Month: August 2014

Эрхэм Ерөнхийлөгч таны энэ өдрийн мэндийг айлтган миний бие танд хоёр дахь удаагааил захидал илгээж байна. Таныг цаг зав гарган уншиж танилцана гэдэгт гүнээ итгэж байна.

Миний нөхөр Д.Цогтбаатар өргөсөн тангарагтаа үнэнч, төрийн төлөө хоёргүй сэтгэлээр зүтгэн ТЕГ-т  16 жил ажиллахдаа хоёр ч удаа Сөрөх тагнуулын газрын даргаар томилогдож байсан. Миний нөхрийг анх 2013 оны 2 сараас эхлэн хэвлэл мэдээллийн хэрэгслээр огт ор үндэслэлгүй гүтгэсэн мэдээллүүдийг цацаж байгаад улмаар 2013 оны 6 сараас эхлэн зохиомол хэргээр цагдан хорьсон.

Хоёр сар гаруй хоригдоод суллагдсан учраас бүх асуудал шийдэгдэж дууссан гэж бодож байтал шоронгоос суллагдсан өдрөөс нь эхлэн хэвлэл мэдээллийн хэрэгслээр зохион байгуулалттайгаар өмнөхийн адилаар гүтгэсэн мэдээллүүд гаргаж эхэлсэн. Ингэж байгаад 2014 оны 4 сарын 4-ний өдөр гэнэт АТГ-аас баривчлан Төв аймгийн хориход бүтэн гурван сар цагдан хорьсон.

Хоригдсоноосоо хойш нөхрийн маань бие эрс муудаж, эмчийн дүгнэлтээр хаван тулсан, бөөрний архаг үрэвсэлтэй, зүрхний хэм алдагдсан, шулуун гэдэсний цус алдалттай зэрэг өвчнүүдийн оноштойгоор Төв аймгийн хорихоос 461 дүгээр хорих ангийн эмнэлэгт шилжиж ирсэн ч бие нь дээрдэхгүй байгаа билээ.

Эмч нарын дүгнэлтээр яаралтай мэс засалд орох шаардлагатай гэсэн онош тавигдсан учраас миний зүгээс нөхрийгөө заавал цагдан хорихгүйгээр батлан даалтад гаргаж авах хүсэлтээ Ерөнхий прокурорын нэр дээр гурван удаа, Нийслэлийн прокурорт зургаан удаа гаргасан юм.

Мөн өмгөөлөгч нь батлан даалтад гаргах хүсэлтээ олон удаа гаргаж байсан боловч “Гэмт хэрэг дахин үйлдэхээс сэргийлэх, оргон зайлж болзошгүй гэсэн үндэслэлээр хорьж байгаа” гэсэн хариуг өгсөн. Миний нөхөр хууль эрх зүйн өндөр мэдлэгтэй, оршин суух тодорхой хаягтай, ТЕГ- т харьяалагддаг, гадаад паспорт нь энэ байгуулагадаа хадгалагдаж байдаг.

Ийм байхад заавал шоронд хорьж, олон янзын хэрэг тулгаж,зөвхөн оргон зайлж гэмт хэрэг дахин үйлдэхмагадлалтай гэсэн хуулийн заалтаар өнөөдрийг хүртэл хориод байгаад гомдолтой байна. Энэ нь зохион байгуулалттайгаар нөхрийг маань ямар нэгэн байдлаар яллах гээд байна уу гэсэн хардлага төрүүлж байгаа юм” хэмээн тайлбарлаж байна.

Нөхрийг маань гэм буруутай гэж шүүх тогтоогоогүй байхад хэвлэл мэдээллийн хэрэгслээр удаа дараа гэмт хэрэгтэн мэтээр мэдээлж, нэр төрийг нь гутаан доромжлоод зогсохгүй “Цогтбаатар амьд явах эрхгүй, өс хонзонгоо авч байхад битгий саад бол” гэж хэлсэн нөлөө бүхий хүний ажилладаг АТГ нөхрийн маань хэргийг шалгаад байгаа нь ашиг сонирхлын зөрчилтэйг харуулж байна.

