Month: August 2014

Categories
мэдээ соёл-урлаг

“Соёл урлагийн мэдээллийн төв” албан ёсны нээлтээ хийнэ

Монголын уран бүтээлчид болоод урлаг соёлын байгууллагуудын шинэ шинэлэг уран бүтээлийн мэдээ мэдээллийг мэргэжлийн өндөр ур чадвартай, чадварлаг хамт олны бэлтгэсэнээр, хамтран ажилладаг хэвлэл мэдээллийн байгууллагуудаараа дамжуулан уншигч, сонсогч, үзэгч түмэнд хүргэх эрхэм зорилготойгоор “Соёл урлагийн мэдээллийн төв” байгуулагдан үйл ажиллагаагаа явуулж эхэлжээ.

Уран бүтээлчдийн тоглолт, шоу арга хэмжээний хэвлэлийн хурал, шинэ уран бүтээлийн нээлт хаалт, уран бүтээлчдийн хурал зөвлөгөөн, уулзалт семинар зэргийг мэргэжлийн өндөр түвшинд зохион байгуулж буй  тус төв нь энэ оны эхнээс үйл ажиллагаагаа явуулж эхэлсэн бөгөөд өнгөрсөн хугацаанд олон арван уран бүтээлчдийн тоглолтын хэвлэлийн хурал, шоу арга хэмжээ, уулзалт семинарыг зохион байгуулж иржээ. Ийнхүү урлагийнхны мэдээ мэдээллийг нэг цэгээс, нийтэд түргэн шуурхай түгээн ажиллаж буй тус төвийн хамт олон ирэх сард уран бүтээлчдийн төлөөллүүд болон хэвлэл мэдээллийн салбарын төлөөллүүдийг оролцуулсан албан ёсны нээлтээ хийхээр төлөвлөжээ.

“Соёл урлагийн мэдээллийн төв” нь 100-200 хүний багтаамжтай хурлын их танхим, 30-60 хүний багтаамжтай хурлын бага танхим, 10-30 хүний багтаамжтай VIP танхимууддаа захиалга авч байгаа аж. Үүнд:

•    Тоглолтын хэвлэлийн хурал

•    Шинэ уран бүтээлийн нээлт, хаалт

•    Уран бүтээлчдийн уулзалт семинар

•    Шинэ цомгийн баяр

   зэргийг мэргэжлийн өндөр түвшинд тав тухтай тохилог зориулалтын орчинд, орчин үеийн дэвшилтэт техник тоног төхөөрөмжид тулгуурлан зохион байгуулдаг бөгөөд олон улсын чанартай хурал зөвлөгөөн, уулзалт семинарыг зориулалтын Синхрони орчуулгын төхөөрөмж ашиглан зохион байгуулдаг юм. Мөн үйл ажиллагааныхаа фото зураг, видео бичлэгийг зохион байгуулагчдад нь хүлээлгэн өгч ажилладагаараа онцлог ажээ.

Categories
мэдээ нийгэм

Цусны хорт хавдартай хүүхдийн эмнэлэг ирэх долоо хоногт нээлтээ хийнэ

Ажаа Гэгээнтний хандив тусламжаар баригдаж буй цусны хорт хавдартай хүүхдийн эмнэлэг энэ сарын 28-нд нээлтээ хийх гэж байна.

Үүнтэй холбогдуулан хэсэг залуус нэгдэн өчигдөр тус барилгын дараах их цэвэрлэгээ хийжээ.

Энэхүү сайн үйлсийн аяныг Монголын Залуучуудын Холбоо санаачилж Энэрэл нигүүсэл оюун билгийн төв, МЗХ – ны дэргэдэх Залуучуудын хөдөлмөрийн төв бирж , Нийтийн үйлчилгээний Улаанбаатар нэгтгэлийн зүүн бүс ОНӨААТҮГ, Цус сэлбэлтийн үндэсний төв, Залуу дугуйчин клуб хамтран зохион байгуулсан байна.

