Иргэн Г-ээс 150 сая төгрөг залилж, улмаар айлган сүрдүүлсэн “Гандан бороо” хочтой Б-г өчигдөр гэрээс нь баривчиллаа. Өчигдөр буюу 10 дугаар сарын 23-ны өдөр 18:00 цагийн орчимд БГД-т байрлах гэртээ мансуурсан байдалтай байхад нь цагдаа нар баривчилжээ.
Тодруулбал, Эрүүгийн цагдаагийн газрын 4-р хэлтээс болон Тусгай ажиллагааны газрын алба хаагчид эрэн сурвалжлах ажиллагааг зогсоосон юм.
Монгол Улсын Эрүүгийн хуулийн 148.3 заасан гэмт хэрэгт сэжигтнээр эрэн сурвалжлагдаж байсан 50 настай эрэгтэй “Гандан бороо” хочтой Б-ийн гэрт нь хийсэн үзлэгээр Метафитамин төрлийн мансууруулах бодис илэрсэн байна. Тиймээс сэжигтэнд холбогдох эрүүгийн хуулийн 148.3-т заасан хэрэг дээр нэмж Монгол улсын эрүүгийн хуулийн 192 дугаар зүйлд зааснаар хэрэг үүсгэн, хоёр хэргийг нэгтгэн шалгаж эхэлжээ.
“Гандан бороо” хочтой Б нь иргэн Г-с 150 орчим сая төгрөгийн эд зүйлийг зээлээр авч улмаар зээлийн хугацаа дууссан боловч мөнгийг нь өгөлгүй айлган сүрдүүлсэн, заналхийлжээ. Улмаар хохирогч Г цагдаагийн байгууллагад гомдол гаргаж, хэргийг Сүхбаатар дүүргийн цагдаагийн нэгдүгээр хэлтэст Эрүүгийн хуулийн 148.3 зааснаар хэрэг үүсгэн шалгаж байсан ажээ. Иймд дээрх этгээдэд залилуулсан болон хохирсон иргэд байвал Эрүүгийн цагдаагийн газарт хандахыг цагдаагийн байгууллагаас дамжууллаа.