Д.Цогтбаатарт холбогдох хэрэг гэгчийг шуурхай шалгаж, шийдвэрлэж өгөхийг Цогтбаатарын өмгөөлөгч болон миний бие 2013 оны 6 сараас хойш өнөөг хүртэл хугацаанд мөрддөг, хянадаг, хорих зөвшөөрөл өгдөг шат шатны эрх бүхий албан тушаалтнуудаас эхлээд УИХ-ын Тусгай хяналтын дэд хороо, Улсын ерөнхий прокурор, түүнчлэн Үндэсний аюулгүй байдлын зөвлөл, Хүний эрхийн үндэсний комисст олон удаа гомдол, хүсэлт, захидал илгээсэн боловч анхаарч үзэж байгаа байгууллага, албан тушаалтан алга байна. Одоо би хаана, хэнд хандах ёстой вэ, эрхэм Ерөнхийлөгч өө. Миний нөхөр шоронгоос Ерөнхийлөгч танд үнэн байдлаа илтгэсэн захидал нийт таван удаа илгээсэн гэсэн. Танд хүрдэг эсэх нь эргэлзээтэй юм.

Монгол Улсын Үндсэн хуульд заасан амьд явах эрх, хүний эрх, эрх чөлөө манай гэр бүлд ноцтойгоор зөрчигдөж, эрх мэдэлтэй хүний хувийн өс хонзонгийн золиос болоод байхад XXI зууны Ардчилсан Монгол, Ардчилсан засгийн газар огт анхаарахгүй байгаад би хувьдаа маш их эмзэглэж байна. Манай улсад одоо яг тэртээх 37 оны хэлмэгдүүлэлт биетээрээ болж, жирийн нэг айлын тайван амьдрал сүйрч, төрийн төлөө хоёргүй сэтгэлээр зүтгэж буй хүмүүсийн итгэл алдарч, шүүх прокурор нь хараат байдалд ажиллаж байгааг яагаад төр засаг нүд чихгүй мэт анзаарахгүй байна вэ?

Энэ бүхэнд Монгол Улсын ардчилсан Ерөнхийлөгч та төрийн тэргүүн, хань нөхөр, эцэг хүнийхээ хувьд цаг зав гарган анхаарлаа хандуулж өгөөч ээ хэмээн хүчин мөхөдсөн эмэгтэй хүний хувиас чин сэтгэлээсээ хүсч байна.

Ажил үүргээ үнэнч шударгаар гүйцэтгэж явахад нь хүнийг хэвлэл мэдээллээр хэн ч биш болгон зохиомол хэргээр гүтгэн доромжлоод, мөрдөж мөшгиж цагдан хорьж, сэтгэл санаа, эрүүл мэндээр хохироодог ийм байдлаахэзээ зогсоох юм бол.

Дашрамд хэлэхэд, миний өвөө болон аав маань хууль хүчний байгууллагад нэг насныхаа амьдралыг нэр төртэй холбосон хүмүүс байсан. Миний нөхөр ч гэсэн Монгол Улсын хууль тогтоомжийг зөрчилгүй, хуулийн хүрээнд ажил үүргээ нэр төртэй гүйцэтгэж байсан гэдэгт ханийн хувьд би итгэлтэй байна.

Эрхэм Ерөнхийлөгч таныг хүндэтгэсэн иргэн Ч.Мандах

Улаанбаатар хотын Олон улсын шинэ нисэх буудал барих ажлын гүйцэтгэл 17.3 хувьд хүрч өнөөдрийн байдлаар төлөвлөгөөгөө нэг хувиар давуулан биелүүлээд байгаа аж. Өнгөрөгч бямба гарагт ИНЕГ-ын даргын үүргийг түр орлон гүйцэтгэгч Т.Лхагвасүрэн тус төслийн ажлын явцтай танилцах үеэр төслийн захирал Н.Энхбат оны төгсгөл гэхэд гүйцэтгэлийг 26.9 хувьд хүргэх төлөвлөгөөтэй ажиллаж байгаагаа хэлсэн юм.

Төслийн бүтээн байгуулалтын хувьд Зорчигч үйлчилгээний барилга, нислэг хөдөлгөөний удирдлагын цамхаг, түүний дэд өртөө, Үндсэн дэд өртөө, Гал унтраах, авран хамгаалах албаны барилга, Ус цэвэршүүлэх байгууламжийн төмөр бетоны ажил, инженерийн шугам сүлжээний ажлууд хийгдэж байна. Мөн Зорчигч үйлчилгээний барилгын нисэх буудлын харилцаа холбоо, аюулгүй байдал, хамгаалалтын системийн кабелийн сувагчлалын ажил, нисэх буудлын тусгай тоног төхөөрөмжийг суурилуулах ажлууд ид өрнөж байна. Зорчигч үйлчилгээний барилгын ган хийцийн ажлыг наймдугаар сарын эхээр эхлүүлсэн ба тус барилгад холбогдох гүүрэн байгууламжийн суурийн багануудыг цутгах, агаарын навигацийн гэрэл суултын системийг суурилуулах, хөөрч буух зурвасын инженерийн шугам сүлжээний хонгил цутгах ажлыг гүйцэжтгэж байгаагаа төслийнхөн ИНЕГ-ын удирдлагад танилцууллаа