Хүүхдийн цусны эмгэг, хавдрын эмнэлгийн бүтээн байгуулалтын ажилд нийт 70 гаруй хүүхэд багачууд, оюутан залуус хүрэлцэн ирсэн аж.

Ажиа Гэгээнтэн өөрийн болон олон сайхан шавь, сүсэгтэн  олны хандиваар баригдсан энэхүү эмнэлэг нь нийт 75 ортой байх бөгөөд дотроо хавдрын, хүүхдийн эрчимт эмчилгээний, хагалгааны гэсэн гурван үндсэн тасагтай байх юм.

Уг эмнэлгийг тун удахгүй ашиглалтанд оруулж Монгол улсын засгийн газар, Эрүүл мэндийн яаманд хүлээлгэн өгнө.

Categories
мэдээ спорт

Ширэний теннисний өсвөрийн тамирчид Японыг зорино

Монголын ширээний теннисний холбооны өсвөрийн шигшээ баг Японы Осака хотод болох Зүүн Азийн “HOPES” олон улсын А зэрэглэлийн тэмцээн болон Токио хотноо Азийн хотуудын аварга шалгаруулах олон улсын тэмцээнд оролцохоор маргааш тус улсыг зорих гэж байна. 

Энэ сарын 26-наас 31-ны өдрүүдэд Японы Осака, Токио хотуудад болох ширээний теннисний өсвөрийн олон улсын тэмцээнд Монгол Улсын эрэгтэй, эмэгтэй тус бүр найман тамирчин, хоёр дасгалжуулагч, нэг албаны хүний хамтаар оролцох гэж байна.

Осака хотод болох Зүүн Азийн 12-с доош насны тамирчдын “HOPES” олон улсын А зэрэглэлийн тэмцээнд Б.Цэрэнтогтох дасгалжуулагчтай өсвөрийн арван тамирчин оролцоно. Тус тэмцээний багийн бүрэлдэхүүнд хөвгүүдээс Б.Билгүүн (“Шинэ Эргэлт” клуб), Г.Бат-Ирээдүй (“Оч”), Э.Оргил (“Хангарьд”), А.Чингүүм (“Оч”), Г.Жаргалсайхан (“Шинэ-Од”), охидоос Б.Болор-Эрдэнэ (“Оч” клуб), Ө.Балжинням (“Шинэ Эргэлт”), Э.Намуунбайгаль (“Оч”), Г.Сэлэнгэмөрөн (Говьсүмбэр аймаг), Э.Мичид (Хангарьд) нар багтжээ.

Мөн удаах тэмцээн наймдугаар сарын 27-31-ний өдрүүдэд Токио хотноо болно. Азийн нийслэл хотуудын өсвөрийн 13-15 насны тамирчдын аварга шалгаруулах А зэрэглэлийн олон улсын тэмцээнд Монголын ширээний теннисний холбооны нарийн бичгийн дарга Ч.Амарсанаа ахлагчтай, Ж.Болд дасгалжуулагчтай өсвөрийн зургаан тамирчин уригдан оролцох гэж байна.

Энэхүү тэмцээн нь 2020 онд Токио хотод болох Зуны олимпийн наадмын маркетинг, идэвхижүүлэлтийн хүрээнд Токио хотын захиргаа, Токио хотын ширээний теннисний холбооноос санаачлан тэмцээнд оролцож байгаа бүх баг тамирчдын зардлыг санхүүжүүлэн зохион байгуулж байгаа томоохон тэмцээн юм. Тэмцээнд Азийн 20 гаран нийслэл хотын өсвөрийн шилдэг ширээний теннисчид оролцож, ирээдүйн дэлхий, олимпийн аварга шилдэг тамирчдыг Ази тивээс тодруулах, Азийн нийслэл хотуудын харилцаа холбоо, харилцан ойлголцолыг спортоор дамжуулан бэхжүүлэх зорилготой болно.

