд тухтай, хүртээмжтэй, найдвартай санхүүгийн үйлчилгээ үзүүлэх Голомт банкны зорилготой нийцэж байгаа бөгөөд Монгол Улсын эдийн засгийн хөгжилд оруулах хувь нэмрийн нэг хэсэг” гэлээ.  

Тус системийн нээлт Шинэчлэлийн Засгийн газрын ЭЗЭН 100 ажлын хүрээнд хийгдэж байгаа ажлуудын нэг бөгөөд нээлтэнд Сангийн сайд Ч.Улаан, Татварын ерөнхий газрын дарга Т.Батмагнай, АНУ- аас Монгол Улсад суугаа Онц бөгөөд бүрэн эрхт Элчин сайд Пайпэр Энн Уинд Кэмбэлл нар оролцлоо.

Categories
мэдээ нийгэм

Монгол авлигаараа хоёрт жагсчээ

“Wall Street” сонин авлигаараа тэргүүлдэг орнуудыг жагсаахад манай улс хоёрдугаарт оржээ.  Иргэдийн санал асуулгаар үнэлсэн энэ жагсаалтыг Африкийн Либер улс тэргүүлсэн байна. Дэлхийн авлигын барометр гэсэн уг судалгааг Олон улсын ил тод байдал байгууллагаас хийдэг юм байна. Энэ удаагийн судалгааг 107 оронд явуулжээ. Монголоос судалгаанд оролцогчдын 77 хувь нь төрийн албан хаагчид авлигын хэрэг холбогддог, мөн 66 хувь нь цагдаа нар авлига авдаг гэсэн байна. Энэ жагсаалтын эхний есөн улсад Либер, Монгол, Венесуэл, Зимбабве, Мексик, Парагвай, ОХУ, Нигер, Замби оржээ. 

Categories
мэдээ нийгэм

Оюутнуудын заавал судлах хичээлийн жагсаалтыг баталлаа

Боловсрол, шинжлэх ухааны сайд Л.Гантөмөрийн А/285 дугаар тушаалаар бакалаврын ерөнхий суурь чиглэлийн заавал судлах хичээлийн жагсаалтыг баталсан байна. Уг жагсаалтыг Дээд боловсролын байгууллагын бакалаврын хөтөлбөрт тавигдах нийтлэг шаардлагыг баталсантай холбогдуулан гаргажээ. Үүнд, Монголын түүх, соёл, ёс заншил /иргэний боловсрол/, Монгол хэл бичиг, найруулга зүй /яриа бичгийн ур чадвар/, Хүний хөгжил, харилцааны ёс зүй, эрх зүй /хүмүүнлэгийн ухаан/, Сэтгэлгээний түүх, соёл /хүмүүнлэгийн ухаан/ гэсэн хичээл багтсан байна.

Эдгээр хичээлийг судалснаар эх хэлээрээ логик дэс дараалалтай, үндэслэлтэй товч тодорхой, үнэн зөв амаар болон бичгээр өөрийгөө илэрхийлэх чадвартай болох төдийгүй Монголын түүхийн нэгдсэн сурвалж бичгүүдийг тоймлон дүгнэх зэрэг олон чадвар оюутнууд эзэмшинэ гэж үзжээ. Иймд эдгээр хичээлийг сургалтын хөтөлбөртөө оруулахыг дээд боловсролын байгууллагын удирдлагуудад үүрэг болгосон байна.

Categories
мэдээ улс-төр

Ерөнхий сайд С.Е.Донскойг хүлээн авч уулзлаа

Монгол Улсын Ерөнхий сайд Н.Алтанхуяг ОХУ-ын Байгалийн нөөц, экологийн сайд, Монгол, Оросын Засгийн газар хоорондын комиссын Оросын хэсгийн дарга С.Е.Донскойг өнөөдөр хүлээн авч уулзахдаа “Энэ сард Халх голын тулалдаанд ялалт байгуулсны 75 жилийн ойг манай улс тэмдэглэхээр  төлөвлөж байна. Энэ түүхэн ойн баярт Оросын тал ач холбогдол өгч, өндөр дээд түвшинд оролцох гэж буйд талархаж байна” гэж хэллээ.

Энэ оны есдүгээр сард ОХУ-ын Ерөнхийлөгч В.В.Путины манай улсад хийх айлчлалд Монголын тал өндөр ач холбогдол өгч, бэлтгэл ажлыг ханган ажиллаж байгаа гэлээ.

