Автомашины дугуйг түгжих тухай НИТХ-ын тэргүүлэгчдээс гаргасан журам өчигдрөөс хэрэгжиж эхэллээ. Өөрөөр хэлбэл, ачаалал ихтэй Их, Бага тойруу, Сөүлийн гудамж, хотын төвийн замын нэгдүгээр эгнээд машинтайгаа түр буюу удаан зогссон эсвэл ногоон байгууламж, явган зам, нийтийн эзэмшлийн зам талбай дээр зогссон бол машиныхаа урд дугуйг түгжүүлнээ л гэсэн үг. Түүнчлэн жолооч нь эзгүй байгаа болон бүрэн бус тээврийн хэрэгслүүд ч үүнд хамаарч явах эрхгүй болно.
Дугуйгаа түгжүүлсэн иргэдийн хувьд торгуулийн хуудас бичүүлж, 20 мянган төгрөг төлснөөр машинаа “өөрийн” болгох юм билээ.
Энэ журмыг өнгөц харахад нийслэлийн удирдлагууд маань ядарсан муу иргэдээ “бодож”, шууд ачаад явчихаас арай хөнгөн “шийтгэл”-ийг оногдуулжээ гэмээр.
Гэхдээ ийм шинэ арга хэмжээ авлаа гээд машин ачих үйл ажиллагаа зогсчихгүй юм билээ. Дээрх тохиолдлуудаас арай хүнд буюу замын хөдөлгөөний ноцтой зөрчил гаргасан үед ачна гэсэн.
Автомашиныг ачиж байх үед хамгийн багадаа 80 мянган төгрөг, машины овор хэмжээнээс хамаарч түүнээс дээш төлбөр төлж байж машинаа журмын хашаанаас олж авч байв. Үүнээс хойш автомашин ачих үйлчилгээ үзүүлэгч компаниуд хэдэн саяыг халаасалж, энэ төрлийн бизнес цэцэглэсэн. Бүр ийм бизнес хийе гээд хэдэн зуугаараа хүсэлтээ ирүүлээд байгаа гэсэн шүү. Ингэж зөвхөн мөнгөний төлөө улайрсан компаниуд хэдхэн сартай нярай хүүхэдтэй машиныг ачаад явчихсан тохиолдол ч гарсан.
Одоо харин дугуй түгжигч гэх шинэ бизнес гарч ирэв. Иргэд машинаа ачуулчихаад хаана хандахаа мэдэхгүй, цаг заваа алдаж бухимддаг байсан бол одоо дугуйгаа түгжүүлчихээд банк хайх, улмаар банкны урт дараалалд зогсох, эргэж ирж төлбөр төлсөн дансны хуулгаа өгөх гэсэн олон шат дамжлагыг давах хэрэгтэй боллоо. Магадгүй халаас хоосон нэгэн таарвал мөнгө хайж хаа нэг тийшээ гүйх ч хэрэг гарав шүү.
Ер нь эдгээр арга хэмжээний эцсийн зорилго нь замын хөдөлгөөний түгжрэлийг сааруулах гэж байгаа. Гэтэл яг үнэндээ дээр хэлсэн шат дамжлагуудыг дамжсаар явтал дор хаяж 30 минут болно. Тэгэхээр юун нөгөө замын хөдөлгөөнийг саадгүй болгох манатай болох биш үү.
Нөгөө талаас 20 мянган төгрөг төлж тайлуулах энэ түгжээ хэний бизнес вэ гэдэг асуудал сөхөгдөнө. Хэн, хэзээ, хичнээн ширхэг түгжээг Замын хөдөлгөөний удирдлагын төвд шахчихсан нь ийнхүү иргэдийн толгой дээр буув. Зарим хэвлэл мэдээллийн хэрэгслээр хотын мэр Э.Бат-Үүлийн хүү Б.Чулуудайн “Грандлайн” компаниас нийлүүлж байгаа гэх юм. “Грандлайн” бол брокер диллерийн компани байснаа гэнэт барилгын компани болж БЗД-ийн гэр хорооллыг дахин төлөвлөх томоохон төслийг хэрэгжүүлэгч болсон билээ. Тиймээс бас л гэнэт үйл ажиллагаагаа өөрчлөн дугуй түгжигчийн бизнес эрхлэхээр болсон байж ч болох л юм.