Монголын багийн бүрэлдэхүүнд хөвгүүдээс Ч.Эрдэнэбаяр (“Оч”), Ө.Лхагва-Эрдэнэ (“Оч”), М.Тэмүүлэн (“Шинэ-Эргэлт”), охидоос М.Ундрам, Р.Мөнхнаран (хоёул “Оч” клуб), Б.Хонгорзул (Баянхонгор аймаг) нар тус тус багтжээ. 

Монголын ширээний теннисний холбооны өсвөрийн баг тамирчдын хувьд энэ зуны турш бэлтгэл сургуулилалтаа хийсэн бөгөөд маргааш буюу наймдугаар сарын 26-нд Япон улсыг зорих гэж байна.

Categories
мэдээ спорт

Б.Мөнгөнтуул мөнгөн медаль хүртлээ

Польшийн Катовиц хотноо өчигдөр(08.24) өндөрлөсөн шатрын оюуны Дэлхийн аварга шалгаруулах тэмцээнээс Үндэсний шигшээ баг, “Алдар” спорт хороо, Завхан аймгийн тамирчин, Их мастер Батхуягийн Мөнгөнтуул (2410) 6.0 оноогоор мөнгөн медаль хүртлээ.

Олон улсын 18 цолтонтой, нийт 26 шатарчин есөн өрөг тоглосноос Польшийн Кладиа Кулон (2301) 8.5 оноогоор алтан медаль хүртсэн бол Б.Мөнгөнтуул, БНХАУ-ын Дин Ишин (2449) нар 6.0 оноогоор мөнгө, хүрэл медаль хүртлээ. Харин чансаагаараа зургаад эрэмбэлэгдсэн Сэлэнгэ аймаг, “Бороо гоулд” ХХК-ийн тамирчин, Их мастер, Алтан-Өлзийн Энхтуул (2300) 3,5 оноогоор 22-р байрт шалгарсан амжилтыг үзүүллээ.

14 их мастер цолтой бүхий 46 эрэгтэй шатарчыг чансаагаараа тэргүүлсэн ОХУ-ын Халимагийн их мастер Сугиров (2449) 6.5 оноогоор алтан медаль хүртлээ. Манай шатарчдаас их мастер Ц.Батчулуун (2513) 6,0 оноогоор шагналт V байрт шалгарсан бол олон улсын мастер Г.Мөнхгал (2418) 5.0 оноогоор XVIII, спортын мастер Б.Галмандах 4.0 оноогоор XXX байр эзэллээ.

Оюутны дэлхийн аваргын гурав дахь медалиа хүртээд байгаа Ч.Мөнгөнтуулийн хувьд 12 насандаа Монгол Улсын спортын мастер, 13 насандаа олон улсын мастер, 15 насандаа олон улсын их мастер цолыг хүртсэн. Тэрээр өсвөрийн шатарчдын дэлхийн аваргаас Монгол Улсын анхны хүрэл медалийг эх орондоо авчирч байсан. Түүнээс хойш өсвөрийн дэлхийн аваргаас мөнгө, Азийн бүсийн аваргын алт, хос мөнгөн медаль, Универсиад наадмын мөнгөн медалийг хүртсэн бол оюутны дэлхийн аваргын хувийн алт, мөнгө, багийн алтан медалийг хүртээд байна. Мөн ОХУ-ын Түргэн тоглолтын хоёр удаагийн аварга цолыг хүртээд байгаа тэрээр Монгол Улсын анхны эрэгтэйчүүдийн олон улсын мастер цолтон юм.

Categories
мэдээ нийгэм

Адуучин 2014 тэмцээн боллоо

Ерөнхий сайдын ивээл дор жил бүр зохион байгуулдаг “Адуучин 2014” тэмцээнд 21 аймгаас шалгарч ирсэн адуучид уурга ташуур шүүрэх, уран уургач, уран бугуйлч, эмнэг хангал сургагч гэсэн дөрвөн төрлөөр өрсөлдөж шилдгүүдээ тодрууллаа.