Хөөрч буух зурвасын бетон хучилтын ажлыг өнгөрсөн зургадугаар сарын 25-наас эхлүүлсэн ба төлөвлөгөөний дагуу энэ ажил 2015 онд дуусах аж. Манай улсын Засгийн газраас төслийг хэрэгжүүлэхэд онцгой анхаарч шинэ нисэх буудлын дэд бүтэц болох холбоо мэдээллийн шилэн кабель, цахилгаан эрчим хүчээр хангах 110 кв-ын цахилгаан дамжуулах шугамуудыг ашиглалтад бүрэн оруулж, одоо 9,4 км урт үерийн усны хамгаалалтын далангийн барилгын ажил хийгдэж байна. Мөн нисэх буудад холбогдох хурдны авто зам, Захиргааны барилга, Аэродромын үйлчилгээний барилга болон Ачаа шуудан тээврийн барилгуудыг манай улсын Засгийн газрын санхүүжилтээр барих бөгөөд гүйцэтгэгчийг сонгон шалгаруулахаар ажиллаж байгаа ажээ. Төслийн бүтээн байгуулалтад өдөрт 1300 гаруй хүн, 150 гаруй машин техник ажиллаж байна. Гадаад дотоодын нийт 40 гаруй туслан гүйцэтгэгч компани ажиллаж байгаа ажээ.

Ардчилсан намын Хэрэг эрхлэх газраас намынхаа анхан шатны гишүүдэд зориулан “Сумын чуулган” сургалт хэлэлцүүлгийг нийт 21 аймгийн 331 сум, 9 дүүргийн хэмжээнд зохион байгуулж байгаа аж. Одоогоор 11 аймгийн 172 сумын анхан шатны 4000 орчим гишүүнд энэхүү сургалт, хэлэлцүүлэг зохион байгуулсан байна.

Энэ сарын 22-ны өдөр Багануур дүүрэгт АН-ын Нарийн бичгийн дарга Э.Батсууриар ахлуулсан баг тус дүүргийн 100 гаруй гишүүдэд дээрх сургалтыг зохион байгуулсан аж.  Сургалтанд багаар хамтран ажиллах, багийн дотор ямар байр суурь эзлэх, тэдгээрийг танин мэдэхээс гадна Ардчилсан намын түүх, эв нэгдлийн талаарх сургалтууд зохион байгуулагдсан нь ихээхэн ач холбогдолтой болсон хэмээн гишүүд хэлж байв. Мөн Багануур дүүргийн намын гишүүдийн санал бодлыг сонсож, тулгамдаж буй асуудлын талаар хэлэлцүүлэг өрнүүлжээ.

Тухайлбал, хотын ачааллыг сааруулах хамгийн чухал зүйл бол алслагдсан дүүргүүдийн хөгжил юм. Багануур дүүрэг нь хэдий алслагдсан дүүрэг боловч сүүлийн жилүүдэд хүн ам эрчимтэйгээр төвлөрч, оюунлаг, шинжлэх ухааны хот болохоор зорьж байгаа аж. Үүний тулд Аюулгүй эрүүл ногоон хот, Амьдрах таатай орчин бүрдүүлсэн хот, Сайн засаглал, эрх зүйн орчин бүрдсэн хот, Эрчимтэй технологи хөгжлийн дагуул хот, Жуулчдын сонирхол татсан Азийн аялал жуулчлалын төв хот, Дэлхийн хөгжингүй орнуудын нийслэлийн түвшинд хүрсэн төв хот болох үндсэн зорилтуудыг тавьжээ. Дээрх томоохон зорилтуудын суурь тавигдаж эхэлсэн гэдгийг Багануур дүүргийн Засаг дарга Б.Бямбадорж танилцуулсан байна. Тэрбээр хэлэхдээ Үйлдвэр технологийн паркийн техник эдийн засгийн үзүүлэлт хийгдсэнээс гадна оюутны хотхоны асуудал эрчимтэй явагдаж, амжилттай үргэлжилж байгаа. Мөн дүүргийн 2030 он хүртэлх хөгжлийн ерөнхий төлөвлөгөө энэ сард батлагдахаар болсныг дуулгалаа.