ОХУ-ын Байгалийн нөөц, экологийн сайд, Монгол, Оросын Засгийн газар хоорондын комиссын Оросын хэсгийн дарга С.Е.Донской ажлын айлчлалынхаа үеэр Засгийн газар хоорондын комиссын өмнөх хуралдааны шийдвэрүүдийн хэрэгжилтийн явцыг дүгнэж, хэрэгжүүлж байгаа ажлыг эрчимжүүлэх чиглэлийн талаар ярилцаж, санал мэдээлэл харилцан солилцсон талаар Ерөнхий сайдад мэдээллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.  

Categories
мэдээ нийгэм

Төв замаар төлбөртэй зорчихыг хотын мэр дэмжиж байна

Нийслэлээс замын түгжрээг бууруулах чиглэлээр багагүй ажил хэрэгжүүлж буй. Дугаарын хязгаарлалттай өдөр, нэгдүгээр эгнээнд зогссон машинд тавьж буй торгууль, эхний эгнээгээр зөвхөн нийтийн тээвэр зорчих журам гээд багагүй шийдвэрүүд нь замын  түгжрэлийн асуудлыг шийдэхэд нөлөө үзүүлж байгаа. Хотын төвийн замаар тодруулж хэлбэл бага тойруугаар зорчих иргэд төлбөр төлөх талаар нийслэлийн хэмжээнд яриад эхэлсэн. Төлбөр нь 40-50 мянган төгрөг гэсэн тоо яригдаж буй. Хотын даргын хувьд энэ асуудлыг дэмжиж байгаагаа өнөөдөр мэдэгдлээ. Дэлхийд бусад улсын нийслэлүүд ч ийм жишиг барьдаг байна. Төлбөрийн хувьд үүнээс бага тогтоох боломжгүй гэж тэрээр үзэж байгаа аж. НИТХ-аар ирэх долоо хоногт хэлэлцэх энэ асуудал жолооч нарын шүүмжлэлд өртөөд байгаа. Хотын удирдлагын хувьд бүр болохгүй бол ард иргэдээс санал асуулга авна гэсэн байр суурьтай байгаа аж. 

Categories
мэдээ эдийн-засаг

“Монгол-Солонгосын эдийн засгийн форум” болно

“Монгол-Солонгосын эдийн засгийн форум” ирэх 10-12-ны ѳдрүүдэд “Их тэнгэр цогцолбор”-т болох гэж байна. Форумын үндсэн зорилго Монгол Улс болоод БНСУ хоорондын эдийн засгийн хамтын ажиллагааг дэмжих, харилцан үр ашигтай, нөхөрсөг харилцааг хөгжүүлэхэд оршино гэж зохион байгуулагчид нь хэлж байна. Форумд Монгол-Солонгосын Эдийн Засгийн Форумын дарга Г.Батхүү, Солонгос-Монголын Хамтын Aжиллагааны Форумын дарга Жүн Жан Сон, Монгол-Солонгосын Эдийн Засгийн Форумын дэд дарга, Эрдэнэс Таван Толгой ХК-ийн гүйцэтгэх захирал Я.Батсуурь, “Корейн Эйр” компанийн захирал Жи Чан Хун, Монгол Улсаас БНСУ-д суугаа Онц бөгөөд бүрэн эрхт элчин сайд Б.Ганболд нар болон хоёр улсын парламент, Засгийн газрын гишүүдийн төлөөлөл оролцоно.Форумын өдрүүдэд төлөөлөгчдийг Тавантолгой ХК, Оюутолгой ХХК болон Монгол Улс дахь БНСУ-ын компаниудын үйл ажиллагаатай танилцуулах, хоёр орны улс төр, бизнесийн салбарт цаашдын хамтын ажиллагааг далайцтай өрнүүлэх талаар хэлэлцэхээр бэлтгэж байгаа аж.

Categories
гадаад мэдээ

Эбола вирусын эсрэг вакциныг хүн дээр туршихаар болжээ

Канадын Tekmira Pharmaceuticals компани эбола вирусын эсрэг вакцин бүтээхээр ажиллаж байгаа. Энэ  компанид  тус вакциныг хүн дээр турших зөвшөөрлийг АНУ-ын Эм, эмийн бүтээгдэхүүнийг зохицуулах хорооноос олгожээ.Үхэлд хүргэх эбола вирус Баруун Африкийн дөрвөн оронд хүчтэй тархаад байгаа билээ. Tekmira компани тус вакциныг TKM-Ebola гэж нэрлэсэн бөгөөд мичинд хийсэн туршилтаар эерэг дүн үзүүлсэн байна.