Монголчуудын адуу эдлэх соёлыг олон нийтэд  түгээн сурталчлах, энэ соёлыг хадгалж хамгаалж үлдэх, эзэмшихэд энэ “Адуучин” тэмцээн чухал ач холбогдолтой. Бидний бахархал болсон энэ соёл, уламжлалыг олон нийтэд сурталчилж, хүртээл болгох үүднээс ирэх жилээс энэ тэмцээнийг Үндэсний их баяр наадмын хөтөлбөрт оруулах болсон гэж Ерөнхий сайд Н.Алтанхуяг тэмцээнд оролцогчдод хандаж хэллээ.

Аймаг бүрээс шалгарч ирсэн шилдэг адуучдаас Хэнтий аймгийн Биндэр сумын адуучин Х.Бат-Эрдэнэ шилдгийн шилдгээр шалгарч Ерөнхий сайдаас шагналаа гардлаа.

Categories
онцлох-нийтлэл туслах-ангилал

Сондгой тоогоор төгссөн машин хөдөлгөөнд оролцоно

-Сондгой тоогоор төгссөн машин өнөөдөр хөдөлгөөнд оролцоно. –


Наймдугаар сарын 22-ноос 31-ныг дуустал автомашиныг тэгш, сондгойгоор нь ангилан замын хөдөлгөөнд оролцуулах шийдвэрийг НЗДТГ-аас гаргасан билээ.

Энэ хуваарийн дагуу хэрэв таны Тээврийн хэрэгсэл тэгш тоогоор буюу 0, 2, 4, 6, 8-аар төгссөн бол наймдугаар сарын 22, 24, 26, 28, 30-ны өдөр замын хөдөлгөөнд оролцоно. Харин сондгой тоогоор буюу 1, 3, 5, 7, 9-өөр төгссөн бол наймдугаар сарын 23, 25, 27, 29, 31 өдөр замын хөдөлгөөнд оролцох боломжтойг анхаарна уу.

Жич: Нийтийн тээврийн хэрэгслүүд түргэний машин, цагдаагийн машин энэ хязгаарлалтад хамаарахгүй болно.

Categories
онцлох-нийтлэл туслах-ангилал

Өнөөдөр Монголын залуучуудын өдөр

-“Цагийн ажил-2” хөдөлмөрийн яармаг Монголын залуучуудын холбооны гадна талбайд болно-

Монголын залуучуудын өдөр өнөөдөр болно. Тэртээ 92 жилийн өмнө Монголын залуучуудын хөдөлгөөн үүсч, үг хэлэх эрх чөлөөгөө хангуулахаар албан ёсоор нэгдэж байжээ. 1997 онд Монгол Улсын Засгийн газар тогтоол гарган, жил бүрийн наймдугаар сарын 25-нд энэхүү түүхэн өдрийг тэмдэглэж байхаар шийдвэрлэжээ. Түүнээс хойш манай улс Залуучуудын өдрийг тэмдэглэн ирсэн бөгөөд даруй 17 жилийг ардаа орхижээ. Монголын Залуучуудын Холбооны дэргэдэх “Залуучуудын Хөдөлмөрийн Төв Бирж” Нийслэлийн хөдөлмөрийн газартай хамтран оюутны хөдөлмөр эрхлэлтийг нэмэгдүүлэх, цагийн ажлын системийг боловсронгуй болгох зорилгоор наймдугаар сарын 25-нд буюу “Монголын залуучуудын өдөр”-өөр 10.00-17.00 цагийн хооронд “Цагийн ажил-2” хөдөлмөрийн яармагийг Залуучуудын холбооны гадна талбайд зохион байгуулах гэж байна. Хөдөлмөрийн яармагт 15-аас 20 ажил олгогч байгууллага оролцох бөгөөд нээлттэй ажлын байранд оюутан залуучууд шууд зуучлагдахаараа онцлог юм. Мөн ажил хайгчаар бүртгүүлсэн залуучуудыг Нийслэлийн Хөдөлмөрийн Газрын цагийн ажлыг дэмжих бодлогын хүрээнд зохион байгуулагдах ажлуудад хамруулах бөгөөд хичээлийн бус, чөлөөт цагаараа цагийн ажил хийж орлого олох хүсэлтэй хүн бүр хамрагдах ажээ.Хөдөлмөрийн яармагт оролцсоноор ажил олгогчид хүний нөөц бүрдүүлэх, компанийн үйл ажиллагааг олон нийтэд таниулах, лед дэлгэцээр компанийхаа сурталчилгааг гаргах, их дээд сургуулиудын оюутан залуучуудын төвлөрлийг бий болгох, хэвлэл мэдээллийн байгууллагад үнэ төлбөргүй нээлттэй ажлын байраа сурталчилах бол ажил хайгчид цагийн ажлын байранд шууд зуучлагдах, ажлын байрны талаарх бүх мэдээллийг авах, оюутнууд дадлага хийх байгууллага, аж ахуй нэгжийг сонгох, МУ-ын хөдөлмөрийн мэдээллийн нэгдсэн санд бүртгэгдэх, оюутнууд дадлага хийх байгууллага, аж ахуй нэгжээ сонгох зэрэг боломжууд нээлттэй байх юм байна.