Төв аймгийн Засаг даргын тамгын газар Хакүхо М.Даваажаргалтай хамтран япон цагаан будааг Монголд тарих төслийг хэрэгжүүлж эхэлжээ. Тэгвэл энэ хөтөлбөрийн хүрээнд Угтаалцайдам сумын хоёр мэргэжилтнийг Япон улсад сургалтад хамруулахаар илгээжээ. Зургаан сарын хугацаанд бэлтгэгдэх учиртай мэргэжилтнүүд ирэх аравдугаар сард эх нутагтаа ирэх юм байна.

Төв аймгийн Угтаалцайдам, Жаргалант суманд ирэх жил цагаан будаа тарихаар төлөвлөжээ. Цагаан будаа ус, чийг их шаардаж, халуун, дулаан орчинд ургадаг учир эхний ээлжинд 0.5 га талбай бүхий хүлэмжид тарихаар зэхэж буйгаа Төв аймгийн Үйлдвэр, хөдөө аж ахуйн газрын дарга Л.Даваасүрэн ярьжээ.

  Нийслэлийн Тээврийн газраас “Нийтийн тээврийн сүлжээ-үйлчилгээний шинэчилсэн төлөвлөлтийн туршилтын ажил”-ын хүрээнд өдрийн турш 500 төгрөгийн үнэтэй тасалбараар үйлчлүүлэх шинэ үйлчилгээг нэвтрүүлэн ажиллаж байна. Нийтийн тээврийн автобусуудыг богино эргүүлж, өдрийн 500 төгрөгийн тасалбараар хэдэн ч удаа сэлгэн суух боломжтой туршилтын ажил энэ 31-ний өдрийг хүртэл хэрэгжинэ. 500 төгрөгийн тасалбарыг хуурамчаар хийсэн гэх мэдээлэл Тээврийн газарт иржээ. Нийслэлийн Тээврийн газраас  “Иргэд нийтийн тээврээр  үйлчлүүлэх тасалбараа тухай өдөртөө л тасалбар борлуулагчаар дамжуулан худалдан авах боломжтой. Тасалбарыг урьдчилан буюу өмнөх өдөр нь худалдаалахгүй тул иргэд хуурамч тасалбар худалдан авахаас сэргийлэхийг сануулж байна” гэлээ. Өдөр бүр өөр өөр өнгөтэй гарч буй 500 төгрөгийн тасалбар зөвхөн тухайн өдрөө л борлуулагдах аж..

Саяхан нээлтээ хийсэн “Инженер технологийн дээд боловсрол” төслийн хүрээнд Монгол улсаас 1005 хүнийг Токиогийн их сургуульд сургахаар болжээ.

2013 онд хийсэн судалгаагаар Токиогийн их сургуулийн инженерийн хөтөлбөр дэлхийн шилдэг их сургууль MIT-тэй эн зэрэгцэж байжээ. Тийм хэдий ч сургалтын төлбөрийн хувьд MIT их сургуулиас 8,4 дахин бага байдаг аж.  MIT-ийн жилийн төлбөр 43,498 доллар байгаа бол Токиогийн их сургуульд монгол залуус нэг жилд 5,164 ам.доллараар суралцах гэнэ. 

  Гадаадын хөрөнгө оруулалтай “Саусгоби сэндс” ХХК-ийг 2007-2011 онуудад онц их хэмжээний татвар төлөхөөс зайлхийсэн учир хэрэгт татан шалгаж эхэлсэн билээ. Тус компанийн гүйцэтгэх захирал асан АНУ-ийн иргэн Жастин Кабла, санхүүгийн ерөнхий менежер асан Филиппин улсын иргэн Кристобол Давид мөн Хиларион В.Кажуком иргэдэд холбогдох хэргийг татвараас зайлхийсэн хэргээр буруутгаж байгаа юм. Тэдэнд холбогдох шүүх хурал өнөөдөр Дүүргийн эрүүгийн хэргийн хоёрдугаар шүүхэд болно. Тэднийг Эрүүгийн хуулийн тусгай ангийн 166.2-т зааснаар буруутган шүүх юм байна.