Нийслэлийн Баянзүрх дүүрэгт байрладаг орон сууцны 13 давхраас дөрөвдүгээр сарын 9-нөөс 10-ныг шилжих шөнө 22 настай Ц гэгч эмэгтэй унаж амиа алдсан харамсалтай хэрэг гарчээ. Оршин суугчдын хэлж буйгаар талийгаач Ц нь өөрийн найз залуу болох 25 настай, Б гэгчтэй тус байранд хамтран амьдардаг байсан ба хэрэг гарсан өдөр хоорондоо маргалдаж байхыг байрны хүмүүс харсан гэв. Өөр нэгэн эх сурвалж талийгаачийн найз залуу Б тухайн өдөр Ц-г бусадтай хардаж, ширүүн авирлан, улмаар 13 давхрын цонхоор түлхэж, амь насыг нь хохироосон байж болзошгүй гэж мэдээллээ.
Дээрх хэргийг одоогоор тус дүүргийн цагдаагийн нэгдүгээр хэлтэс шалгаж байна. Шалгалтын явцад талийгаачийн найз залуу гэх 25 настай Б нь тухайн өдөр согтууруулах ундааны зүйл хэрэглэсэн байсан нь урьдчилсан байдлаар тогтоогджээ. Харин талийгаачийн ар гэрийнхний зүгээс түүнийг амиа хорлох хэмжээний сэтгэл зүйтэй хүн байгаагүй гэсэн байр суурийг илэрхийлж хэргийг үнэн зөвөөр шийдүүлэх хүсэлтэй байгаа аж.