Categories
мэдээ

Зургаан цагаан мэнгэтэй шар луу өдөр

Аргын тооллын наймдугаар сарын 25. Сумъяа гариг. Билгийн тооллын 30. Зургаан цагаан мэнгэтэй шар луу өдөр. Өдрийн наран 06.07 цагт мандан 19.50 цагт жаргана. Тухайн өдөр хулгана, бич жилтнээ аливаа үйлийг хийхэд эерэг сайн. Эл өдөр элдэв үйлд хянуур хандах хэрэгтэй ба ан гөрөө хийх, мал, адгуус муулах, хөгжмийн зэмсэг урлахад сайн. Гүүр тавих, газар малтахад муу. 

Өдрийн сайн цаг нь бар, луу, могой,  бич, тахиа, гахай болой. Хол газар яваар одогсод зүүн урагш мөрөө гаргавал зохистой. Үс шинээр үргээлгэх буюу засуулахад тохиромжгүй.

Categories
мэдээ нийгэм

Ихэнх гол, мөрний усны түвшин буурчээ

Гол, мөрний усны горимын тойм:

2014 оны наймдугаар сарын хоёрдугаар арав хоног

1.Хойт мөсөн далайн ай савын гол мөрөн

Хөвсгөлийн уулсаас эх авсан Дэлгэрмөрөн, Эг, Бэлтэс, Бүгсий, Үүр, Шишхэд голын усны түвшин наймдугаар сарын хоёрдугаар арав хоногт ерөнхийдөө хоногийн түвшний хэлбэлзэл багатай байсан ба өнгөрсөн оны мөн үеийнхээс 20-40 см ахиу байлаа.

Хангай нурууны арын Идэр, Хануй, Чулуут, Суман, Урдтамир, Хойттамир зэрэг голууд өмнөх арав хоногт түвшний хэлбэлзэл багатай хугацааны дундуур буурсан хандлагатай байна.

Хангайн арын Идэр голын дунд болон Хануй, Суман голын арав хоногийн дундаж түвшин 2013 оны мөн үеийнхээс 10-30 см их , бусад голууд арав хоногийн дундаж утгаараа олон жилийн дундаж болон өнгөрсөн оны мөн үеийнхээс 20-40 см бага түвшинд байна.

Хэнтэй нурууны баруун хажуугаас усжих Хүдэр, Хараа, Ерөө, Тэрэлж, Сэлбэ, Улиастай, Туул, Сөгнөгөр зэрэг голууд энэ арав хоногийн эхээр 5-10 см нэмэгдээд хугацааны сүүл рүү аажим буурсан явцтай байна. Хүдэр, Ерөө, Санзай, Сэлбэ, Сөгнөгөр голуудын арав хоногийн дундаж түвшинг олон жилийн дундаж болон 2013 оны мөн үеийнхтэй харьцуулбал 5-10 см их харин Туул, Хараа, Тэрэлж зэрэг голууд 10-30 см бага түвшинд байна.

