“Эрдэнэс Тавантолгой” компанийн хувьцаа эзэмшигчид ногдол ашиг хүртэх эрхтэй болов. Тус компани 2019 оны цэвэр ашгаасаа ногдол ашиг тараахаар болжээ. Нэгж хувьцаанд 90 төгрөг, нийт 1072 ширхэг хувьцаатай иргэнд 96480 төгрөг олгохоор шийдвэрлэсэн байна. “Эрдэнэс Тавантолгой” компанийн ТУЗ-ийн хурлаар дээрх шийдвэрийг гаргажээ.
“Эрдэнэс Тавантолгой” компанийн гүйцэтгэх захирал Б.Ганхуяг: “Эрдэнэс Тавантолгой” компани иргэддээ ногдол ашиг олгохоор боллоо. 2016 он хүртэл компани алдагдалтай ажиллаж байсан. Хоёр сая 511 мянган хувьцаа эзэмшигчдэд ногдол ашиг олгоно.
1072 хувьцаатай нэг сая 80 мянган иргэн байна. 700 хувьцаатай иргэд 63 мянган төгрөгийн ногдол ашиг авна. Эхлээд хувьцаа эзэмшигчидээ бүртгэнэ. Ногдол ашгийг 2020 ондоо багтаан олгоно. Ирэх тавдугаар сараас ногдол ашгаа олгоэ эхэлнэ. Дөрөвдүгээр сарын 17 хүртэл иргэдээ бүртгэх ба онлайнаар бүх бүртгэл явагдана гэлээ.
Сэтгүүлчдийн асуултад хариулав.
-Яагаад ашгаа хөрөнгө оруулалтад зарцуулахгүй талхны мөнгөнд явуулж байна вэ?
УУХҮ-ийн сайд Д.Сумъяабазар:
-Хөрөнгө оруулалтын ажлаа ч хийж байна. Компанийн ногдол ашгаа ч хуваарилж байна. Иргэн хүндээ хөрөнгө оруулалт хэлбэрээр очиж байна.
“Эрдэнэс Тавантолгой” компанийн гүйцэтгэх захирал Б.Ганхуяг:
-Энэ шийдвэр мөнгө тарааж байгаа биш. Ногдол ашиг олгож байна. Ашгийн дараах үр ашиг гэж ойлгохыг хүсч байна.