Мөн “Яаж сэтгэвэл иргэдээсээ мөнгө салгах вэ” гэдэг уралдаанд түрүүлсэн санаа мэт. Машиныг нь ачаад байхаар иргэд барагтай бол хүнд, ноцтой зөрчил үүсгэхээ больж, нийслэл болон автомашин ачигч компанийн орлого буурсан энэ цаг үед дахин мөнгө хайх боломжийг эрэлхийлсэн нь ийм шийдэлд хүргэсэн юм болов уу даа. Магадгүй жижиг, жижиг зөрчлүүдэд дөрөөлөн 20 мянган төгрөг салгах энэ арга хэмжээ нь автомашин ачихаас илүү орлогыг ч тэдэнд авчирч болох юм. Ингэж хардахаас өөрөөр замын хөдөлгөөнийг шуурхай, чирэгдэлгүй болгохын тулд хийж байна гэж огтхон ч харагдахгүй байна. Харин ч ойр зуурхны зөрчлийн улмаас дугуйгаа боолгуулсан хэдэн арван автомашин энд тэндгүй зогсож, хэдэн минутаар үргэлжлэх байсан түгжрэл хэдэн цаг болох бус уу.
Хэдхэн хоногийн өмнө Нийслэлийн Засаг дарга маань хотын төвөөр автомашинтай явбал 40-50 мянган төгрөг авна гэж жолооч нарыг бухимдуулж үзсэн.
Энэ бүхнээс харахад төр засаг улмаар нийслэлийн удирдлагууд маань иргэдийгээ хэрхэн аюулгүй, эрүүл, сэтгэл санааны дарамтгүй орчинд амьдруулах вэ гэсэн улиг болсон “үүргээсээ” илүүтэйгээр жаахан ч гэсэн шалтаг, өө гарвал хэдэн мянган төгрөгөөр хэмжээд буцаагаад авчих вэ гэсэн бодлыг л өдөр шөнөгүй бодож суудаг юм шиг ээ. Ер нь энэ нийгэм хүнийг хүн гэж үзэлгүй мөнгө гэж хараад байгаа нь нийслэлийнхний энэхүү дугуй түгжих журмаас харагдаж байгаа юм.
Т.ГЭРЭЛ
Италид сургуулилт хийж байсан хоёр сөнөөгч онгоц хоорондоо мөргөлдөж осолдсон хэрэг гарчээ. Уг осол Марке мужийн Асколи хэмээх газраас 30 километрийн зайтай болсон бөгөөд осолдсон онгоцууд модтой ууланд унасны улмаас гал гарсан байна.
ОХУ-ын Ерөнхийлөгч В.Путин, Украины Ерөнхийлөгч П.Порошенко нар Белоруссийн нийслэлд уулзаж магадгүй гэнэ. Зарим эх сурвалжуудын мэдээлж байгаагаар энэ сарын 26-ны өдөр уулзах бололтой. Минск хотноо болох Гаалийн холбооны уулзалтад хоёр улсын төрийн тэргүүнүүд оролцох юм байна. Гэвч тэд энэ үеэр хэлэлцээ хийх эсэх нь одоогоор тодорхойгүй аж.
Засгийн газрын хэрэгжүүлэгч агентлаг Газрын харилцаа, геодези, зурагзүйн газар нь 21 аймаг, 330 сумын нутаг дэвсгэрт үнэ төлбөргүйгээр газар өмчилсөн иргэний бүртгэлийг нэгтгэж, мэдээллийн нэгдсэн сан байгуулжээ. Энэхүү мэдээллийн сангийн үйл ажиллагаа ирэх сарын нэгнээс албан ёсоор эхэлнэ. Мэдээллийн сангийн төв сервер нь Газрын харилцаа, геодези, зурагзүйн газарт байрлаж, нийслэлийн Өмчийн харилцааны газар, есөн дүүргийн Өмч, газрын харилцааны алба, 21 аймгийн ГХБХБГ, 330 сумын газрын даамал интернет сүлжээгээр холбогдож ажиллана. Мэдээллийн сан ашиглалтад орсноор иргэд заавал орон нутгаасаа газар өмчлөлийн тодорхойлолт авах шаардлагагүй болно. Өөрөөр хэлбэл мэдээллийн нэгдсэн санг ашиглан, хүссэн аймаг, сумаас тодорхойлолт гаргуулах боломж бүрдэх аж.