Сэлэнгэ мөрөн Орхон голын дагууд усны түвшин өнгөрсөн арав хоногийн турш аажим буурсан ба хоногийн түвшний өөрчлөлт 5-10 см байлаа. Сэлэнгэ мөрний дагуух усны түвшин арав хоногийн дундаж утгаараа өмнөх оны мөн үеэс 20-50 см бага харин Орхон голын дагуу 10-50 см их түвшинд байна.

2.Номхон далайн ай савын гол мөрөн

Хэнтэй нурууны ар, зүүн өврөөс эхтэй Хурх, Барх, Эг, Балж, Онон, Хэрлэн зэрэг голын усны түвшин өнгөрсөн арав хоногийн турш хоногт 2-5 см буурсан бол Хэрлэн голын адаг буюу Чойбалсан хот орчмоор хугацааны эхээр үерийн түвшинг 5-10 см даван үерийн байдалд шилжсэн байна. Их Хянганы нуруунаас эхтэй Халх голын дагууд усны түвшинхугацааны турш буурсан хэдий ч Ялалт баг орчмоор үерийн аюултай түвшинг давсан хэвээр харин Улз голын усны түвшин хугацааны турш буурч түвшний өөрчлөлт багатай байлаа.

Номхон далайн ай савын дээр дурьдсан голуудын арав хоногийн дундаж утга өмнөх 2013 оны мөн үе болон олон жилийн дундаж түвшнээс 20-90 см их байв.

3. Төв Азийн гадагш урсацгүй ай сав

Алтай нуруунаас эх авсан Ховд, Буянт, Булган, Сагсай, Турган, Харбут, Чигэртэй, Дундцэнхэр зэрэг голууд өмнөх арав хоногийн турш аажим буурсан ба эдгээр голуудын арав хоногийн дундаж түвшинг өнгөрсөн оны мөн үе болон олон жилийн дундажтай харьцуулбал 60-120 см бага харин ус судлалын харуул Ховд-Мянгад, Буянт-Ховд орчимд олон жилийн дунджаас 10-20 см ахиу түвшинд байна.

Хангай нурууны өврийн Чигэстэй, Богд, Завхан, Заг, Хүнгүй, Түй, Зүйл, Цагаантуруут, Байдраг, Онги зэрэг голын усны түвшин өнгөрсөн хугацааны турш аажим буурсан хандлагатай буюу хоногийн түвшний хэлбэлзэл 1-2 см байсан байна. Завхан, Түй, Шаргалжуут, Онги, Таац голуудын арав хоногийн дундаж түвшинг өнгөрсөн оны мөн үетэй харьцуулбал 10-50 см их, олон жилийн дунджаас 20-50 см бага байв.

Увс нуурын сав газрын Чигж, Түргэн, Баруунтуруун, Тэс, Хариг зэрэг голуудын усны түвшин өнгөрсөн арав хоногийн турш түвшний хэлбэлзэл багатай ба арав хоногийн дундаж утгаараа эдгээр голуудын усны түвшин олон жилийн дунджаас 10-30 см бага харин Хархираа голын хувьд 5-10 см их байна.

Наймдугаар сарын хоёрдугаар арав хоногийн байдлыг ерөнхийд нь дүгнэвэл манай орны ихэнх гол, мөрний усны түвшин аажим буурсан хандлагатай байна гэж УЦУОХ, Ус судлалын сектороос мэдээлэв.

Categories
мэдээ нийгэм

Өнөө шөнө хөрсөн дээр цочир хүйтэрнэ

Өнөө шөнө Хөвсгөл, Булган, Сэлэнгэ, Төв аймгийн газар тариалангийн бүс нутгаар хөрсөн дээр 0-2 градус хүрч цочир хүйтрэнэ. 

Малчид, тариаланчдад зориулсан мэдээ.

Ойрын хоногуудад ихэнх нутгаар өдөртөө дулаарна.

2014 оны 8 дугаар сарын 24-ний 20 цагаас 2014 оны 8 дугаар сарын 25-ны 20 цаг хүртэлх цаг агаарын урьдчилсан мэдээ:

БАРУУН АЙМГУУДЫН НУТГААР: Солигдмол үүлтэй. Шөнөдөө бороо орохгүй. Өдөртөө нутгийн хойд хэсгээр түр зуурын бороо орно. Дуу цахилгаантай. Салхи баруун өмнөөс секундэд 7-12 метр. Алтай, Хангайн уулархаг нутгаар шөнөдөө 1-6 градус, өдөртөө 17-22 градус, Их нууруудын хотгор, Алтайн өвөр говиор шөнөдөө 10-15 градус, өдөртөө 24-29 градус, бусад нутгаар шөнөдөө 6-11 градус, өдөртөө 20-25 градус дулаан байна.

ТӨВИЙН АЙМГУУДЫН НУТГААР: Үүлшинэ. Шөнөдөө бороо орохгүй. Өдөртөө зарим газраар түр зуурын бороо орно. Дуу цахилгаантай. Салхи зүүн хойноос секундэд 5-10 метр. Хангай, Хөвсгөл, Хэнтийн уулархаг нутгаар шөнөдөө 1-6 градус, өдөртөө 16-21 градус, бусад нутгаар шөнөдөө 5-10 градус, өдөртөө 19-24 градус дулаан байна.

ЗҮҮН АЙМГУУДЫН НУТГААР: Солигдмол үүлтэй. Нутгийн хойд хэсгээр түр зуурын бороо орно. Дуу цахилгаантай. Салхи борооны өмнө түр зуур ширүүснэ. Шөнөдөө 6-11 градус, өдөртөө 21-26 градус дулаан байна.

ОТРЫН НУТАГ ХЭРЛЭНБАЯН-УЛААН ОРЧМООР: Үүлшинэ. Бороо орохгүй. Салхи баруун хойноос секундэд 4-9 метр. Шөнөдөө 5-7 градус, өдөртөө 23-25 градус дулаан байна.

ГОВИЙН АЙМГУУДЫН НУТГААР: Багавтар үүлтэй. Бороо орохгүй. Салхи баруун өмнөөс секундэд 7-12 метр. Шөнөдөө Өмнөговийн нутгаар 13-18 градус, бусад нутгаар 10-15 градус, өдөртөө бүх нутгаар 25-30 градус дулаан байна.

УЛААНБААТАР ХОТ: Үүлшинэ. Бороо орохгүй. Салхи зүүн хойноос секундэд 5-10 метр. Шөнөдөө 7-9 градус, өдөртөө 22-24 градус дулаан байна.

2014 оны 8 дугаар сарын 26-наас 2014 оны 8 дугаар сарын 30-ныг хүртэлх цаг агаарын урьдчилсан төлөв:

26-нд баруун зүгийн нутгийн зүүн хэсэг, төвийн нутгийн зарим газраар, 27-нд зарим газраар, 28-нд баруун зүгийн нутаг, төвийн нутгийн баруун хэсгээр, 29-нд төв, говь болон зүүн зүгийн ихэнх нутгаар түр зуурын бороо орно. Дуу цахилгаантай. Салхи 26-нд зарим газраар секундэд 12-14 метр, 27-28-нд баруун зүгийн нутгаар, 29-нд ихэнх нутгаар секундэд 18-20 метр хүрч ширүүснэ. Алтай, Хангай, Хөвсгөл, Хэнтийн уулархаг нутгаар шөнөдөө 3-8 градус, өдөртөө 17-22 градус, говийн бүс нутгаар шөнөдөө 12-17 градус, өдөртөө 27-32 градус, бусад нутгаар шөнөдөө 7-12 градус, өдөртөө 21-26 градус дулаан байна. Хугацааны эцсээр нутгийн баруун хэсгээр сэрүүснэ гэж Ус цаг уурын орчны хүрээлэнгээс мэдээлж байна.