Зүүн хойд Азийн Хотын дарга нар форумд нийслэлийн Засаг даргын урилгаар ОХУ-ын Москва, Якутск, Владивосток, Иркутск хотын удирдлагууд оролцсон юм. Форумын үеэр нийслэлийн Засаг дарга бөгөөд Улаанбаатар хотын Захирагч Э.Бат-Үүл ОХУ-ын Иркутск хотын орлогч дарга, Эдийн засгийн хорооны дарга ноён Алмухамедов Алексей тэргүүтэй төлөөлөгчдийг хүлээн авч уулзав. Уулзалтын үеэр нийслэлийн Засаг дарга эхний ээлжинд Иркутск хоттой гурван чиглэлээр хамтарч ажиллах хүсэлтэй байгаагаа илэрхийлсэн юм. Иркутск хотын хуучны барилгуудыг уламжлалаа хадгалж, сэргээн засварласан туршлага, Агаарын бохирдлын эсрэг хэрэгжүүлж буй хөтөлбөр, Иркутск хотын орлогч даргын хэлсэнчлэн Өвлийн аялал жуулчлалыг хөгжүүлэхэд харилцан суралцаж туршлага судлах хүсэлтэй буйгаа илэрхийлж, хамтран ажиллахаар тохиролцов. 
Японы Хирошимад хэдэн хоногийн турш үргэлжилсэн бороо орсоны улмаас газар нурж 18 хүн нас барсан байна. Нас барагсдын хоёр нь 2, 11 настай хүүхдүүд аж. Байгалийн гамшиг болсон газруудад аврах багийнхан ажиллаж нурангид дарагдсан хүмүүст тусламж үзүүлж байна.
Бат инженер хэмээх нэрээр твиттерт алдаршсан Ц.Бат-Монголын шvvх жиргээг “хэвлэл мэдээллийн хэрэгсэл”-д тооцох эсэх асуудал өнөөдөр шийдэгдэнэ… хэмээн жиргэсэн байна лээ. 
“Майкрософт”-ийн Удирдах зөвлөлийн дарга Стив Балмер ажлаа өгсөн байна. 34 жил тус компанид үнэнчээр зүтгэсэн гэдгээ ч тэрээр онцолсон байна. С.Балмер нь “Лос-Анжелес Клипперс “клубт ажиллахаас гадна багшлах гэнэ. Гэхдээ “Майкрософт”-ийн нэлээд хэмжээний хувьцааг эзэмшдэгтул тус компанитай ямар ч холбоогүй болохгүй гэжээ. 
Хятадын Наньжин хотноо өнгөрсөн бямба гарагт эхэлсэн “Наньжин-2014” дэлхийн залуучуудын II наадмын нээлтийн ёслолыг Хятадын Ерөнхийлөгч Си Зиньпин нээж үг хэлсэн юм. Энэхүү наадамд 204 орны 14-18 насны 3808 тамирчин спортын 30 төрөлд өрсөлдөж байна. Уламжлал ёсоор наадмын эхний өдөр усанд сэлэлт, спортын гимнастик болон туялзуур сэлэмний төрлийн тэмцээнээр эхэлж, медалиуд гардуулсан.
Энэ жил олон жилийн дундажтай харьцуулахад бороо хур элбэг, гол усны түвшин ч нэмэгдсэн хэвээр байна. Түүнчлэн энэ зуны хувьд Онцгой байдлын албанд иргэдээс ирсэн ихэнх дуудлага үер, гол устай холбоотой байжээ. Онцгой байдлынхан энэ зун 164 эрдэнэт хүний амь насыг уснаас авран хамгаалжээ. Иргэдийн анхаарал болгоомжгүйгээс шалтгаалан өнөөдрийн байдлаар гэхэд гол усанд осолдсон хүний тоо 77-д хүрсэн байна. Үүний 14 нь бага насны хүүхэд аж.